| Library / Tipiṭaka / ತಿಪಿಟಕ • Tipiṭaka / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā |
ನಾವಟ್ಠಕಥಾವಣ್ಣನಾ
Nāvaṭṭhakathāvaṇṇanā
೯೯. ನಾವಟ್ಠಕಥಾಯಂ ಪನ ಯಾ ಬನ್ಧನಾ ಮುತ್ತಮತ್ತೇ ಠಾನಾ ನ ಚವತೀತಿ ಇಮಿನಾ ಚಣ್ಡಸೋತೇ ಬದ್ಧನಾವಂ ಪಟಿಕ್ಖಿಪತಿ। ತಾವ ದುಕ್ಕಟನ್ತಿ ‘‘ಬನ್ಧನಂ ಮೋಚೇತಿ, ಆಪತ್ತಿ ದುಕ್ಕಟಸ್ಸಾ’’ತಿ ಏವಂ ಮೋಚೇನ್ತಸ್ಸ ಪಞ್ಞತ್ತಂ ದುಕ್ಕಟಂ ಸನ್ಧಾಯ ವುತ್ತಂ। ಥುಲ್ಲಚ್ಚಯಮ್ಪಿ ಪಾರಾಜಿಕಮ್ಪಿ ಹೋತೀತಿ ಏತ್ಥ ಪಠಮಂ ಠಾನಾ ಅಚಾವೇತ್ವಾ ಮುತ್ತೇ ಥುಲ್ಲಚ್ಚಯಂ, ಪಠಮಂ ಠಾನಾ ಚಾವೇತ್ವಾ ಮುತ್ತೇ ಪಾರಾಜಿಕನ್ತಿ ವೇದಿತಬ್ಬಂ।
99. Nāvaṭṭhakathāyaṃ pana yā bandhanā muttamatte ṭhānā na cavatīti iminā caṇḍasote baddhanāvaṃ paṭikkhipati. Tāva dukkaṭanti ‘‘bandhanaṃ moceti, āpatti dukkaṭassā’’ti evaṃ mocentassa paññattaṃ dukkaṭaṃ sandhāya vuttaṃ. Thullaccayampi pārājikampi hotīti ettha paṭhamaṃ ṭhānā acāvetvā mutte thullaccayaṃ, paṭhamaṃ ṭhānā cāvetvā mutte pārājikanti veditabbaṃ.
‘‘ಪಾಸೇ ಬದ್ಧಸೂಕರೋ ವಿಯಾ’’ತಿಆದಿನಾ ವುತ್ತಂ ಸನ್ಧಾಯಾಹ ‘‘ತತ್ಥ ಯುತ್ತಿ ಪುಬ್ಬೇ ವುತ್ತಾ ಏವಾ’’ತಿ। ವಿಪ್ಪನಟ್ಠಾ ನಾವಾತಿ ವಿಸಮವಾತಾದೀಹಿ ವಿನಾಸಂ ಪತ್ವಾ ಉದಕೇ ನಿಮುಜ್ಜಿತ್ವಾ ಹೇಟ್ಠಾ ಭೂಮಿತಲಂ ಅಪ್ಪತ್ವಾ ಮಜ್ಝೇ ಠಿತಂ ಸನ್ಧಾಯ ವದತಿ। ತೇನೇವ ‘‘ಅಧೋ ವಾ ಓಪಿಲಾಪೇನ್ತಸ್ಸ…ಪೇ॰… ನಾವಾತಲೇನ ಫುಟ್ಠೋಕಾಸಂ ಮುಖವಟ್ಟಿಂ ಅತಿಕ್ಕನ್ತಮತ್ತೇ ಪಾರಾಜಿಕ’’ನ್ತಿ ವುತ್ತಂ। ಓಪಿಲಾಪೇನ್ತಸ್ಸಾತಿ ಓಸೀದಾಪೇನ್ತಸ್ಸ। ಅತಿಕ್ಕನ್ತಮತ್ತೇತಿ ಫುಟ್ಠೋಕಾಸಂ ಅತಿಕ್ಕನ್ತಮತ್ತೇ। ಏಸೇವ ನಯೋತಿ ಮುತ್ತಮತ್ತೇ ಪಾರಾಜಿಕನ್ತಿ ದಸ್ಸೇತಿ।
‘‘Pāse baddhasūkaro viyā’’tiādinā vuttaṃ sandhāyāha ‘‘tattha yutti pubbe vuttā evā’’ti. Vippanaṭṭhā nāvāti visamavātādīhi vināsaṃ patvā udake nimujjitvā heṭṭhā bhūmitalaṃ appatvā majjhe ṭhitaṃ sandhāya vadati. Teneva ‘‘adho vā opilāpentassa…pe… nāvātalena phuṭṭhokāsaṃ mukhavaṭṭiṃ atikkantamatte pārājika’’nti vuttaṃ. Opilāpentassāti osīdāpentassa. Atikkantamatteti phuṭṭhokāsaṃ atikkantamatte. Eseva nayoti muttamatte pārājikanti dasseti.
