| Library / Tipiṭaka / ತಿಪಿಟಕ • Tipiṭaka / ಭಿಕ್ಖುನೀವಿಭಙ್ಗ • Bhikkhunīvibhaṅga |
೯. ನವಮಸಙ್ಘಾದಿಸೇಸಸಿಕ್ಖಾಪದಂ
9. Navamasaṅghādisesasikkhāpadaṃ
೭೨೧. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ। ತೇನ ಖೋ ಪನ ಸಮಯೇನ ಥುಲ್ಲನನ್ದಾಯ ಭಿಕ್ಖುನಿಯಾ ಅನ್ತೇವಾಸಿಕಾ ಭಿಕ್ಖುನಿಯೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ॰… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಸಂಸಟ್ಠಾ ವಿಹರಿಸ್ಸನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ’’ತಿ…ಪೇ॰… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾತಿ? ‘‘ಸಚ್ಚಂ, ಭಗವಾ’’ತಿ। ವಿಗರಹಿ ಬುದ್ಧೋ ಭಗವಾ…ಪೇ॰… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ಸಂಸಟ್ಠಾ ವಿಹರಿಸ್ಸನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ॰… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –
721. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandāya bhikkhuniyā antevāsikā bhikkhuniyo saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo saṃsaṭṭhā viharissanti pāpācārā pāpasaddā pāpasilokā bhikkhunisaṅghassa vihesikā aññamaññissā vajjappaṭicchādikā’’ti…pe… saccaṃ kira, bhikkhave, bhikkhuniyo saṃsaṭṭhā viharanti pāpācārā pāpasaddā pāpasilokā bhikkhunisaṅghassa vihesikā aññamaññissā vajjappaṭicchādikāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo saṃsaṭṭhā viharissanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
೭೨೨. ‘‘ಭಿಕ್ಖುನಿಯೋ ಪನೇವ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ತಾ ಭಿಕ್ಖುನಿಯೋ ಭಿಕ್ಖುನೀಹಿ ಏವಮಸ್ಸು ವಚನೀಯಾ – ‘ಭಗಿನಿಯೋ ಖೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ವಿವಿಚ್ಚಥಾಯ್ಯೇ। ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀ’ತಿ। ಏವಞ್ಚ ತಾ ಭಿಕ್ಖುನಿಯೋ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯುಂ, ತಾ ಭಿಕ್ಖುನಿಯೋ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ। ಯಾವತತಿಯಞ್ಚೇ ಸಮನುಭಾಸೀಯಮಾನಾ ತಂ ಪಟಿನಿಸ್ಸಜ್ಜೇಯ್ಯುಂ, ಇಚ್ಚೇತಂ ಕುಸಲಂ; ನೋ ಚೇ ಪಟಿನಿಸ್ಸಜ್ಜೇಯ್ಯುಂ, ಇಮಾಪಿ ಭಿಕ್ಖುನಿಯೋ ಯಾವತತಿಯಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ।
722.‘‘Bhikkhuniyo paneva saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Tā bhikkhuniyo bhikkhunīhi evamassu vacanīyā – ‘bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Evañca tā bhikkhuniyo bhikkhunīhi vuccamānā tatheva paggaṇheyyuṃ, tā bhikkhuniyo bhikkhunīhi yāvatatiyaṃ samanubhāsitabbā tassa paṭinissaggāya. Yāvatatiyañce samanubhāsīyamānā taṃ paṭinissajjeyyuṃ, iccetaṃ kusalaṃ; no ce paṭinissajjeyyuṃ, imāpi bhikkhuniyo yāvatatiyakaṃ dhammaṃ āpannā nissāraṇīyaṃ saṅghādisesa’’nti.
೭೨೩. ಭಿಕ್ಖುನಿಯೋ ಪನೇವಾತಿ ಉಪಸಮ್ಪನ್ನಾಯೋ ವುಚ್ಚನ್ತಿ।
723.Bhikkhuniyo panevāti upasampannāyo vuccanti.
