| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༨. ནཝངྒུཔོསཐསུཏྟཾ
8. Navaṅguposathasuttaṃ
༡༨. ‘‘ནཝཧི , བྷིཀྑཝེ, ཨངྒེཧི སམནྣཱགཏོ ཨུཔོསཐོ ཨུཔཝུཏྠོ མཧཔྥལོ ཧོཏི མཧཱནིསཾསོ མཧཱཛུཏིཀོ མཧཱཝིཔྥཱརོ། ཀཐཾ ཨུཔཝུཏྠོ ཙ, བྷིཀྑཝེ, ནཝཧངྒེཧི སམནྣཱགཏོ ཨུཔོསཐོ མཧཔྥལོ ཧོཏི མཧཱནིསཾསོ མཧཱཛུཏིཀོ མཧཱཝིཔྥཱརོ? ཨིདྷ, བྷིཀྑཝེ, ཨརིཡསཱཝཀོ ཨིཏི པཊིསཉྩིཀྑཏི – ‘ཡཱཝཛཱིཝཾ ཨརཧནྟོ པཱཎཱཏིཔཱཏཾ པཧཱཡ པཱཎཱཏིཔཱཏཱ པཊིཝིརཏཱ ནིཧིཏདཎྜཱ ནིཧིཏསཏྠཱ ལཛྫཱི དཡཱཔནྣཱ སབྦཔཱཎབྷཱུཏཧིཏཱནུཀམྤིནོ ཝིཧརནྟི; ཨཧམྤཛྫ ཨིམཉྩ རཏྟིཾ ཨིམཉྩ དིཝསཾ པཱཎཱཏིཔཱཏཾ པཧཱཡ པཱཎཱཏིཔཱཏཱ པཊིཝིརཏོ ནིཧིཏདཎྜོ ནིཧིཏསཏྠོ ལཛྫཱི དཡཱཔནྣོ སབྦཔཱཎབྷཱུཏཧིཏཱནུཀམྤཱི ཝིཧརཱམི། ཨིམིནཱཔངྒེན 1 ཨརཧཏཾ ཨནུཀརོམི; ཨུཔོསཐོ ཙ མེ ཨུཔཝུཏྠོ བྷཝིསྶཏཱི’ཏི། ཨིམིནཱ པཋམེན ཨངྒེན སམནྣཱགཏོ ཧོཏི…པེ॰ …།
18. ‘‘Navahi , bhikkhave, aṅgehi samannāgato uposatho upavuttho mahapphalo hoti mahānisaṃso mahājutiko mahāvipphāro. Kathaṃ upavuttho ca, bhikkhave, navahaṅgehi samannāgato uposatho mahapphalo hoti mahānisaṃso mahājutiko mahāvipphāro? Idha, bhikkhave, ariyasāvako iti paṭisañcikkhati – ‘yāvajīvaṃ arahanto pāṇātipātaṃ pahāya pāṇātipātā paṭiviratā nihitadaṇḍā nihitasatthā lajjī dayāpannā sabbapāṇabhūtahitānukampino viharanti; ahampajja imañca rattiṃ imañca divasaṃ pāṇātipātaṃ pahāya pāṇātipātā paṭivirato nihitadaṇḍo nihitasattho lajjī dayāpanno sabbapāṇabhūtahitānukampī viharāmi. Imināpaṅgena 2 arahataṃ anukaromi; uposatho ca me upavuttho bhavissatī’ti. Iminā paṭhamena aṅgena samannāgato hoti…pe. ….
‘‘‘ཡཱཝཛཱིཝཾ ཨརཧནྟོ ཨུཙྩཱསཡནམཧཱསཡནཾ པཧཱཡ ཨུཙྩཱསཡནམཧཱསཡནཱ པཊིཝིརཏཱ ནཱིཙསེཡྻཾ ཀཔྤེནྟི – མཉྩཀེ ཝཱ ཏིཎསནྠཱརཀེ ཝཱ; ཨཧམྤཛྫ ཨིམཉྩ རཏྟིཾ ཨིམཉྩ དིཝསཾ ཨུཙྩཱསཡནམཧཱསཡནཾ པཧཱཡ ཨུཙྩཱསཡནམཧཱསཡནཱ པཊིཝིརཏོ ནཱིཙསེཡྻཾ ཀཔྤེམི – མཉྩཀེ ཝཱ ཏིཎསནྠཱརཀེ ཝཱ། ཨིམིནཱཔངྒེན ཨརཧཏཾ ཨནུཀརོམི; ཨུཔོསཐོ ཙ མེ ཨུཔཝུཏྠོ བྷཝིསྶཏཱི’ཏི། ཨིམིནཱ ཨཊྛམེན ཨངྒེན སམནྣཱགཏོ ཧོཏི།
‘‘‘Yāvajīvaṃ arahanto uccāsayanamahāsayanaṃ pahāya uccāsayanamahāsayanā paṭiviratā nīcaseyyaṃ kappenti – mañcake vā tiṇasanthārake vā; ahampajja imañca rattiṃ imañca divasaṃ uccāsayanamahāsayanaṃ pahāya uccāsayanamahāsayanā paṭivirato nīcaseyyaṃ kappemi – mañcake vā tiṇasanthārake vā. Imināpaṅgena arahataṃ anukaromi; uposatho ca me upavuttho bhavissatī’ti. Iminā aṭṭhamena aṅgena samannāgato hoti.
‘‘མེཏྟཱསཧགཏེན ཙེཏསཱ ཨེཀཾ དིསཾ ཕརིཏྭཱ ཝིཧརཏི, ཏཐཱ དུཏིཡཾ ཏཐཱ ཏཏིཡཾ ཏཐཱ ཙཏུཏྠཾ། ཨིཏི ཨུདྡྷམདྷོ ཏིརིཡཾ སབྦདྷི སབྦཏྟཏཱཡ སབྦཱཝནྟཾ ལོཀཾ མེཏྟཱསཧགཏེན ཙེཏསཱ ཝིཔུལེན མཧགྒཏེན ཨཔྤམཱཎེན ཨཝེརེན ཨབྱཱཔཛྫེན 3 ཕརིཏྭཱ ཝིཧརཏི། ཨིམིནཱ ནཝམེན ཨངྒེན སམནྣཱགཏོ ཧོཏི། ཨེཝཾ ཨུཔཝུཏྠོ ཁོ, བྷིཀྑཝེ, ནཝཧངྒེཧི སམནྣཱགཏོ ཨུཔོསཐོ མཧཔྥལོ ཧོཏི མཧཱནིསཾསོ མཧཱཛུཏིཀོ མཧཱཝིཔྥཱརོ’’ཏི། ཨཊྛམཾ།
‘‘Mettāsahagatena cetasā ekaṃ disaṃ pharitvā viharati, tathā dutiyaṃ tathā tatiyaṃ tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjena 4 pharitvā viharati. Iminā navamena aṅgena samannāgato hoti. Evaṃ upavuttho kho, bhikkhave, navahaṅgehi samannāgato uposatho mahapphalo hoti mahānisaṃso mahājutiko mahāvipphāro’’ti. Aṭṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༧-༨. ཀུལསུཏྟཱདིཝཎྞནཱ • 7-8. Kulasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༥-༩. གཎྜསུཏྟཱདིཝཎྞནཱ • 5-9. Gaṇḍasuttādivaṇṇanā
