| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
9. නවමනයො සම්‌පයුත්‌තෙනසම්‌පයුත්‌තපදවණ්‌ණනා
9. Navamanayo sampayuttenasampayuttapadavaṇṇanā
319. ඉදානි සම්‌පයුත්‌තෙනසම්‌පයුත්‌තපදං භාජෙතුං වෙදනාක්‌ඛන්‌ධෙනාතිආදි ආරද්‌ධං. තත්‌ථ යං ඛන්‌ධාදිවසෙන සම්‌පයුත්‌තං, පුන තස්‌සෙව ඛන්‌ධාදීහි සම්‌පයොගං පුච්‌ඡිත්‌වා විස්‌සජ්‌ජනං කතං. තං රූපෙන වා රූපමිස්‌සකෙහි වා සබ්‌බරූපක්‌ඛන්‌ධසඞ්‌ගාහකෙහි වා පදෙහි සද්‌ධිං න යුජ්‌ජති. රූපෙන හි රූපමිස්‌සකෙන වා අඤ්‌ඤෙසං සම්‌පයොගො නත්‌ථි. සබ්‌බරූපක්‌ඛන්‌ධසඞ්‌ගාහකෙහි සබ්‌බෙසං සම්‌පයොගාරහානං ඛන්‌ධාදීනං ගහිතත්‌තා අඤ්‌ඤංයෙව නත්‌ථි, යං තෙන සහ සම්‌පයොගං ගච්‌ඡෙය්‍ය. තස්‌මා තථාරූපානි පදානි ඉධ න ගහිතානි. යානි පන පදානි රූපෙන අසම්‌මිස්‌සං අරූපෙකදෙසං දීපෙන්‌ති, තානි ඉධ ගහිතානි. තෙසං ඉදමුද්‌දානං –
319. Idāni sampayuttenasampayuttapadaṃ bhājetuṃ vedanākkhandhenātiādi āraddhaṃ. Tattha yaṃ khandhādivasena sampayuttaṃ, puna tasseva khandhādīhi sampayogaṃ pucchitvā vissajjanaṃ kataṃ. Taṃ rūpena vā rūpamissakehi vā sabbarūpakkhandhasaṅgāhakehi vā padehi saddhiṃ na yujjati. Rūpena hi rūpamissakena vā aññesaṃ sampayogo natthi. Sabbarūpakkhandhasaṅgāhakehi sabbesaṃ sampayogārahānaṃ khandhādīnaṃ gahitattā aññaṃyeva natthi, yaṃ tena saha sampayogaṃ gaccheyya. Tasmā tathārūpāni padāni idha na gahitāni. Yāni pana padāni rūpena asammissaṃ arūpekadesaṃ dīpenti, tāni idha gahitāni. Tesaṃ idamuddānaṃ –
‘‘අරූපක්‌ඛන්‌ධා චත්‌තාරො, මනායතනමෙව ච;
‘‘Arūpakkhandhā cattāro, manāyatanameva ca;
විඤ්‌ඤාණධාතුයො සත්‌ත, ද්‌වෙ සච්‌චා චුද්‌දසින්‌ද්‍රියා.
Viññāṇadhātuyo satta, dve saccā cuddasindriyā.
‘‘පච්‌චයෙ ද්‌වාදස පදා, තතො උපරි සොළස;
‘‘Paccaye dvādasa padā, tato upari soḷasa;
තිකෙසු අට්‌ඨ ගොච්‌ඡකෙ, තෙචත්‌තාලීසමෙව ච.
Tikesu aṭṭha gocchake, tecattālīsameva ca.
‘‘මහන්‌තරදුකෙ සත්‌ත, පදා පිට්‌ඨිදුකෙසු ඡ;
‘‘Mahantaraduke satta, padā piṭṭhidukesu cha;
නවමස්‌ස පදස්‌සෙතෙ, නිද්‌දෙසෙ සඞ්‌ගහං ගතා’’ති.
Navamassa padassete, niddese saṅgahaṃ gatā’’ti.
සබ්‌බපඤ්‌හෙසු පන යෙ ධම්‌මා පුච්‌ඡාය උද්‌ධටා, තෙ යෙහි සම්‌පයුත්‌තා හොන්‌ති, තෙසං වසෙන ඛන්‌ධාදිභෙදො වෙදිතබ්‌බො . වෙදනාක්‌ඛන්‌ධෙන හි ඉතරෙ තයො ඛන්‌ධා සම්‌පයුත්‌තා, පුන තෙහි වෙදනාක්‌ඛන්‌ධො සම්‌පයුත්‌තො. සො තෙහි සඤ්‌ඤාදීහි තීහි ඛන්‌ධෙහි, එකෙන මනායතනෙන, සත්‌තහි විඤ්‌ඤාණධාතූහි, එකස්‌මිං ධම්‌මායතනෙ, ධම්‌මධාතුයා ච, කෙහිචි සඤ්‌ඤාසඞ්‌ඛාරෙහෙව සම්‌පයුත්‌තො. එසෙව නයො සබ්‌බත්‌ථාති.
Sabbapañhesu pana ye dhammā pucchāya uddhaṭā, te yehi sampayuttā honti, tesaṃ vasena khandhādibhedo veditabbo . Vedanākkhandhena hi itare tayo khandhā sampayuttā, puna tehi vedanākkhandho sampayutto. So tehi saññādīhi tīhi khandhehi, ekena manāyatanena, sattahi viññāṇadhātūhi, ekasmiṃ dhammāyatane, dhammadhātuyā ca, kehici saññāsaṅkhāreheva sampayutto. Eseva nayo sabbatthāti.
සම්‌පයුත්‌තෙනසම්‌පයුත්‌තපදවණ්‌ණනා.
Sampayuttenasampayuttapadavaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / ධාතුකථාපාළි • Dhātukathāpāḷi / 9. සම්‌පයුත්‌තෙනසම්‌පයුත්‌තපදනිද්‌දෙසො • 9. Sampayuttenasampayuttapadaniddeso
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 9. නවමනයො සම්‌පයුත්‌තෙනසම්‌පයුත්‌තපදවණ්‌ණනා • 9. Navamanayo sampayuttenasampayuttapadavaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 9. නවමනයො සම්‌පයුත්‌තෙනසම්‌පයුත්‌තපදවණ්‌ණනා • 9. Navamanayo sampayuttenasampayuttapadavaṇṇanā