ಸಂಸಟ್ಠಾ ವಿಹರನ್ತೀತಿ ಸಂಸಟ್ಠಾ ನಾಮ ಅನನುಲೋಮಿಕೇನ ಕಾಯಿಕವಾಚಸಿಕೇನ ಸಂಸಟ್ಠಾ ವಿಹರನ್ತಿ।
Saṃsaṭṭhā viharantīti saṃsaṭṭhā nāma ananulomikena kāyikavācasikena saṃsaṭṭhā viharanti.
ಪಾಪಾಚಾರಾತಿ ಪಾಪಕೇನ ಆಚಾರೇನ ಸಮನ್ನಾಗತಾ।
Pāpācārāti pāpakena ācārena samannāgatā.
ಪಾಪಸದ್ದಾತಿ ಪಾಪಕೇನ ಕಿತ್ತಿಸದ್ದೇನ ಅಬ್ಭುಗ್ಗತಾ।
Pāpasaddāti pāpakena kittisaddena abbhuggatā.
ಪಾಪಸಿಲೋಕಾತಿ ಪಾಪಕೇನ ಮಿಚ್ಛಾಜೀವೇನ ಜೀವಿತಂ ಕಪ್ಪೇನ್ತಿ।
Pāpasilokāti pāpakena micchājīvena jīvitaṃ kappenti.
ಭಿಕ್ಖುನಿಸಙ್ಘಸ್ಸ ವಿಹೇಸಿಕಾತಿ ಅಞ್ಞಮಞ್ಞಿಸ್ಸಾ ಕಮ್ಮೇ ಕರೀಯಮಾನೇ ಪಟಿಕ್ಕೋಸನ್ತಿ।
Bhikkhunisaṅghassa vihesikāti aññamaññissā kamme karīyamāne paṭikkosanti.
ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾತಿ ಅಞ್ಞಮಞ್ಞಂ ವಜ್ಜಂ ಪಟಿಚ್ಛಾದೇನ್ತಿ।
Aññamaññissā vajjappaṭicchādikāti aññamaññaṃ vajjaṃ paṭicchādenti.
ತಾ ಭಿಕ್ಖುನಿಯೋತಿ ಯಾ ತಾ ಸಂಸಟ್ಠಾ ಭಿಕ್ಖುನಿಯೋ।
Tā bhikkhuniyoti yā tā saṃsaṭṭhā bhikkhuniyo.
ಭಿಕ್ಖುನೀಹೀತಿ ಅಞ್ಞಾಹಿ ಭಿಕ್ಖುನೀಹಿ।
Bhikkhunīhīti aññāhi bhikkhunīhi.
ಯಾ ಪಸ್ಸನ್ತಿ ಯಾ ಸುಣನ್ತಿ ತಾಹಿ ವತ್ತಬ್ಬಾ – ‘‘ಭಗಿನಿಯೋ ಖೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ವಿವಿಚ್ಚಥಾಯ್ಯೇ। ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀ’’ತಿ। ದುತಿಯಮ್ಪಿ ವತ್ತಬ್ಬಾ। ತತಿಯಮ್ಪಿ ವತ್ತಬ್ಬಾ। ಸಚೇ ಪಟಿನಿಸ್ಸಜ್ಜನ್ತಿ, ಇಚ್ಚೇತಂ ಕುಸಲಂ; ನೋ ಚೇ ಪಟಿನಿಸ್ಸಜ್ಜನ್ತಿ, ಆಪತ್ತಿ ದುಕ್ಕಟಸ್ಸ। ಸುತ್ವಾ ನ ವದನ್ತಿ, ಆಪತ್ತಿ ದುಕ್ಕಟಸ್ಸ। ತಾ ಭಿಕ್ಖುನಿಯೋ ಸಙ್ಘಮಜ್ಝಮ್ಪಿ ಆಕಡ್ಢಿತ್ವಾ ವತ್ತಬ್ಬಾ – ‘‘ಭಗಿನಿಯೋ ಖೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ವಿವಿಚ್ಚಥಾಯ್ಯೇ। ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀ’’ತಿ। ದುತಿಯಮ್ಪಿ ವತ್ತಬ್ಬಾ। ತತಿಯಮ್ಪಿ ವತ್ತಬ್ಬಾ। ಸಚೇ ಪಟಿನಿಸ್ಸಜ್ಜನ್ತಿ, ಇಚ್ಚೇತಂ ಕುಸಲಂ; ನೋ ಚೇ ಪಟಿನಿಸ್ಸಜ್ಜನ್ತಿ, ಆಪತ್ತಿ ದುಕ್ಕಟಸ್ಸ। ತಾ ಭಿಕ್ಖುನಿಯೋ ಸಮನುಭಾಸಿತಬ್ಬಾ। ಏವಞ್ಚ ಪನ, ಭಿಕ್ಖವೇ, ಸಮನುಭಾಸಿತಬ್ಬಾ। ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –
