| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
5. நாவங்க³பஞ்ஹோ
5. Nāvaṅgapañho
5. ‘‘ப⁴ந்தே நாக³ஸேன, ‘நாவாய தீணி அங்கா³னி க³ஹேதப்³பா³னீ’தி யங் வதே³ஸி, கதமானி தானி தீணி அங்கா³னி க³ஹேதப்³பா³னீ’’தி? ‘‘யதா², மஹாராஜ, நாவா ப³ஹுவித⁴தா³ருஸங்கா⁴டஸமவாயேன ப³ஹும்பி ஜனங் தாரயதி, ஏவமேவ கோ², மஹாராஜ, யோகி³னா யோகா³வசரேன ஆசாரஸீலகு³ணவத்தப்படிவத்தப³ஹுவித⁴த⁴ம்மஸங்கா⁴டஸமவாயேன ஸதே³வகோ லோகோ தாரயிதப்³போ³. இத³ங், மஹாராஜ, நாவாய பட²மங் அங்க³ங் க³ஹேதப்³ப³ங்.
5. ‘‘Bhante nāgasena, ‘nāvāya tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, nāvā bahuvidhadārusaṅghāṭasamavāyena bahumpi janaṃ tārayati, evameva kho, mahārāja, yoginā yogāvacarena ācārasīlaguṇavattappaṭivattabahuvidhadhammasaṅghāṭasamavāyena sadevako loko tārayitabbo. Idaṃ, mahārāja, nāvāya paṭhamaṃ aṅgaṃ gahetabbaṃ.
‘‘புன சபரங், மஹாராஜ, நாவா ப³ஹுவித⁴ஊமித்த²னிதவேக³விஸடமாவட்டவேக³ங் ஸஹதி, ஏவமேவ கோ², மஹாராஜ, யோகி³னா யோகா³வசரேன ப³ஹுவித⁴கிலேஸஊமிவேக³ங் லாப⁴ஸக்காரயஸஸிலோகபூஜனவந்த³னா பரகுலேஸு நிந்தா³பஸங்ஸாஸுக²து³க்க²ஸம்மானநவிமானநப³ஹுவித⁴தோ³ஸஊமிவேக³ஞ்ச ஸஹிதப்³ப³ங். இத³ங், மஹாராஜ, நாவாய து³தியங் அங்க³ங் க³ஹேதப்³ப³ங்.
‘‘Puna caparaṃ, mahārāja, nāvā bahuvidhaūmitthanitavegavisaṭamāvaṭṭavegaṃ sahati, evameva kho, mahārāja, yoginā yogāvacarena bahuvidhakilesaūmivegaṃ lābhasakkārayasasilokapūjanavandanā parakulesu nindāpasaṃsāsukhadukkhasammānanavimānanabahuvidhadosaūmivegañca sahitabbaṃ. Idaṃ, mahārāja, nāvāya dutiyaṃ aṅgaṃ gahetabbaṃ.
‘‘புன சபரங், மஹாராஜ, நாவா அபரிமிதமனந்தமபாரமக்கோ²பி⁴தக³ம்பீ⁴ரே மஹதிமஹாகோ⁴ஸே திமிதிமிங்க³லமகரமச்ச²க³ணாகுலே மஹதிமஹாஸமுத்³தே³ சரதி, ஏவமேவ கோ², மஹாராஜ, யோகி³னா யோகா³வசரேன திபரிவட்ட த்³வாத³ஸாகார சதுஸச்சாபி⁴ஸமயப்படிவேதே⁴ மானஸங் ஸஞ்சாரயிதப்³ப³ங். இத³ங், மஹாராஜ, நாவாய ததியங் அங்க³ங் க³ஹேதப்³ப³ங். பா⁴ஸிதம்பேதங், மஹாராஜ, ப⁴க³வதா தே³வாதிதே³வேன ஸங்யுத்தனிகாயவரே ஸச்சஸங்யுத்தே –
‘‘Puna caparaṃ, mahārāja, nāvā aparimitamanantamapāramakkhobhitagambhīre mahatimahāghose timitimiṅgalamakaramacchagaṇākule mahatimahāsamudde carati, evameva kho, mahārāja, yoginā yogāvacarena tiparivaṭṭa dvādasākāra catusaccābhisamayappaṭivedhe mānasaṃ sañcārayitabbaṃ. Idaṃ, mahārāja, nāvāya tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare saccasaṃyutte –
‘‘‘விதக்கெந்தா ச கோ² தும்ஹே, பி⁴க்க²வே, ‘‘இத³ங் து³க்க²’’ந்தி விதக்கெய்யாத², ‘‘அயங் து³க்க²ஸமுத³யோ’’தி விதக்கெய்யாத², ‘‘அயங் து³க்க²னிரோதோ⁴’’தி விதக்கெய்யாத², ‘‘அயங் து³க்க²னிரோத⁴கா³மினீ படிபதா³’’தி விதக்கெய்யாதா²’’’தி.
‘‘‘Vitakkentā ca kho tumhe, bhikkhave, ‘‘idaṃ dukkha’’nti vitakkeyyātha, ‘‘ayaṃ dukkhasamudayo’’ti vitakkeyyātha, ‘‘ayaṃ dukkhanirodho’’ti vitakkeyyātha, ‘‘ayaṃ dukkhanirodhagāminī paṭipadā’’ti vitakkeyyāthā’’’ti.
நாவங்க³பஞ்ஹோ பஞ்சமோ.
Nāvaṅgapañho pañcamo.
