| Library / Tipiṭaka / திபிடக • Tipiṭaka / நெத்திப்பகரணபாளி • Nettippakaraṇapāḷi |
நயஸமுட்டா²னங்
Nayasamuṭṭhānaṃ
79. தத்த² கதமங் நயஸமுட்டா²னங்? புப்³பா³ கோடி ந பஞ்ஞாயதி அவிஜ்ஜாயச ப⁴வதண்ஹாய ச, தத்த² அவிஜ்ஜானீவரணங் தண்ஹாஸங்யோஜனங். அவிஜ்ஜானீவரணா ஸத்தா அவிஜ்ஜாஸங்யுத்தா 1 அவிஜ்ஜாபக்கே²ன விசரந்தி, தே வுச்சந்தி தி³ட்டி²சரிதாதி. தண்ஹாஸங்யோஜனா ஸத்தா தண்ஹாஸங்யுத்தா தண்ஹாபக்கே²ன விசரந்தி, தே வுச்சந்தி தண்ஹாசரிதாதி. தி³ட்டி²சரிதா இதோ ப³ஹித்³தா⁴ பப்³ப³ஜிதா அத்தகிலமதா²னுயோக³மனுயுத்தா விஹரந்தி. தண்ஹாசரிதா இதோ ப³ஹித்³தா⁴ பப்³ப³ஜிதா காமேஸு காமஸுக²ல்லிகானுயோக³மனுயுத்தா விஹரந்தி.
79. Tattha katamaṃ nayasamuṭṭhānaṃ? Pubbā koṭi na paññāyati avijjāyaca bhavataṇhāya ca, tattha avijjānīvaraṇaṃ taṇhāsaṃyojanaṃ. Avijjānīvaraṇā sattā avijjāsaṃyuttā 2 avijjāpakkhena vicaranti, te vuccanti diṭṭhicaritāti. Taṇhāsaṃyojanā sattā taṇhāsaṃyuttā taṇhāpakkhena vicaranti, te vuccanti taṇhācaritāti. Diṭṭhicaritā ito bahiddhā pabbajitā attakilamathānuyogamanuyuttā viharanti. Taṇhācaritā ito bahiddhā pabbajitā kāmesu kāmasukhallikānuyogamanuyuttā viharanti.
தத்த² கிங்காரணங் யங் தி³ட்டி²சரிதா இதோ ப³ஹித்³தா⁴ பப்³ப³ஜிதா அத்தகிலமதா²னுயோக³மனுயுத்தா விஹரந்தி, தண்ஹாசரிதா இதோ ப³ஹித்³தா⁴ பப்³ப³ஜிதா காமேஸு காமஸுக²ல்லிகானுயோக³மனுயுத்தா விஹரந்தி? இதோ ப³ஹித்³தா⁴ நத்தி² ஸச்சவவத்தா²னங், குதோ சதுஸச்சப்பகாஸனா வா ஸமத²விபஸ்ஸனாகோஸல்லங் வா உபஸமஸுக²ப்பத்தி வா! தே உபஸமஸுக²ஸ்ஸ அனபி⁴ஞ்ஞா விபரீதசேதா ஏவமாஹங்ஸு ‘‘நத்தி² ஸுகே²ன ஸுக²ங், து³க்கே²ன நாம ஸுக²ங் அதி⁴க³ந்தப்³ப³’’ந்தி. யோ காமே படிஸேவதி, ஸோ லோகங் வட்³ட⁴யதி, யோ லோகங் வட்³ட⁴யதி, ஸோ ப³ஹுங் புஞ்ஞங் பஸவதீதி தே ஏவங்ஸஞ்ஞீ ஏவங்தி³ட்டீ² து³க்கே²ன ஸுக²ங் பத்த²யமானா காமேஸு புஞ்ஞஸஞ்ஞீ அத்தகிலமதா²னுயோக³மனுயுத்தா ச விஹரந்தி காமஸுக²ல்லிகானுயோக³மனுயுத்தா ச, தே தத³பி⁴ஞ்ஞா ஸந்தா ரோக³மேவ வட்³ட⁴யந்தி, க³ண்ட³மேவ வட்³ட⁴யந்தி, ஸல்லமேவ வட்³ட⁴யந்தி, தே ரோகா³பி⁴துன்னா க³ண்ட³படிபீளிதா ஸல்லானுவித்³தா⁴ நிரயதிரச்சா²னயோனிபேதாஸுரேஸு உம்முஜ்ஜனிமுஜ்ஜானி கரொந்தா உக்³கா⁴தனிக்³கா⁴தங் பச்சனுபொ⁴ந்தா ரோக³க³ண்ட³ஸல்லபே⁴ஸஜ்ஜங் ந விந்த³ந்தி. தத்த² அத்தகிலமதா²னுயோகோ³ காமஸுக²ல்லிகானுயோகோ³ ச ஸங்கிலேஸோ, ஸமத²விபஸ்ஸனா வோதா³னங். அத்தகிலமதா²னுயோகோ³ காமஸுக²ல்லிகானுயோகோ³ ச ரோகோ³, ஸமத²விபஸ்ஸனா ரோக³னிக்³கா⁴தகபே⁴ஸஜ்ஜங். அத்தகிலமதா²னுயோகோ³ காமஸுக²ல்லிகானுயோகோ³ ச க³ண்டோ³, ஸமத²விபஸ்ஸனா க³ண்ட³னிக்³கா⁴தகபே⁴ஸஜ்ஜங் . அத்தகிலமதா²னுயோகோ³ காமஸுக²ல்லிகானுயோகோ³ ச ஸல்லோ, ஸமத²விபஸ்ஸனா ஸல்லுத்³த⁴ரணபே⁴ஸஜ்ஜங்.
Tattha kiṃkāraṇaṃ yaṃ diṭṭhicaritā ito bahiddhā pabbajitā attakilamathānuyogamanuyuttā viharanti, taṇhācaritā ito bahiddhā pabbajitā kāmesu kāmasukhallikānuyogamanuyuttā viharanti? Ito bahiddhā natthi saccavavatthānaṃ, kuto catusaccappakāsanā vā samathavipassanākosallaṃ vā upasamasukhappatti vā! Te upasamasukhassa anabhiññā viparītacetā evamāhaṃsu ‘‘natthi sukhena sukhaṃ, dukkhena nāma sukhaṃ adhigantabba’’nti. Yo kāme paṭisevati, so lokaṃ vaḍḍhayati, yo lokaṃ vaḍḍhayati, so bahuṃ puññaṃ pasavatīti te evaṃsaññī evaṃdiṭṭhī dukkhena sukhaṃ patthayamānā kāmesu puññasaññī attakilamathānuyogamanuyuttā ca viharanti kāmasukhallikānuyogamanuyuttā ca, te tadabhiññā santā rogameva vaḍḍhayanti, gaṇḍameva vaḍḍhayanti, sallameva vaḍḍhayanti, te rogābhitunnā gaṇḍapaṭipīḷitā sallānuviddhā nirayatiracchānayonipetāsuresu ummujjanimujjāni karontā ugghātanigghātaṃ paccanubhontā rogagaṇḍasallabhesajjaṃ na vindanti. Tattha attakilamathānuyogo kāmasukhallikānuyogo ca saṃkileso, samathavipassanā vodānaṃ. Attakilamathānuyogo kāmasukhallikānuyogo ca rogo, samathavipassanā roganigghātakabhesajjaṃ. Attakilamathānuyogo kāmasukhallikānuyogo ca gaṇḍo, samathavipassanā gaṇḍanigghātakabhesajjaṃ . Attakilamathānuyogo kāmasukhallikānuyogo ca sallo, samathavipassanā salluddharaṇabhesajjaṃ.
தத்த² ஸங்கிலேஸோ து³க்க²ங், தத³பி⁴ஸங்கோ³ தண்ஹா ஸமுத³யோ, தண்ஹானிரோதோ⁴ து³க்க²னிரோதோ⁴, ஸமத²விபஸ்ஸனா து³க்க²னிரோத⁴கா³மினீ படிபதா³, இமானி சத்தாரி ஸச்சானி. து³க்க²ங் பரிஞ்ஞெய்யங், ஸமுத³யோ பஹாதப்³போ³, மக்³கோ³ பா⁴வேதப்³போ³, நிரோதோ⁴ ஸச்சி²காதப்³போ³.
Tattha saṃkileso dukkhaṃ, tadabhisaṅgo taṇhā samudayo, taṇhānirodho dukkhanirodho, samathavipassanā dukkhanirodhagāminī paṭipadā, imāni cattāri saccāni. Dukkhaṃ pariññeyyaṃ, samudayo pahātabbo, maggo bhāvetabbo, nirodho sacchikātabbo.
80. தத்த² தி³ட்டி²சரிதா ரூபங் அத்ததோ உபக³ச்ச²ந்தி. வேத³னங்…பே॰… ஸஞ்ஞங்…பே॰… ஸங்கா²ரே…பே॰… விஞ்ஞாணங் அத்ததோ உபக³ச்ச²ந்தி. தண்ஹாசரிதா ரூபவந்தங் அத்தானங் உபக³ச்ச²ந்தி. அத்தனி வா ரூபங், ரூபஸ்மிங் வா அத்தானங், வேத³னாவந்தங்…பே॰… ஸஞ்ஞாவந்தங்…பே॰… ஸங்கா²ரவந்தங்…பே॰… விஞ்ஞாணவந்தங் அத்தானங் உபக³ச்ச²ந்தி, அத்தனி வா விஞ்ஞாணங், விஞ்ஞாணஸ்மிங் வா அத்தானங், அயங் வுச்சதி வீஸதிவத்து²கா ஸக்காயதி³ட்டி².
80. Tattha diṭṭhicaritā rūpaṃ attato upagacchanti. Vedanaṃ…pe… saññaṃ…pe… saṅkhāre…pe… viññāṇaṃ attato upagacchanti. Taṇhācaritā rūpavantaṃ attānaṃ upagacchanti. Attani vā rūpaṃ, rūpasmiṃ vā attānaṃ, vedanāvantaṃ…pe… saññāvantaṃ…pe… saṅkhāravantaṃ…pe… viññāṇavantaṃ attānaṃ upagacchanti, attani vā viññāṇaṃ, viññāṇasmiṃ vā attānaṃ, ayaṃ vuccati vīsativatthukā sakkāyadiṭṭhi.
தஸ்ஸா படிபக்கோ² லோகுத்தரா ஸம்மாதி³ட்டி², அன்வாயிகா ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴, அயங் அரியோ அட்ட²ங்கி³கோ மக்³கோ³. தே தயோ க²ந்தா⁴ ஸீலக்க²ந்தோ⁴ ஸமாதி⁴க்க²ந்தோ⁴ பஞ்ஞாக்க²ந்தோ⁴. ஸீலக்க²ந்தோ⁴ ஸமாதி⁴க்க²ந்தோ⁴ ச ஸமதோ², பஞ்ஞாக்க²ந்தோ⁴ விபஸ்ஸனா. தத்த² ஸக்காயோ து³க்க²ங், ஸக்காயஸமுத³யோ து³க்க²ஸமுத³யோ, ஸக்காயனிரோதோ⁴ து³க்க²னிரோதோ⁴, அரியோ அட்ட²ங்கி³கோ மக்³கோ³ து³க்க²னிரோத⁴கா³மினீ படிபதா³, இமானி சத்தாரி ஸச்சானி. து³க்க²ங் பரிஞ்ஞெய்யங், ஸமுத³யோ பஹாதப்³போ³, மக்³கோ³ பா⁴வேதப்³போ³, நிரோதோ⁴ ஸச்சி²காதப்³போ³.
