| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. නාවාසුත්‌තං
10. Nāvāsuttaṃ
158. ‘‘සෙය්‍යථාපි, භික්‌ඛවෙ, සාමුද්‌දිකාය නාවාය වෙත්‌තබන්‌ධනබන්‌ධාය ඡ මාසානි උදකෙ පරියාදාය 1 හෙමන්‌තිකෙන ථලං උක්‌ඛිත්‌තාය වාතාතපපරෙතානි බන්‌ධනානි තානි පාවුස්‌සකෙන මෙඝෙන අභිප්‌පවුට්‌ඨානි අප්‌පකසිරෙනෙව පටිප්‌පස්‌සම්‌භන්‌ති, පූතිකානි භවන්‌ති; එවමෙව ඛො, භික්‌ඛවෙ, භික්‌ඛුනො අරියං අට්‌ඨඞ්‌ගිකං මග්‌ගං භාවයතො අරියං අට්‌ඨඞ්‌ගිකං මග්‌ගං බහුලීකරොතො අප්‌පකසිරෙනෙව සංයොජනානි පටිප්‌පස්‌සම්‌භන්‌ති, පූතිකානි භවන්‌ති . කථඤ්‌ච, භික්‌ඛවෙ, භික්‌ඛුනො අරියං අට්‌ඨඞ්‌ගිකං මග්‌ගං භාවයතො අරියං අට්‌ඨඞ්‌ගිකං මග්‌ගං බහුලීකරොතො අප්‌පකසිරෙනෙව සංයොජනානි පටිප්‌පස්‌සම්‌භන්‌ති, පූතිකානි භවන්‌ති? ඉධ, භික්‌ඛවෙ, භික්‌ඛු සම්‌මාදිට්‌ඨිං භාවෙති…පෙ.… සම්‌මාසමාධිං භාවෙති විවෙකනිස්‌සිතං විරාගනිස්‌සිතං නිරොධනිස්‌සිතං වොස්‌සග්‌ගපරිණාමිං…පෙ.… එවං ඛො, භික්‌ඛවෙ, භික්‌ඛුනො අරියං අට්‌ඨඞ්‌ගිකං මග්‌ගං භාවයතො අරියං අට්‌ඨඞ්‌ගිකං මග්‌ගං බහුලීකරොතො අප්‌පකසිරෙනෙව සංයොජනානි පටිප්‌පස්‌සම්‌භන්‌ති, පූතිකානි භවන්‌තී’’ති. දසමං.
158. ‘‘Seyyathāpi, bhikkhave, sāmuddikāya nāvāya vettabandhanabandhāya cha māsāni udake pariyādāya 2 hemantikena thalaṃ ukkhittāya vātātapaparetāni bandhanāni tāni pāvussakena meghena abhippavuṭṭhāni appakasireneva paṭippassambhanti, pūtikāni bhavanti; evameva kho, bhikkhave, bhikkhuno ariyaṃ aṭṭhaṅgikaṃ maggaṃ bhāvayato ariyaṃ aṭṭhaṅgikaṃ maggaṃ bahulīkaroto appakasireneva saṃyojanāni paṭippassambhanti, pūtikāni bhavanti . Kathañca, bhikkhave, bhikkhuno ariyaṃ aṭṭhaṅgikaṃ maggaṃ bhāvayato ariyaṃ aṭṭhaṅgikaṃ maggaṃ bahulīkaroto appakasireneva saṃyojanāni paṭippassambhanti, pūtikāni bhavanti? Idha, bhikkhave, bhikkhu sammādiṭṭhiṃ bhāveti…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… evaṃ kho, bhikkhave, bhikkhuno ariyaṃ aṭṭhaṅgikaṃ maggaṃ bhāvayato ariyaṃ aṭṭhaṅgikaṃ maggaṃ bahulīkaroto appakasireneva saṃyojanāni paṭippassambhanti, pūtikāni bhavantī’’ti. Dasamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. නාවාසුත්‌තවණ්‌ණනා • 10. Nāvāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 8-9-10. පඨමමෙඝසුත්‌තාදිවණ්‌ණනා • 8-9-10. Paṭhamameghasuttādivaṇṇanā
