| Library / Tipiṭaka / តិបិដក • Tipiṭaka / បរិវារបាឡិ • Parivārapāḷi |
៥. នវសង្គហវគ្គោ
5. Navasaṅgahavaggo
៥០១. នវសង្គហា – វត្ថុសង្គហោ, វិបត្តិសង្គហោ អាបត្តិសង្គហោ, និទានសង្គហោ, បុគ្គលសង្គហោ, ខន្ធសង្គហោ, សមុដ្ឋានសង្គហោ, អធិករណសង្គហោ, សមថសង្គហោតិ។
501. Navasaṅgahā – vatthusaṅgaho, vipattisaṅgaho āpattisaṅgaho, nidānasaṅgaho, puggalasaṅgaho, khandhasaṅgaho, samuṭṭhānasaṅgaho, adhikaraṇasaṅgaho, samathasaṅgahoti.
អធិករណេ សមុប្បន្នេ សចេ ឧភោ អត្ថបច្ចត្ថិកា អាគច្ឆន្តិ ឧភិន្នម្បិ វត្ថុ អារោចាបេតព្ពំ។ ឧភិន្នម្បិ វត្ថុ អារោចាបេត្វា ឧភិន្នម្បិ បដិញ្ញា សោតព្ពា។ ឧភិន្នម្បិ បដិញ្ញំ សុត្វា ឧភោបិ វត្តព្ពា – ‘‘អម្ហាកំ ឥមស្មិំ អធិករណេ វូបសមិតេ 1 ឧភោបិ តុដ្ឋា ភវិស្សថា’’តិ។ សចេ អាហំសុ – ‘‘ឧភោបិ តុដ្ឋា ភវិស្សាមា’’តិ, សង្ឃេន តំ អធិករណំ សម្បដិច្ឆិតព្ពំ។ សចេ អលជ្ជុស្សន្នា ហោតិ, បរិសា ឧព្ពាហិកាយ វូបសមេតព្ពំ។ សចេ ពាលុស្សន្នា ហោតិ, បរិសា វិនយធរោ បរិយេសិតព្ពោ យេន ធម្មេន យេន វិនយេន យេន សត្ថុសាសនេន តំ អធិករណំ វូបសម្មតិ។ តថា តំ អធិករណំ វូបសមេតព្ពំ។
Adhikaraṇe samuppanne sace ubho atthapaccatthikā āgacchanti ubhinnampi vatthu ārocāpetabbaṃ. Ubhinnampi vatthu ārocāpetvā ubhinnampi paṭiññā sotabbā. Ubhinnampi paṭiññaṃ sutvā ubhopi vattabbā – ‘‘amhākaṃ imasmiṃ adhikaraṇe vūpasamite 2 ubhopi tuṭṭhā bhavissathā’’ti. Sace āhaṃsu – ‘‘ubhopi tuṭṭhā bhavissāmā’’ti, saṅghena taṃ adhikaraṇaṃ sampaṭicchitabbaṃ. Sace alajjussannā hoti, parisā ubbāhikāya vūpasametabbaṃ. Sace bālussannā hoti, parisā vinayadharo pariyesitabbo yena dhammena yena vinayena yena satthusāsanena taṃ adhikaraṇaṃ vūpasammati. Tathā taṃ adhikaraṇaṃ vūpasametabbaṃ.
វត្ថុ ជានិតព្ពំ, គោត្តំ ជានិតព្ពំ, នាមំ ជានិតព្ពំ, អាបត្តិ ជានិតព្ពា។
Vatthu jānitabbaṃ, gottaṃ jānitabbaṃ, nāmaṃ jānitabbaṃ, āpatti jānitabbā.
មេថុនធម្មោតិ វត្ថុ ចេវ គោត្តញ្ច – បារាជិកន្តិ នាមញ្ចេវ អាបត្តិ ច។
Methunadhammoti vatthu ceva gottañca – pārājikanti nāmañceva āpatti ca.