ನಾವಾಕಡ್ಢನಯೋಗ್ಗಮಹಾಯೋತ್ತತಾಯ ಯೋತ್ತಕೋಟಿತೋ ಪಟ್ಠಾಯ ಸಕಲಮ್ಪಿ ‘‘ಠಾನ’’ನ್ತಿ ವುತ್ತಂ।
Nāvākaḍḍhanayoggamahāyottatāya yottakoṭito paṭṭhāya sakalampi ‘‘ṭhāna’’nti vuttaṃ.
ಅಸತಿಪಿ ವಾತೇ ಯಥಾ ವಾತಂ ಗಣ್ಹಾತಿ, ತಥಾ ಠಪಿತತ್ತಾ ‘‘ವಾತಂ ಗಣ್ಹಾಪೇತೀ’’ತಿ ವುತ್ತಂ। ಬಲವಾ ಚ ವಾತೋ ಆಗಮ್ಮಾತಿ ಇಮಿನಾ ಅಸತಿ ವಾತೇ ಅಯಂ ಪಯೋಗೋ ಕತೋತಿ ದಸ್ಸೇತಿ। ತೇನೇವ ‘‘ಪುಗ್ಗಲಸ್ಸ ನತ್ಥಿ ಅವಹಾರೋ’’ತಿ ವುತ್ತಂ। ಸತಿ ಪನ ವಾತೇ ಕತೋ ಪಯೋಗೋ ಠಾನಾಚಾವನಪಯೋಗೋಯೇವಾತಿ ಮಾತಿಕಾಉಜುಕರಣೇ ವಿಯ ಅತ್ಥೇವ ಅವಹಾರೋತಿ ದಟ್ಠಬ್ಬಂ। ಠಾನಾಚಾವನಪಯೋಗೋ ನ ಹೋತೀತಿ ಸುಕ್ಖಮಾತಿಕಾಉಜುಕರಣೇ ವಿಯ ಅಸತಿ ವಾತೇ ಕತಪಯೋಗತ್ತಾ। ಭಣ್ಡದೇಯ್ಯಂ ಪನ ಹೋತೀತಿ ನಾವಾಸಾಮಿಕಸ್ಸ ಭಣ್ಡದೇಯ್ಯಂ ಹೋತಿ।
Asatipi vāte yathā vātaṃ gaṇhāti, tathā ṭhapitattā ‘‘vātaṃ gaṇhāpetī’’ti vuttaṃ. Balavā ca vāto āgammāti iminā asati vāte ayaṃ payogo katoti dasseti. Teneva ‘‘puggalassa natthi avahāro’’ti vuttaṃ. Sati pana vāte kato payogo ṭhānācāvanapayogoyevāti mātikāujukaraṇe viya attheva avahāroti daṭṭhabbaṃ. Ṭhānācāvanapayogo na hotīti sukkhamātikāujukaraṇe viya asati vāte katapayogattā. Bhaṇḍadeyyaṃ pana hotīti nāvāsāmikassa bhaṇḍadeyyaṃ hoti.
ನಾವಟ್ಠಕಥಾವಣ್ಣನಾ ನಿಟ್ಠಿತಾ।
Nāvaṭṭhakathāvaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೨. ದುತಿಯಪಾರಾಜಿಕಂ • 2. Dutiyapārājikaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā / ೨. ದುತಿಯಪಾರಾಜಿಕಂ • 2. Dutiyapārājikaṃ
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಭೂಮಟ್ಠಕಥಾದಿವಣ್ಣನಾ • Bhūmaṭṭhakathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ನಾವಟ್ಠಕಥಾವಣ್ಣನಾ • Nāvaṭṭhakathāvaṇṇanā
