| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৯. নৰমনযো সম্পযুত্তেনসম্পযুত্তপদৰণ্ণনা
9. Navamanayo sampayuttenasampayuttapadavaṇṇanā
৩১৯. ইদানি সম্পযুত্তেনসম্পযুত্তপদং ভাজেতুং ৰেদনাক্খন্ধেনাতিআদি আরদ্ধং। তত্থ যং খন্ধাদিৰসেন সম্পযুত্তং, পুন তস্সেৰ খন্ধাদীহি সম্পযোগং পুচ্ছিত্ৰা ৰিস্সজ্জনং কতং। তং রূপেন ৰা রূপমিস্সকেহি ৰা সব্বরূপক্খন্ধসঙ্গাহকেহি ৰা পদেহি সদ্ধিং ন যুজ্জতি। রূপেন হি রূপমিস্সকেন ৰা অঞ্ঞেসং সম্পযোগো নত্থি। সব্বরূপক্খন্ধসঙ্গাহকেহি সব্বেসং সম্পযোগারহানং খন্ধাদীনং গহিতত্তা অঞ্ঞংযেৰ নত্থি, যং তেন সহ সম্পযোগং গচ্ছেয্য। তস্মা তথারূপানি পদানি ইধ ন গহিতানি। যানি পন পদানি রূপেন অসম্মিস্সং অরূপেকদেসং দীপেন্তি, তানি ইধ গহিতানি। তেসং ইদমুদ্দানং –
319. Idāni sampayuttenasampayuttapadaṃ bhājetuṃ vedanākkhandhenātiādi āraddhaṃ. Tattha yaṃ khandhādivasena sampayuttaṃ, puna tasseva khandhādīhi sampayogaṃ pucchitvā vissajjanaṃ kataṃ. Taṃ rūpena vā rūpamissakehi vā sabbarūpakkhandhasaṅgāhakehi vā padehi saddhiṃ na yujjati. Rūpena hi rūpamissakena vā aññesaṃ sampayogo natthi. Sabbarūpakkhandhasaṅgāhakehi sabbesaṃ sampayogārahānaṃ khandhādīnaṃ gahitattā aññaṃyeva natthi, yaṃ tena saha sampayogaṃ gaccheyya. Tasmā tathārūpāni padāni idha na gahitāni. Yāni pana padāni rūpena asammissaṃ arūpekadesaṃ dīpenti, tāni idha gahitāni. Tesaṃ idamuddānaṃ –
‘‘অরূপক্খন্ধা চত্তারো, মনাযতনমেৰ চ।
‘‘Arūpakkhandhā cattāro, manāyatanameva ca;
ৰিঞ্ঞাণধাতুযো সত্ত, দ্ৰে সচ্চা চুদ্দসিন্দ্রিযা॥
Viññāṇadhātuyo satta, dve saccā cuddasindriyā.
‘‘পচ্চযে দ্ৰাদস পদা, ততো উপরি সোল়স।
‘‘Paccaye dvādasa padā, tato upari soḷasa;
তিকেসু অট্ঠ গোচ্ছকে, তেচত্তালীসমেৰ চ॥
Tikesu aṭṭha gocchake, tecattālīsameva ca.
‘‘মহন্তরদুকে সত্ত, পদা পিট্ঠিদুকেসু ছ।
‘‘Mahantaraduke satta, padā piṭṭhidukesu cha;
নৰমস্স পদস্সেতে, নিদ্দেসে সঙ্গহং গতা’’তি॥
Navamassa padassete, niddese saṅgahaṃ gatā’’ti.
সব্বপঞ্হেসু পন যে ধম্মা পুচ্ছায উদ্ধটা, তে যেহি সম্পযুত্তা হোন্তি, তেসং ৰসেন খন্ধাদিভেদো ৰেদিতব্বো । ৰেদনাক্খন্ধেন হি ইতরে তযো খন্ধা সম্পযুত্তা, পুন তেহি ৰেদনাক্খন্ধো সম্পযুত্তো। সো তেহি সঞ্ঞাদীহি তীহি খন্ধেহি, একেন মনাযতনেন, সত্তহি ৰিঞ্ঞাণধাতূহি, একস্মিং ধম্মাযতনে, ধম্মধাতুযা চ, কেহিচি সঞ্ঞাসঙ্খারেহেৰ সম্পযুত্তো। এসেৰ নযো সব্বত্থাতি।
Sabbapañhesu pana ye dhammā pucchāya uddhaṭā, te yehi sampayuttā honti, tesaṃ vasena khandhādibhedo veditabbo . Vedanākkhandhena hi itare tayo khandhā sampayuttā, puna tehi vedanākkhandho sampayutto. So tehi saññādīhi tīhi khandhehi, ekena manāyatanena, sattahi viññāṇadhātūhi, ekasmiṃ dhammāyatane, dhammadhātuyā ca, kehici saññāsaṅkhāreheva sampayutto. Eseva nayo sabbatthāti.
সম্পযুত্তেনসম্পযুত্তপদৰণ্ণনা।
Sampayuttenasampayuttapadavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ধাতুকথাপাল়ি • Dhātukathāpāḷi / ৯. সম্পযুত্তেনসম্পযুত্তপদনিদ্দেসো • 9. Sampayuttenasampayuttapadaniddeso
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৯. নৰমনযো সম্পযুত্তেনসম্পযুত্তপদৰণ্ণনা • 9. Navamanayo sampayuttenasampayuttapadavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৯. নৰমনযো সম্পযুত্তেনসম্পযুত্তপদৰণ্ণনা • 9. Navamanayo sampayuttenasampayuttapadavaṇṇanā
