| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
наавадтагат̇ааван̣н̣анаа
Nāvaṭṭhakathāvaṇṇanā
99. наавадтагат̇ааяам̣ т̇уллажжаяамби баарааж̇игамби ход̇ийд̇и зд̇т̇а батамам̣ таанаа ажаавзд̇ваа муд̇д̇з т̇уллажжаяам̣, батамам̣ бана таанаа жаавзд̇ваа муд̇д̇з баарааж̇иганд̇и взд̣̇ид̇аб̣б̣ам̣. баасз б̣ад̣̇д̇хасуугаро вияаад̇иаад̣̇инаа вуд̇д̇ам̣ санд̇хааяааха ‘‘д̇ад̇т̇а яуд̇д̇и буб̣б̣з вуд̇д̇аазваа’’д̇и. вибаннадтанааваад̇и висамаваад̇зхи д̣̇зсанд̇арам̣ балаад̇аа, бхиж̇ж̇ид̇ваа ваа винаасам̣ бад̇ваа уд̣̇агз нимуж̇ж̇ид̇ваа хздтаа бхуумид̇алам̣ аббад̇ваа саамигзхи жа абарижжад̇д̇аалаяаа вужжад̇и. б̣алаваа жа ваад̇о ааг̇аммаад̇и иминаа асад̇и ваад̇з аяам̣ баяог̇о гад̇од̇и д̣̇ассзд̇и. буг̇г̇аласса над̇т̇и авахаарод̇и сугкамаад̇игааяам̣ уж̇угаран̣анаязна вуд̇д̇ам̣. д̇ам̣ ад̇д̇ано баад̣̇зна анаггамид̇ваа хад̇т̇зна жа анугкибид̇ваа ан̃н̃асмим̣ д̣̇ан̣д̣аад̣̇ийсу б̣анд̇хид̇ваа табид̇з яуж̇ж̇ад̇и, ад̇д̇ано баад̣̇зна аггамид̇ваа хад̇т̇зна жа угкибид̇ваа тид̇асса бана б̣алававаад̇зна чад̇д̇ажийвараад̣̇ийсу бахадзсу багад̇им̣ виж̇ахид̇ваа д̣̇ал̣хад̇арам̣ аггаманаг̇ахан̣аад̣̇ибаяог̇о абхинаво гаад̇аб̣б̣о сияаа. ид̇арат̇аа чад̇д̇ажийвараад̣̇ийни ваа виг̇ажчанд̇и, авахаараго ваа саяам̣ бад̇иссад̇и, нааваа жа д̇ад̣̇аа на г̇амиссад̇и. д̇асмаа ийд̣̇исз абхинаваббаяог̇з сад̇и авахаарзна бхавид̇аб̣б̣ам̣. сугкамаад̇игааяам̣ уж̇угад̇ааяа уд̣̇агааг̇аманагаалз гаад̇аб̣б̣агижжам̣ над̇т̇ийд̇и д̇ам̣ ид̇ха нид̣̇ассанам̣ на ход̇и. д̣̇аасам̣ бана багад̇ияаа балааяанд̇ам̣ ‘‘сийгхам̣ яаахий’’д̇и вад̇ваа багад̇иг̇аманад̇о д̇урид̇аг̇амануббаад̣̇анаад̣̇инаа ид̇ха нид̣̇ассанзна бхавид̇аб̣б̣анд̇и амхаагам̣ канд̇и , виймам̣сид̇ваа г̇ахзд̇аб̣б̣ам̣. ваад̇з ааг̇ад̇зби яад̇т̇а ад̇илахугад̇д̇аа наавааяа ган̃жи баяог̇ам̣ агад̇ваа багад̇ияаа авахаараго д̇идтад̇и, д̇ад̇т̇ид̣̇ам̣ адтагат̇ааяам̣ вуд̇д̇анд̇и г̇ахзд̇аб̣б̣ам̣.
99. Nāvaṭṭhakathāyaṃ thullaccayampi pārājikampi hotīti ettha paṭhamaṃ ṭhānā acāvetvā mutte thullaccayaṃ, paṭhamaṃ pana ṭhānā cāvetvā mutte pārājikanti veditabbaṃ. Pāse baddhasūkaro viyātiādinā vuttaṃ sandhāyāha ‘‘tattha yutti pubbe vuttāevā’’ti. Vipannaṭṭhanāvāti visamavātehi desantaraṃ palātā, bhijjitvā vā vināsaṃ patvā udake nimujjitvā heṭṭhā bhūmitalaṃ appatvā sāmikehi ca apariccattālayā vuccati. Balavā ca vāto āgammāti iminā asati vāte ayaṃ payogo katoti dasseti. Puggalassa natthi avahāroti sukkhamātikāyaṃ ujukaraṇanayena vuttaṃ. Taṃ attano pādena anakkamitvā hatthena ca anukkhipitvā aññasmiṃ daṇḍādīsu bandhitvā ṭhapite yujjati, attano pādena akkamitvā hatthena ca ukkhipitvā ṭhitassa pana balavavātena chattacīvarādīsu pahaṭesu pakatiṃ vijahitvā daḷhataraṃ akkamanagahaṇādipayogo abhinavo kātabbo siyā. Itarathā chattacīvarādīni vā vigacchanti, avahārako vā sayaṃ patissati, nāvā ca tadā na gamissati. Tasmā īdise abhinavappayoge sati avahārena bhavitabbaṃ. Sukkhamātikāyaṃ ujukatāya udakāgamanakāle kātabbakiccaṃ natthīti taṃ idha nidassanaṃ na hoti. Dāsaṃ pana pakatiyā palāyantaṃ ‘‘sīghaṃ yāhī’’ti vatvā pakatigamanato turitagamanuppādanādinā idha nidassanena bhavitabbanti amhākaṃ khanti , vīmaṃsitvā gahetabbaṃ. Vāte āgatepi yattha atilahukattā nāvāya kañci payogaṃ akatvā pakatiyā avahārako tiṭṭhati, tatthidaṃ aṭṭhakathāyaṃ vuttanti gahetabbaṃ.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 2. д̣̇уд̇ияабаарааж̇игам̣ • 2. Dutiyapārājikaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 2. д̣̇уд̇ияабаарааж̇игам̣ • 2. Dutiyapārājikaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / наавадтагат̇ааван̣н̣анаа • Nāvaṭṭhakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / бхуумадтагат̇аад̣̇иван̣н̣анаа • Bhūmaṭṭhakathādivaṇṇanā
