| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༦. ནཱཝཱལགྒནཀངྒཔཉྷོ
6. Nāvālagganakaṅgapañho
༦. ‘‘བྷནྟེ ནཱགསེན, ‘ནཱཝཱལགྒནཀསྶ དྭེ ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི དྭེ ཨངྒཱནི གཧེཏབྦཱནཱི’’ཏི? ‘‘ཡཐཱ, མཧཱརཱཛ, ནཱཝཱལགྒནཀཾ བཧུཨཱུམིཛཱལཱཀུལཝིཀྑོབྷིཏསལིལཏལེ མཧཏིམཧཱསམུདྡེ ནཱཝཾ ལགྒེཏི ཋཔེཏི, ན དེཏི དིསཱཝིདིསཾ ཧརིཏུཾ, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན རཱགདོསམོཧཱུམིཛཱལེ མཧཏིམཧཱཝིཏཀྐསམྤཧཱརེ ཙིཏྟཾ ལགྒེཏབྦཾ, ན དཱཏབྦཾ དིསཱཝིདིསཾ ཧརིཏུཾ། ཨིདཾ, མཧཱརཱཛ, ནཱཝཱལགྒནཀསྶ པཋམཾ ཨངྒཾ གཧེཏབྦཾ།
6. ‘‘Bhante nāgasena, ‘nāvālagganakassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, nāvālagganakaṃ bahuūmijālākulavikkhobhitasalilatale mahatimahāsamudde nāvaṃ laggeti ṭhapeti, na deti disāvidisaṃ harituṃ, evameva kho, mahārāja, yoginā yogāvacarena rāgadosamohūmijāle mahatimahāvitakkasampahāre cittaṃ laggetabbaṃ, na dātabbaṃ disāvidisaṃ harituṃ. Idaṃ, mahārāja, nāvālagganakassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ནཱཝཱལགྒནཀཾ ན པླཝཏི 1 ཝིསཱིདཏི, ཧཏྠསཏེཔི ཨུདཀེ ནཱཝཾ ལགྒེཏི ཋཱནམུཔནེཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ལཱབྷཡསསཀྐཱརམཱནནཝནྡནཔཱུཛནཨཔཙིཏཱིསུ ལཱབྷགྒཡསགྒེཔི ན པླཝིཏབྦཾ, སརཱིརཡཱཔནམཏྟཀེ ཡེཝ ཙིཏྟཾ ཋཔེཏབྦཾ། ཨིདཾ, མཧཱརཱཛ, ནཱཝཱལགྒནཀསྶ དུཏིཡཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, ཐེརེན སཱརིཔུཏྟེན དྷམྨསེནཱཔཏིནཱ –
‘‘Puna caparaṃ, mahārāja, nāvālagganakaṃ na plavati 2 visīdati, hatthasatepi udake nāvaṃ laggeti ṭhānamupaneti, evameva kho, mahārāja, yoginā yogāvacarena lābhayasasakkāramānanavandanapūjanaapacitīsu lābhaggayasaggepi na plavitabbaṃ, sarīrayāpanamattake yeva cittaṃ ṭhapetabbaṃ. Idaṃ, mahārāja, nāvālagganakassa dutiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘ཡཐཱ སམུདྡེ ལགྒནཀཾ, ན པླཝཏི ཝིསཱིདཏི།
‘‘‘Yathā samudde lagganakaṃ, na plavati visīdati;
ཏཐེཝ ལཱབྷསཀྐཱརེ, མཱ པླཝཐ ཝིསཱིདཐཱ’’’ཏི༎
Tatheva lābhasakkāre, mā plavatha visīdathā’’’ti.
ནཱཝཱལགྒནཀངྒཔཉྷོ ཚཊྛོ།
Nāvālagganakaṅgapañho chaṭṭho.
Footnotes:
