| Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ • Bhikkhunīvibhaṅga |
၉. နဝမသိက္ခာပဒံ
9. Navamasikkhāpadaṃ
၈၂၈. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန အညတရသ္သ ဗ္ရာဟ္မဏသ္သ ဘိက္ခုနူပသ္သယံ နိသ္သာယ ယဝခေတ္တံ ဟောတိ။ ဘိက္ခုနိယော ဥစ္စာရမ္ပိ ပသ္သာဝမ္ပိ သင္ကာရမ္ပိ ဝိဃာသမ္ပိ ခေတ္တေ ဆဍ္ဍေန္တိ။ အထ ခော သော ဗ္ရာဟ္မဏော ဥဇ္ဈာယတိ ခိယ္ယတိ ဝိပာစေတိ – ‘‘ကထဉ္ဟိ နာမ ဘိက္ခုနိယော အမ္ဟာကံ ယဝခေတ္တံ ဒူသေသ္သန္တီ’’တိ! အသ္သောသုံ ခော ဘိက္ခုနိယော တသ္သ ဗ္ရာဟ္မဏသ္သ ဥဇ္ဈာယန္တသ္သ ခိယ္ယန္တသ္သ ဝိပာစေန္တသ္သ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဘိက္ခုနိယော ဥစ္စာရမ္ပိ ပသ္သာဝမ္ပိ သင္ကာရမ္ပိ ဝိဃာသမ္ပိ ဟရိတေ ဆဍ္ဍေသ္သန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဥစ္စာရမ္ပိ ပသ္သာဝမ္ပိ သင္ကာရမ္ပိ ဝိဃာသမ္ပိ ဟရိတေ ဆဍ္ဍေန္တီတိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ, ဘိက္ခဝေ, ဘိက္ခုနိယော ဥစ္စာရမ္ပိ ပသ္သာဝမ္ပိ သင္ကာရမ္ပိ ဝိဃာသမ္ပိ ဟရိတေ ဆဍ္ဍေသ္သန္တိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –
828. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarassa brāhmaṇassa bhikkhunūpassayaṃ nissāya yavakhettaṃ hoti. Bhikkhuniyo uccārampi passāvampi saṅkārampi vighāsampi khette chaḍḍenti. Atha kho so brāhmaṇo ujjhāyati khiyyati vipāceti – ‘‘kathañhi nāma bhikkhuniyo amhākaṃ yavakhettaṃ dūsessantī’’ti! Assosuṃ kho bhikkhuniyo tassa brāhmaṇassa ujjhāyantassa khiyyantassa vipācentassa. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo uccārampi passāvampi saṅkārampi vighāsampi harite chaḍḍessantī’’ti…pe… saccaṃ kira, bhikkhave, bhikkhuniyo uccārampi passāvampi saṅkārampi vighāsampi harite chaḍḍentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo uccārampi passāvampi saṅkārampi vighāsampi harite chaḍḍessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
၈၂၉. ‘‘ယာ ပန ဘိက္ခုနီ ဥစ္စာရံ ဝာ ပသ္သာဝံ ဝာ သင္ကာရံ ဝာ ဝိဃာသံ ဝာ ဟရိတေ ဆဍ္ဍေယ္ယ ဝာ ဆဍ္ဍာပေယ္ယ ဝာ, ပာစိတ္တိယ’’န္တိ။
829.‘‘Yā pana bhikkhunī uccāraṃ vā passāvaṃ vā saṅkāraṃ vā vighāsaṃ vā harite chaḍḍeyya vā chaḍḍāpeyya vā, pācittiya’’nti.
၈၃၀. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။
830.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ဥစ္စာရော နာမ ဂူထော ဝုစ္စတိ။ ပသ္သာဝော နာမ မုတ္တံ ဝုစ္စတိ။
Uccāro nāma gūtho vuccati. Passāvo nāma muttaṃ vuccati.
သင္ကာရံ နာမ ကစဝရံ ဝုစ္စတိ။
Saṅkāraṃ nāma kacavaraṃ vuccati.
