| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
8. නවඞ්‌ගුපොසථසුත්‌තං
8. Navaṅguposathasuttaṃ
18. ‘‘නවහි , භික්‌ඛවෙ, අඞ්‌ගෙහි සමන්‌නාගතො උපොසථො උපවුත්‌ථො මහප්‌ඵලො හොති මහානිසංසො මහාජුතිකො මහාවිප්‌ඵාරො. කථං උපවුත්‌ථො ච, භික්‌ඛවෙ, නවහඞ්‌ගෙහි සමන්‌නාගතො උපොසථො මහප්‌ඵලො හොති මහානිසංසො මහාජුතිකො මහාවිප්‌ඵාරො? ඉධ, භික්‌ඛවෙ, අරියසාවකො ඉති පටිසඤ්‌චික්‌ඛති – ‘යාවජීවං අරහන්‌තො පාණාතිපාතං පහාය පාණාතිපාතා පටිවිරතා නිහිතදණ්‌ඩා නිහිතසත්‌ථා ලජ්‌ජී දයාපන්‌නා සබ්‌බපාණභූතහිතානුකම්‌පිනො විහරන්‌ති; අහම්‌පජ්‌ජ ඉමඤ්‌ච රත්‌තිං ඉමඤ්‌ච දිවසං පාණාතිපාතං පහාය පාණාතිපාතා පටිවිරතො නිහිතදණ්‌ඩො නිහිතසත්‌ථො ලජ්‌ජී දයාපන්‌නො සබ්‌බපාණභූතහිතානුකම්‌පී විහරාමි. ඉමිනාපඞ්‌ගෙන 1 අරහතං අනුකරොමි; උපොසථො ච මෙ උපවුත්‌ථො භවිස්‌සතී’ති. ඉමිනා පඨමෙන අඞ්‌ගෙන සමන්‌නාගතො හොති…පෙ. ….
18. ‘‘Navahi , bhikkhave, aṅgehi samannāgato uposatho upavuttho mahapphalo hoti mahānisaṃso mahājutiko mahāvipphāro. Kathaṃ upavuttho ca, bhikkhave, navahaṅgehi samannāgato uposatho mahapphalo hoti mahānisaṃso mahājutiko mahāvipphāro? Idha, bhikkhave, ariyasāvako iti paṭisañcikkhati – ‘yāvajīvaṃ arahanto pāṇātipātaṃ pahāya pāṇātipātā paṭiviratā nihitadaṇḍā nihitasatthā lajjī dayāpannā sabbapāṇabhūtahitānukampino viharanti; ahampajja imañca rattiṃ imañca divasaṃ pāṇātipātaṃ pahāya pāṇātipātā paṭivirato nihitadaṇḍo nihitasattho lajjī dayāpanno sabbapāṇabhūtahitānukampī viharāmi. Imināpaṅgena 2 arahataṃ anukaromi; uposatho ca me upavuttho bhavissatī’ti. Iminā paṭhamena aṅgena samannāgato hoti…pe. ….
‘‘‘යාවජීවං අරහන්‌තො උච්‌චාසයනමහාසයනං පහාය උච්‌චාසයනමහාසයනා පටිවිරතා නීචසෙය්‍යං කප්‌පෙන්‌ති – මඤ්‌චකෙ වා තිණසන්‌ථාරකෙ වා; අහම්‌පජ්‌ජ ඉමඤ්‌ච රත්‌තිං ඉමඤ්‌ච දිවසං උච්‌චාසයනමහාසයනං පහාය උච්‌චාසයනමහාසයනා පටිවිරතො නීචසෙය්‍යං කප්‌පෙමි – මඤ්‌චකෙ වා තිණසන්‌ථාරකෙ වා. ඉමිනාපඞ්‌ගෙන අරහතං අනුකරොමි; උපොසථො ච මෙ උපවුත්‌ථො භවිස්‌සතී’ති. ඉමිනා අට්‌ඨමෙන අඞ්‌ගෙන සමන්‌නාගතො හොති.
‘‘‘Yāvajīvaṃ arahanto uccāsayanamahāsayanaṃ pahāya uccāsayanamahāsayanā paṭiviratā nīcaseyyaṃ kappenti – mañcake vā tiṇasanthārake vā; ahampajja imañca rattiṃ imañca divasaṃ uccāsayanamahāsayanaṃ pahāya uccāsayanamahāsayanā paṭivirato nīcaseyyaṃ kappemi – mañcake vā tiṇasanthārake vā. Imināpaṅgena arahataṃ anukaromi; uposatho ca me upavuttho bhavissatī’ti. Iminā aṭṭhamena aṅgena samannāgato hoti.
‘‘මෙත්‌තාසහගතෙන චෙතසා එකං දිසං ඵරිත්‌වා විහරති, තථා දුතියං තථා තතියං තථා චතුත්‌ථං. ඉති උද්‌ධමධො තිරියං සබ්‌බධි සබ්‌බත්‌තතාය සබ්‌බාවන්‌තං ලොකං මෙත්‌තාසහගතෙන චෙතසා විපුලෙන මහග්‌ගතෙන අප්‌පමාණෙන අවෙරෙන අබ්‍යාපජ්‌ජෙන 3 ඵරිත්‌වා විහරති. ඉමිනා නවමෙන අඞ්‌ගෙන සමන්‌නාගතො හොති. එවං උපවුත්‌ථො ඛො, භික්‌ඛවෙ, නවහඞ්‌ගෙහි සමන්‌නාගතො උපොසථො මහප්‌ඵලො හොති මහානිසංසො මහාජුතිකො මහාවිප්‌ඵාරො’’ති. අට්‌ඨමං.
‘‘Mettāsahagatena cetasā ekaṃ disaṃ pharitvā viharati, tathā dutiyaṃ tathā tatiyaṃ tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjena 4 pharitvā viharati. Iminā navamena aṅgena samannāgato hoti. Evaṃ upavuttho kho, bhikkhave, navahaṅgehi samannāgato uposatho mahapphalo hoti mahānisaṃso mahājutiko mahāvipphāro’’ti. Aṭṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7-8. කුලසුත්‌තාදිවණ්‌ණනා • 7-8. Kulasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5-9. ගණ්‌ඩසුත්‌තාදිවණ්‌ණනා • 5-9. Gaṇḍasuttādivaṇṇanā
