| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৫. নৰসঙ্গহৰগ্গো
5. Navasaṅgahavaggo
৫০১. নৰসঙ্গহা – ৰত্থুসঙ্গহো, ৰিপত্তিসঙ্গহো আপত্তিসঙ্গহো, নিদানসঙ্গহো, পুগ্গলসঙ্গহো, খন্ধসঙ্গহো, সমুট্ঠানসঙ্গহো, অধিকরণসঙ্গহো, সমথসঙ্গহোতি।
501. Navasaṅgahā – vatthusaṅgaho, vipattisaṅgaho āpattisaṅgaho, nidānasaṅgaho, puggalasaṅgaho, khandhasaṅgaho, samuṭṭhānasaṅgaho, adhikaraṇasaṅgaho, samathasaṅgahoti.
অধিকরণে সমুপ্পন্নে সচে উভো অত্থপচ্চত্থিকা আগচ্ছন্তি উভিন্নম্পি ৰত্থু আরোচাপেতব্বং। উভিন্নম্পি ৰত্থু আরোচাপেত্ৰা উভিন্নম্পি পটিঞ্ঞা সোতব্বা। উভিন্নম্পি পটিঞ্ঞং সুত্ৰা উভোপি ৰত্তব্বা – ‘‘অম্হাকং ইমস্মিং অধিকরণে ৰূপসমিতে 1 উভোপি তুট্ঠা ভৰিস্সথা’’তি। সচে আহংসু – ‘‘উভোপি তুট্ঠা ভৰিস্সামা’’তি, সঙ্ঘেন তং অধিকরণং সম্পটিচ্ছিতব্বং। সচে অলজ্জুস্সন্না হোতি, পরিসা উব্বাহিকায ৰূপসমেতব্বং। সচে বালুস্সন্না হোতি, পরিসা ৰিনযধরো পরিযেসিতব্বো যেন ধম্মেন যেন ৰিনযেন যেন সত্থুসাসনেন তং অধিকরণং ৰূপসম্মতি। তথা তং অধিকরণং ৰূপসমেতব্বং।
Adhikaraṇe samuppanne sace ubho atthapaccatthikā āgacchanti ubhinnampi vatthu ārocāpetabbaṃ. Ubhinnampi vatthu ārocāpetvā ubhinnampi paṭiññā sotabbā. Ubhinnampi paṭiññaṃ sutvā ubhopi vattabbā – ‘‘amhākaṃ imasmiṃ adhikaraṇe vūpasamite 2 ubhopi tuṭṭhā bhavissathā’’ti. Sace āhaṃsu – ‘‘ubhopi tuṭṭhā bhavissāmā’’ti, saṅghena taṃ adhikaraṇaṃ sampaṭicchitabbaṃ. Sace alajjussannā hoti, parisā ubbāhikāya vūpasametabbaṃ. Sace bālussannā hoti, parisā vinayadharo pariyesitabbo yena dhammena yena vinayena yena satthusāsanena taṃ adhikaraṇaṃ vūpasammati. Tathā taṃ adhikaraṇaṃ vūpasametabbaṃ.
ৰত্থু জানিতব্বং, গোত্তং জানিতব্বং, নামং জানিতব্বং, আপত্তি জানিতব্বা।
Vatthu jānitabbaṃ, gottaṃ jānitabbaṃ, nāmaṃ jānitabbaṃ, āpatti jānitabbā.
মেথুনধম্মোতি ৰত্থু চেৰ গোত্তঞ্চ – পারাজিকন্তি নামঞ্চেৰ আপত্তি চ।
Methunadhammoti vatthu ceva gottañca – pārājikanti nāmañceva āpatti ca.
অদিন্নাদানন্তি ৰত্থু চেৰ গোত্তঞ্চ – পারাজিকন্তি নামঞ্চেৰ আপত্তি চ।
Adinnādānanti vatthu ceva gottañca – pārājikanti nāmañceva āpatti ca.
মনুস্সৰিগ্গহোতি ৰত্থু চেৰ গোত্তঞ্চ – পারাজিকন্তি নামঞ্চেৰ আপত্তি চ।
Manussaviggahoti vatthu ceva gottañca – pārājikanti nāmañceva āpatti ca.
উত্তরিমনুস্সধম্মোতি ৰত্থু চেৰ গোত্তঞ্চ – পারাজিকন্তি নামঞ্চেৰ আপত্তি চ।
Uttarimanussadhammoti vatthu ceva gottañca – pārājikanti nāmañceva āpatti ca.
সুক্কৰিস্সট্ঠীতি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ।
Sukkavissaṭṭhīti vatthu ceva gottañca – saṅghādisesoti nāmañceva āpatti ca.
কাযসংসগ্গোতি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ।
Kāyasaṃsaggoti vatthu ceva gottañca – saṅghādisesoti nāmañceva āpatti ca.
দুট্ঠুল্লৰাচাতি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ।
Duṭṭhullavācāti vatthu ceva gottañca – saṅghādisesoti nāmañceva āpatti ca.
অত্তকামন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ।
Attakāmanti vatthu ceva gottañca – saṅghādisesoti nāmañceva āpatti ca.
সঞ্চরিত্তন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ।
Sañcarittanti vatthu ceva gottañca – saṅghādisesoti nāmañceva āpatti ca.
সঞ্ঞাচিকায কুটিং কারাপনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ।
Saññācikāya kuṭiṃ kārāpananti vatthu ceva gottañca – saṅghādisesoti nāmañceva āpatti ca.
মহল্লকং ৰিহারং কারাপনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ।
Mahallakaṃ vihāraṃ kārāpananti vatthu ceva gottañca – saṅghādisesoti nāmañceva āpatti ca.
ভিক্খুং অমূলকেন পারাজিকেন ধম্মেন অনুদ্ধংসনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ।
Bhikkhuṃ amūlakena pārājikena dhammena anuddhaṃsananti vatthu ceva gottañca – saṅghādisesoti nāmañceva āpatti ca.
ভিক্খুং অঞ্ঞভাগিযস্স অধিকরণস্স কিঞ্চি দেসং লেসমত্তং উপাদায পারাজিকেন ধম্মেন অনুদ্ধংসনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ।
Bhikkhuṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsananti vatthu ceva gottañca – saṅghādisesoti nāmañceva āpatti ca.
সঙ্ঘভেদকস্স ভিক্খুনো যাৰততিযং সমনুভাসনায ন পটিনিস্সজ্জনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ।
Saṅghabhedakassa bhikkhuno yāvatatiyaṃ samanubhāsanāya na paṭinissajjananti vatthu ceva gottañca – saṅghādisesoti nāmañceva āpatti ca.
ভেদকানুৰত্তকানং ভিক্খূনং যাৰততিযং সমনুভাসনায ন পটিনিস্সজ্জনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ।
Bhedakānuvattakānaṃ bhikkhūnaṃ yāvatatiyaṃ samanubhāsanāya na paṭinissajjananti vatthu ceva gottañca – saṅghādisesoti nāmañceva āpatti ca.
দুব্বচস্স ভিক্খুনো যাৰততিযং সমনুভাসনায ন পটিনিস্সজ্জনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ।
Dubbacassa bhikkhuno yāvatatiyaṃ samanubhāsanāya na paṭinissajjananti vatthu ceva gottañca – saṅghādisesoti nāmañceva āpatti ca.
কুলদূসকস্স ভিক্খুনো যাৰততিযং সমনুভাসনায ন পটিনিস্সজ্জনন্তি ৰত্থু চেৰ গোত্তঞ্চ – সঙ্ঘাদিসেসোতি নামঞ্চেৰ আপত্তি চ…পে॰…।
Kuladūsakassa bhikkhuno yāvatatiyaṃ samanubhāsanāya na paṭinissajjananti vatthu ceva gottañca – saṅghādisesoti nāmañceva āpatti ca…pe….
অনাদরিযং পটিচ্চ উদকে উচ্চারং ৰা পস্সাৰং ৰা খেল়ং ৰা করণন্তি ৰত্থু চেৰ গোত্তঞ্চ – দুক্কটন্তি নামঞ্চেৰ আপত্তি চাতি।
Anādariyaṃ paṭicca udake uccāraṃ vā passāvaṃ vā kheḷaṃ vā karaṇanti vatthu ceva gottañca – dukkaṭanti nāmañceva āpatti cāti.
নৰসঙ্গহৰগ্গো নিট্ঠিতো পঞ্চমো।
Navasaṅgahavaggo niṭṭhito pañcamo.
তস্সুদ্দানং –
Tassuddānaṃ –
অপলোকনং ঞত্তি চ, দুতিযং চতুত্থেন চ।
Apalokanaṃ ñatti ca, dutiyaṃ catutthena ca;
ৰত্থু ঞত্তি অনুস্সাৰনং, সীমা পরিসমেৰ চ॥
Vatthu ñatti anussāvanaṃ, sīmā parisameva ca.