Tassā paṭipakkho lokuttarā sammādiṭṭhi, anvāyikā sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi, ayaṃ ariyo aṭṭhaṅgiko maggo. Te tayo khandhā sīlakkhandho samādhikkhandho paññākkhandho. Sīlakkhandho samādhikkhandho ca samatho, paññākkhandho vipassanā. Tattha sakkāyo dukkhaṃ, sakkāyasamudayo dukkhasamudayo, sakkāyanirodho dukkhanirodho, ariyo aṭṭhaṅgiko maggo dukkhanirodhagāminī paṭipadā, imāni cattāri saccāni. Dukkhaṃ pariññeyyaṃ, samudayo pahātabbo, maggo bhāvetabbo, nirodho sacchikātabbo.
தத்த² யே ரூபங் அத்ததோ உபக³ச்ச²ந்தி. வேத³னங்…பே॰… ஸஞ்ஞங்…பே॰… ஸங்கா²ரே…பே॰… விஞ்ஞாணங் அத்ததோ உபக³ச்ச²ந்தி. இமே வுச்சந்தி ‘‘உச்சே²த³வாதி³னோ’’தி. யே ரூபவந்தங் அத்தானங் உபக³ச்ச²ந்தி. அத்தனி வா ரூபங், ரூபஸ்மிங் வா அத்தானங். யே வேத³னாவந்தங்…பே॰… யே ஸஞ்ஞாவந்தங்…பே॰… யே ஸங்கா²ரவந்தங்…பே॰… யே விஞ்ஞாணவந்தங் அத்தானங் உபக³ச்ச²ந்தி, அத்தனி வா விஞ்ஞாணங், விஞ்ஞாணஸ்மிங் வா அத்தானங். இமே வுச்சந்தி ‘‘ஸஸ்ஸதவாதி³னோ’’தி, தத்த² உச்சே²த³ஸஸ்ஸதவாதா³ உபோ⁴ அந்தா, அயங் ஸங்ஸாரபவத்தி. தஸ்ஸ படிபக்கோ² மஜ்ஜி²மா படிபதா³ அரியோ அட்ட²ங்கி³கோ மக்³கோ³, அயங் ஸங்ஸாரனிவத்தி. தத்த² பவத்தி து³க்க²ங், தத³பி⁴ஸங்கோ³ தண்ஹா ஸமுத³யோ, தண்ஹானிரோதோ⁴ து³க்க²னிரோதோ⁴, அரியோ அட்ட²ங்கி³கோ மக்³கோ³ து³க்க²னிரோத⁴கா³மினீ படிபதா³, இமானி சத்தாரி ஸச்சானி. து³க்க²ங் பரிஞ்ஞெய்யங், ஸமுத³யோ பஹாதப்³போ³, மக்³கோ³ பா⁴வேதப்³போ³, நிரோதோ⁴ ஸச்சி²காதப்³போ³.
Tattha ye rūpaṃ attato upagacchanti. Vedanaṃ…pe… saññaṃ…pe… saṅkhāre…pe… viññāṇaṃ attato upagacchanti. Ime vuccanti ‘‘ucchedavādino’’ti. Ye rūpavantaṃ attānaṃ upagacchanti. Attani vā rūpaṃ, rūpasmiṃ vā attānaṃ. Ye vedanāvantaṃ…pe… ye saññāvantaṃ…pe… ye saṅkhāravantaṃ…pe… ye viññāṇavantaṃ attānaṃ upagacchanti, attani vā viññāṇaṃ, viññāṇasmiṃ vā attānaṃ. Ime vuccanti ‘‘sassatavādino’’ti, tattha ucchedasassatavādā ubho antā, ayaṃ saṃsārapavatti. Tassa paṭipakkho majjhimā paṭipadā ariyo aṭṭhaṅgiko maggo, ayaṃ saṃsāranivatti. Tattha pavatti dukkhaṃ, tadabhisaṅgo taṇhā samudayo, taṇhānirodho dukkhanirodho, ariyo aṭṭhaṅgiko maggo dukkhanirodhagāminī paṭipadā, imāni cattāri saccāni. Dukkhaṃ pariññeyyaṃ, samudayo pahātabbo, maggo bhāvetabbo, nirodho sacchikātabbo.
தத்த² உச்சே²த³ஸஸ்ஸதங் ஸமாஸதோ வீஸதிவத்து²கா ஸக்காயதி³ட்டி², வித்தா²ரதோ த்³வாஸட்டி² தி³ட்டி²க³தானி, தேஸங் படிபக்கோ² தேசத்தாலீஸங் போ³தி⁴பக்கி²யா த⁴ம்மா அட்ட² விமொக்கா² த³ஸ கஸிணாயதனானி. த்³வாஸட்டி² தி³ட்டி²க³தானி மோஹஜாலங் அனாதி³அனித⁴னப்பவத்தங். தேசத்தாலீஸங் 3 போ³தி⁴பக்கி²யா த⁴ம்மா ஞாணவஜிரங் மோஹஜாலப்பதா³லனங். தத்த² மோஹோ அவிஜ்ஜா, ஜாலங் ப⁴வதண்ஹா, தேன வுச்சதி ‘‘புப்³பா³ கோடி ந பஞ்ஞாயதி அவிஜ்ஜாய ச ப⁴வதண்ஹாய சா’’தி.
Tattha ucchedasassataṃ samāsato vīsativatthukā sakkāyadiṭṭhi, vitthārato dvāsaṭṭhi diṭṭhigatāni, tesaṃ paṭipakkho tecattālīsaṃ bodhipakkhiyā dhammā aṭṭha vimokkhā dasa kasiṇāyatanāni. Dvāsaṭṭhi diṭṭhigatāni mohajālaṃ anādianidhanappavattaṃ. Tecattālīsaṃ 4 bodhipakkhiyā dhammā ñāṇavajiraṃ mohajālappadālanaṃ. Tattha moho avijjā, jālaṃ bhavataṇhā, tena vuccati ‘‘pubbā koṭi na paññāyati avijjāya ca bhavataṇhāya cā’’ti.
81. தத்த² தி³ட்டி²சரிதோ அஸ்மிங் ஸாஸனே பப்³ப³ஜிதோ ஸல்லேகா²னுஸந்ததவுத்தி ப⁴வதி ஸல்லேகே² திப்³ப³கா³ரவோ. தண்ஹாசரிதோ அஸ்மிங் ஸாஸனே பப்³ப³ஜிதோ ஸிக்கா²னுஸந்ததவுத்தி ப⁴வதி ஸிக்கா²ய திப்³ப³கா³ரவோ. தி³ட்டி²சரிதோ ஸம்மத்தனியாமங் ஓக்கமந்தோ த⁴ம்மானுஸாரீ ப⁴வதி. தண்ஹாசரிதோ ஸம்மத்தனியாமங் ஓக்கமந்தோ ஸத்³தா⁴னுஸாரீ ப⁴வதி, தி³ட்டி²சரிதோ ஸுகா²ய படிபதா³ய த³ந்தா⁴பி⁴ஞ்ஞாய கி²ப்பாபி⁴ஞ்ஞாய ச நிய்யாதி. தண்ஹாசரிதோ து³க்கா²ய படிபதா³ய த³ந்தா⁴பி⁴ஞ்ஞாய கி²ப்பாபி⁴ஞ்ஞாய ச நிய்யாதி.
81. Tattha diṭṭhicarito asmiṃ sāsane pabbajito sallekhānusantatavutti bhavati sallekhe tibbagāravo. Taṇhācarito asmiṃ sāsane pabbajito sikkhānusantatavutti bhavati sikkhāya tibbagāravo. Diṭṭhicarito sammattaniyāmaṃ okkamanto dhammānusārī bhavati. Taṇhācarito sammattaniyāmaṃ okkamanto saddhānusārī bhavati, diṭṭhicarito sukhāya paṭipadāya dandhābhiññāya khippābhiññāya ca niyyāti. Taṇhācarito dukkhāya paṭipadāya dandhābhiññāya khippābhiññāya ca niyyāti.
தத்த² கிங்காரணங், யங் தண்ஹாசரிதோ து³க்கா²ய படிபதா³ய த³ந்தா⁴பி⁴ஞ்ஞாய கி²ப்பாபி⁴ஞ்ஞாய ச நிய்யாதி, தஸ்ஸ ஹி காமா அபரிச்சத்தா ப⁴வந்தி, ஸோ காமேஹி விவேசியமானோ து³க்கே²ன படினிஸ்ஸரதி த³ந்த⁴ஞ்ச த⁴ம்மங் ஆஜானாதி? யோ பனாயங் தி³ட்டி²சரிதோ அயங் ஆதி³தோயேவ காமேஹி அனத்தி²கோ ப⁴வதி. ஸோ ததோ விவேசியமானோ கி²ப்பஞ்ச படினிஸ்ஸரதி, கி²ப்பஞ்ச த⁴ம்மங் ஆஜானாதி. து³க்கா²பி படிபதா³ து³விதா⁴ த³ந்தா⁴பி⁴ஞ்ஞா ச கி²ப்பாபி⁴ஞ்ஞா ச. ஸுகா²பி படிபதா³ து³விதா⁴ த³ந்தா⁴பி⁴ஞ்ஞா ச கி²ப்பாபி⁴ஞ்ஞா ச. ஸத்தாபி து³விதா⁴ முதி³ந்த்³ரியாபி திக்கி²ந்த்³ரியாபி. யே முதி³ந்த்³ரியா, தே த³ந்த⁴ஞ்ச படினிஸ்ஸரந்தி த³ந்த⁴ஞ்ச த⁴ம்மங் ஆஜானந்தி. யே திக்கி²ந்த்³ரியா, தே கி²ப்பஞ்ச படினிஸ்ஸரந்தி, கி²ப்பஞ்ச த⁴ம்மங் ஆஜானந்தி, இமா சதஸ்ஸோ படிபதா³. யே ஹி கேசி நிய்யிங்ஸு வா நிய்யந்தி வா நிய்யிஸ்ஸந்தி வா, தே இமாஹி ஏவ சதூஹி படிபதா³ஹி. ஏவங் அரியா சதுக்கமக்³க³ங் பஞ்ஞாபெந்தி அபு³த⁴ஜனஸேவிதாய பா³லகந்தாய ரத்தவாஸினியா நந்தி³யா ப⁴வதண்ஹாய அவட்டனத்த²ங் 5. அயங் வுச்சதி நந்தி³யாவட்டஸ்ஸ நயஸ்ஸ பூ⁴மீதி, தேனாஹ ‘‘தண்ஹஞ்ச அவிஜ்ஜம்பி ச ஸமதே²னா’’தி.
Tattha kiṃkāraṇaṃ, yaṃ taṇhācarito dukkhāya paṭipadāya dandhābhiññāya khippābhiññāya ca niyyāti, tassa hi kāmā apariccattā bhavanti, so kāmehi viveciyamāno dukkhena paṭinissarati dandhañca dhammaṃ ājānāti? Yo panāyaṃ diṭṭhicarito ayaṃ āditoyeva kāmehi anatthiko bhavati. So tato viveciyamāno khippañca paṭinissarati, khippañca dhammaṃ ājānāti. Dukkhāpi paṭipadā duvidhā dandhābhiññā ca khippābhiññā ca. Sukhāpi paṭipadā duvidhā dandhābhiññā ca khippābhiññā ca. Sattāpi duvidhā mudindriyāpi tikkhindriyāpi. Ye mudindriyā, te dandhañca paṭinissaranti dandhañca dhammaṃ ājānanti. Ye tikkhindriyā, te khippañca paṭinissaranti, khippañca dhammaṃ ājānanti, imā catasso paṭipadā. Ye hi keci niyyiṃsu vā niyyanti vā niyyissanti vā, te imāhi eva catūhi paṭipadāhi. Evaṃ ariyā catukkamaggaṃ paññāpenti abudhajanasevitāya bālakantāya rattavāsiniyā nandiyā bhavataṇhāya avaṭṭanatthaṃ 6. Ayaṃ vuccati nandiyāvaṭṭassa nayassa bhūmīti, tenāha ‘‘taṇhañca avijjampi ca samathenā’’ti.
