| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
9. நவமஸிக்கா²பத³ங்
9. Navamasikkhāpadaṃ
874. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ அத்தனோ ப⁴ண்ட³கங் அபஸ்ஸந்தியோ சண்ட³காளிங் பி⁴க்கு²னிங் ஏதத³வோசுங் – ‘‘அபாய்யே, அம்ஹாகங், ப⁴ண்ட³கங் பஸ்ஸெய்யாஸீ’’தி? சண்ட³காளீ பி⁴க்கு²னீ உஜ்ஜா²யதி கி²ய்யதி விபாசேதி – ‘‘அஹமேவ நூன சோரீ, அஹமேவ நூன அலஜ்ஜினீ, யா அய்யாயோ அத்தனோ ப⁴ண்ட³கங் அபஸ்ஸந்தியோ தா மங் ஏவமாஹங்ஸு – ‘அபாய்யே, அம்ஹாகங் ப⁴ண்ட³கங் பஸ்ஸெய்யாஸீ’தி? ஸசாஹங், அய்யே, தும்ஹாகங் ப⁴ண்ட³கங் க³ண்ஹாமி, அஸ்ஸமணீ ஹோமி, ப்³ரஹ்மசரியா சவாமி, நிரயங் உபபஜ்ஜாமி; யா பன மங் அபூ⁴தேன ஏவமாஹ ஸாபி அஸ்ஸமணீ ஹோது, ப்³ரஹ்மசரியா சவது, நிரயங் உபபஜ்ஜதூ’’தி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா சண்ட³காளீ அத்தானம்பி பரம்பி நிரயேனபி ப்³ரஹ்மசரியேனபி அபி⁴ஸபிஸ்ஸதீ’’தி…பே॰… ஸச்சங் கிர, பி⁴க்க²வே, சண்ட³காளீ பி⁴க்கு²னீ அத்தானம்பி பரம்பி நிரயேனபி ப்³ரஹ்மசரியேனபி அபி⁴ஸபதீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, சண்ட³காளீ பி⁴க்கு²னீ அத்தானம்பி பரம்பி நிரயேனபி ப்³ரஹ்மசரியேனபி அபி⁴ஸபிஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
874. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo attano bhaṇḍakaṃ apassantiyo caṇḍakāḷiṃ bhikkhuniṃ etadavocuṃ – ‘‘apāyye, amhākaṃ, bhaṇḍakaṃ passeyyāsī’’ti? Caṇḍakāḷī bhikkhunī ujjhāyati khiyyati vipāceti – ‘‘ahameva nūna corī, ahameva nūna alajjinī, yā ayyāyo attano bhaṇḍakaṃ apassantiyo tā maṃ evamāhaṃsu – ‘apāyye, amhākaṃ bhaṇḍakaṃ passeyyāsī’ti? Sacāhaṃ, ayye, tumhākaṃ bhaṇḍakaṃ gaṇhāmi, assamaṇī homi, brahmacariyā cavāmi, nirayaṃ upapajjāmi; yā pana maṃ abhūtena evamāha sāpi assamaṇī hotu, brahmacariyā cavatu, nirayaṃ upapajjatū’’ti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā caṇḍakāḷī attānampi parampi nirayenapi brahmacariyenapi abhisapissatī’’ti…pe… saccaṃ kira, bhikkhave, caṇḍakāḷī bhikkhunī attānampi parampi nirayenapi brahmacariyenapi abhisapatīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, caṇḍakāḷī bhikkhunī attānampi parampi nirayenapi brahmacariyenapi abhisapissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
875. ‘‘யா பன பி⁴க்கு²னீ அத்தானங் வா பரங் வா நிரயேன வா ப்³ரஹ்மசரியேன வா அபி⁴ஸபெய்ய, பாசித்திய்ய’’ந்தி.
875.‘‘Yā pana bhikkhunī attānaṃ vā paraṃ vā nirayena vā brahmacariyena vā abhisapeyya, pācittiyya’’nti.
876. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
876.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
அத்தானந்தி பச்சத்தங். பரந்தி உபஸம்பன்னங். நிரயேன வா ப்³ரஹ்மசரியேன வா அபி⁴ஸபதி, ஆபத்தி பாசித்தியஸ்ஸ.
Attānanti paccattaṃ. Paranti upasampannaṃ. Nirayena vā brahmacariyena vā abhisapati, āpatti pācittiyassa.
877. உபஸம்பன்னாய உபஸம்பன்னஸஞ்ஞா நிரயேன வா ப்³ரஹ்மசரியேன வா அபி⁴ஸபதி, ஆபத்தி பாசித்தியஸ்ஸ. உபஸம்பன்னாய வேமதிகா நிரயேன வா ப்³ரஹ்மசரியேன வா அபி⁴ஸபதி, ஆபத்தி பாசித்தியஸ்ஸ. உபஸம்பன்னாய அனுபஸம்பன்னஸஞ்ஞா நிரயேன வா ப்³ரஹ்மசரியேன வா அபி⁴ஸபதி, ஆபத்தி பாசித்தியஸ்ஸ.
877. Upasampannāya upasampannasaññā nirayena vā brahmacariyena vā abhisapati, āpatti pācittiyassa. Upasampannāya vematikā nirayena vā brahmacariyena vā abhisapati, āpatti pācittiyassa. Upasampannāya anupasampannasaññā nirayena vā brahmacariyena vā abhisapati, āpatti pācittiyassa.
திரச்சா²னயோனியா வா பெத்திவிஸயேன வா மனுஸ்ஸதோ³ப⁴க்³கே³ன வா அபி⁴ஸபதி, ஆபத்தி து³க்கடஸ்ஸ. அனுபஸம்பன்னங் அபி⁴ஸபதி, ஆபத்தி து³க்கடஸ்ஸ. அனுபஸம்பன்னாய உபஸம்பன்னஸஞ்ஞா, ஆபத்தி து³க்கடஸ்ஸ. அனுபஸம்பன்னாய வேமதிகா, ஆபத்தி து³க்கடஸ்ஸ. அனுபஸம்பன்னாய அனுபஸம்பன்னஸஞ்ஞா, ஆபத்தி து³க்கடஸ்ஸ.
Tiracchānayoniyā vā pettivisayena vā manussadobhaggena vā abhisapati, āpatti dukkaṭassa. Anupasampannaṃ abhisapati, āpatti dukkaṭassa. Anupasampannāya upasampannasaññā, āpatti dukkaṭassa. Anupasampannāya vematikā, āpatti dukkaṭassa. Anupasampannāya anupasampannasaññā, āpatti dukkaṭassa.
878. அனாபத்தி அத்த²புரெக்கா²ராய, த⁴ம்மபுரெக்கா²ராய, அனுஸாஸனிபுரெக்கா²ராய, உம்மத்திகாய, ஆதி³கம்மிகாயாதி.
878. Anāpatti atthapurekkhārāya, dhammapurekkhārāya, anusāsanipurekkhārāya, ummattikāya, ādikammikāyāti.
நவமஸிக்கா²பத³ங் நிட்டி²தங்.
Navamasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 9. நவமஸிக்கா²பத³வண்ணனா • 9. Navamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 9. நவமஸிக்கா²பத³வண்ணனா • 9. Navamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மாதி³ஸிக்கா²பத³வண்ணனா • 1. Paṭhamādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 9. நவமஸிக்கா²பத³ங் • 9. Navamasikkhāpadaṃ
