| Library / Tipiṭaka / திபிடக • Tipiṭaka / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā |
நவமசித்தவண்ணனா
Navamacittavaṇṇanā
413. விஸப்பனஅனிட்ட²ரூபஸமுட்டா²னவஸேன அத்தனோ பவத்திஆகாரவஸேன ச விஸப்பனரஸோ. தோ³ஸோ உபயோக³ப²லேஸு அனிட்ட²த்தா விஸஸங்ஸட்ட²பூதிமுத்தங் விய த³ட்ட²ப்³போ³. அனபி⁴ரதிரஸாதி ஏவங்பகாரேஸு படிக்கே²பேன ரஸவசனேஸு தங்தங்படிபக்க²கிச்சக³ஹணங் த³ட்ட²ப்³ப³ங். கடுகாகாரக³தி கடுகஞ்சுகதா, அத்தஸம்பத்தி ஆவாஸாதி³, பராயத்ததாய தா³ஸப்³யங் விய த³ட்ட²ப்³ப³ங். யதா² ஹி தா³ஸப்³யே ஸதி தா³ஸோ பராயத்தோ ஹோதி, ஏவங் குக்குச்சே ஸதி தங்ஸமங்கீ³. ந ஹி ஸோ அத்தனோ த⁴ம்மதாய பவத்திதுங் ஸக்கோதி குஸலேதி. அத² வா கதாகதாகுஸலகுஸலானுஸோசனே ஆயத்ததாய தது³ப⁴யவஸேன குக்குச்சேன தங்ஸமங்கீ³ ஹோதீதி தா³ஸப்³யங் விய தங் ஹோதி.
413. Visappanaaniṭṭharūpasamuṭṭhānavasena attano pavattiākāravasena ca visappanaraso. Doso upayogaphalesu aniṭṭhattā visasaṃsaṭṭhapūtimuttaṃ viya daṭṭhabbo. Anabhiratirasāti evaṃpakāresu paṭikkhepena rasavacanesu taṃtaṃpaṭipakkhakiccagahaṇaṃ daṭṭhabbaṃ. Kaṭukākāragati kaṭukañcukatā, attasampatti āvāsādi, parāyattatāya dāsabyaṃ viya daṭṭhabbaṃ. Yathā hi dāsabye sati dāso parāyatto hoti, evaṃ kukkucce sati taṃsamaṅgī. Na hi so attano dhammatāya pavattituṃ sakkoti kusaleti. Atha vā katākatākusalakusalānusocane āyattatāya tadubhayavasena kukkuccena taṃsamaṅgī hotīti dāsabyaṃ viya taṃ hoti.
418. விருத்³தா⁴காரோதி விருத்³த⁴ஸ்ஸ புக்³க³லஸ்ஸ, சித்தஸ்ஸ வா ஆகாரோ விருத்³த⁴பா⁴வோ. தேன விருஜ்ஜ²னங் விரோதோ⁴தி த³ஸ்ஸேதி. வசனந்தி ஏதங் நித³ஸ்ஸனமத்தங் த³ட்ட²ப்³ப³ங். ஸப்³ப³மேவ ஹி கிச்சங் ஏதேன கரியமானங் ஸுரோபிதங் ஸுஜனிதங் ந ஹோதீதி. ரோபஸத்³த³வசனத்த²மேவ கேசி வண்ணெந்தி. தங் அப்பமாணந்தி கோத⁴ஸ்ஸ ததா²பவத்தனஸபா⁴வாபா⁴வா அஞ்ஞேன கேனசி காரணேன பரிபுண்ணதா ஸியாதி ஸந்தா⁴ய வுத்தங்.
418. Viruddhākāroti viruddhassa puggalassa, cittassa vā ākāro viruddhabhāvo. Tena virujjhanaṃ virodhoti dasseti. Vacananti etaṃ nidassanamattaṃ daṭṭhabbaṃ. Sabbameva hi kiccaṃ etena kariyamānaṃ suropitaṃ sujanitaṃ na hotīti. Ropasaddavacanatthameva keci vaṇṇenti. Taṃ appamāṇanti kodhassa tathāpavattanasabhāvābhāvā aññena kenaci kāraṇena paripuṇṇatā siyāti sandhāya vuttaṃ.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / த்³வாத³ஸ அகுஸலானி • Dvādasa akusalāni
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā / நவமசித்தங் • Navamacittaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / நவமசித்தவண்ணனா • Navamacittavaṇṇanā