82. வெய்யாகரணேஸு ஹி யே குஸலாகுஸலாதி தே து³விதா⁴ உபபரிக்கி²தப்³பா³ – லோகவட்டானுஸாரீ ச லோகவிவட்டானுஸாரீ ச. வட்டங் நாம ஸங்ஸாரோ. விவட்டங் நிப்³பா³னங். கம்மகிலேஸா ஹேது ஸங்ஸாரஸ்ஸ. தத்த² கம்மங் சேதனா சேதஸிகஞ்ச நித்³தி³ஸிதப்³ப³ங். தங் கத²ங் த³ட்ட²ப்³ப³ங்? உபசயேன ஸப்³பே³பி கிலேஸா சதூஹி விபல்லாஸேஹி நித்³தி³ஸிதப்³பா³. தே கத்த² த³ட்ட²ப்³பா³? த³ஸ வத்து²கே கிலேஸபுஞ்ஜே. கதமானி த³ஸ வத்தூ²னி? சத்தாரோ ஆஹாரா, சத்தாரோ விபல்லாஸா, சத்தாரி உபாதா³னானி, சத்தாரோ யோகா³, சத்தாரோ க³ந்தா², சத்தாரோ ஆஸவா, சத்தாரோ ஓகா⁴, சத்தாரோ ஸல்லா, சதஸ்ஸோ விஞ்ஞாணட்டி²தியோ சத்தாரி அக³திக³மனானி. பட²மே ஆஹாரே பட²மோ விபல்லாஸோ, து³தியே ஆஹாரே து³தியோ விபல்லாஸோ, ததியே ஆஹாரே ததியோ விபல்லாஸோ, சதுத்தே² ஆஹாரே சதுத்தோ² விபல்லாஸோ. பட²மே விபல்லாஸே பட²மங் உபாதா³னங். து³தியே விபல்லாஸே து³தியங் உபாதா³னங், ததியே விபல்லாஸே ததியங் உபாதா³னங், சதுத்தே² விபல்லாஸே சதுத்த²ங் உபாதா³னங். பட²மே உபாதா³னே பட²மோ யோகோ³, து³தியே உபாதா³னே து³தியோ யோகோ³, ததியே உபாதா³னே ததியோ யோகோ³, சதுத்தே² உபாதா³னே சதுத்தோ² யோகோ³. பட²மே யோகே³ பட²மோ க³ந்தோ², து³தியே யோகே³ து³தியோ க³ந்தோ², ததியே யோகே³ ததியோ க³ந்தோ², சதுத்தே² யோகே³ சதுத்தோ² க³ந்தோ², பட²மே க³ந்தே² பட²மோ ஆஸவோ, து³தியே க³ந்தே² து³தியோ ஆஸவோ, ததியே க³ந்தே² ததியோ ஆஸவோ, சதுத்தே² க³ந்தே² சதுத்தோ² ஆஸவோ. பட²மே ஆஸவே பட²மோ ஓகோ⁴, து³தியே ஆஸவே து³தியோ ஓகோ⁴, ததியே ஆஸவே ததியோ ஓகோ⁴, சதுத்தே² ஆஸவே சதுத்தோ² ஓகோ⁴. பட²மே ஓகே⁴ பட²மோ ஸல்லோ, து³தியே ஓகே⁴ து³தியோ ஸல்லோ, ததியே ஓகே⁴ ததியோ ஸல்லோ, சதுத்தே² ஓகே⁴ சதுத்தோ² ஸல்லோ. பட²மே ஸல்லே பட²மா விஞ்ஞாணட்டி²தி, து³தியே ஸல்லே து³தியா விஞ்ஞாணட்டி²தி, ததியே ஸல்லே ததியா விஞ்ஞாணட்டி²தி, சதுத்தே² ஸல்லே சதுத்தீ² 7 விஞ்ஞாணட்டி²தி, பட²மாயங் விஞ்ஞாணட்டி²தியங் பட²மங் அக³திக³மனங். து³தியாயங் விஞ்ஞாணட்டி²தியங் து³தியங் அக³திக³மனங். ததியாயங் விஞ்ஞாணட்டி²தியங் ததியங் அக³திக³மனங், சதுத்தி²யங் 8 விஞ்ஞாணட்டி²தியங் சதுத்த²ங் அக³திக³மனங்.
82. Veyyākaraṇesu hi ye kusalākusalāti te duvidhā upaparikkhitabbā – lokavaṭṭānusārī ca lokavivaṭṭānusārī ca. Vaṭṭaṃ nāma saṃsāro. Vivaṭṭaṃ nibbānaṃ. Kammakilesā hetu saṃsārassa. Tattha kammaṃ cetanā cetasikañca niddisitabbaṃ. Taṃ kathaṃ daṭṭhabbaṃ? Upacayena sabbepi kilesā catūhi vipallāsehi niddisitabbā. Te kattha daṭṭhabbā? Dasa vatthuke kilesapuñje. Katamāni dasa vatthūni? Cattāro āhārā, cattāro vipallāsā, cattāri upādānāni, cattāro yogā, cattāro ganthā, cattāro āsavā, cattāro oghā, cattāro sallā, catasso viññāṇaṭṭhitiyo cattāri agatigamanāni. Paṭhame āhāre paṭhamo vipallāso, dutiye āhāre dutiyo vipallāso, tatiye āhāre tatiyo vipallāso, catutthe āhāre catuttho vipallāso. Paṭhame vipallāse paṭhamaṃ upādānaṃ. Dutiye vipallāse dutiyaṃ upādānaṃ, tatiye vipallāse tatiyaṃ upādānaṃ, catutthe vipallāse catutthaṃ upādānaṃ. Paṭhame upādāne paṭhamo yogo, dutiye upādāne dutiyo yogo, tatiye upādāne tatiyo yogo, catutthe upādāne catuttho yogo. Paṭhame yoge paṭhamo gantho, dutiye yoge dutiyo gantho, tatiye yoge tatiyo gantho, catutthe yoge catuttho gantho, paṭhame ganthe paṭhamo āsavo, dutiye ganthe dutiyo āsavo, tatiye ganthe tatiyo āsavo, catutthe ganthe catuttho āsavo. Paṭhame āsave paṭhamo ogho, dutiye āsave dutiyo ogho, tatiye āsave tatiyo ogho, catutthe āsave catuttho ogho. Paṭhame oghe paṭhamo sallo, dutiye oghe dutiyo sallo, tatiye oghe tatiyo sallo, catutthe oghe catuttho sallo. Paṭhame salle paṭhamā viññāṇaṭṭhiti, dutiye salle dutiyā viññāṇaṭṭhiti, tatiye salle tatiyā viññāṇaṭṭhiti, catutthe salle catutthī 9 viññāṇaṭṭhiti, paṭhamāyaṃ viññāṇaṭṭhitiyaṃ paṭhamaṃ agatigamanaṃ. Dutiyāyaṃ viññāṇaṭṭhitiyaṃ dutiyaṃ agatigamanaṃ. Tatiyāyaṃ viññāṇaṭṭhitiyaṃ tatiyaṃ agatigamanaṃ, catutthiyaṃ 10 viññāṇaṭṭhitiyaṃ catutthaṃ agatigamanaṃ.
83. தத்த² யோ ச கப³ளீகாரோ ஆஹாரோ ப²ஸ்ஸோ ஆஹாரோ, இமே தண்ஹாசரிதஸ்ஸ புக்³க³லஸ்ஸ உபக்கிலேஸா. யோ ச மனோஸஞ்சேதனாஹாரோ யோ ச விஞ்ஞாணாஹாரோ, இமே தி³ட்டி²சரிதஸ்ஸ புக்³க³லஸ்ஸ உபக்கிலேஸா. தத்த² யோ ச ‘‘அஸுபே⁴ ஸுப⁴’’ந்தி விபல்லாஸோ, யோ ச ‘‘து³க்கே² ஸுக²’’ந்தி விபல்லாஸோ, இமே தண்ஹாசரிதஸ்ஸ புக்³க³லஸ்ஸ உபக்கிலேஸா. யோ ச ‘‘அனிச்சே நிச்ச’’ந்தி விபல்லாஸோ, யோ ச ‘‘அனத்தனி அத்தா’’தி விபல்லாஸோ, இமே தி³ட்டி²சரிதஸ்ஸ புக்³க³லஸ்ஸ உபக்கிலேஸா. தத்த² யஞ்ச காமுபாதா³னங் யஞ்ச ப⁴வுபாதா³னங், இமே தண்ஹாசரிதஸ்ஸ புக்³க³லஸ்ஸ உபக்கிலேஸா. யஞ்ச தி³ட்டு²பாதா³னங் யஞ்ச அத்தவாது³பாதா³னங், இமே தி³ட்டி²சரிதஸ்ஸ புக்³க³லஸ்ஸ உபக்கிலேஸா. தத்த² யோ ச காமயோகோ³, யோ ச ப⁴வயோகோ³, இமே தண்ஹாசரிதஸ்ஸ புக்³க³லஸ்ஸ உபக்கிலேஸா. யோ ச தி³ட்டி²யோகோ³, யோ ச அவிஜ்ஜாயோகோ³, இமே தி³ட்டி²சரிதஸ்ஸ புக்³க³லஸ்ஸ உபக்கிலேஸா. தத்த² யோ ச அபி⁴ஜ்ஜா²காயக³ந்தோ², யோ ச ப்³யாபாதோ³ காயக³ந்தோ², இமே தண்ஹாசரிதஸ்ஸ புக்³க³லஸ்ஸ உபக்கிலேஸா. யோ ச பராமாஸகாயக³ந்தோ², யோ ச இத³ங்ஸச்சாபி⁴னிவேஸகாயக³ந்தோ², இமே தி³ட்டி²சரிதஸ்ஸ புக்³க³லஸ்ஸ உபக்கிலேஸா. தத்த² யோ ச காமாஸவோ, யோ ச ப⁴வாஸவோ, இமே தண்ஹாசரிதஸ்ஸ புக்³க³லஸ்ஸ உபக்கிலேஸா. யோ ச தி³ட்டா²ஸவோ, யோ ச அவிஜ்ஜாஸவோ, இமே தி³ட்டி²சரிதஸ்ஸ புக்³க³லஸ்ஸ உபக்கிலேஸா. தத்த² யோ ச காமோகோ⁴, யோ ச ப⁴வோகோ⁴, இமே தண்ஹாசரிதஸ்ஸ புக்³க³லஸ்ஸ உபக்கிலேஸா. யோ ச தி³ட்டோ²கோ⁴, யோ ச அவிஜ்ஜோகோ⁴, இமே தி³ட்டி²சரிதஸ்ஸ புக்³க³லஸ்ஸ உபக்கிலேஸா. தத்த² யோ ச ராக³ஸல்லோ, யோ ச தோ³ஸஸல்லோ, இமே தண்ஹாசரிதஸ்ஸ புக்³க³லஸ்ஸ உபக்கிலேஸா. யோ ச மானஸல்லோ, யோ ச மோஹஸல்லோ, இமே தி³ட்டி²சரிதஸ்ஸ புக்³க³லஸ்ஸ உபக்கிலேஸா. தத்த² யா ச ரூபூபகா³ விஞ்ஞாணட்டி²தி, யா ச வேத³னூபகா³ விஞ்ஞாணட்டி²தி, இமே தண்ஹாசரிதஸ்ஸ புக்³க³லஸ்ஸ உபக்கிலேஸா. யா ச ஸஞ்ஞூபகா³ விஞ்ஞாணட்டி²தி, யா ச ஸங்கா²ரூபகா³ விஞ்ஞாணட்டி²தி, இமே தி³ட்டி²சரிதஸ்ஸ புக்³க³லஸ்ஸ உபக்கிலேஸா. தத்த² யஞ்ச ச²ந்தா³ அக³திக³மனங் யஞ்ச தோ³ஸா அக³திக³மனங், இமே தண்ஹாசரிதஸ்ஸ புக்³க³லஸ்ஸ உபக்கிலேஸா. யஞ்ச ப⁴யா அக³திக³மனங், யஞ்ச மோஹா அக³திக³மனங், இமே தி³ட்டி²சரிதஸ்ஸ புக்³க³லஸ்ஸ உபக்கிலேஸா.
