| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
6. නාවාලග්‌ගනකඞ්‌ගපඤ්‌හො
6. Nāvālagganakaṅgapañho
6. ‘‘භන්‌තෙ නාගසෙන, ‘නාවාලග්‌ගනකස්‌ස ද්‌වෙ අඞ්‌ගානි ගහෙතබ්‌බානී’ති යං වදෙසි, කතමානි තානි ද්‌වෙ අඞ්‌ගානි ගහෙතබ්‌බානී’’ති? ‘‘යථා, මහාරාජ, නාවාලග්‌ගනකං බහුඌමිජාලාකුලවික්‌ඛොභිතසලිලතලෙ මහතිමහාසමුද්‌දෙ නාවං ලග්‌ගෙති ඨපෙති, න දෙති දිසාවිදිසං හරිතුං, එවමෙව ඛො, මහාරාජ, යොගිනා යොගාවචරෙන රාගදොසමොහූමිජාලෙ මහතිමහාවිතක්‌කසම්‌පහාරෙ චිත්‌තං ලග්‌ගෙතබ්‌බං, න දාතබ්‌බං දිසාවිදිසං හරිතුං. ඉදං, මහාරාජ, නාවාලග්‌ගනකස්‌ස පඨමං අඞ්‌ගං ගහෙතබ්‌බං.
6. ‘‘Bhante nāgasena, ‘nāvālagganakassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, nāvālagganakaṃ bahuūmijālākulavikkhobhitasalilatale mahatimahāsamudde nāvaṃ laggeti ṭhapeti, na deti disāvidisaṃ harituṃ, evameva kho, mahārāja, yoginā yogāvacarena rāgadosamohūmijāle mahatimahāvitakkasampahāre cittaṃ laggetabbaṃ, na dātabbaṃ disāvidisaṃ harituṃ. Idaṃ, mahārāja, nāvālagganakassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, නාවාලග්‌ගනකං න ප්‌ලවති 1 විසීදති, හත්‌ථසතෙපි උදකෙ නාවං ලග්‌ගෙති ඨානමුපනෙති, එවමෙව ඛො, මහාරාජ, යොගිනා යොගාවචරෙන ලාභයසසක්‌කාරමානනවන්‌දනපූජනඅපචිතීසු ලාභග්‌ගයසග්‌ගෙපි න ප්‌ලවිතබ්‌බං, සරීරයාපනමත්‌තකෙ යෙව චිත්‌තං ඨපෙතබ්‌බං. ඉදං, මහාරාජ, නාවාලග්‌ගනකස්‌ස දුතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන සාරිපුත්‌තෙන ධම්‌මසෙනාපතිනා –
‘‘Puna caparaṃ, mahārāja, nāvālagganakaṃ na plavati 2 visīdati, hatthasatepi udake nāvaṃ laggeti ṭhānamupaneti, evameva kho, mahārāja, yoginā yogāvacarena lābhayasasakkāramānanavandanapūjanaapacitīsu lābhaggayasaggepi na plavitabbaṃ, sarīrayāpanamattake yeva cittaṃ ṭhapetabbaṃ. Idaṃ, mahārāja, nāvālagganakassa dutiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘යථා සමුද්‌දෙ ලග්‌ගනකං, න ප්‌ලවති විසීදති;
‘‘‘Yathā samudde lagganakaṃ, na plavati visīdati;
තථෙව ලාභසක්‌කාරෙ, මා ප්‌ලවථ විසීදථා’’’ති.
Tatheva lābhasakkāre, mā plavatha visīdathā’’’ti.
නාවාලග්‌ගනකඞ්‌ගපඤ්‌හො ඡට්‌ඨො.
Nāvālagganakaṅgapañho chaṭṭho.
Footnotes:
