| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
নাৰট্ঠকথাৰণ্ণনা
Nāvaṭṭhakathāvaṇṇanā
৯৯. নাৰট্ঠকথাযং পন যা বন্ধনা মুত্তমত্তে ঠানা ন চৰতীতি ইমিনা চণ্ডসোতে বদ্ধনাৰং পটিক্খিপতি। তাৰ দুক্কটন্তি ‘‘বন্ধনং মোচেতি, আপত্তি দুক্কটস্সা’’তি এৰং মোচেন্তস্স পঞ্ঞত্তং দুক্কটং সন্ধায ৰুত্তং। থুল্লচ্চযম্পি পারাজিকম্পি হোতীতি এত্থ পঠমং ঠানা অচাৰেত্ৰা মুত্তে থুল্লচ্চযং, পঠমং ঠানা চাৰেত্ৰা মুত্তে পারাজিকন্তি ৰেদিতব্বং।
99. Nāvaṭṭhakathāyaṃ pana yā bandhanā muttamatte ṭhānā na cavatīti iminā caṇḍasote baddhanāvaṃ paṭikkhipati. Tāva dukkaṭanti ‘‘bandhanaṃ moceti, āpatti dukkaṭassā’’ti evaṃ mocentassa paññattaṃ dukkaṭaṃ sandhāya vuttaṃ. Thullaccayampi pārājikampi hotīti ettha paṭhamaṃ ṭhānā acāvetvā mutte thullaccayaṃ, paṭhamaṃ ṭhānā cāvetvā mutte pārājikanti veditabbaṃ.
‘‘পাসে বদ্ধসূকরো ৰিযা’’তিআদিনা ৰুত্তং সন্ধাযাহ ‘‘তত্থ যুত্তি পুব্বে ৰুত্তা এৰা’’তি। ৰিপ্পনট্ঠা নাৰাতি ৰিসমৰাতাদীহি ৰিনাসং পত্ৰা উদকে নিমুজ্জিত্ৰা হেট্ঠা ভূমিতলং অপ্পত্ৰা মজ্ঝে ঠিতং সন্ধায ৰদতি। তেনেৰ ‘‘অধো ৰা ওপিলাপেন্তস্স…পে॰… নাৰাতলেন ফুট্ঠোকাসং মুখৰট্টিং অতিক্কন্তমত্তে পারাজিক’’ন্তি ৰুত্তং। ওপিলাপেন্তস্সাতি ওসীদাপেন্তস্স। অতিক্কন্তমত্তেতি ফুট্ঠোকাসং অতিক্কন্তমত্তে। এসেৰ নযোতি মুত্তমত্তে পারাজিকন্তি দস্সেতি।
‘‘Pāse baddhasūkaro viyā’’tiādinā vuttaṃ sandhāyāha ‘‘tattha yutti pubbe vuttā evā’’ti. Vippanaṭṭhā nāvāti visamavātādīhi vināsaṃ patvā udake nimujjitvā heṭṭhā bhūmitalaṃ appatvā majjhe ṭhitaṃ sandhāya vadati. Teneva ‘‘adho vā opilāpentassa…pe… nāvātalena phuṭṭhokāsaṃ mukhavaṭṭiṃ atikkantamatte pārājika’’nti vuttaṃ. Opilāpentassāti osīdāpentassa. Atikkantamatteti phuṭṭhokāsaṃ atikkantamatte. Eseva nayoti muttamatte pārājikanti dasseti.
নাৰাকড্ঢনযোগ্গমহাযোত্ততায যোত্তকোটিতো পট্ঠায সকলম্পি ‘‘ঠান’’ন্তি ৰুত্তং।
Nāvākaḍḍhanayoggamahāyottatāya yottakoṭito paṭṭhāya sakalampi ‘‘ṭhāna’’nti vuttaṃ.
অসতিপি ৰাতে যথা ৰাতং গণ্হাতি, তথা ঠপিতত্তা ‘‘ৰাতং গণ্হাপেতী’’তি ৰুত্তং। বলৰা চ ৰাতো আগম্মাতি ইমিনা অসতি ৰাতে অযং পযোগো কতোতি দস্সেতি। তেনেৰ ‘‘পুগ্গলস্স নত্থি অৰহারো’’তি ৰুত্তং। সতি পন ৰাতে কতো পযোগো ঠানাচাৰনপযোগোযেৰাতি মাতিকাউজুকরণে ৰিয অত্থেৰ অৰহারোতি দট্ঠব্বং। ঠানাচাৰনপযোগো ন হোতীতি সুক্খমাতিকাউজুকরণে ৰিয অসতি ৰাতে কতপযোগত্তা। ভণ্ডদেয্যং পন হোতীতি নাৰাসামিকস্স ভণ্ডদেয্যং হোতি।
Asatipi vāte yathā vātaṃ gaṇhāti, tathā ṭhapitattā ‘‘vātaṃ gaṇhāpetī’’ti vuttaṃ. Balavā ca vāto āgammāti iminā asati vāte ayaṃ payogo katoti dasseti. Teneva ‘‘puggalassa natthi avahāro’’ti vuttaṃ. Sati pana vāte kato payogo ṭhānācāvanapayogoyevāti mātikāujukaraṇe viya attheva avahāroti daṭṭhabbaṃ. Ṭhānācāvanapayogo na hotīti sukkhamātikāujukaraṇe viya asati vāte katapayogattā. Bhaṇḍadeyyaṃ pana hotīti nāvāsāmikassa bhaṇḍadeyyaṃ hoti.
নাৰট্ঠকথাৰণ্ণনা নিট্ঠিতা।
Nāvaṭṭhakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ২. দুতিযপারাজিকং • 2. Dutiyapārājikaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ২. দুতিযপারাজিকং • 2. Dutiyapārājikaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ভূমট্ঠকথাদিৰণ্ণনা • Bhūmaṭṭhakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / নাৰট্ঠকথাৰণ্ণনা • Nāvaṭṭhakathāvaṇṇanā