Yā passanti yā suṇanti tāhi vattabbā – ‘‘bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’’ti. Dutiyampi vattabbā. Tatiyampi vattabbā. Sace paṭinissajjanti, iccetaṃ kusalaṃ; no ce paṭinissajjanti, āpatti dukkaṭassa. Sutvā na vadanti, āpatti dukkaṭassa. Tā bhikkhuniyo saṅghamajjhampi ākaḍḍhitvā vattabbā – ‘‘bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’’ti. Dutiyampi vattabbā. Tatiyampi vattabbā. Sace paṭinissajjanti, iccetaṃ kusalaṃ; no ce paṭinissajjanti, āpatti dukkaṭassa. Tā bhikkhuniyo samanubhāsitabbā. Evañca pana, bhikkhave, samanubhāsitabbā. Byattāya bhikkhuniyā paṭibalāya saṅgho ñāpetabbo –
೭೨೪. ‘‘ಸುಣಾತು ಮೇ, ಅಯ್ಯೇ, ಸಙ್ಘೋ। ಇತ್ಥನ್ನಾಮಾ ಚ ಇತ್ಥನ್ನಾಮಾ ಚ ಭಿಕ್ಖುನಿಯೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ತಾ ತಂ ವತ್ಥುಂ ನ ಪಟಿನಿಸ್ಸಜ್ಜನ್ತಿ। ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಞ್ಚ ಇತ್ಥನ್ನಾಮಞ್ಚ ಭಿಕ್ಖುನಿಯೋ ಸಮನುಭಾಸೇಯ್ಯ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ। ಏಸಾ ಞತ್ತಿ।
724. ‘‘Suṇātu me, ayye, saṅgho. Itthannāmā ca itthannāmā ca bhikkhuniyo saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Tā taṃ vatthuṃ na paṭinissajjanti. Yadi saṅghassa pattakallaṃ, saṅgho itthannāmañca itthannāmañca bhikkhuniyo samanubhāseyya tassa vatthussa paṭinissaggāya. Esā ñatti.