ဝိဃာသံ နာမ စလကာနိ ဝာ အဋ္ဌိကာနိ ဝာ ဥစ္ဆိဋ္ဌောဒကံ ဝာ။
Vighāsaṃ nāma calakāni vā aṭṭhikāni vā ucchiṭṭhodakaṃ vā.
ဟရိတံ နာမ ပုဗ္ဗဏ္ဏံ အပရဏ္ဏံ ယံ မနုသ္သာနံ ဥပဘောဂပရိဘောဂံ ရောပိမံ ။
Haritaṃ nāma pubbaṇṇaṃ aparaṇṇaṃ yaṃ manussānaṃ upabhogaparibhogaṃ ropimaṃ .
ဆဍ္ဍေယ္ယာတိ သယံ ဆဍ္ဍေတိ, အာပတ္တိ ပာစိတ္တိယသ္သ။
Chaḍḍeyyāti sayaṃ chaḍḍeti, āpatti pācittiyassa.
ဆဍ္ဍာပေယ္ယာတိ အညံ အာဏာပေတိ, အာပတ္တိ ဒုက္ကဋသ္သ။ သကိံ အာဏတ္တာ ဗဟုကမ္ပိ ဆဍ္ဍေတိ, အာပတ္တိ ပာစိတ္တိယသ္သ။
Chaḍḍāpeyyāti aññaṃ āṇāpeti, āpatti dukkaṭassa. Sakiṃ āṇattā bahukampi chaḍḍeti, āpatti pācittiyassa.
၈၃၁. ဟရိတေ ဟရိတသညာ ဆဍ္ဍေတိ ဝာ ဆဍ္ဍာပေတိ ဝာ, အာပတ္တိ ပာစိတ္တိယသ္သ။ ဟရိတေ ဝေမတိကာ ဆဍ္ဍေတိ ဝာ ဆဍ္ဍာပေတိ ဝာ, အာပတ္တိ ပာစိတ္တိယသ္သ ။ ဟရိတေ အဟရိတသညာ ဆဍ္ဍေတိ ဝာ ဆဍ္ဍာပေတိ ဝာ, အာပတ္တိ ပာစိတ္တိယသ္သ။
831. Harite haritasaññā chaḍḍeti vā chaḍḍāpeti vā, āpatti pācittiyassa. Harite vematikā chaḍḍeti vā chaḍḍāpeti vā, āpatti pācittiyassa . Harite aharitasaññā chaḍḍeti vā chaḍḍāpeti vā, āpatti pācittiyassa.
အဟရိတေ ဟရိတသညာ, အာပတ္တိ ဒုက္ကဋသ္သ။ အဟရိတေ ဝေမတိကာ, အာပတ္တိ ဒုက္ကဋသ္သ။ အဟရိတေ အဟရိတသညာ, အနာပတ္တိ။
Aharite haritasaññā, āpatti dukkaṭassa. Aharite vematikā, āpatti dukkaṭassa. Aharite aharitasaññā, anāpatti.
၈၃၂. အနာပတ္တိ ဩလောကေတ္ဝာ ဆဍ္ဍေတိ, ခေတ္တမရိယာဒေ 1 ဆဍ္ဍေတိ သာမိကေ အာပုစ္ဆိတ္ဝာ အပလောကေတ္ဝာ ဆဍ္ဍေတိ, ဥမ္မတ္တိကာယ, အာဒိကမ္မိကာယာတိ။
832. Anāpatti oloketvā chaḍḍeti, khettamariyāde 2 chaḍḍeti sāmike āpucchitvā apaloketvā chaḍḍeti, ummattikāya, ādikammikāyāti.
နဝမသိက္ခာပဒံ နိဋ္ဌိတံ။
Navamasikkhāpadaṃ niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / ၉. နဝမသိက္ခာပဒဝဏ္ဏနာ • 9. Navamasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၁. လသုဏဝဂ္ဂဝဏ္ဏနာ • 1. Lasuṇavaggavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၉. နဝမသိက္ခာပဒဝဏ္ဏနာ • 9. Navamasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁. ပဌမလသုဏာဒိသိက္ခာပဒဝဏ္ဏနာ • 1. Paṭhamalasuṇādisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၉. နဝမသိက္ခာပဒံ • 9. Navamasikkhāpadaṃ