83. Tattha yo ca kabaḷīkāro āhāro phasso āhāro, ime taṇhācaritassa puggalassa upakkilesā. Yo ca manosañcetanāhāro yo ca viññāṇāhāro, ime diṭṭhicaritassa puggalassa upakkilesā. Tattha yo ca ‘‘asubhe subha’’nti vipallāso, yo ca ‘‘dukkhe sukha’’nti vipallāso, ime taṇhācaritassa puggalassa upakkilesā. Yo ca ‘‘anicce nicca’’nti vipallāso, yo ca ‘‘anattani attā’’ti vipallāso, ime diṭṭhicaritassa puggalassa upakkilesā. Tattha yañca kāmupādānaṃ yañca bhavupādānaṃ, ime taṇhācaritassa puggalassa upakkilesā. Yañca diṭṭhupādānaṃ yañca attavādupādānaṃ, ime diṭṭhicaritassa puggalassa upakkilesā. Tattha yo ca kāmayogo, yo ca bhavayogo, ime taṇhācaritassa puggalassa upakkilesā. Yo ca diṭṭhiyogo, yo ca avijjāyogo, ime diṭṭhicaritassa puggalassa upakkilesā. Tattha yo ca abhijjhākāyagantho, yo ca byāpādo kāyagantho, ime taṇhācaritassa puggalassa upakkilesā. Yo ca parāmāsakāyagantho, yo ca idaṃsaccābhinivesakāyagantho, ime diṭṭhicaritassa puggalassa upakkilesā. Tattha yo ca kāmāsavo, yo ca bhavāsavo, ime taṇhācaritassa puggalassa upakkilesā. Yo ca diṭṭhāsavo, yo ca avijjāsavo, ime diṭṭhicaritassa puggalassa upakkilesā. Tattha yo ca kāmogho, yo ca bhavogho, ime taṇhācaritassa puggalassa upakkilesā. Yo ca diṭṭhogho, yo ca avijjogho, ime diṭṭhicaritassa puggalassa upakkilesā. Tattha yo ca rāgasallo, yo ca dosasallo, ime taṇhācaritassa puggalassa upakkilesā. Yo ca mānasallo, yo ca mohasallo, ime diṭṭhicaritassa puggalassa upakkilesā. Tattha yā ca rūpūpagā viññāṇaṭṭhiti, yā ca vedanūpagā viññāṇaṭṭhiti, ime taṇhācaritassa puggalassa upakkilesā. Yā ca saññūpagā viññāṇaṭṭhiti, yā ca saṅkhārūpagā viññāṇaṭṭhiti, ime diṭṭhicaritassa puggalassa upakkilesā. Tattha yañca chandā agatigamanaṃ yañca dosā agatigamanaṃ, ime taṇhācaritassa puggalassa upakkilesā. Yañca bhayā agatigamanaṃ, yañca mohā agatigamanaṃ, ime diṭṭhicaritassa puggalassa upakkilesā.
84. தத்த² கப³ளீகாரே ஆஹாரே ‘‘அஸுபே⁴ ஸுப⁴’’ந்தி விபல்லாஸோ, ப²ஸ்ஸே ஆஹாரே ‘‘து³க்கே² ஸுக²’’ந்தி விபல்லாஸோ, விஞ்ஞாணே ஆஹாரே ‘‘அனிச்சே நிச்ச’’ந்தி விபல்லாஸோ, மனோஸஞ்சேதனாய ஆஹாரே ‘‘அனத்தனி அத்தா’’தி விபல்லாஸோ. பட²மே விபல்லாஸே டி²தோ காமே உபாதி³யதி , இத³ங் வுச்சதி காமுபாதா³னங்; து³தியே விபல்லாஸே டி²தோ அனாக³தங் ப⁴வங் உபாதி³யதி , இத³ங் வுச்சதி ப⁴வுபாதா³னங்; ததியே விபல்லாஸே டி²தோ ஸங்ஸாராபி⁴னந்தி³னிங் தி³ட்டி²ங் உபாதி³யதி, இத³ங் வுச்சதி தி³ட்டு²பாதா³னங்; சதுத்தே² விபல்லாஸே டி²தோ அத்தானங் கப்பியங் உபாதி³யதி, இத³ங் வுச்சதி அத்தவாது³பாதா³னங்.
84. Tattha kabaḷīkāre āhāre ‘‘asubhe subha’’nti vipallāso, phasse āhāre ‘‘dukkhe sukha’’nti vipallāso, viññāṇe āhāre ‘‘anicce nicca’’nti vipallāso, manosañcetanāya āhāre ‘‘anattani attā’’ti vipallāso. Paṭhame vipallāse ṭhito kāme upādiyati , idaṃ vuccati kāmupādānaṃ; dutiye vipallāse ṭhito anāgataṃ bhavaṃ upādiyati , idaṃ vuccati bhavupādānaṃ; tatiye vipallāse ṭhito saṃsārābhinandiniṃ diṭṭhiṃ upādiyati, idaṃ vuccati diṭṭhupādānaṃ; catutthe vipallāse ṭhito attānaṃ kappiyaṃ upādiyati, idaṃ vuccati attavādupādānaṃ.
காமுபாதா³னேன காமேஹி ஸங்யுஜ்ஜதி, அயங் வுச்சதி காமயோகோ³; ப⁴வுபாதா³னேன ப⁴வேஹி ஸங்யுஜ்ஜதி, அயங் வுச்சதி ப⁴வயோகோ³; தி³ட்டு²பாதா³னேன பாபிகாய தி³ட்டி²யா ஸங்யுஜ்ஜதி, அயங் வுச்சதி தி³ட்டி²யோகோ³; அத்தவாது³பாதா³னேன அவிஜ்ஜாய ஸங்யுஜ்ஜதி, அயங் வுச்சதி அவிஜ்ஜாயோகோ³.
Kāmupādānena kāmehi saṃyujjati, ayaṃ vuccati kāmayogo; bhavupādānena bhavehi saṃyujjati, ayaṃ vuccati bhavayogo; diṭṭhupādānena pāpikāya diṭṭhiyā saṃyujjati, ayaṃ vuccati diṭṭhiyogo; attavādupādānena avijjāya saṃyujjati, ayaṃ vuccati avijjāyogo.
பட²மே யோகே³ டி²தோ அபி⁴ஜ்ஜா²ய காயங் க³ந்த²தி, அயங் வுச்சதி அபி⁴ஜ்ஜா²காயக³ந்தோ²; து³தியே யோகே³ டி²தோ ப்³யாபாதே³ன காயங் க³ந்த²தி, அயங் வுச்சதி ப்³யாபாத³காயக³ந்தோ²; ததியே யோகே³ டி²தோ பராமாஸேன காயங் க³ந்த²தி, அயங் வுச்சதி பராமாஸகாயக³ந்தோ²; சதுத்தே² யோகே³ டி²தோ இத³ங்ஸச்சாபி⁴னிவேஸேன காயங் க³ந்த²தி, அயங் வுச்சதி இத³ங்ஸச்சாபி⁴னிவேஸகாயக³ந்தோ².
Paṭhame yoge ṭhito abhijjhāya kāyaṃ ganthati, ayaṃ vuccati abhijjhākāyagantho; dutiye yoge ṭhito byāpādena kāyaṃ ganthati, ayaṃ vuccati byāpādakāyagantho; tatiye yoge ṭhito parāmāsena kāyaṃ ganthati, ayaṃ vuccati parāmāsakāyagantho; catutthe yoge ṭhito idaṃsaccābhinivesena kāyaṃ ganthati, ayaṃ vuccati idaṃsaccābhinivesakāyagantho.
தஸ்ஸ ஏவங்க³ந்தி²தா கிலேஸா ஆஸவந்தி. குதோ ச வுச்சதி ஆஸவந்தீதி? அனுஸயதோ வா பரியுட்டா²னதோ வா. தத்த² அபி⁴ஜ்ஜா²காயக³ந்தே²ன காமாஸவோ, ப்³யாபாத³காயக³ந்தே²ன ப⁴வாஸவோ, பராமாஸகாயக³ந்தே²ன தி³ட்டா²ஸவோ, இத³ங்ஸச்சாபி⁴னிவேஸகாயக³ந்தே²ன அவிஜ்ஜாஸவோ.
Tassa evaṃganthitā kilesā āsavanti. Kuto ca vuccati āsavantīti? Anusayato vā pariyuṭṭhānato vā. Tattha abhijjhākāyaganthena kāmāsavo, byāpādakāyaganthena bhavāsavo, parāmāsakāyaganthena diṭṭhāsavo, idaṃsaccābhinivesakāyaganthena avijjāsavo.
தஸ்ஸ இமே சத்தாரோ ஆஸவா வேபுல்லங் க³தா ஓகா⁴ ப⁴வந்தி. இதி ஆஸவவேபுல்லா ஓக⁴வேபுல்லங். தத்த² காமாஸவேன காமோகோ⁴, ப⁴வாஸவேன ப⁴வோகோ⁴, தி³ட்டா²ஸவேன தி³ட்டோ²கோ⁴, அவிஜ்ஜாஸவேன அவிஜ்ஜோகோ⁴.
Tassa ime cattāro āsavā vepullaṃ gatā oghā bhavanti. Iti āsavavepullā oghavepullaṃ. Tattha kāmāsavena kāmogho, bhavāsavena bhavogho, diṭṭhāsavena diṭṭhogho, avijjāsavena avijjogho.
தஸ்ஸ இமே சத்தாரோ ஓகா⁴ அனுஸயஸஹக³தா அஜ்ஜா²ஸயங் அனுபவிட்டா² ஹத³யங் ஆஹச்ச திட்ட²ந்தி, தேன வுச்சந்தி ஸல்லாஇதி. தத்த² காமோகே⁴ன ராக³ஸல்லோ, ப⁴வோகே⁴ன தோ³ஸஸல்லோ, தி³ட்டோ²கே⁴ன மானஸல்லோ, அவிஜ்ஜோகே⁴ன மோஹஸல்லோ.
Tassa ime cattāro oghā anusayasahagatā ajjhāsayaṃ anupaviṭṭhā hadayaṃ āhacca tiṭṭhanti, tena vuccanti sallāiti. Tattha kāmoghena rāgasallo, bhavoghena dosasallo, diṭṭhoghena mānasallo, avijjoghena mohasallo.