អទិន្នាទានន្តិ វត្ថុ ចេវ គោត្តញ្ច – បារាជិកន្តិ នាមញ្ចេវ អាបត្តិ ច។
Adinnādānanti vatthu ceva gottañca – pārājikanti nāmañceva āpatti ca.
មនុស្សវិគ្គហោតិ វត្ថុ ចេវ គោត្តញ្ច – បារាជិកន្តិ នាមញ្ចេវ អាបត្តិ ច។
Manussaviggahoti vatthu ceva gottañca – pārājikanti nāmañceva āpatti ca.
ឧត្តរិមនុស្សធម្មោតិ វត្ថុ ចេវ គោត្តញ្ច – បារាជិកន្តិ នាមញ្ចេវ អាបត្តិ ច។
Uttarimanussadhammoti vatthu ceva gottañca – pārājikanti nāmañceva āpatti ca.
សុក្កវិស្សដ្ឋីតិ វត្ថុ ចេវ គោត្តញ្ច – សង្ឃាទិសេសោតិ នាមញ្ចេវ អាបត្តិ ច។
Sukkavissaṭṭhīti vatthu ceva gottañca – saṅghādisesoti nāmañceva āpatti ca.
កាយសំសគ្គោតិ វត្ថុ ចេវ គោត្តញ្ច – សង្ឃាទិសេសោតិ នាមញ្ចេវ អាបត្តិ ច។
Kāyasaṃsaggoti vatthu ceva gottañca – saṅghādisesoti nāmañceva āpatti ca.
ទុដ្ឋុល្លវាចាតិ វត្ថុ ចេវ គោត្តញ្ច – សង្ឃាទិសេសោតិ នាមញ្ចេវ អាបត្តិ ច។
Duṭṭhullavācāti vatthu ceva gottañca – saṅghādisesoti nāmañceva āpatti ca.
អត្តកាមន្តិ វត្ថុ ចេវ គោត្តញ្ច – សង្ឃាទិសេសោតិ នាមញ្ចេវ អាបត្តិ ច។
Attakāmanti vatthu ceva gottañca – saṅghādisesoti nāmañceva āpatti ca.
សញ្ចរិត្តន្តិ វត្ថុ ចេវ គោត្តញ្ច – សង្ឃាទិសេសោតិ នាមញ្ចេវ អាបត្តិ ច។
Sañcarittanti vatthu ceva gottañca – saṅghādisesoti nāmañceva āpatti ca.
សញ្ញាចិកាយ កុដិំ ការាបនន្តិ វត្ថុ ចេវ គោត្តញ្ច – សង្ឃាទិសេសោតិ នាមញ្ចេវ អាបត្តិ ច។
Saññācikāya kuṭiṃ kārāpananti vatthu ceva gottañca – saṅghādisesoti nāmañceva āpatti ca.
មហល្លកំ វិហារំ ការាបនន្តិ វត្ថុ ចេវ គោត្តញ្ច – សង្ឃាទិសេសោតិ នាមញ្ចេវ អាបត្តិ ច។
Mahallakaṃ vihāraṃ kārāpananti vatthu ceva gottañca – saṅghādisesoti nāmañceva āpatti ca.
ភិក្ខុំ អមូលកេន បារាជិកេន ធម្មេន អនុទ្ធំសនន្តិ វត្ថុ ចេវ គោត្តញ្ច – សង្ឃាទិសេសោតិ នាមញ្ចេវ អាបត្តិ ច។
Bhikkhuṃ amūlakena pārājikena dhammena anuddhaṃsananti vatthu ceva gottañca – saṅghādisesoti nāmañceva āpatti ca.
ភិក្ខុំ អញ្ញភាគិយស្ស អធិករណស្ស កិញ្ចិ ទេសំ លេសមត្តំ ឧបាទាយ បារាជិកេន ធម្មេន អនុទ្ធំសនន្តិ វត្ថុ ចេវ គោត្តញ្ច – សង្ឃាទិសេសោតិ នាមញ្ចេវ អាបត្តិ ច។
Bhikkhuṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsananti vatthu ceva gottañca – saṅghādisesoti nāmañceva āpatti ca.
