| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
9. நவமஸிக்கா²பத³வண்ணனா
9. Navamasikkhāpadavaṇṇanā
969. ஏகிந்த்³ரியந்தி காயிந்த்³ரியேனேவ ஏகிந்த்³ரியங், நிக³ண்டா²னங் அசேலகானங் மதங். காபிலா பன ‘‘பஞ்சிந்த்³ரியா’’தி மஞ்ஞந்தா ஏவங் வத³ந்தி ‘‘ஸசக்கு²கத்தா அலாபு³மாலுவாத³யோ யத்த² ஆலம்ப³னங், தத்த² க³ச்ச²ந்தி. ஸஸோதகத்தா கத³லியோ மேக⁴க³ஜ்ஜிதங் ஸுத்வா க³ப்³ப⁴ங் க³ண்ஹந்தி. ஸகா⁴னகத்தா பனஸாத³யோ குணபக³ந்தே⁴ன ப²லந்தி. ஸஜிவ்ஹகத்தா உத³கங் பிவந்தி யேன, ஸப்³பே³பி ‘பாத³பா’தி வுச்சந்தி. ஸகாயபஸாத³த்தா இத்தி²ஸம்ப²ஸ்ஸேன அஸோகருக்கா² புப்ப²ந்தீ’’தி. ஸங்கா⁴தந்தி வினாஸங்.
969.Ekindriyanti kāyindriyeneva ekindriyaṃ, nigaṇṭhānaṃ acelakānaṃ mataṃ. Kāpilā pana ‘‘pañcindriyā’’ti maññantā evaṃ vadanti ‘‘sacakkhukattā alābumāluvādayo yattha ālambanaṃ, tattha gacchanti. Sasotakattā kadaliyo meghagajjitaṃ sutvā gabbhaṃ gaṇhanti. Saghānakattā panasādayo kuṇapagandhena phalanti. Sajivhakattā udakaṃ pivanti yena, sabbepi ‘pādapā’ti vuccanti. Sakāyapasādattā itthisamphassena asokarukkhā pupphantī’’ti. Saṅghātanti vināsaṃ.
970. இத⁴ ச வஸ்ஸச்சே²தே³ன து³க்கடங். பட²மங் ஆவஸித்வா பச்சா² சாரிகா சரணபச்சயா பாசித்தியங் ஆபஜ்ஜதீதி வேதி³தப்³ப³ங். அத² வஸ்ஸங் அவஸித்வா சரதி, அவஸ்ஸுபக³மனபச்சயா து³க்கடங் ஆபஜ்ஜதி. போராணக³ண்டி²பதே³ பன ‘‘அந்தோஸத்தாஹே அந்தோவஸ்ஸே சாரிகங் சரந்தியா பாசித்தியங். ஸத்தாஹகரணீயேன பன வட்டதி, பி⁴க்கு²னோ து³க்கடங் ஹோதீ’’தி வுத்தங்.
970. Idha ca vassacchedena dukkaṭaṃ. Paṭhamaṃ āvasitvā pacchā cārikā caraṇapaccayā pācittiyaṃ āpajjatīti veditabbaṃ. Atha vassaṃ avasitvā carati, avassupagamanapaccayā dukkaṭaṃ āpajjati. Porāṇagaṇṭhipade pana ‘‘antosattāhe antovasse cārikaṃ carantiyā pācittiyaṃ. Sattāhakaraṇīyena pana vaṭṭati, bhikkhuno dukkaṭaṃ hotī’’ti vuttaṃ.
972. கேனசி உப்³பா³ள்ஹாதி வஸ்ஸச்சே²த³காரணேனாதி நோ தக்கோதி ஆசரியோ. கித்தாவதா சாரிகா ஹோதீதி? இத³ங் ந ஸப்³ப³த்த² விசாரிதங். அனந்தரஸிக்கா²பதே³ ‘‘அந்தமஸோ ச²ப்பஞ்சயோஜனானிபீ’’தி வுத்தத்தா ஸோ ச மஞ்ஞே ஹெட்டி²மபரிச்சே²தோ³தி.
972.Kenaci ubbāḷhāti vassacchedakāraṇenāti no takkoti ācariyo. Kittāvatā cārikā hotīti? Idaṃ na sabbattha vicāritaṃ. Anantarasikkhāpade ‘‘antamaso chappañcayojanānipī’’ti vuttattā so ca maññe heṭṭhimaparicchedoti.
நவமஸிக்கா²பத³வண்ணனா நிட்டி²தா.
Navamasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 9. நவமஸிக்கா²பத³ங் • 9. Navamasikkhāpadaṃ