தஸ்ஸ இமேஹி சதூஹி ஸல்லேஹி பரியாதி³ன்னங் 11 விஞ்ஞாணங் சதூஸு த⁴ம்மேஸு ஸண்ட²ஹதி ரூபே வேத³னாய ஸஞ்ஞாய ஸங்கா²ரேஸு. தத்த² ராக³ஸல்லேன நந்தூ³பஸேசனேன விஞ்ஞாணேன ரூபூபகா³ விஞ்ஞாணட்டி²தி, தோ³ஸஸல்லேன நந்தூ³பஸேசனேன விஞ்ஞாணேன வேத³னூபகா³ விஞ்ஞாணட்டி²தி, மானஸல்லேன நந்தூ³பஸேசனேன விஞ்ஞாணேன ஸஞ்ஞூபகா³ விஞ்ஞாணட்டி²தி, மோஹஸல்லேன நந்தூ³பஸேசனேன விஞ்ஞாணேன ஸங்கா²ரூபகா³ விஞ்ஞாணட்டி²தி.
Tassa imehi catūhi sallehi pariyādinnaṃ 12 viññāṇaṃ catūsu dhammesu saṇṭhahati rūpe vedanāya saññāya saṅkhāresu. Tattha rāgasallena nandūpasecanena viññāṇena rūpūpagā viññāṇaṭṭhiti, dosasallena nandūpasecanena viññāṇena vedanūpagā viññāṇaṭṭhiti, mānasallena nandūpasecanena viññāṇena saññūpagā viññāṇaṭṭhiti, mohasallena nandūpasecanena viññāṇena saṅkhārūpagā viññāṇaṭṭhiti.
தஸ்ஸ இமாஹி சதூஹி விஞ்ஞாணட்டி²தீஹி உபத்த²த்³த⁴ங் விஞ்ஞாணங் சதூஹி த⁴ம்மேஹி அக³திங் க³ச்ச²தி ச²ந்தா³ தோ³ஸா ப⁴யா மோஹா. தத்த² ராகே³ன ச²ந்தா³க³திங் க³ச்ச²தி, தோ³ஸேன தோ³ஸாக³திங் க³ச்ச²தி, ப⁴யேன ப⁴யாக³திங் க³ச்ச²தி, மோஹேன மோஹாக³திங் க³ச்ச²தி. இதி கோ² தஞ்ச கம்மங் இமே ச கிலேஸா, ஏஸ ஹேது ஸங்ஸாரஸ்ஸ, ஏவங் ஸப்³பே³ கிலேஸா சதூஹி விபல்லாஸேஹி நித்³தி³ஸிதப்³பா³.
Tassa imāhi catūhi viññāṇaṭṭhitīhi upatthaddhaṃ viññāṇaṃ catūhi dhammehi agatiṃ gacchati chandā dosā bhayā mohā. Tattha rāgena chandāgatiṃ gacchati, dosena dosāgatiṃ gacchati, bhayena bhayāgatiṃ gacchati, mohena mohāgatiṃ gacchati. Iti kho tañca kammaṃ ime ca kilesā, esa hetu saṃsārassa, evaṃ sabbe kilesā catūhi vipallāsehi niddisitabbā.
85. தத்த² இமா சதஸ்ஸோ தி³ஸா கப³ளீகாரோ ஆஹாரோ ‘‘அஸுபே⁴ ஸுப⁴’’ந்தி விபல்லாஸோ, காமுபாதா³னங், காமயோகோ³, அபி⁴ஜ்ஜா²காயக³ந்தோ², காமாஸவோ, காமோகோ⁴, ராக³ஸல்லோ, ரூபூபகா³ விஞ்ஞாணட்டி²தி, ச²ந்தா³ அக³திக³மனந்தி பட²மா தி³ஸா.
85. Tattha imā catasso disā kabaḷīkāro āhāro ‘‘asubhe subha’’nti vipallāso, kāmupādānaṃ, kāmayogo, abhijjhākāyagantho, kāmāsavo, kāmogho, rāgasallo, rūpūpagā viññāṇaṭṭhiti, chandā agatigamananti paṭhamā disā.
ப²ஸ்ஸோ ஆஹாரோ, ‘‘து³க்கே² ஸுக²’’ந்தி விபல்லாஸோ, ப⁴வுபாதா³னங், ப⁴வயோகோ³, ப்³யாபாத³காயக³ந்தோ², ப⁴வாஸவோ, ப⁴வோகோ⁴, தோ³ஸஸல்லோ, வேத³னூபகா³ விஞ்ஞாணட்டி²தி, தோ³ஸா அக³திக³மனந்தி து³தியா தி³ஸா.
Phasso āhāro, ‘‘dukkhe sukha’’nti vipallāso, bhavupādānaṃ, bhavayogo, byāpādakāyagantho, bhavāsavo, bhavogho, dosasallo, vedanūpagā viññāṇaṭṭhiti, dosā agatigamananti dutiyā disā.
விஞ்ஞாணாஹாரோ ‘‘அனிச்சே நிச்ச’’ந்தி விபல்லாஸோ, தி³ட்டு²பாதா³னங், தி³ட்டி²யோகோ³ பராமாஸகாயக³ந்தோ², தி³ட்டா²ஸவோ, தி³ட்டோ²கோ⁴, மானஸல்லோ, ஸஞ்ஞூபகா³ விஞ்ஞாணட்டி²தி, ப⁴யா அக³திக³மனந்தி ததியா தி³ஸா.
Viññāṇāhāro ‘‘anicce nicca’’nti vipallāso, diṭṭhupādānaṃ, diṭṭhiyogo parāmāsakāyagantho, diṭṭhāsavo, diṭṭhogho, mānasallo, saññūpagā viññāṇaṭṭhiti, bhayā agatigamananti tatiyā disā.
மனோஸஞ்சேதனாஹாரோ ‘‘அனத்தனி அத்தா’’தி விபல்லாஸோ, அத்தவாது³பாதா³னங், அவிஜ்ஜாயோகோ³, இத³ங்ஸச்சாபி⁴னிவேஸகாயக³ந்தோ², அவிஜ்ஜாஸவோ, அவிஜ்ஜோகோ⁴, மோஹஸல்லோ, ஸங்கா²ரூபகா³ விஞ்ஞாணட்டி²தி, மோஹா அக³திக³மனந்தி சதுத்தீ² தி³ஸா.
Manosañcetanāhāro ‘‘anattani attā’’ti vipallāso, attavādupādānaṃ, avijjāyogo, idaṃsaccābhinivesakāyagantho, avijjāsavo, avijjogho, mohasallo, saṅkhārūpagā viññāṇaṭṭhiti, mohā agatigamananti catutthī disā.
தத்த² யோ ச கப³ளீகாரோ ஆஹாரோ யோ ச ‘‘அஸுபே⁴ ஸுப⁴’’ந்தி விபல்லாஸோ, காமுபாதா³னங், காமயோகோ³, அபி⁴ஜ்ஜா²காயக³ந்தோ², காமாஸவோ , காமோகோ⁴, ராக³ஸல்லோ, ரூபூபகா³ விஞ்ஞாணட்டி²தி ச²ந்தா³ அக³திக³மனந்தி, இமேஸங் த³ஸன்னங் ஸுத்தானங் ஏகோ அத்தோ², ப்³யஞ்ஜனமேவ நானங். இமே ராக³சரிதஸ்ஸ புக்³க³லஸ்ஸ உபக்கிலேஸா.
Tattha yo ca kabaḷīkāro āhāro yo ca ‘‘asubhe subha’’nti vipallāso, kāmupādānaṃ, kāmayogo, abhijjhākāyagantho, kāmāsavo , kāmogho, rāgasallo, rūpūpagā viññāṇaṭṭhiti chandā agatigamananti, imesaṃ dasannaṃ suttānaṃ eko attho, byañjanameva nānaṃ. Ime rāgacaritassa puggalassa upakkilesā.
தத்த² யோ ச ப²ஸ்ஸோ ஆஹாரோ யோ ச ‘‘து³க்கே² ஸுக²’’ந்தி விபல்லாஸோ, ப⁴வுபாதா³னங், ப⁴வயோகோ³ , ப்³யாபாத³காயக³ந்தோ², ப⁴வாஸவோ, ப⁴வோகோ⁴, தோ³ஸஸல்லோ, வேத³னூபகா³ விஞ்ஞாணட்டி²தி, தோ³ஸா அக³திக³மனந்தி இமேஸங் த³ஸன்னங் ஸுத்தானங் ஏகோ அத்தோ² ப்³யஞ்ஜனமேவ நானங், இமே தோ³ஸசரிதஸ்ஸ புக்³க³லஸ்ஸ உபக்கிலேஸா.
Tattha yo ca phasso āhāro yo ca ‘‘dukkhe sukha’’nti vipallāso, bhavupādānaṃ, bhavayogo , byāpādakāyagantho, bhavāsavo, bhavogho, dosasallo, vedanūpagā viññāṇaṭṭhiti, dosā agatigamananti imesaṃ dasannaṃ suttānaṃ eko attho byañjanameva nānaṃ, ime dosacaritassa puggalassa upakkilesā.
தத்த² யோ ச விஞ்ஞாணாஹாரோ யோ ச ‘‘அனிச்சே நிச்ச’’ந்தி விபல்லாஸோ, தி³ட்டு²பாதா³னங், தி³ட்டி²யோகோ³, பராமாஸகாயக³ந்தோ², தி³ட்டா²ஸவோ, தி³ட்டோ²கோ⁴, மானஸல்லோ, ஸஞ்ஞூபகா³ விஞ்ஞாணட்டி²தி, ப⁴யா அக³திக³மனந்தி இமேஸங் த³ஸன்னங் ஸுத்தானங் ஏகோ அத்தோ², ப்³யஞ்ஜனமேவ நானங். இமே தி³ட்டி²சரிதஸ்ஸ மந்த³ஸ்ஸ உபக்கிலேஸா.
Tattha yo ca viññāṇāhāro yo ca ‘‘anicce nicca’’nti vipallāso, diṭṭhupādānaṃ, diṭṭhiyogo, parāmāsakāyagantho, diṭṭhāsavo, diṭṭhogho, mānasallo, saññūpagā viññāṇaṭṭhiti, bhayā agatigamananti imesaṃ dasannaṃ suttānaṃ eko attho, byañjanameva nānaṃ. Ime diṭṭhicaritassa mandassa upakkilesā.
தத்த² யோ ச மனோஸஞ்சேதனாஹாரோ யோ ச ‘‘அனத்தனி அத்தா’’தி விபல்லாஸோ, அத்தவாது³பாதா³னங், அவிஜ்ஜாயோகோ³, இத³ங்ஸச்சாபி⁴னிவேஸகாயக³ந்தோ², அவிஜ்ஜாஸவோ, அவிஜ்ஜோகோ⁴, மோஹஸல்லோ, ஸங்கா²ரூபகா³ விஞ்ஞாணட்டி²தி, மோஹா அக³திக³மனந்தி, இமேஸங் த³ஸன்னங் ஸுத்தானங் ஏகோ அத்தோ², ப்³யஞ்ஜனமேவ நானங். இமே தி³ட்டி²சரிதஸ்ஸ உத³த்தஸ்ஸ 13 உபக்கிலேஸா.
Tattha yo ca manosañcetanāhāro yo ca ‘‘anattani attā’’ti vipallāso, attavādupādānaṃ, avijjāyogo, idaṃsaccābhinivesakāyagantho, avijjāsavo, avijjogho, mohasallo, saṅkhārūpagā viññāṇaṭṭhiti, mohā agatigamananti, imesaṃ dasannaṃ suttānaṃ eko attho, byañjanameva nānaṃ. Ime diṭṭhicaritassa udattassa 14 upakkilesā.
