| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
9. நவமஸிக்கா²பத³ங்
9. Navamasikkhāpadaṃ
969. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன பி⁴க்கு²னியோ அந்தோவஸ்ஸங் சாரிகங் சரந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ அந்தோவஸ்ஸங் சாரிகங் சரிஸ்ஸந்தி ஹரிதானி திணானி ச ஸம்மத்³த³ந்தா, ஏகிந்த்³ரியங் ஜீவங் விஹேடெ²ந்தா, ப³ஹூ கு²த்³த³கே பாணே ஸங்கா⁴தங் ஆபாதெ³ந்தா’’தி! அஸ்ஸோஸுங் கோ² பி⁴க்கு²னியோ தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ அந்தோவஸ்ஸங் சாரிகங் சரிஸ்ஸந்தீ’’தி…பே॰… ஸச்சங் கிர, பி⁴க்க²வே, பி⁴க்கு²னியோ அந்தோவஸ்ஸங் சாரிகங் சரந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னியோ அந்தோவஸ்ஸங் சாரிகங் சரிஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
969. Tena samayena buddho bhagavā rājagahe viharati veḷuvane kalandakanivāpe. Tena kho pana samayena bhikkhuniyo antovassaṃ cārikaṃ caranti. Manussā ujjhāyanti khiyyanti vipācenti – ‘‘kathañhi nāma bhikkhuniyo antovassaṃ cārikaṃ carissanti haritāni tiṇāni ca sammaddantā, ekindriyaṃ jīvaṃ viheṭhentā, bahū khuddake pāṇe saṅghātaṃ āpādentā’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo antovassaṃ cārikaṃ carissantī’’ti…pe… saccaṃ kira, bhikkhave, bhikkhuniyo antovassaṃ cārikaṃ carantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo antovassaṃ cārikaṃ carissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
970. ‘‘யா பன பி⁴க்கு²னீ அந்தோவஸ்ஸங் சாரிகங் சரெய்ய, பாசித்திய’’ந்தி.
970.‘‘Yā pana bhikkhunī antovassaṃ cārikaṃ careyya, pācittiya’’nti.
971. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
971.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
அந்தோவஸ்ஸந்தி புரிமங் வா தேமாஸங் பச்சி²மங் வா தேமாஸங் அவஸித்வா.
Antovassanti purimaṃ vā temāsaṃ pacchimaṃ vā temāsaṃ avasitvā.
சாரிகங் சரெய்யாதி குக்குடஸம்பாதே கா³மே கா³மந்தரே கா³மந்தரே ஆபத்தி பாசித்தியஸ்ஸ. அகா³மகே அரஞ்ஞே அத்³த⁴யோஜனே அத்³த⁴யோஜனே ஆபத்தி பாசித்தியஸ்ஸ.
Cārikaṃcareyyāti kukkuṭasampāte gāme gāmantare gāmantare āpatti pācittiyassa. Agāmake araññe addhayojane addhayojane āpatti pācittiyassa.
972. அனாபத்தி ஸத்தாஹகரணீயேன க³ச்ச²தி, கேனசி உப்³பா³ள்ஹா க³ச்ச²தி, ஆபதா³ஸு, உம்மத்திகாய, ஆதி³கம்மிகாயாதி.
972. Anāpatti sattāhakaraṇīyena gacchati, kenaci ubbāḷhā gacchati, āpadāsu, ummattikāya, ādikammikāyāti.
நவமஸிக்கா²பத³ங் நிட்டி²தங்.
Navamasikkhāpadaṃ niṭṭhitaṃ.
Related texts:
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 9. நவமஸிக்கா²பத³வண்ணனா • 9. Navamasikkhāpadavaṇṇanā
