| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
৯. নৰমসিক্খাপদং
9. Navamasikkhāpadaṃ
৮২৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন অঞ্ঞতরস্স ব্রাহ্মণস্স ভিক্খুনূপস্সযং নিস্সায যৰখেত্তং হোতি। ভিক্খুনিযো উচ্চারম্পি পস্সাৰম্পি সঙ্কারম্পি ৰিঘাসম্পি খেত্তে ছড্ডেন্তি। অথ খো সো ব্রাহ্মণো উজ্ঝাযতি খিয্যতি ৰিপাচেতি – ‘‘কথঞ্হি নাম ভিক্খুনিযো অম্হাকং যৰখেত্তং দূসেস্সন্তী’’তি! অস্সোসুং খো ভিক্খুনিযো তস্স ব্রাহ্মণস্স উজ্ঝাযন্তস্স খিয্যন্তস্স ৰিপাচেন্তস্স। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো উচ্চারম্পি পস্সাৰম্পি সঙ্কারম্পি ৰিঘাসম্পি হরিতে ছড্ডেস্সন্তী’’তি…পে॰… সচ্চং কির, ভিক্খৰে, ভিক্খুনিযো উচ্চারম্পি পস্সাৰম্পি সঙ্কারম্পি ৰিঘাসম্পি হরিতে ছড্ডেন্তীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, ভিক্খুনিযো উচ্চারম্পি পস্সাৰম্পি সঙ্কারম্পি ৰিঘাসম্পি হরিতে ছড্ডেস্সন্তি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
828. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarassa brāhmaṇassa bhikkhunūpassayaṃ nissāya yavakhettaṃ hoti. Bhikkhuniyo uccārampi passāvampi saṅkārampi vighāsampi khette chaḍḍenti. Atha kho so brāhmaṇo ujjhāyati khiyyati vipāceti – ‘‘kathañhi nāma bhikkhuniyo amhākaṃ yavakhettaṃ dūsessantī’’ti! Assosuṃ kho bhikkhuniyo tassa brāhmaṇassa ujjhāyantassa khiyyantassa vipācentassa. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo uccārampi passāvampi saṅkārampi vighāsampi harite chaḍḍessantī’’ti…pe… saccaṃ kira, bhikkhave, bhikkhuniyo uccārampi passāvampi saṅkārampi vighāsampi harite chaḍḍentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo uccārampi passāvampi saṅkārampi vighāsampi harite chaḍḍessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
৮২৯. ‘‘যা পন ভিক্খুনী উচ্চারং ৰা পস্সাৰং ৰা সঙ্কারং ৰা ৰিঘাসং ৰা হরিতে ছড্ডেয্য ৰা ছড্ডাপেয্য ৰা, পাচিত্তিয’’ন্তি।
829.‘‘Yā pana bhikkhunī uccāraṃ vā passāvaṃ vā saṅkāraṃ vā vighāsaṃ vā harite chaḍḍeyya vā chaḍḍāpeyya vā, pācittiya’’nti.
৮৩০. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি।
830.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
উচ্চারো নাম গূথো ৰুচ্চতি। পস্সাৰো নাম মুত্তং ৰুচ্চতি।
Uccāro nāma gūtho vuccati. Passāvo nāma muttaṃ vuccati.
সঙ্কারং নাম কচৰরং ৰুচ্চতি।
Saṅkāraṃ nāma kacavaraṃ vuccati.
ৰিঘাসং নাম চলকানি ৰা অট্ঠিকানি ৰা উচ্ছিট্ঠোদকং ৰা।
Vighāsaṃ nāma calakāni vā aṭṭhikāni vā ucchiṭṭhodakaṃ vā.
হরিতং নাম পুব্বণ্ণং অপরণ্ণং যং মনুস্সানং উপভোগপরিভোগং রোপিমং ।
Haritaṃ nāma pubbaṇṇaṃ aparaṇṇaṃ yaṃ manussānaṃ upabhogaparibhogaṃ ropimaṃ .
ছড্ডেয্যাতি সযং ছড্ডেতি, আপত্তি পাচিত্তিযস্স।
Chaḍḍeyyāti sayaṃ chaḍḍeti, āpatti pācittiyassa.
ছড্ডাপেয্যাতি অঞ্ঞং আণাপেতি, আপত্তি দুক্কটস্স। সকিং আণত্তা বহুকম্পি ছড্ডেতি, আপত্তি পাচিত্তিযস্স।
Chaḍḍāpeyyāti aññaṃ āṇāpeti, āpatti dukkaṭassa. Sakiṃ āṇattā bahukampi chaḍḍeti, āpatti pācittiyassa.
৮৩১. হরিতে হরিতসঞ্ঞা ছড্ডেতি ৰা ছড্ডাপেতি ৰা, আপত্তি পাচিত্তিযস্স। হরিতে ৰেমতিকা ছড্ডেতি ৰা ছড্ডাপেতি ৰা, আপত্তি পাচিত্তিযস্স । হরিতে অহরিতসঞ্ঞা ছড্ডেতি ৰা ছড্ডাপেতি ৰা, আপত্তি পাচিত্তিযস্স।
831. Harite haritasaññā chaḍḍeti vā chaḍḍāpeti vā, āpatti pācittiyassa. Harite vematikā chaḍḍeti vā chaḍḍāpeti vā, āpatti pācittiyassa . Harite aharitasaññā chaḍḍeti vā chaḍḍāpeti vā, āpatti pācittiyassa.
অহরিতে হরিতসঞ্ঞা, আপত্তি দুক্কটস্স। অহরিতে ৰেমতিকা, আপত্তি দুক্কটস্স। অহরিতে অহরিতসঞ্ঞা, অনাপত্তি।
Aharite haritasaññā, āpatti dukkaṭassa. Aharite vematikā, āpatti dukkaṭassa. Aharite aharitasaññā, anāpatti.
৮৩২. অনাপত্তি ওলোকেত্ৰা ছড্ডেতি, খেত্তমরিযাদে 1 ছড্ডেতি সামিকে আপুচ্ছিত্ৰা অপলোকেত্ৰা ছড্ডেতি, উম্মত্তিকায, আদিকম্মিকাযাতি।
832. Anāpatti oloketvā chaḍḍeti, khettamariyāde 2 chaḍḍeti sāmike āpucchitvā apaloketvā chaḍḍeti, ummattikāya, ādikammikāyāti.
নৰমসিক্খাপদং নিট্ঠিতং।
Navamasikkhāpadaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / ৯. নৰমসিক্খাপদৰণ্ণনা • 9. Navamasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. লসুণৰগ্গৰণ্ণনা • 1. Lasuṇavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৯. নৰমসিক্খাপদৰণ্ণনা • 9. Navamasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমলসুণাদিসিক্খাপদৰণ্ণনা • 1. Paṭhamalasuṇādisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৯. নৰমসিক্খাপদং • 9. Navamasikkhāpadaṃ