தத்த² யோ ச கப³ளீகாரோ ஆஹாரோ யோ ச ப²ஸ்ஸோ ஆஹாரோ, இமே அப்பணிஹிதேன விமொக்க²முகே²ன பரிஞ்ஞங் க³ச்ச²ந்தி, விஞ்ஞாணாஹாரோ ஸுஞ்ஞதாய, மனோஸஞ்சேதனாஹாரோ அனிமித்தேன, தத்த² யோ ச ‘‘அஸுபே⁴ ஸுப⁴’’ந்தி விபல்லாஸோ, யோ ச ‘‘து³க்கே² ஸுக²’’ந்தி விபல்லாஸோ, இமே அப்பணிஹிதேன விமொக்க²முகே²ன பஹானங் அப்³ப⁴த்த²ங் க³ச்ச²ந்தி. ‘‘அனிச்சே நிச்ச’’ந்தி விபல்லாஸோ ஸுஞ்ஞதாய, ‘‘அனத்தனி அத்தா’’தி விபல்லாஸோ அனிமித்தேன. தத்த² காமுபாதா³னஞ்ச ப⁴வுபாதா³னஞ்ச அப்பணிஹிதேன விமொக்க²முகே²ன பஹானங் க³ச்ச²ந்தி. தி³ட்டு²பாதா³னங் ஸுஞ்ஞதாய, அத்தவாது³பாதா³னங் அனிமித்தேன. தத்த² காமயோகோ³ ச ப⁴வயோகோ³ ச அப்பணிஹிதேன விமொக்க²முகே²ன பஹானங் க³ச்ச²ந்தி, தி³ட்டி²யோகோ³ ஸுஞ்ஞதாய, அவிஜ்ஜாயோகோ³ அனிமித்தேன. தத்த² அபி⁴ஜ்ஜா²காயக³ந்தோ² ச ப்³யாபாத³காயக³ந்தோ² ச அப்பணிஹிதேன விமொக்க²முகே²ன பஹானங் க³ச்ச²ந்தி, பராமாஸகாயக³ந்தோ² ஸுஞ்ஞதாய, இத³ங்ஸச்சாபி⁴னிவேஸகாயக³ந்தோ² அனிமித்தேன.
Tattha yo ca kabaḷīkāro āhāro yo ca phasso āhāro, ime appaṇihitena vimokkhamukhena pariññaṃ gacchanti, viññāṇāhāro suññatāya, manosañcetanāhāro animittena, tattha yo ca ‘‘asubhe subha’’nti vipallāso, yo ca ‘‘dukkhe sukha’’nti vipallāso, ime appaṇihitena vimokkhamukhena pahānaṃ abbhatthaṃ gacchanti. ‘‘Anicce nicca’’nti vipallāso suññatāya, ‘‘anattani attā’’ti vipallāso animittena. Tattha kāmupādānañca bhavupādānañca appaṇihitena vimokkhamukhena pahānaṃ gacchanti. Diṭṭhupādānaṃ suññatāya, attavādupādānaṃ animittena. Tattha kāmayogo ca bhavayogo ca appaṇihitena vimokkhamukhena pahānaṃ gacchanti, diṭṭhiyogo suññatāya, avijjāyogo animittena. Tattha abhijjhākāyagantho ca byāpādakāyagantho ca appaṇihitena vimokkhamukhena pahānaṃ gacchanti, parāmāsakāyagantho suññatāya, idaṃsaccābhinivesakāyagantho animittena.
தத்த² காமாஸவோ ச ப⁴வாஸவோ ச அப்பணிஹிதேன விமொக்க²முகே²ன பஹானங் க³ச்ச²ந்தி, தி³ட்டா²ஸவோ ஸுஞ்ஞதாய, அவிஜ்ஜாஸவோ அனிமித்தேன. தத்த² காமோகோ⁴ ச ப⁴வோகோ⁴ ச அப்பணிஹிதேன விமொக்க²முகே²ன பஹானங் க³ச்ச²ந்தி, தி³ட்டோ²கோ⁴ ஸுஞ்ஞதாய, அவிஜ்ஜோகோ⁴ அனிமித்தேன. தத்த² ராக³ஸல்லோ ச தோ³ஸஸல்லோ ச அப்பணிஹிதேன விமொக்க²முகே²ன பஹானங் க³ச்ச²ந்தி, மானஸல்லோ ஸுஞ்ஞதாய, மோஹஸல்லோ அனிமித்தேன. தத்த² ரூபூபகா³ ச விஞ்ஞாணட்டி²தி வேத³னூபகா³ ச விஞ்ஞாணட்டி²தி அப்பணிஹிதேன விமொக்க²முகே²ன பரிஞ்ஞங் க³ச்ச²ந்தி, ஸஞ்ஞூபகா³ ஸுஞ்ஞதாய, ஸங்கா²ரூபகா³ அனிமித்தேன.
Tattha kāmāsavo ca bhavāsavo ca appaṇihitena vimokkhamukhena pahānaṃ gacchanti, diṭṭhāsavo suññatāya, avijjāsavo animittena. Tattha kāmogho ca bhavogho ca appaṇihitena vimokkhamukhena pahānaṃ gacchanti, diṭṭhogho suññatāya, avijjogho animittena. Tattha rāgasallo ca dosasallo ca appaṇihitena vimokkhamukhena pahānaṃ gacchanti, mānasallo suññatāya, mohasallo animittena. Tattha rūpūpagā ca viññāṇaṭṭhiti vedanūpagā ca viññāṇaṭṭhiti appaṇihitena vimokkhamukhena pariññaṃ gacchanti, saññūpagā suññatāya, saṅkhārūpagā animittena.
தத்த² ச²ந்தா³ ச அக³திக³மனங் தோ³ஸா ச அக³திக³மனங் அப்பணிஹிதேன விமொக்க²முகே²ன பஹானங் க³ச்ச²ந்தி, ப⁴யா அக³திக³மனங் ஸுஞ்ஞதாய, மோஹா அக³திக³மனங் அனிமித்தேன விமொக்க²முகே²ன பஹானங் க³ச்ச²ந்தி. இதி ஸப்³பே³ லோகவட்டானுஸாரினோ த⁴ம்மா நிய்யந்தி. தே லோகா தீஹி விமொக்க²முகே²ஹி.
Tattha chandā ca agatigamanaṃ dosā ca agatigamanaṃ appaṇihitena vimokkhamukhena pahānaṃ gacchanti, bhayā agatigamanaṃ suññatāya, mohā agatigamanaṃ animittena vimokkhamukhena pahānaṃ gacchanti. Iti sabbe lokavaṭṭānusārino dhammā niyyanti. Te lokā tīhi vimokkhamukhehi.
86. தத்ரித³ங் நிய்யானங் –
86. Tatridaṃ niyyānaṃ –
சதஸ்ஸோ படிபதா³, சத்தாரோ ஸதிபட்டா²னா, சத்தாரி ஜா²னானி, சத்தாரோ விஹாரா, சத்தாரோ ஸம்மப்பதா⁴னா, சத்தாரோ அச்ச²ரியா அப்³பு⁴தா த⁴ம்மா, சத்தாரி அதி⁴ட்டா²னானி, சதஸ்ஸோ ஸமாதி⁴பா⁴வனா, சத்தாரோ ஸுக²பா⁴கி³யா த⁴ம்மா, சதஸ்ஸோ அப்பமாணா.
Catasso paṭipadā, cattāro satipaṭṭhānā, cattāri jhānāni, cattāro vihārā, cattāro sammappadhānā, cattāro acchariyā abbhutā dhammā, cattāri adhiṭṭhānāni, catasso samādhibhāvanā, cattāro sukhabhāgiyā dhammā, catasso appamāṇā.
பட²மா படிபதா³ பட²மங் ஸதிபட்டா²னங், து³தியா படிபதா³ து³தியங் ஸதிபட்டா²னங், ததியா படிபதா³ ததியங் ஸதிபட்டா²னங், சதுத்தீ² படிபதா³ சதுத்த²ங் ஸதிபட்டா²னங். பட²மங் ஸதிபட்டா²னங் பட²மங் ஜா²னங், து³தியங் ஸதிபட்டா²னங் து³தியங் ஜா²னங், ததியங் ஸதிபட்டா²னங் ததியங் ஜா²னங். சதுத்த²ங் ஸதிபட்டா²னங் சதுத்த²ங் ஜா²னங். பட²மங் ஜா²னங் பட²மோ விஹாரோ, து³தியங் ஜா²னங் து³தியோ விஹாரோ, ததியங் ஜா²னங் ததியோ விஹாரோ, சதுத்த²ங் ஜா²னங் சதுத்தோ² விஹாரோ. பட²மோ விஹாரோ பட²மங் ஸம்மப்பதா⁴னங், து³தியோ விஹாரோ து³தியங் ஸம்மப்பதா⁴னங், ததியோ விஹாரோ ததியங் ஸம்மப்பதா⁴னங், சதுத்தோ² விஹாரோ சதுத்த²ங் ஸம்மப்பதா⁴னங். பட²மங் ஸம்மப்பதா⁴னங் பட²மோ அச்ச²ரியோ அப்³பு⁴தோ த⁴ம்மோ, து³தியங் து³தியோ, ததியங் ததியோ, சதுத்த²ங் ஸம்மப்பதா⁴னங் சதுத்தோ² அச்ச²ரியோ அப்³பு⁴தோ த⁴ம்மோ. பட²மோ அச்ச²ரியோ அப்³பு⁴தோ த⁴ம்மோ பட²மங் அதி⁴ட்டா²னங், து³தியோ அச்ச²ரியோ அப்³பு⁴தோ த⁴ம்மோ து³தியங் அதி⁴ட்டா²னங், ததியோ அச்ச²ரியோ அப்³பு⁴தோ த⁴ம்மோ ததியங் அதி⁴ட்டா²னங், சதுத்தோ² அச்ச²ரியோ அப்³பு⁴தோ த⁴ம்மோ சதுத்த²ங் அதி⁴ட்டா²னங். பட²மங் அதி⁴ட்டா²னங் பட²மா ஸமாதி⁴பா⁴வனா, து³தியங் அதி⁴ட்டா²னங் து³தியா ஸமாதி⁴பா⁴வனா, ததியங் அதி⁴ட்டா²னங் ததியா ஸமாதி⁴பா⁴வனா, சதுத்த²ங் அதி⁴ட்டா²னங் சதுத்தீ² ஸமாதி⁴பா⁴வனா. பட²மா ஸமாதி⁴பா⁴வனா பட²மோ ஸுக²பா⁴கி³யோ த⁴ம்மோ, து³தியா ஸமாதி⁴பா⁴வனா து³தியோ ஸுக²பா⁴கி³யோ த⁴ம்மோ, ததியா ஸமாதி⁴பா⁴வனா ததியோ ஸுக²பா⁴கி³யோ த⁴ம்மோ, சதுத்தீ² ஸமாதி⁴பா⁴வனா சதுத்தோ² ஸுக²பா⁴கி³யோ த⁴ம்மோ. பட²மோ ஸுக²பா⁴கி³யோ த⁴ம்மோ பட²மங் அப்பமாணங், து³தியோ ஸுக²பா⁴கி³யோ த⁴ம்மோ து³தியங் அப்பமாணங், ததியோ ஸுக²பா⁴கி³யோ த⁴ம்மோ ததியங் அப்பமாணங், சதுத்தோ² ஸுக²பா⁴கி³யோ த⁴ம்மோ சதுத்த²ங் அப்பமாணங். பட²மா படிபதா³ பா⁴விதா ப³ஹுலீகதா 15 பட²மங் ஸதிபட்டா²னங் பரிபூரேதி, து³தியா படிபதா³ பா⁴விதா ப³ஹுலீகதா து³தியங் ஸதிபட்டா²னங் பரிபூரேதி, ததியா படிபதா³ பா⁴விதா ப³ஹுலீகதா ததியங் ஸதிபட்டா²னங் பரிபூரேதி, சதுத்தீ² படிபதா³ பா⁴விதா ப³ஹுலீகதா சதுத்த²ங் ஸதிபட்டா²னங் பரிபூரேதி. பட²மோ ஸதிபட்டா²னோ பா⁴விதோ ப³ஹுலீகதோ பட²மங் ஜா²னங் பரிபூரேதி, து³தியோ ஸதிபட்டா²னோ பா⁴விதோ ப³ஹுலீகதோ து³தியங் ஜா²னங் பரிபூரேதி, ததியோ ஸதிபட்டா²னோ பா⁴விதோ ப³ஹுலீகதோ ததியங் ஜா²னங் பரிபூரேதி, சதுத்தோ² ஸதிபட்டா²னோ பா⁴விதோ ப³ஹுலீகதோ சதுத்த²ங் ஜா²னங் பரிபூரேதி.
