| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
3. நயமுக²மாதிகாவண்ணனா
3. Nayamukhamātikāvaṇṇanā
3. நயானங் ஸங்க³ஹாதி³ப்பகாரவிஸேஸானங் பவத்தி தே³ஸனா, தஸ்ஸா வினிக்³க³மட்டா²னதாய த்³வாரங். யதா²வுத்தத⁴ம்மா யதா²ரஹங் க²ந்தா⁴யதனதா⁴துயோ அரூபினோ ச க²ந்தா⁴தி தேஸங் உத்³தே³ஸோ நயமுக²மாதிகா. தேனாஹ ‘‘நயான’’ந்திஆதி³. வியுஜ்ஜனஸீலா, வியோகோ³ வா ஏதேஸங் அத்தீ²தி வியோகி³னோ, ததா² ஸஹயோகி³னோ, ஸங்க³ஹாஸங்க³ஹத⁴ம்மா ச வியோகீ³ஸஹயோகீ³த⁴ம்மா ச ஸங்க³ஹா…பே॰… த⁴ம்மா, ஸங்க³ண்ஹனாஸங்க³ண்ஹனவஸேன வியுஜ்ஜனஸங்யுஜ்ஜனவஸேன ச பவத்தனகஸபா⁴வாதி அத்தோ². சுத்³த³ஸபீதிஆதி³னா தமேவத்த²ங் பாகடதரங் கரோதி. யேஹீதி யேஹி க²ந்தா⁴தீ³ஹி அரூபக்க²ந்தே⁴ஹி ச. தே சத்தாரோதி தே ஸங்க³ஹாத³யோ சத்தாரோ. ஸச்சாதீ³ஹிபீதி ஸச்சஇந்த்³ரியபடிச்சஸமுப்பாதா³தீ³ஹிபி ஸஹ. யதா²ஸம்ப⁴வந்தி ஸம்ப⁴வானுரூபங், யங் யங் பத³ங் ஸங்க³ஹிதோ அஸங்க³ஹிதோதி ச வத்துங் யுத்தங், தங் தந்தி அத்தோ².
3. Nayānaṃ saṅgahādippakāravisesānaṃ pavatti desanā, tassā viniggamaṭṭhānatāya dvāraṃ. Yathāvuttadhammā yathārahaṃ khandhāyatanadhātuyo arūpino ca khandhāti tesaṃ uddeso nayamukhamātikā. Tenāha ‘‘nayāna’’ntiādi. Viyujjanasīlā, viyogo vā etesaṃ atthīti viyogino, tathā sahayogino, saṅgahāsaṅgahadhammā ca viyogīsahayogīdhammā ca saṅgahā…pe… dhammā, saṅgaṇhanāsaṅgaṇhanavasena viyujjanasaṃyujjanavasena ca pavattanakasabhāvāti attho. Cuddasapītiādinā tamevatthaṃ pākaṭataraṃ karoti. Yehīti yehi khandhādīhi arūpakkhandhehi ca. Te cattāroti te saṅgahādayo cattāro. Saccādīhipīti saccaindriyapaṭiccasamuppādādīhipi saha. Yathāsambhavanti sambhavānurūpaṃ, yaṃ yaṃ padaṃ saṅgahito asaṅgahitoti ca vattuṃ yuttaṃ, taṃ tanti attho.
ஸோ பனாதி ஸங்க³ஹாஸங்க³ஹோ. ஸங்கா³ஹகபூ⁴தேஹீதி ஸங்க³ஹணகிரியாய கத்துபூ⁴தேஹி. தேஹீதி ஸச்சாதீ³ஹி. ந ஸங்க³ஹபூ⁴தேஹீதி ஸங்க³ஹணகிரியாய கரணபூ⁴தேஹி ஸச்சாதீ³ஹி ஸங்க³ஹாஸங்க³ஹோ ந வுத்தோ. தத்தா²பி ஹி க²ந்தா⁴யதனதா⁴துயோ ஏவ கரணபூ⁴தாதி த³ஸ்ஸேதி. க²ந்தா⁴தீ³ஹேவ ஸங்க³ஹேஹீதி க²ந்தா⁴தீ³ஹியேவ ஸங்க³ண்ஹனகிரியாய கரணபூ⁴தேஹி, ‘‘க²ந்த⁴ஸங்க³ஹேன ஸங்க³ஹிதா, ஆயதனஸங்க³ஹேன அஸங்க³ஹிதா , தா⁴துஸங்க³ஹேன அஸங்க³ஹிதா, தே த⁴ம்மா சதூஹி க²ந்தே⁴ஹி, த்³வீஹாயதனேஹி, அட்ட²ஹி தா⁴தூஹி அஸங்க³ஹிதா’’தி ஸங்க³ஹாஸங்க³ஹோ நியமெத்வா வுத்தோ. தஸ்மாதி யஸ்மா ஸச்சாதீ³னி ஸங்கா³ஹகபா⁴வேன வுத்தானி, ந ஸங்க³ஹபா⁴வேன, க²ந்தா⁴தீ³னியேவ ச ஸங்க³ஹபா⁴வேன வுத்தானி, தஸ்மா.