সম্মুখা পটিপুচ্ছা চ, পটিঞ্ঞা ৰিনযারহো।
Sammukhā paṭipucchā ca, paṭiññā vinayāraho;
ৰত্থু সঙ্ঘপুগ্গলঞ্চ, ঞত্তিং ন পচ্ছা ঞত্তি চ॥
Vatthu saṅghapuggalañca, ñattiṃ na pacchā ñatti ca.
ৰত্থুং সঙ্ঘপুগ্গলঞ্চ, সাৰনং অকালেন চ।
Vatthuṃ saṅghapuggalañca, sāvanaṃ akālena ca;
অতিখুদ্দকা মহন্তা চ, খণ্ডচ্ছাযা নিমিত্তকা॥
Atikhuddakā mahantā ca, khaṇḍacchāyā nimittakā.
বহিনদী সমুদ্দে চ, জাতস্সরে চ ভিন্দতি।
Bahinadī samudde ca, jātassare ca bhindati;
অজ্ঝোত্থরতি সীমায, চতু পঞ্চ চ ৰগ্গিকা॥
Ajjhottharati sīmāya, catu pañca ca vaggikā.
দস ৰীসতিৰগ্গা চ, অনাহটা চ আহটা।
Dasa vīsativaggā ca, anāhaṭā ca āhaṭā;
কম্মপত্তা ছন্দারহা, কম্মারহা চ পুগ্গলা॥
Kammapattā chandārahā, kammārahā ca puggalā.
অপলোকনং পঞ্চট্ঠানং, ঞত্তি চ নৰঠানিকা।
Apalokanaṃ pañcaṭṭhānaṃ, ñatti ca navaṭhānikā;
ঞত্তি দুতিযং সত্তট্ঠানং, চতুত্থা সত্তঠানিকা॥
Ñatti dutiyaṃ sattaṭṭhānaṃ, catutthā sattaṭhānikā.
সুট্ঠু ফাসু চ দুম্মঙ্কু, পেসলা চাপি আসৰা।
Suṭṭhu phāsu ca dummaṅku, pesalā cāpi āsavā;
ৰেরৰজ্জভযঞ্চেৰ, অকুসলং গিহীনঞ্চ॥
Veravajjabhayañceva, akusalaṃ gihīnañca.
পাপিচ্ছা অপ্পসন্নানং, পসন্না ধম্মট্ঠপনা।
Pāpicchā appasannānaṃ, pasannā dhammaṭṭhapanā;
ৰিনযানুগ্গহা চেৰ, পাতিমোক্খুদ্দেসেন চ॥
Vinayānuggahā ceva, pātimokkhuddesena ca.
পাতিমোক্খঞ্চ ঠপনা, পৰারণঞ্চ ঠপনং।
Pātimokkhañca ṭhapanā, pavāraṇañca ṭhapanaṃ;
তজ্জনীযা নিযস্সঞ্চ, পব্বাজনীয পটিসারণী।
Tajjanīyā niyassañca, pabbājanīya paṭisāraṇī;
উক্খেপন পরিৰাসং, মূলমানত্তঅব্ভানং।
Ukkhepana parivāsaṃ, mūlamānattaabbhānaṃ;
ওসারণং নিস্সারণং, তথেৰ উপসম্পদা॥
Osāraṇaṃ nissāraṇaṃ, tatheva upasampadā.
অপলোকনঞত্তি চ, দুতিযঞ্চ চতুত্থকং।
Apalokanañatti ca, dutiyañca catutthakaṃ;
অপঞ্ঞত্তেনুপঞ্ঞত্তং, সম্মুখাৰিনযো সতি॥
Apaññattenupaññattaṃ, sammukhāvinayo sati.
অমূল়্হপটিযেভুয্য, পাপিয তিণৰত্থারকং।
Amūḷhapaṭiyebhuyya, pāpiya tiṇavatthārakaṃ;
ৰত্থু ৰিপত্তি আপত্তি, নিদানং পুগ্গলেন চ॥
Vatthu vipatti āpatti, nidānaṃ puggalena ca.
খন্ধা চেৰ সমুট্ঠানা, অধিকরণমেৰ চ।
Khandhā ceva samuṭṭhānā, adhikaraṇameva ca;
সমথা সঙ্গহা চেৰ, নামআপত্তিকা তথাতি॥
Samathā saṅgahā ceva, nāmaāpattikā tathāti.
পরিৰারো নিট্ঠিতো।
Parivāro niṭṭhito.
পরিৰারপাল়ি নিট্ঠিতা।
Parivārapāḷi niṭṭhitā.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / অত্থৰসৰগ্গাদিৰণ্ণনা • Atthavasavaggādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / অত্থৰসৰগ্গাদিৰণ্ণনা • Atthavasavaggādivaṇṇanā