សង្ឃភេទកស្ស ភិក្ខុនោ យាវតតិយំ សមនុភាសនាយ ន បដិនិស្សជ្ជនន្តិ វត្ថុ ចេវ គោត្តញ្ច – សង្ឃាទិសេសោតិ នាមញ្ចេវ អាបត្តិ ច។
Saṅghabhedakassa bhikkhuno yāvatatiyaṃ samanubhāsanāya na paṭinissajjananti vatthu ceva gottañca – saṅghādisesoti nāmañceva āpatti ca.
ភេទកានុវត្តកានំ ភិក្ខូនំ យាវតតិយំ សមនុភាសនាយ ន បដិនិស្សជ្ជនន្តិ វត្ថុ ចេវ គោត្តញ្ច – សង្ឃាទិសេសោតិ នាមញ្ចេវ អាបត្តិ ច។
Bhedakānuvattakānaṃ bhikkhūnaṃ yāvatatiyaṃ samanubhāsanāya na paṭinissajjananti vatthu ceva gottañca – saṅghādisesoti nāmañceva āpatti ca.
ទុព្ពចស្ស ភិក្ខុនោ យាវតតិយំ សមនុភាសនាយ ន បដិនិស្សជ្ជនន្តិ វត្ថុ ចេវ គោត្តញ្ច – សង្ឃាទិសេសោតិ នាមញ្ចេវ អាបត្តិ ច។
Dubbacassa bhikkhuno yāvatatiyaṃ samanubhāsanāya na paṭinissajjananti vatthu ceva gottañca – saṅghādisesoti nāmañceva āpatti ca.
កុលទូសកស្ស ភិក្ខុនោ យាវតតិយំ សមនុភាសនាយ ន បដិនិស្សជ្ជនន្តិ វត្ថុ ចេវ គោត្តញ្ច – សង្ឃាទិសេសោតិ នាមញ្ចេវ អាបត្តិ ច…បេ.…។
Kuladūsakassa bhikkhuno yāvatatiyaṃ samanubhāsanāya na paṭinissajjananti vatthu ceva gottañca – saṅghādisesoti nāmañceva āpatti ca…pe….
អនាទរិយំ បដិច្ច ឧទកេ ឧច្ចារំ វា បស្សាវំ វា ខេឡំ វា ករណន្តិ វត្ថុ ចេវ គោត្តញ្ច – ទុក្កដន្តិ នាមញ្ចេវ អាបត្តិ ចាតិ។
Anādariyaṃ paṭicca udake uccāraṃ vā passāvaṃ vā kheḷaṃ vā karaṇanti vatthu ceva gottañca – dukkaṭanti nāmañceva āpatti cāti.
នវសង្គហវគ្គោ និដ្ឋិតោ បញ្ចមោ។
Navasaṅgahavaggo niṭṭhito pañcamo.
តស្សុទ្ទានំ –
Tassuddānaṃ –
អបលោកនំ ញត្តិ ច, ទុតិយំ ចតុត្ថេន ច;
Apalokanaṃ ñatti ca, dutiyaṃ catutthena ca;
វត្ថុ ញត្តិ អនុស្សាវនំ, សីមា បរិសមេវ ច។
Vatthu ñatti anussāvanaṃ, sīmā parisameva ca.
សម្មុខា បដិបុច្ឆា ច, បដិញ្ញា វិនយារហោ;
Sammukhā paṭipucchā ca, paṭiññā vinayāraho;
វត្ថុ សង្ឃបុគ្គលញ្ច, ញត្តិំ ន បច្ឆា ញត្តិ ច។
Vatthu saṅghapuggalañca, ñattiṃ na pacchā ñatti ca.
វត្ថុំ សង្ឃបុគ្គលញ្ច, សាវនំ អកាលេន ច;
Vatthuṃ saṅghapuggalañca, sāvanaṃ akālena ca;
អតិខុទ្ទកា មហន្តា ច, ខណ្ឌច្ឆាយា និមិត្តកា។
Atikhuddakā mahantā ca, khaṇḍacchāyā nimittakā.
