| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༩. ནཝམསིཀྑཱཔདཾ
9. Navamasikkhāpadaṃ
༨༢༨. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཨཉྙཏརསྶ བྲཱཧྨཎསྶ བྷིཀྑུནཱུཔསྶཡཾ ནིསྶཱཡ ཡཝཁེཏྟཾ ཧོཏི། བྷིཀྑུནིཡོ ཨུཙྩཱརམྤི པསྶཱཝམྤི སངྐཱརམྤི ཝིགྷཱསམྤི ཁེཏྟེ ཚཌྜེནྟི། ཨཐ ཁོ སོ བྲཱཧྨཎོ ཨུཛ྄ཛྷཱཡཏི ཁིཡྻཏི ཝིཔཱཙེཏི – ‘‘ཀཐཉྷི ནཱམ བྷིཀྑུནིཡོ ཨམྷཱཀཾ ཡཝཁེཏྟཾ དཱུསེསྶནྟཱི’’ཏི! ཨསྶོསུཾ ཁོ བྷིཀྑུནིཡོ ཏསྶ བྲཱཧྨཎསྶ ཨུཛ྄ཛྷཱཡནྟསྶ ཁིཡྻནྟསྶ ཝིཔཱཙེནྟསྶ། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུནིཡོ ཨུཙྩཱརམྤི པསྶཱཝམྤི སངྐཱརམྤི ཝིགྷཱསམྤི ཧརིཏེ ཚཌྜེསྶནྟཱི’’ཏི…པེ॰… སཙྩཾ ཀིར, བྷིཀྑཝེ, བྷིཀྑུནིཡོ ཨུཙྩཱརམྤི པསྶཱཝམྤི སངྐཱརམྤི ཝིགྷཱསམྤི ཧརིཏེ ཚཌྜེནྟཱིཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, བྷིཀྑུནིཡོ ཨུཙྩཱརམྤི པསྶཱཝམྤི སངྐཱརམྤི ཝིགྷཱསམྤི ཧརིཏེ ཚཌྜེསྶནྟི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
828. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarassa brāhmaṇassa bhikkhunūpassayaṃ nissāya yavakhettaṃ hoti. Bhikkhuniyo uccārampi passāvampi saṅkārampi vighāsampi khette chaḍḍenti. Atha kho so brāhmaṇo ujjhāyati khiyyati vipāceti – ‘‘kathañhi nāma bhikkhuniyo amhākaṃ yavakhettaṃ dūsessantī’’ti! Assosuṃ kho bhikkhuniyo tassa brāhmaṇassa ujjhāyantassa khiyyantassa vipācentassa. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo uccārampi passāvampi saṅkārampi vighāsampi harite chaḍḍessantī’’ti…pe… saccaṃ kira, bhikkhave, bhikkhuniyo uccārampi passāvampi saṅkārampi vighāsampi harite chaḍḍentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo uccārampi passāvampi saṅkārampi vighāsampi harite chaḍḍessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༨༢༩. ‘‘ཡཱ པན བྷིཀྑུནཱི ཨུཙྩཱརཾ ཝཱ པསྶཱཝཾ ཝཱ སངྐཱརཾ ཝཱ ཝིགྷཱསཾ ཝཱ ཧརིཏེ ཚཌྜེཡྻ ཝཱ ཚཌྜཱཔེཡྻ ཝཱ, པཱཙིཏྟིཡ’’ནྟི།
829.‘‘Yā pana bhikkhunī uccāraṃ vā passāvaṃ vā saṅkāraṃ vā vighāsaṃ vā harite chaḍḍeyya vā chaḍḍāpeyya vā, pācittiya’’nti.
༨༣༠. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
830.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ཨུཙྩཱརོ ནཱམ གཱུཐོ ཝུཙྩཏི། པསྶཱཝོ ནཱམ མུཏྟཾ ཝུཙྩཏི།
Uccāro nāma gūtho vuccati. Passāvo nāma muttaṃ vuccati.
སངྐཱརཾ ནཱམ ཀཙཝརཾ ཝུཙྩཏི།
Saṅkāraṃ nāma kacavaraṃ vuccati.