Paṭhamā paṭipadā paṭhamaṃ satipaṭṭhānaṃ, dutiyā paṭipadā dutiyaṃ satipaṭṭhānaṃ, tatiyā paṭipadā tatiyaṃ satipaṭṭhānaṃ, catutthī paṭipadā catutthaṃ satipaṭṭhānaṃ. Paṭhamaṃ satipaṭṭhānaṃ paṭhamaṃ jhānaṃ, dutiyaṃ satipaṭṭhānaṃ dutiyaṃ jhānaṃ, tatiyaṃ satipaṭṭhānaṃ tatiyaṃ jhānaṃ. Catutthaṃ satipaṭṭhānaṃ catutthaṃ jhānaṃ. Paṭhamaṃ jhānaṃ paṭhamo vihāro, dutiyaṃ jhānaṃ dutiyo vihāro, tatiyaṃ jhānaṃ tatiyo vihāro, catutthaṃ jhānaṃ catuttho vihāro. Paṭhamo vihāro paṭhamaṃ sammappadhānaṃ, dutiyo vihāro dutiyaṃ sammappadhānaṃ, tatiyo vihāro tatiyaṃ sammappadhānaṃ, catuttho vihāro catutthaṃ sammappadhānaṃ. Paṭhamaṃ sammappadhānaṃ paṭhamo acchariyo abbhuto dhammo, dutiyaṃ dutiyo, tatiyaṃ tatiyo, catutthaṃ sammappadhānaṃ catuttho acchariyo abbhuto dhammo. Paṭhamo acchariyo abbhuto dhammo paṭhamaṃ adhiṭṭhānaṃ, dutiyo acchariyo abbhuto dhammo dutiyaṃ adhiṭṭhānaṃ, tatiyo acchariyo abbhuto dhammo tatiyaṃ adhiṭṭhānaṃ, catuttho acchariyo abbhuto dhammo catutthaṃ adhiṭṭhānaṃ. Paṭhamaṃ adhiṭṭhānaṃ paṭhamā samādhibhāvanā, dutiyaṃ adhiṭṭhānaṃ dutiyā samādhibhāvanā, tatiyaṃ adhiṭṭhānaṃ tatiyā samādhibhāvanā, catutthaṃ adhiṭṭhānaṃ catutthī samādhibhāvanā. Paṭhamā samādhibhāvanā paṭhamo sukhabhāgiyo dhammo, dutiyā samādhibhāvanā dutiyo sukhabhāgiyo dhammo, tatiyā samādhibhāvanā tatiyo sukhabhāgiyo dhammo, catutthī samādhibhāvanā catuttho sukhabhāgiyo dhammo. Paṭhamo sukhabhāgiyo dhammo paṭhamaṃ appamāṇaṃ, dutiyo sukhabhāgiyo dhammo dutiyaṃ appamāṇaṃ, tatiyo sukhabhāgiyo dhammo tatiyaṃ appamāṇaṃ, catuttho sukhabhāgiyo dhammo catutthaṃ appamāṇaṃ. Paṭhamā paṭipadā bhāvitā bahulīkatā 16 paṭhamaṃ satipaṭṭhānaṃ paripūreti, dutiyā paṭipadā bhāvitā bahulīkatā dutiyaṃ satipaṭṭhānaṃ paripūreti, tatiyā paṭipadā bhāvitā bahulīkatā tatiyaṃ satipaṭṭhānaṃ paripūreti, catutthī paṭipadā bhāvitā bahulīkatā catutthaṃ satipaṭṭhānaṃ paripūreti. Paṭhamo satipaṭṭhāno bhāvito bahulīkato paṭhamaṃ jhānaṃ paripūreti, dutiyo satipaṭṭhāno bhāvito bahulīkato dutiyaṃ jhānaṃ paripūreti, tatiyo satipaṭṭhāno bhāvito bahulīkato tatiyaṃ jhānaṃ paripūreti, catuttho satipaṭṭhāno bhāvito bahulīkato catutthaṃ jhānaṃ paripūreti.
பட²மங் ஜா²னங் பா⁴விதங் ப³ஹுலீகதங் பட²மங் விஹாரங் பரிபூரேதி, து³தியங் ஜா²னங் பா⁴விதங் ப³ஹுலீகதங் து³தியங் விஹாரங் பரிபூரேதி, ததியங் ஜா²னங் பா⁴விதங் ப³ஹுலீகதங் ததியங் விஹாரங் பரிபூரேதி, சதுத்த²ங் ஜா²னங் பா⁴விதங் ப³ஹுலீகதங் சதுத்த²ங் விஹாரங் பரிபூரேதி. பட²மோ விஹாரோ பா⁴விதோ ப³ஹுலீகதோ அனுப்பன்னானங் பாபகானங் அகுஸலானங் த⁴ம்மானங் அனுப்பாத³ங் பரிபூரேதி, து³தியோ விஹாரோ பா⁴விதோ ப³ஹுலீகதோ உப்பன்னானங் பாபகானங் அகுஸலானங் த⁴ம்மானங் பஹானங் பரிபூரேதி, ததியோ விஹாரோ பா⁴விதோ ப³ஹுலீகதோ அனுப்பன்னானங் குஸலானங் த⁴ம்மானங் உப்பாத³ங் பரிபூரேதி, சதுத்தோ² விஹாரோ பா⁴விதோ ப³ஹுலீகதோ உப்பன்னானங் குஸலானங் த⁴ம்மானங் டி²திங் அஸம்மோஸங் பி⁴ய்யோபா⁴வங் பரிபூரேதி. பட²மங் ஸம்மப்பதா⁴னங் பா⁴விதங் ப³ஹுலீகதங் மானப்பஹானங் பரிபூரேதி, து³தியங் ஸம்மப்பதா⁴னங் பா⁴விதங் ப³ஹுலீகதங் ஆலயஸமுக்³கா⁴தங் பரிபூரேதி, ததியங் ஸம்மப்பதா⁴னங் பா⁴விதங் ப³ஹுலீகதங் அவிஜ்ஜாபஹானங் பரிபூரேதி, சதுத்த²ங் ஸம்மப்பதா⁴னங் பா⁴விதங் ப³ஹுலீகதங் ப⁴வூபஸமங் பரிபூரேதி. மானப்பஹானங் பா⁴விதங் ப³ஹுலீகதங் ஸச்சாதி⁴ட்டா²னங் பரிபூரேதி, ஆலயஸமுக்³கா⁴தோ பா⁴விதோ ப³ஹுலீகதோ சாகா³தி⁴ட்டா²னங் பரிபூரேதி, அவிஜ்ஜாபஹானங் பா⁴விதங் ப³ஹுலீகதங் பஞ்ஞாதி⁴ட்டா²னங் பரிபூரேதி, ப⁴வூபஸமோ பா⁴விதோ ப³ஹுலீகதோ உபஸமாதி⁴ட்டா²னங் பரிபூரேதி. ஸச்சாதி⁴ட்டா²னங் பா⁴விதங் ப³ஹுலீகதங் ச²ந்த³ஸமாதி⁴ங் பரிபூரேதி, சாகா³தி⁴ட்டா²னங் பா⁴விதங் ப³ஹுலீகதங் வீரியஸமாதி⁴ங் பரிபூரேதி, பஞ்ஞாதி⁴ட்டா²னங் பா⁴விதங் ப³ஹுலீகதங் சித்தஸமாதி⁴ங் பரிபூரேதி, உபஸமாதி⁴ட்டா²னங் பா⁴விதங் ப³ஹுலீகதங் வீமங்ஸாஸமாதி⁴ங் பரிபூரேதி. ச²ந்த³ஸமாதி⁴ பா⁴விதோ ப³ஹுலீகதோ இந்த்³ரியஸங்வரங் பரிபூரேதி, வீரியஸமாதி⁴ பா⁴விதோ ப³ஹுலீகதோ தபங் பரிபூரேதி, சித்தஸமாதி⁴ பா⁴விதோ ப³ஹுலீகதோ பு³த்³தி⁴ங் பரிபூரேதி, வீமங்ஸாஸமாதி⁴ பா⁴விதோ ப³ஹுலீகதோ ஸப்³பூ³பதி⁴படினிஸ்ஸக்³க³ங் பரிபூரேதி. இந்த்³ரியஸங்வரோ பா⁴விதோ ப³ஹுலீகதோ மெத்தங் பரிபூரேதி, தபோ பா⁴விதோ ப³ஹுலீகதோ கருணங் பரிபூரேதி, பு³த்³தி⁴ பா⁴விதா ப³ஹுலீகதா முதி³தங் பரிபூரேதி, ஸப்³பூ³பதி⁴படினிஸ்ஸக்³கோ³ பா⁴விதோ ப³ஹுலீகதோ உபெக்க²ங் பரிபூரேதி.