‘‘ಸುಣಾತು ಮೇ, ಅಯ್ಯೇ, ಸಙ್ಘೋ। ಇತ್ಥನ್ನಾಮಾ ಚ ಇತ್ಥನ್ನಾಮಾ ಚ ಭಿಕ್ಖುನಿಯೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ, ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ, ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ। ತಾ ತಂ ವತ್ಥುಂ ನ ಪಟಿನಿಸ್ಸಜ್ಜನ್ತಿ। ಸಙ್ಘೋ ಇತ್ಥನ್ನಾಮಞ್ಚ ಇತ್ಥನ್ನಾಮಞ್ಚ ಭಿಕ್ಖುನಿಯೋ ಸಮನುಭಾಸತಿ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ। ಯಸ್ಸಾ ಅಯ್ಯಾಯ ಖಮತಿ ಇತ್ಥನ್ನಾಮಾಯ ಚ ಇತ್ಥನ್ನಾಮಾಯ ಚ ಭಿಕ್ಖುನೀನಂ ಸಮನುಭಾಸನಾ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ, ಸಾ ತುಣ್ಹಸ್ಸ; ಯಸ್ಸಾ ನಕ್ಖಮತಿ, ಸಾ ಭಾಸೇಯ್ಯ।
‘‘Suṇātu me, ayye, saṅgho. Itthannāmā ca itthannāmā ca bhikkhuniyo saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Tā taṃ vatthuṃ na paṭinissajjanti. Saṅgho itthannāmañca itthannāmañca bhikkhuniyo samanubhāsati tassa vatthussa paṭinissaggāya. Yassā ayyāya khamati itthannāmāya ca itthannāmāya ca bhikkhunīnaṃ samanubhāsanā tassa vatthussa paṭinissaggāya, sā tuṇhassa; yassā nakkhamati, sā bhāseyya.
‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ॰… ತತಿಯಮ್ಪಿ ಏತಮತ್ಥಂ ವದಾಮಿ…ಪೇ॰…।
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘ಸಮನುಭಟ್ಠಾ ಸಙ್ಘೇನ, ಇತ್ಥನ್ನಾಮಾ ಚ ಇತ್ಥನ್ನಾಮಾ ಚ ಭಿಕ್ಖುನಿಯೋ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ। ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ।
‘‘Samanubhaṭṭhā saṅghena, itthannāmā ca itthannāmā ca bhikkhuniyo tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
ಞತ್ತಿಯಾ ದುಕ್ಕಟಂ, ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ, ಕಮ್ಮವಾಚಾಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ। ಸಙ್ಘಾದಿಸೇಸಂ ಅಜ್ಝಾಪಜ್ಜನ್ತೀನಂ ಞತ್ತಿಯಾ ದುಕ್ಕಟಂ ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ ಪಟಿಪ್ಪಸ್ಸಮ್ಭನ್ತಿ। ದ್ವೇ ತಿಸ್ಸೋ ಏಕತೋ ಸಮನುಭಾಸಿತಬ್ಬಾ। ತತುತ್ತರಿ ನ ಸಮನುಭಾಸಿತಬ್ಬಾ।
Ñattiyā dukkaṭaṃ, dvīhi kammavācāhi thullaccayā, kammavācāpariyosāne āpatti saṅghādisesassa. Saṅghādisesaṃ ajjhāpajjantīnaṃ ñattiyā dukkaṭaṃ dvīhi kammavācāhi thullaccayā paṭippassambhanti. Dve tisso ekato samanubhāsitabbā. Tatuttari na samanubhāsitabbā.
ಇಮಾಪಿ ಭಿಕ್ಖುನಿಯೋತಿ ಪುರಿಮಾಯೋ ಉಪಾದಾಯ ವುಚ್ಚನ್ತಿ।
Imāpi bhikkhuniyoti purimāyo upādāya vuccanti.
ಯಾವತತಿಯಕನ್ತಿ ಯಾವತತಿಯಂ ಸಮನುಭಾಸನಾಯ ಆಪಜ್ಜನ್ತಿ, ನ ಸಹ ವತ್ಥುಜ್ಝಾಚಾರಾ।
Yāvatatiyakanti yāvatatiyaṃ samanubhāsanāya āpajjanti, na saha vatthujjhācārā.
ನಿಸ್ಸಾರಣೀಯನ್ತಿ ಸಙ್ಘಮ್ಹಾ ನಿಸ್ಸಾರೀಯತಿ।
Nissāraṇīyanti saṅghamhā nissārīyati.
ಸಙ್ಘಾದಿಸೇಸೋತಿ…ಪೇ॰… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ।
Saṅghādisesoti…pe… tenapi vuccati saṅghādisesoti.