ཝིགྷཱསཾ ནཱམ ཙལཀཱནི ཝཱ ཨཊྛིཀཱནི ཝཱ ཨུཙྪིཊྛོདཀཾ ཝཱ།
Vighāsaṃ nāma calakāni vā aṭṭhikāni vā ucchiṭṭhodakaṃ vā.
ཧརིཏཾ ནཱམ པུབྦཎྞཾ ཨཔརཎྞཾ ཡཾ མནུསྶཱནཾ ཨུཔབྷོགཔརིབྷོགཾ རོཔིམཾ །
Haritaṃ nāma pubbaṇṇaṃ aparaṇṇaṃ yaṃ manussānaṃ upabhogaparibhogaṃ ropimaṃ .
ཚཌྜེཡྻཱཏི སཡཾ ཚཌྜེཏི, ཨཱཔཏྟི པཱཙིཏྟིཡསྶ།
Chaḍḍeyyāti sayaṃ chaḍḍeti, āpatti pācittiyassa.
ཚཌྜཱཔེཡྻཱཏི ཨཉྙཾ ཨཱཎཱཔེཏི, ཨཱཔཏྟི དུཀྐཊསྶ། སཀིཾ ཨཱཎཏྟཱ བཧུཀམྤི ཚཌྜེཏི, ཨཱཔཏྟི པཱཙིཏྟིཡསྶ།
Chaḍḍāpeyyāti aññaṃ āṇāpeti, āpatti dukkaṭassa. Sakiṃ āṇattā bahukampi chaḍḍeti, āpatti pācittiyassa.
༨༣༡. ཧརིཏེ ཧརིཏསཉྙཱ ཚཌྜེཏི ཝཱ ཚཌྜཱཔེཏི ཝཱ, ཨཱཔཏྟི པཱཙིཏྟིཡསྶ། ཧརིཏེ ཝེམཏིཀཱ ཚཌྜེཏི ཝཱ ཚཌྜཱཔེཏི ཝཱ, ཨཱཔཏྟི པཱཙིཏྟིཡསྶ ། ཧརིཏེ ཨཧརིཏསཉྙཱ ཚཌྜེཏི ཝཱ ཚཌྜཱཔེཏི ཝཱ, ཨཱཔཏྟི པཱཙིཏྟིཡསྶ།
831. Harite haritasaññā chaḍḍeti vā chaḍḍāpeti vā, āpatti pācittiyassa. Harite vematikā chaḍḍeti vā chaḍḍāpeti vā, āpatti pācittiyassa . Harite aharitasaññā chaḍḍeti vā chaḍḍāpeti vā, āpatti pācittiyassa.
ཨཧརིཏེ ཧརིཏསཉྙཱ, ཨཱཔཏྟི དུཀྐཊསྶ། ཨཧརིཏེ ཝེམཏིཀཱ, ཨཱཔཏྟི དུཀྐཊསྶ། ཨཧརིཏེ ཨཧརིཏསཉྙཱ, ཨནཱཔཏྟི།
Aharite haritasaññā, āpatti dukkaṭassa. Aharite vematikā, āpatti dukkaṭassa. Aharite aharitasaññā, anāpatti.
༨༣༢. ཨནཱཔཏྟི ཨོལོཀེཏྭཱ ཚཌྜེཏི, ཁེཏྟམརིཡཱདེ 1 ཚཌྜེཏི སཱམིཀེ ཨཱཔུཙྪིཏྭཱ ཨཔལོཀེཏྭཱ ཚཌྜེཏི, ཨུམྨཏྟིཀཱཡ, ཨཱདིཀམྨིཀཱཡཱཏི།
832. Anāpatti oloketvā chaḍḍeti, khettamariyāde 2 chaḍḍeti sāmike āpucchitvā apaloketvā chaḍḍeti, ummattikāya, ādikammikāyāti.
ནཝམསིཀྑཱཔདཾ ནིཊྛིཏཾ།
Navamasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༩. ནཝམསིཀྑཱཔདཝཎྞནཱ • 9. Navamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༡. ལསུཎཝགྒཝཎྞནཱ • 1. Lasuṇavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༩. ནཝམསིཀྑཱཔདཝཎྞནཱ • 9. Navamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམལསུཎཱདིསིཀྑཱཔདཝཎྞནཱ • 1. Paṭhamalasuṇādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༩. ནཝམསིཀྑཱཔདཾ • 9. Navamasikkhāpadaṃ