So panāti saṅgahāsaṅgaho. Saṅgāhakabhūtehīti saṅgahaṇakiriyāya kattubhūtehi. Tehīti saccādīhi. Na saṅgahabhūtehīti saṅgahaṇakiriyāya karaṇabhūtehi saccādīhi saṅgahāsaṅgaho na vutto. Tatthāpi hi khandhāyatanadhātuyo eva karaṇabhūtāti dasseti. Khandhādīheva saṅgahehīti khandhādīhiyeva saṅgaṇhanakiriyāya karaṇabhūtehi, ‘‘khandhasaṅgahena saṅgahitā, āyatanasaṅgahena asaṅgahitā , dhātusaṅgahena asaṅgahitā, te dhammā catūhi khandhehi, dvīhāyatanehi, aṭṭhahi dhātūhi asaṅgahitā’’ti saṅgahāsaṅgaho niyametvā vutto. Tasmāti yasmā saccādīni saṅgāhakabhāvena vuttāni, na saṅgahabhāvena, khandhādīniyeva ca saṅgahabhāvena vuttāni, tasmā.
கஸ்மா பனெத்த² ஸச்சாத³யோ ஸங்க³ஹவஸேன ந வுத்தாதி? ததா²தே³ஸனாய அஸம்ப⁴வதோ. ந ஹி ஸக்கா ரூபக்க²ந்தா⁴தீ³னங் ஸமுத³யஸச்சாதீ³ஹி, ஸஞ்ஞாதீ³னங் வா இந்த்³ரியாதீ³ஹி ஸங்க³ஹனயேன புச்சி²துங் விஸ்ஸஜ்ஜிதுங் வாதி. ததா² அரியப²லாதீ³ஸு உப்பன்னவேத³னாதீ³னங் ஸச்சவினிமுத்ததாய ‘‘வேத³னாக்க²ந்தோ⁴ கதிஹி ஸச்சேஹி ஸங்க³ஹிதோ’’தி புச்சி²த்வாபி ‘‘ஏகேன ஸச்சேன ஸங்க³ஹிதோ’’திஆதி³னா நியமெத்வா ஸங்க³ஹங் த³ஸ்ஸேதுங் ந ஸக்காதி. யதா²ஸம்ப⁴வந்தி யேஹி ஸம்பயோகோ³, யேஹி ச விப்பயோகோ³, தத³னுரூபங்.
Kasmā panettha saccādayo saṅgahavasena na vuttāti? Tathādesanāya asambhavato. Na hi sakkā rūpakkhandhādīnaṃ samudayasaccādīhi, saññādīnaṃ vā indriyādīhi saṅgahanayena pucchituṃ vissajjituṃ vāti. Tathā ariyaphalādīsu uppannavedanādīnaṃ saccavinimuttatāya ‘‘vedanākkhandho katihi saccehi saṅgahito’’ti pucchitvāpi ‘‘ekena saccena saṅgahito’’tiādinā niyametvā saṅgahaṃ dassetuṃ na sakkāti. Yathāsambhavanti yehi sampayogo, yehi ca vippayogo, tadanurūpaṃ.