೭೨೫. ಧಮ್ಮಕಮ್ಮೇ ಧಮ್ಮಕಮ್ಮಸಞ್ಞಾ ನ ಪಟಿನಿಸ್ಸಜ್ಜನ್ತಿ, ಆಪತ್ತಿ ಸಙ್ಘಾದಿಸೇಸಸ್ಸ। ಧಮ್ಮಕಮ್ಮೇ ವೇಮತಿಕಾ ನ ಪಟಿನಿಸ್ಸಜ್ಜನ್ತಿ, ಆಪತ್ತಿ ಸಙ್ಘಾದಿಸೇಸಸ್ಸ। ಧಮ್ಮಕಮ್ಮೇ ಅಧಮ್ಮಕಮ್ಮಸಞ್ಞಾ ನ ಪಟಿನಿಸ್ಸಜ್ಜನ್ತಿ, ಆಪತ್ತಿ ಸಙ್ಘಾದಿಸೇಸಸ್ಸ।
725. Dhammakamme dhammakammasaññā na paṭinissajjanti, āpatti saṅghādisesassa. Dhammakamme vematikā na paṭinissajjanti, āpatti saṅghādisesassa. Dhammakamme adhammakammasaññā na paṭinissajjanti, āpatti saṅghādisesassa.
ಅಧಮ್ಮಕಮ್ಮೇ ಧಮ್ಮಕಮ್ಮಸಞ್ಞಾ, ಆಪತ್ತಿ ದುಕ್ಕಟಸ್ಸ। ಅಧಮ್ಮಕಮ್ಮೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ। ಅಧಮ್ಮಕಮ್ಮೇ ಅಧಮ್ಮಕಮ್ಮಸಞ್ಞಾ, ಆಪತ್ತಿ ದುಕ್ಕಟಸ್ಸ।
Adhammakamme dhammakammasaññā, āpatti dukkaṭassa. Adhammakamme vematikā, āpatti dukkaṭassa. Adhammakamme adhammakammasaññā, āpatti dukkaṭassa.
೭೨೬. ಅನಾಪತ್ತಿ ಅಸಮನುಭಾಸನ್ತೀನಂ, ಪಟಿನಿಸ್ಸಜ್ಜನ್ತೀನಂ, ಉಮ್ಮತ್ತಿಕಾನಂ, ಆದಿಕಮ್ಮಿಕಾನನ್ತಿ।
726. Anāpatti asamanubhāsantīnaṃ, paṭinissajjantīnaṃ, ummattikānaṃ, ādikammikānanti.
ನವಮಸಙ್ಘಾದಿಸೇಸಸಿಕ್ಖಾಪದಂ ನಿಟ್ಠಿತಂ।
Navamasaṅghādisesasikkhāpadaṃ niṭṭhitaṃ.
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಭಿಕ್ಖುನೀವಿಭಙ್ಗ-ಅಟ್ಠಕಥಾ • Bhikkhunīvibhaṅga-aṭṭhakathā / ೯. ನವಮಸಙ್ಘಾದಿಸೇಸಸಿಕ್ಖಾಪದವಣ್ಣನಾ • 9. Navamasaṅghādisesasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೯. ನವಮಸಙ್ಘಾದಿಸೇಸಸಿಕ್ಖಾಪದವಣ್ಣನಾ • 9. Navamasaṅghādisesasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ೯. ನವಮಸಙ್ಘಾದಿಸೇಸಸಿಕ್ಖಾಪದವಣ್ಣನಾ • 9. Navamasaṅghādisesasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೬. ಛಟ್ಠಸಙ್ಘಾದಿಸೇಸಸಿಕ್ಖಾಪದವಣ್ಣನಾ • 6. Chaṭṭhasaṅghādisesasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೯. ನವಮಸಙ್ಘಾದಿಸೇಸಸಿಕ್ಖಾಪದಂ • 9. Navamasaṅghādisesasikkhāpadaṃ
