| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
৯. নৰমসিক্খাপদং
9. Navamasikkhāpadaṃ
৯২০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দায ভিক্খুনিযা উপট্ঠাককুলং থুল্লনন্দং ভিক্খুনিং এতদৰোচ – ‘‘সচে মযং, অয্যে, সক্কোম, ভিক্খুনিসঙ্ঘস্স চীৰরং দস্সামা’’তি। তেন খো পন সমযেন ৰস্সংৰুট্ঠা ভিক্খুনিযো চীৰরং ভাজেতুকামা সন্নিপতিংসু। থুল্লনন্দা ভিক্খুনী তা ভিক্খুনিযো এতদৰোচ – ‘‘আগমেথ, অয্যে, অত্থি ভিক্খুনিসঙ্ঘস্স চীৰরপচ্চাসা’’তি। ভিক্খুনিযো থুল্লনন্দং ভিক্খুনিং এতদৰোচুং – ‘‘গচ্ছায্যে, তং চীৰরং জানাহী’’তি। থুল্লনন্দা ভিক্খুনী যেন তং কুলং তেনুপসঙ্কমি; উপসঙ্কমিত্ৰা তে মনুস্সে এতদৰোচ – ‘‘দেথাৰুসো, ভিক্খুনিসঙ্ঘস্স চীৰর’’ন্তি। ‘‘ন মযং, অয্যে, সক্কোম ভিক্খুনিসঙ্ঘস্স চীৰরং দাতু’’ন্তি । থুল্লনন্দা ভিক্খুনী ভিক্খুনীনং এতমত্থং আরোচেসি। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা দুব্বলচীৰরপচ্চাসায চীৰরকালসমযং অতিক্কামেস্সতী’’তি…পে॰… সচ্চং কির, ভিক্খৰে, থুল্লনন্দা ভিক্খুনী দুব্বলচীৰরপচ্চাসায চীৰরকালসমযং অতিক্কামেতীতি 1? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী দুব্বলচীৰরপচ্চাসায চীৰরকালসমযং অতিক্কামেস্সতি ! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
920. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandāya bhikkhuniyā upaṭṭhākakulaṃ thullanandaṃ bhikkhuniṃ etadavoca – ‘‘sace mayaṃ, ayye, sakkoma, bhikkhunisaṅghassa cīvaraṃ dassāmā’’ti. Tena kho pana samayena vassaṃvuṭṭhā bhikkhuniyo cīvaraṃ bhājetukāmā sannipatiṃsu. Thullanandā bhikkhunī tā bhikkhuniyo etadavoca – ‘‘āgametha, ayye, atthi bhikkhunisaṅghassa cīvarapaccāsā’’ti. Bhikkhuniyo thullanandaṃ bhikkhuniṃ etadavocuṃ – ‘‘gacchāyye, taṃ cīvaraṃ jānāhī’’ti. Thullanandā bhikkhunī yena taṃ kulaṃ tenupasaṅkami; upasaṅkamitvā te manusse etadavoca – ‘‘dethāvuso, bhikkhunisaṅghassa cīvara’’nti. ‘‘Na mayaṃ, ayye, sakkoma bhikkhunisaṅghassa cīvaraṃ dātu’’nti . Thullanandā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā dubbalacīvarapaccāsāya cīvarakālasamayaṃ atikkāmessatī’’ti…pe… saccaṃ kira, bhikkhave, thullanandā bhikkhunī dubbalacīvarapaccāsāya cīvarakālasamayaṃ atikkāmetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī dubbalacīvarapaccāsāya cīvarakālasamayaṃ atikkāmessati ! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
৯২১. ‘‘যা পন ভিক্খুনী দুব্বলচীৰরপচ্চাসায চীৰরকালসমযং অতিক্কামেয্য, পাচিত্তিয’’ন্তি।
921.‘‘Yā pana bhikkhunī dubbalacīvarapaccāsāya cīvarakālasamayaṃ atikkāmeyya, pācittiya’’nti.
৯২২. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি।
922.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
দুব্বলচীৰরপচ্চাসা নাম ‘‘সচে মযং সক্কোম, দস্সাম করিস্সামা’’তি ৰাচা ভিন্না হোতি।
Dubbalacīvarapaccāsā nāma ‘‘sace mayaṃ sakkoma, dassāma karissāmā’’ti vācā bhinnā hoti.
চীৰরকালসমযো নাম অনত্থতে কথিনে ৰস্সানস্স পচ্ছিমো মাসো, অত্থতে কথিনে পঞ্চ মাসা।
Cīvarakālasamayo nāma anatthate kathine vassānassa pacchimo māso, atthate kathine pañca māsā.
চীৰরকালসমযং অতিক্কামেয্যাতি অনত্থতে কথিনে ৰস্সানস্স পচ্ছিমং দিৰসং অতিক্কামেতি, আপত্তি পাচিত্তিযস্স। অত্থতে কথিনে কথিনুদ্ধারদিৰসং অতিক্কামেতি, আপত্তি পাচিত্তিযস্স।
Cīvarakālasamayaṃ atikkāmeyyāti anatthate kathine vassānassa pacchimaṃ divasaṃ atikkāmeti, āpatti pācittiyassa. Atthate kathine kathinuddhāradivasaṃ atikkāmeti, āpatti pācittiyassa.
৯২৩. দুব্বলচীৰরে দুব্বলচীৰরসঞ্ঞা চীৰরকালসমযং অতিক্কামেতি, আপত্তি পাচিত্তিযস্স। দুব্বলচীৰরে ৰেমতিকা চীৰরকালসমযং অতিক্কামেতি, আপত্তি দুক্কটস্স। দুব্বলচীৰরে অদুব্বলচীৰরসঞ্ঞা চীৰরকালসমযং অতিক্কামেতি, অনাপত্তি।
923. Dubbalacīvare dubbalacīvarasaññā cīvarakālasamayaṃ atikkāmeti, āpatti pācittiyassa. Dubbalacīvare vematikā cīvarakālasamayaṃ atikkāmeti, āpatti dukkaṭassa. Dubbalacīvare adubbalacīvarasaññā cīvarakālasamayaṃ atikkāmeti, anāpatti.
অদুব্বলচীৰরে দুব্বলচীৰরসঞ্ঞা, আপত্তি দুক্কটস্স। অদুব্বলচীৰরে ৰেমতিকা, আপত্তি দুক্কটস্স। অদুব্বলচীৰরে অদুব্বলচীৰরসঞ্ঞা, অনাপত্তি।
Adubbalacīvare dubbalacīvarasaññā, āpatti dukkaṭassa. Adubbalacīvare vematikā, āpatti dukkaṭassa. Adubbalacīvare adubbalacīvarasaññā, anāpatti.
৯২৪. অনাপত্তি আনিসংসং দস্সেত্ৰা নিৰারেতি, উম্মত্তিকায, আদিকম্মিকাযাতি।
924. Anāpatti ānisaṃsaṃ dassetvā nivāreti, ummattikāya, ādikammikāyāti.
নৰমসিক্খাপদং নিট্ঠিতং।
Navamasikkhāpadaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / ৯. নৰমসিক্খাপদৰণ্ণনা • 9. Navamasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৩. নগ্গৰগ্গৰণ্ণনা • 3. Naggavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৯. নৰমসিক্খাপদৰণ্ণনা • 9. Navamasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমাদিসিক্খাপদৰণ্ণনা • 1. Paṭhamādisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৯. নৰমসিক্খাপদং • 9. Navamasikkhāpadaṃ
