| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
9. நவமஸிக்கா²பத³ங்
9. Navamasikkhāpadaṃ
828. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரஸ்ஸ ப்³ராஹ்மணஸ்ஸ பி⁴க்கு²னூபஸ்ஸயங் நிஸ்ஸாய யவகெ²த்தங் ஹோதி. பி⁴க்கு²னியோ உச்சாரம்பி பஸ்ஸாவம்பி ஸங்காரம்பி விகா⁴ஸம்பி கெ²த்தே ச²ட்³டெ³ந்தி. அத² கோ² ஸோ ப்³ராஹ்மணோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கு²னியோ அம்ஹாகங் யவகெ²த்தங் தூ³ஸெஸ்ஸந்தீ’’தி! அஸ்ஸோஸுங் கோ² பி⁴க்கு²னியோ தஸ்ஸ ப்³ராஹ்மணஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசெந்தஸ்ஸ. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ உச்சாரம்பி பஸ்ஸாவம்பி ஸங்காரம்பி விகா⁴ஸம்பி ஹரிதே ச²ட்³டெ³ஸ்ஸந்தீ’’தி…பே॰… ஸச்சங் கிர, பி⁴க்க²வே, பி⁴க்கு²னியோ உச்சாரம்பி பஸ்ஸாவம்பி ஸங்காரம்பி விகா⁴ஸம்பி ஹரிதே ச²ட்³டெ³ந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னியோ உச்சாரம்பி பஸ்ஸாவம்பி ஸங்காரம்பி விகா⁴ஸம்பி ஹரிதே ச²ட்³டெ³ஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
828. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarassa brāhmaṇassa bhikkhunūpassayaṃ nissāya yavakhettaṃ hoti. Bhikkhuniyo uccārampi passāvampi saṅkārampi vighāsampi khette chaḍḍenti. Atha kho so brāhmaṇo ujjhāyati khiyyati vipāceti – ‘‘kathañhi nāma bhikkhuniyo amhākaṃ yavakhettaṃ dūsessantī’’ti! Assosuṃ kho bhikkhuniyo tassa brāhmaṇassa ujjhāyantassa khiyyantassa vipācentassa. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo uccārampi passāvampi saṅkārampi vighāsampi harite chaḍḍessantī’’ti…pe… saccaṃ kira, bhikkhave, bhikkhuniyo uccārampi passāvampi saṅkārampi vighāsampi harite chaḍḍentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo uccārampi passāvampi saṅkārampi vighāsampi harite chaḍḍessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
829. ‘‘யா பன பி⁴க்கு²னீ உச்சாரங் வா பஸ்ஸாவங் வா ஸங்காரங் வா விகா⁴ஸங் வா ஹரிதே ச²ட்³டெ³ய்ய வா ச²ட்³டா³பெய்ய வா, பாசித்திய’’ந்தி.
829.‘‘Yā pana bhikkhunī uccāraṃ vā passāvaṃ vā saṅkāraṃ vā vighāsaṃ vā harite chaḍḍeyya vā chaḍḍāpeyya vā, pācittiya’’nti.
830. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
830.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
உச்சாரோ நாம கூ³தோ² வுச்சதி. பஸ்ஸாவோ நாம முத்தங் வுச்சதி.
Uccāro nāma gūtho vuccati. Passāvo nāma muttaṃ vuccati.
ஸங்காரங் நாம கசவரங் வுச்சதி.
Saṅkāraṃ nāma kacavaraṃ vuccati.
விகா⁴ஸங் நாம சலகானி வா அட்டி²கானி வா உச்சி²ட்டோ²த³கங் வா.
Vighāsaṃ nāma calakāni vā aṭṭhikāni vā ucchiṭṭhodakaṃ vā.
ஹரிதங் நாம புப்³ப³ண்ணங் அபரண்ணங் யங் மனுஸ்ஸானங் உபபோ⁴க³பரிபோ⁴க³ங் ரோபிமங் .
Haritaṃ nāma pubbaṇṇaṃ aparaṇṇaṃ yaṃ manussānaṃ upabhogaparibhogaṃ ropimaṃ .
ச²ட்³டெ³ய்யாதி ஸயங் ச²ட்³டே³தி, ஆபத்தி பாசித்தியஸ்ஸ.
Chaḍḍeyyāti sayaṃ chaḍḍeti, āpatti pācittiyassa.
ச²ட்³டா³பெய்யாதி அஞ்ஞங் ஆணாபேதி, ஆபத்தி து³க்கடஸ்ஸ. ஸகிங் ஆணத்தா ப³ஹுகம்பி ச²ட்³டே³தி, ஆபத்தி பாசித்தியஸ்ஸ.
Chaḍḍāpeyyāti aññaṃ āṇāpeti, āpatti dukkaṭassa. Sakiṃ āṇattā bahukampi chaḍḍeti, āpatti pācittiyassa.
831. ஹரிதே ஹரிதஸஞ்ஞா ச²ட்³டே³தி வா ச²ட்³டா³பேதி வா, ஆபத்தி பாசித்தியஸ்ஸ. ஹரிதே வேமதிகா ச²ட்³டே³தி வா ச²ட்³டா³பேதி வா, ஆபத்தி பாசித்தியஸ்ஸ . ஹரிதே அஹரிதஸஞ்ஞா ச²ட்³டே³தி வா ச²ட்³டா³பேதி வா, ஆபத்தி பாசித்தியஸ்ஸ.
831. Harite haritasaññā chaḍḍeti vā chaḍḍāpeti vā, āpatti pācittiyassa. Harite vematikā chaḍḍeti vā chaḍḍāpeti vā, āpatti pācittiyassa . Harite aharitasaññā chaḍḍeti vā chaḍḍāpeti vā, āpatti pācittiyassa.
அஹரிதே ஹரிதஸஞ்ஞா, ஆபத்தி து³க்கடஸ்ஸ. அஹரிதே வேமதிகா, ஆபத்தி து³க்கடஸ்ஸ. அஹரிதே அஹரிதஸஞ்ஞா, அனாபத்தி.
Aharite haritasaññā, āpatti dukkaṭassa. Aharite vematikā, āpatti dukkaṭassa. Aharite aharitasaññā, anāpatti.
832. அனாபத்தி ஓலோகெத்வா ச²ட்³டே³தி, கெ²த்தமரியாதே³ 1 ச²ட்³டே³தி ஸாமிகே ஆபுச்சி²த்வா அபலோகெத்வா ச²ட்³டே³தி, உம்மத்திகாய, ஆதி³கம்மிகாயாதி.
832. Anāpatti oloketvā chaḍḍeti, khettamariyāde 2 chaḍḍeti sāmike āpucchitvā apaloketvā chaḍḍeti, ummattikāya, ādikammikāyāti.
நவமஸிக்கா²பத³ங் நிட்டி²தங்.
Navamasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 9. நவமஸிக்கா²பத³வண்ணனா • 9. Navamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. லஸுணவக்³க³வண்ணனா • 1. Lasuṇavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 9. நவமஸிக்கா²பத³வண்ணனா • 9. Navamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மலஸுணாதி³ஸிக்கா²பத³வண்ணனா • 1. Paṭhamalasuṇādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 9. நவமஸிக்கா²பத³ங் • 9. Navamasikkhāpadaṃ