ពហិនទី សមុទ្ទេ ច, ជាតស្សរេ ច ភិន្ទតិ;
Bahinadī samudde ca, jātassare ca bhindati;
អជ្ឈោត្ថរតិ សីមាយ, ចតុ បញ្ច ច វគ្គិកា។
Ajjhottharati sīmāya, catu pañca ca vaggikā.
ទស វីសតិវគ្គា ច, អនាហដា ច អាហដា;
Dasa vīsativaggā ca, anāhaṭā ca āhaṭā;
កម្មបត្តា ឆន្ទារហា, កម្មារហា ច បុគ្គលា។
Kammapattā chandārahā, kammārahā ca puggalā.
អបលោកនំ បញ្ចដ្ឋានំ, ញត្តិ ច នវឋានិកា;
Apalokanaṃ pañcaṭṭhānaṃ, ñatti ca navaṭhānikā;
ញត្តិ ទុតិយំ សត្តដ្ឋានំ, ចតុត្ថា សត្តឋានិកា។
Ñatti dutiyaṃ sattaṭṭhānaṃ, catutthā sattaṭhānikā.
សុដ្ឋុ ផាសុ ច ទុម្មង្កុ, បេសលា ចាបិ អាសវា;
Suṭṭhu phāsu ca dummaṅku, pesalā cāpi āsavā;
វេរវជ្ជភយញ្ចេវ, អកុសលំ គិហីនញ្ច។
Veravajjabhayañceva, akusalaṃ gihīnañca.
បាបិច្ឆា អប្បសន្នានំ, បសន្នា ធម្មដ្ឋបនា;
Pāpicchā appasannānaṃ, pasannā dhammaṭṭhapanā;
វិនយានុគ្គហា ចេវ, បាតិមោក្ខុទ្ទេសេន ច។
Vinayānuggahā ceva, pātimokkhuddesena ca.
បាតិមោក្ខញ្ច ឋបនា, បវារណញ្ច ឋបនំ;
Pātimokkhañca ṭhapanā, pavāraṇañca ṭhapanaṃ;
តជ្ជនីយា និយស្សញ្ច, បព្ពាជនីយ បដិសារណី;
Tajjanīyā niyassañca, pabbājanīya paṭisāraṇī;
ឧក្ខេបន បរិវាសំ, មូលមានត្តអព្ភានំ;
Ukkhepana parivāsaṃ, mūlamānattaabbhānaṃ;
ឱសារណំ និស្សារណំ, តថេវ ឧបសម្បទា។
Osāraṇaṃ nissāraṇaṃ, tatheva upasampadā.
អបលោកនញត្តិ ច, ទុតិយញ្ច ចតុត្ថកំ;
Apalokanañatti ca, dutiyañca catutthakaṃ;
អបញ្ញត្តេនុបញ្ញត្តំ, សម្មុខាវិនយោ សតិ។
Apaññattenupaññattaṃ, sammukhāvinayo sati.
អមូឡ្ហបដិយេភុយ្យ, បាបិយ តិណវត្ថារកំ;
Amūḷhapaṭiyebhuyya, pāpiya tiṇavatthārakaṃ;
វត្ថុ វិបត្តិ អាបត្តិ, និទានំ បុគ្គលេន ច។
Vatthu vipatti āpatti, nidānaṃ puggalena ca.
ខន្ធា ចេវ សមុដ្ឋានា, អធិករណមេវ ច;
Khandhā ceva samuṭṭhānā, adhikaraṇameva ca;
សមថា សង្គហា ចេវ, នាមអាបត្តិកា តថាតិ។
Samathā saṅgahā ceva, nāmaāpattikā tathāti.
បរិវារោ និដ្ឋិតោ។
Parivāro niṭṭhito.
បរិវារបាឡិ និដ្ឋិតា។
Parivārapāḷi niṭṭhitā.
Footnotes:
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / អត្ថវសវគ្គាទិវណ្ណនា • Atthavasavaggādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / អត្ថវសវគ្គាទិវណ្ណនា • Atthavasavaggādivaṇṇanā
