| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
৯. নৰমসিক্খাপদৰণ্ণনা
9. Navamasikkhāpadavaṇṇanā
৯৬৯. একিন্দ্রিযন্তি কাযিন্দ্রিযেনেৰ একিন্দ্রিযং, নিগণ্ঠানং অচেলকানং মতং। কাপিলা পন ‘‘পঞ্চিন্দ্রিযা’’তি মঞ্ঞন্তা এৰং ৰদন্তি ‘‘সচক্খুকত্তা অলাবুমালুৰাদযো যত্থ আলম্বনং, তত্থ গচ্ছন্তি। সসোতকত্তা কদলিযো মেঘগজ্জিতং সুত্ৰা গব্ভং গণ্হন্তি। সঘানকত্তা পনসাদযো কুণপগন্ধেন ফলন্তি। সজিৰ্হকত্তা উদকং পিৰন্তি যেন, সব্বেপি ‘পাদপা’তি ৰুচ্চন্তি। সকাযপসাদত্তা ইত্থিসম্ফস্সেন অসোকরুক্খা পুপ্ফন্তী’’তি। সঙ্ঘাতন্তি ৰিনাসং।
969.Ekindriyanti kāyindriyeneva ekindriyaṃ, nigaṇṭhānaṃ acelakānaṃ mataṃ. Kāpilā pana ‘‘pañcindriyā’’ti maññantā evaṃ vadanti ‘‘sacakkhukattā alābumāluvādayo yattha ālambanaṃ, tattha gacchanti. Sasotakattā kadaliyo meghagajjitaṃ sutvā gabbhaṃ gaṇhanti. Saghānakattā panasādayo kuṇapagandhena phalanti. Sajivhakattā udakaṃ pivanti yena, sabbepi ‘pādapā’ti vuccanti. Sakāyapasādattā itthisamphassena asokarukkhā pupphantī’’ti. Saṅghātanti vināsaṃ.
৯৭০. ইধ চ ৰস্সচ্ছেদেন দুক্কটং। পঠমং আৰসিত্ৰা পচ্ছা চারিকা চরণপচ্চযা পাচিত্তিযং আপজ্জতীতি ৰেদিতব্বং। অথ ৰস্সং অৰসিত্ৰা চরতি, অৰস্সুপগমনপচ্চযা দুক্কটং আপজ্জতি। পোরাণগণ্ঠিপদে পন ‘‘অন্তোসত্তাহে অন্তোৰস্সে চারিকং চরন্তিযা পাচিত্তিযং। সত্তাহকরণীযেন পন ৰট্টতি, ভিক্খুনো দুক্কটং হোতী’’তি ৰুত্তং।
970. Idha ca vassacchedena dukkaṭaṃ. Paṭhamaṃ āvasitvā pacchā cārikā caraṇapaccayā pācittiyaṃ āpajjatīti veditabbaṃ. Atha vassaṃ avasitvā carati, avassupagamanapaccayā dukkaṭaṃ āpajjati. Porāṇagaṇṭhipade pana ‘‘antosattāhe antovasse cārikaṃ carantiyā pācittiyaṃ. Sattāhakaraṇīyena pana vaṭṭati, bhikkhuno dukkaṭaṃ hotī’’ti vuttaṃ.
৯৭২. কেনচি উব্বাল়্হাতি ৰস্সচ্ছেদকারণেনাতি নো তক্কোতি আচরিযো। কিত্তাৰতা চারিকা হোতীতি? ইদং ন সব্বত্থ ৰিচারিতং। অনন্তরসিক্খাপদে ‘‘অন্তমসো ছপ্পঞ্চযোজনানিপী’’তি ৰুত্তত্তা সো চ মঞ্ঞে হেট্ঠিমপরিচ্ছেদোতি।
972.Kenaci ubbāḷhāti vassacchedakāraṇenāti no takkoti ācariyo. Kittāvatā cārikā hotīti? Idaṃ na sabbattha vicāritaṃ. Anantarasikkhāpade ‘‘antamaso chappañcayojanānipī’’ti vuttattā so ca maññe heṭṭhimaparicchedoti.
নৰমসিক্খাপদৰণ্ণনা নিট্ঠিতা।
Navamasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / ভিক্খুনীৰিভঙ্গ • Bhikkhunīvibhaṅga / ৯. নৰমসিক্খাপদং • 9. Navamasikkhāpadaṃ