ரூபங் ரூபேன நிப்³பா³னேன வா விப்பயுத்தங் ந ஹோதி, நிப்³பா³னங் வா ரூபேன. கஸ்மா? ஸம்பயுத்தந்தி அனாஸங்கனீயஸபா⁴வத்தா. சதுன்னஞ்ஹி க²ந்தா⁴னங் அஞ்ஞமஞ்ஞங் ஸம்பயோகீ³பா⁴வதோ ‘‘ரூபனிப்³பா³னேஹிபி ஸோ அத்தி² நத்தீ²’’தி ஸியா ஆஸங்கா, தஸ்மா தேஸங் இதரேஹி, இதரேஸஞ்ச தேஹி விப்பயோகோ³ வுச்சதி, ந பன ரூபஸ்ஸ ரூபேன, நிப்³பா³னேன வா, நிப்³பா³னஸ்ஸ வா ரூபேன கத்த²சி ஸம்பயோகோ³ அத்தீ²தி ததா³ஸங்காபா⁴வதோ விப்பயோகோ³பி ரூபஸ்ஸ ரூபனிப்³பா³னேஹி, நிப்³பா³னஸ்ஸ வா தேன ந வுச்சதி, அரூபக்க²ந்தே⁴ஹியேவ பன வுச்சதீதி ஆஹ ‘‘சதூஹேவா’’திஆதி³. அனாரம்மணஸ்ஸ சக்கா²யதனாதி³கஸ்ஸ. அனாரம்மணஅனாரம்மணமிஸ்ஸகேஹீதி அனாரம்மணேன ஸோதாயதனாதி³னா அனாரம்மணமிஸ்ஸகேன ச த⁴ம்மாயதனாதி³னா. மிஸ்ஸகஸ்ஸ த⁴ம்மாயதனாதி³கஸ்ஸ. அனாரம்மணஅனாரம்மணமிஸ்ஸகேஹி ந ஹோதீதி யோஜேதப்³ப³ங். யேஸங் பன யேஹி ஹோதி, தங் த³ஸ்ஸேதுங் ‘‘அனாரம்மணஸ்ஸ பனா’’திஆதி³ வுத்தங். யதா² ஹி ஸாரம்மணஸ்ஸ அனாரம்மணேன அனாரம்மணமிஸ்ஸகேன ச விப்பயோகோ³ ஹோதி, ஏவங் ஸாரம்மணேனபி ஸோ ஹோதியேவ. தேன விய அனாரம்மணஸ்ஸ அனாரம்மணமிஸ்ஸகஸ்ஸ சாதி த³ட்ட²ப்³ப³ங்.
Rūpaṃ rūpena nibbānena vā vippayuttaṃ na hoti, nibbānaṃ vā rūpena. Kasmā? Sampayuttanti anāsaṅkanīyasabhāvattā. Catunnañhi khandhānaṃ aññamaññaṃ sampayogībhāvato ‘‘rūpanibbānehipi so atthi natthī’’ti siyā āsaṅkā, tasmā tesaṃ itarehi, itaresañca tehi vippayogo vuccati, na pana rūpassa rūpena, nibbānena vā, nibbānassa vā rūpena katthaci sampayogo atthīti tadāsaṅkābhāvato vippayogopi rūpassa rūpanibbānehi, nibbānassa vā tena na vuccati, arūpakkhandhehiyeva pana vuccatīti āha ‘‘catūhevā’’tiādi. Anārammaṇassa cakkhāyatanādikassa. Anārammaṇaanārammaṇamissakehīti anārammaṇena sotāyatanādinā anārammaṇamissakena ca dhammāyatanādinā. Missakassa dhammāyatanādikassa. Anārammaṇaanārammaṇamissakehi na hotīti yojetabbaṃ. Yesaṃ pana yehi hoti, taṃ dassetuṃ ‘‘anārammaṇassa panā’’tiādi vuttaṃ. Yathā hi sārammaṇassa anārammaṇena anārammaṇamissakena ca vippayogo hoti, evaṃ sārammaṇenapi so hotiyeva. Tena viya anārammaṇassa anārammaṇamissakassa cāti daṭṭhabbaṃ.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / தா⁴துகதா²பாளி • Dhātukathāpāḷi / 3. நயமுக²மாதிகா • 3. Nayamukhamātikā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 3. நயமுக²மாதிகாவண்ணனா • 3. Nayamukhamātikāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 3. நயமுக²மாதிகாவண்ணனா • 3. Nayamukhamātikāvaṇṇanā
