| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
நாவட்ட²கதா²வண்ணனா
Nāvaṭṭhakathāvaṇṇanā
99. நாவட்ட²கதா²யங் து²ல்லச்சயம்பி பாராஜிகம்பி ஹோதீதி எத்த² பட²மங் டா²னா அசாவெத்வா முத்தே து²ல்லச்சயங், பட²மங் பன டா²னா சாவெத்வா முத்தே பாராஜிகந்தி வேதி³தப்³ப³ங். பாஸே ப³த்³த⁴ஸூகரோ வியாதிஆதி³னா வுத்தங் ஸந்தா⁴யாஹ ‘‘தத்த² யுத்தி புப்³பே³ வுத்தாஏவா’’தி. விபன்னட்ட²னாவாதி விஸமவாதேஹி தே³ஸந்தரங் பலாதா, பி⁴ஜ்ஜித்வா வா வினாஸங் பத்வா உத³கே நிமுஜ்ஜித்வா ஹெட்டா² பூ⁴மிதலங் அப்பத்வா ஸாமிகேஹி ச அபரிச்சத்தாலயா வுச்சதி. ப³லவா ச வாதோ ஆக³ம்மாதி இமினா அஸதி வாதே அயங் பயோகோ³ கதோதி த³ஸ்ஸேதி. புக்³க³லஸ்ஸ நத்தி² அவஹாரோதி ஸுக்க²மாதிகாயங் உஜுகரணனயேன வுத்தங். தங் அத்தனோ பாதே³ன அனக்கமித்வா ஹத்தே²ன ச அனுக்கி²பித்வா அஞ்ஞஸ்மிங் த³ண்டா³தீ³ஸு ப³ந்தி⁴த்வா ட²பிதே யுஜ்ஜதி, அத்தனோ பாதே³ன அக்கமித்வா ஹத்தே²ன ச உக்கி²பித்வா டி²தஸ்ஸ பன ப³லவவாதேன ச²த்தசீவராதீ³ஸு பஹடேஸு பகதிங் விஜஹித்வா த³ள்ஹதரங் அக்கமனக³ஹணாதி³பயோகோ³ அபி⁴னவோ காதப்³போ³ ஸியா. இதரதா² ச²த்தசீவராதீ³னி வா விக³ச்ச²ந்தி, அவஹாரகோ வா ஸயங் பதிஸ்ஸதி, நாவா ச ததா³ ந க³மிஸ்ஸதி. தஸ்மா ஈதி³ஸே அபி⁴னவப்பயோகே³ ஸதி அவஹாரேன ப⁴விதப்³ப³ங். ஸுக்க²மாதிகாயங் உஜுகதாய உத³காக³மனகாலே காதப்³ப³கிச்சங் நத்தீ²தி தங் இத⁴ நித³ஸ்ஸனங் ந ஹோதி. தா³ஸங் பன பகதியா பலாயந்தங் ‘‘ஸீக⁴ங் யாஹீ’’தி வத்வா பகதிக³மனதோ துரிதக³மனுப்பாத³னாதி³னா இத⁴ நித³ஸ்ஸனேன ப⁴விதப்³ப³ந்தி அம்ஹாகங் க²ந்தி , வீமங்ஸித்வா க³ஹேதப்³ப³ங். வாதே ஆக³தேபி யத்த² அதிலஹுகத்தா நாவாய கஞ்சி பயோக³ங் அகத்வா பகதியா அவஹாரகோ திட்ட²தி, தத்தி²த³ங் அட்ட²கதா²யங் வுத்தந்தி க³ஹேதப்³ப³ங்.
99. Nāvaṭṭhakathāyaṃ thullaccayampi pārājikampi hotīti ettha paṭhamaṃ ṭhānā acāvetvā mutte thullaccayaṃ, paṭhamaṃ pana ṭhānā cāvetvā mutte pārājikanti veditabbaṃ. Pāse baddhasūkaro viyātiādinā vuttaṃ sandhāyāha ‘‘tattha yutti pubbe vuttāevā’’ti. Vipannaṭṭhanāvāti visamavātehi desantaraṃ palātā, bhijjitvā vā vināsaṃ patvā udake nimujjitvā heṭṭhā bhūmitalaṃ appatvā sāmikehi ca apariccattālayā vuccati. Balavā ca vāto āgammāti iminā asati vāte ayaṃ payogo katoti dasseti. Puggalassa natthi avahāroti sukkhamātikāyaṃ ujukaraṇanayena vuttaṃ. Taṃ attano pādena anakkamitvā hatthena ca anukkhipitvā aññasmiṃ daṇḍādīsu bandhitvā ṭhapite yujjati, attano pādena akkamitvā hatthena ca ukkhipitvā ṭhitassa pana balavavātena chattacīvarādīsu pahaṭesu pakatiṃ vijahitvā daḷhataraṃ akkamanagahaṇādipayogo abhinavo kātabbo siyā. Itarathā chattacīvarādīni vā vigacchanti, avahārako vā sayaṃ patissati, nāvā ca tadā na gamissati. Tasmā īdise abhinavappayoge sati avahārena bhavitabbaṃ. Sukkhamātikāyaṃ ujukatāya udakāgamanakāle kātabbakiccaṃ natthīti taṃ idha nidassanaṃ na hoti. Dāsaṃ pana pakatiyā palāyantaṃ ‘‘sīghaṃ yāhī’’ti vatvā pakatigamanato turitagamanuppādanādinā idha nidassanena bhavitabbanti amhākaṃ khanti , vīmaṃsitvā gahetabbaṃ. Vāte āgatepi yattha atilahukattā nāvāya kañci payogaṃ akatvā pakatiyā avahārako tiṭṭhati, tatthidaṃ aṭṭhakathāyaṃ vuttanti gahetabbaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / நாவட்ட²கதா²வண்ணனா • Nāvaṭṭhakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பூ⁴மட்ட²கதா²தி³வண்ணனா • Bhūmaṭṭhakathādivaṇṇanā