Paṭhamaṃ jhānaṃ bhāvitaṃ bahulīkataṃ paṭhamaṃ vihāraṃ paripūreti, dutiyaṃ jhānaṃ bhāvitaṃ bahulīkataṃ dutiyaṃ vihāraṃ paripūreti, tatiyaṃ jhānaṃ bhāvitaṃ bahulīkataṃ tatiyaṃ vihāraṃ paripūreti, catutthaṃ jhānaṃ bhāvitaṃ bahulīkataṃ catutthaṃ vihāraṃ paripūreti. Paṭhamo vihāro bhāvito bahulīkato anuppannānaṃ pāpakānaṃ akusalānaṃ dhammānaṃ anuppādaṃ paripūreti, dutiyo vihāro bhāvito bahulīkato uppannānaṃ pāpakānaṃ akusalānaṃ dhammānaṃ pahānaṃ paripūreti, tatiyo vihāro bhāvito bahulīkato anuppannānaṃ kusalānaṃ dhammānaṃ uppādaṃ paripūreti, catuttho vihāro bhāvito bahulīkato uppannānaṃ kusalānaṃ dhammānaṃ ṭhitiṃ asammosaṃ bhiyyobhāvaṃ paripūreti. Paṭhamaṃ sammappadhānaṃ bhāvitaṃ bahulīkataṃ mānappahānaṃ paripūreti, dutiyaṃ sammappadhānaṃ bhāvitaṃ bahulīkataṃ ālayasamugghātaṃ paripūreti, tatiyaṃ sammappadhānaṃ bhāvitaṃ bahulīkataṃ avijjāpahānaṃ paripūreti, catutthaṃ sammappadhānaṃ bhāvitaṃ bahulīkataṃ bhavūpasamaṃ paripūreti. Mānappahānaṃ bhāvitaṃ bahulīkataṃ saccādhiṭṭhānaṃ paripūreti, ālayasamugghāto bhāvito bahulīkato cāgādhiṭṭhānaṃ paripūreti, avijjāpahānaṃ bhāvitaṃ bahulīkataṃ paññādhiṭṭhānaṃ paripūreti, bhavūpasamo bhāvito bahulīkato upasamādhiṭṭhānaṃ paripūreti. Saccādhiṭṭhānaṃ bhāvitaṃ bahulīkataṃ chandasamādhiṃ paripūreti, cāgādhiṭṭhānaṃ bhāvitaṃ bahulīkataṃ vīriyasamādhiṃ paripūreti, paññādhiṭṭhānaṃ bhāvitaṃ bahulīkataṃ cittasamādhiṃ paripūreti, upasamādhiṭṭhānaṃ bhāvitaṃ bahulīkataṃ vīmaṃsāsamādhiṃ paripūreti. Chandasamādhi bhāvito bahulīkato indriyasaṃvaraṃ paripūreti, vīriyasamādhi bhāvito bahulīkato tapaṃ paripūreti, cittasamādhi bhāvito bahulīkato buddhiṃ paripūreti, vīmaṃsāsamādhi bhāvito bahulīkato sabbūpadhipaṭinissaggaṃ paripūreti. Indriyasaṃvaro bhāvito bahulīkato mettaṃ paripūreti, tapo bhāvito bahulīkato karuṇaṃ paripūreti, buddhi bhāvitā bahulīkatā muditaṃ paripūreti, sabbūpadhipaṭinissaggo bhāvito bahulīkato upekkhaṃ paripūreti.
87. தத்த² இமா சதஸ்ஸோ தி³ஸா பட²மா படிபதா³ பட²மோ ஸதிபட்டா²னோ பட²மங் ஜா²னங் பட²மோ விஹாரோ பட²மோ ஸம்மப்பதா⁴னோ பட²மோ அச்ச²ரியோ அப்³பு⁴தோ த⁴ம்மோ ஸச்சாதி⁴ட்டா²னங் ச²ந்த³ஸமாதி⁴ இந்த்³ரியஸங்வரோ மெத்தா இதி பட²மா தி³ஸா.
87. Tattha imā catasso disā paṭhamā paṭipadā paṭhamo satipaṭṭhāno paṭhamaṃ jhānaṃ paṭhamo vihāro paṭhamo sammappadhāno paṭhamo acchariyo abbhuto dhammo saccādhiṭṭhānaṃ chandasamādhi indriyasaṃvaro mettā iti paṭhamā disā.
து³தியா படிபதா³ து³தியோ ஸதிபட்டா²னோ து³தியோ விஹாரோ து³தியோ ஸம்மப்பதா⁴னோ து³தியோ அச்ச²ரியோ அப்³பு⁴தோ த⁴ம்மோ ப⁴வாதி⁴ட்டா²னங் வீரியஸமாதி⁴ தபோ கருணா இதி து³தியா தி³ஸா.
Dutiyā paṭipadā dutiyo satipaṭṭhāno dutiyo vihāro dutiyo sammappadhāno dutiyo acchariyo abbhuto dhammo bhavādhiṭṭhānaṃ vīriyasamādhi tapo karuṇā iti dutiyā disā.
ததியா படிபதா³ ததியோ ஸதிபட்டா²னோ ததியங் ஜா²னங் ததியோ விஹாரோ ததியோ ஸம்மப்பதா⁴னோ ததியோ அச்ச²ரியோ அப்³பு⁴தோ த⁴ம்மோ பஞ்ஞாதி⁴ட்டா²னங் சித்தஸமாதி⁴ பு³த்³தி⁴ முதி³தா இதி ததியா தி³ஸா.
Tatiyā paṭipadā tatiyo satipaṭṭhāno tatiyaṃ jhānaṃ tatiyo vihāro tatiyo sammappadhāno tatiyo acchariyo abbhuto dhammo paññādhiṭṭhānaṃ cittasamādhi buddhi muditā iti tatiyā disā.
சதுத்தீ² படிபதா³ சதுத்தோ² ஸதிபட்டா²னோ சதுத்த²ங் ஜா²னங் சதுத்தோ² விஹாரோ சதுத்தோ² ஸம்மப்பதா⁴னோ சதுத்தோ² அச்ச²ரியோ அப்³பு⁴தோ த⁴ம்மோ உபஸமாதி⁴ட்டா²னங் வீமங்ஸாஸமாதி⁴ ஸப்³பூ³பதி⁴படினிஸ்ஸக்³கோ³ உபெக்கா² இதி சதுத்தீ² தி³ஸா.
Catutthī paṭipadā catuttho satipaṭṭhāno catutthaṃ jhānaṃ catuttho vihāro catuttho sammappadhāno catuttho acchariyo abbhuto dhammo upasamādhiṭṭhānaṃ vīmaṃsāsamādhi sabbūpadhipaṭinissaggo upekkhā iti catutthī disā.
தத்த² பட²மா படிபதா³ பட²மோ ஸதிபட்டா²னோ பட²மங் ஜா²னங் பட²மோ விஹாரோ பட²மோ ஸம்மப்பதா⁴னோ பட²மோ அச்ச²ரியோ அப்³பு⁴தோ த⁴ம்மோ ஸச்சாதி⁴ட்டா²னங் ச²ந்த³ஸமாதி⁴ இந்த்³ரியஸங்வரோ, மெத்தா இதி இமேஸங் த³ஸன்னங் ஸுத்தானங் ஏகோ அத்தோ², ப்³யஞ்ஜனமேவ நானங். இத³ங் ராக³சரிதஸ்ஸ புக்³க³லஸ்ஸ பே⁴ஸஜ்ஜங்.
Tattha paṭhamā paṭipadā paṭhamo satipaṭṭhāno paṭhamaṃ jhānaṃ paṭhamo vihāro paṭhamo sammappadhāno paṭhamo acchariyo abbhuto dhammo saccādhiṭṭhānaṃ chandasamādhi indriyasaṃvaro, mettā iti imesaṃ dasannaṃ suttānaṃ eko attho, byañjanameva nānaṃ. Idaṃ rāgacaritassa puggalassa bhesajjaṃ.
து³தியா படிபதா³ து³தியோ ஸதிபட்டா²னோ து³தியங் ஜா²னங் து³தியோ விஹாரோ து³தியோ ஸம்மப்பதா⁴னோ து³தியோ அச்ச²ரியோ அப்³பு⁴தோ த⁴ம்மோ சாகா³தி⁴ட்டா²னங் வீரியஸமாதி⁴ தபோ கருணா இதி இமேஸங் த³ஸன்னங் ஸுத்தானங் ஏகோ அத்தோ², ப்³யஞ்ஜனமேவ நானங். இத³ங் தோ³ஸசரிதஸ்ஸ புக்³க³லஸ்ஸ பே⁴ஸஜ்ஜங்.
Dutiyā paṭipadā dutiyo satipaṭṭhāno dutiyaṃ jhānaṃ dutiyo vihāro dutiyo sammappadhāno dutiyo acchariyo abbhuto dhammo cāgādhiṭṭhānaṃ vīriyasamādhi tapo karuṇā iti imesaṃ dasannaṃ suttānaṃ eko attho, byañjanameva nānaṃ. Idaṃ dosacaritassa puggalassa bhesajjaṃ.
ததியா படிபதா³ ததியோ ஸதிபட்டா²னோ ததியங் ஜா²னங் ததியோ விஹாரோ ததியோ ஸம்மப்பதா⁴னோ ததியோ அச்ச²ரியோ அப்³பு⁴தோ த⁴ம்மோ பஞ்ஞாதி⁴ட்டா²னங் சித்தஸமாதி⁴ பு³த்³தி⁴ முதி³தா இதி இமேஸங் த³ஸன்னங் ஸுத்தானங் ஏகோ அத்தோ², ப்³யஞ்ஜனமேவ நானங். இத³ங் தி³ட்டி²சரிதஸ்ஸ மந்த³ஸ்ஸ பே⁴ஸஜ்ஜங்.
Tatiyā paṭipadā tatiyo satipaṭṭhāno tatiyaṃ jhānaṃ tatiyo vihāro tatiyo sammappadhāno tatiyo acchariyo abbhuto dhammo paññādhiṭṭhānaṃ cittasamādhi buddhi muditā iti imesaṃ dasannaṃ suttānaṃ eko attho, byañjanameva nānaṃ. Idaṃ diṭṭhicaritassa mandassa bhesajjaṃ.
சதுத்தீ² படிபதா³ சதுத்தோ² ஸதிபட்டா²னோ சதுத்த²ங் ஜா²னங் சதுத்தோ² விஹாரோ சதுத்தோ² ஸம்மப்பதா⁴னோ சதுத்தோ² அச்ச²ரியோ அப்³பு⁴தோ த⁴ம்மோ உபஸமாதி⁴ட்டா²னங் வீமங்ஸாஸமாதி⁴ ஸப்³பூ³பதி⁴படினிஸ்ஸக்³கோ³ உபெக்கா² இதி இமேஸங் த³ஸன்னங் ஸுத்தானங் ஏகோ அத்தோ², ப்³யஞ்ஜனமேவ நானங். இத³ங் தி³ட்டி²சரிதஸ்ஸ உத³த்தஸ்ஸ பே⁴ஸஜ்ஜங்.
Catutthī paṭipadā catuttho satipaṭṭhāno catutthaṃ jhānaṃ catuttho vihāro catuttho sammappadhāno catuttho acchariyo abbhuto dhammo upasamādhiṭṭhānaṃ vīmaṃsāsamādhi sabbūpadhipaṭinissaggo upekkhā iti imesaṃ dasannaṃ suttānaṃ eko attho, byañjanameva nānaṃ. Idaṃ diṭṭhicaritassa udattassa bhesajjaṃ.
தத்த² து³க்கா² ச படிபதா³ த³ந்தா⁴பி⁴ஞ்ஞா து³க்கா² ச படிபதா³ கி²ப்பாபி⁴ஞ்ஞா அப்பணிஹிதங் விமொக்க²முக²ங், ஸுகா² படிபதா³ த³ந்தா⁴பி⁴ஞ்ஞா ஸுஞ்ஞதங் விமொக்க²முக²ங், ஸுகா² படிபதா³ கி²ப்பாபி⁴ஞ்ஞா அனிமித்தங் விமொக்க²முக²ங்.
Tattha dukkhā ca paṭipadā dandhābhiññā dukkhā ca paṭipadā khippābhiññā appaṇihitaṃ vimokkhamukhaṃ, sukhā paṭipadā dandhābhiññā suññataṃ vimokkhamukhaṃ, sukhā paṭipadā khippābhiññā animittaṃ vimokkhamukhaṃ.
தத்த² காயே காயானுபஸ்ஸிதா ஸதிபட்டா²னஞ்ச வேத³னாஸு வேத³னானுபஸ்ஸிதா ஸதிபட்டா²னஞ்ச அப்பணிஹிதங் விமொக்க²முக²ங், சித்தே சித்தானுபஸ்ஸிதா ஸுஞ்ஞதங் விமொக்க²முக²ங். த⁴ம்மேஸு த⁴ம்மானுபஸ்ஸிதா அனிமித்தங் விமொக்க²முக²ங்.
Tattha kāye kāyānupassitā satipaṭṭhānañca vedanāsu vedanānupassitā satipaṭṭhānañca appaṇihitaṃ vimokkhamukhaṃ, citte cittānupassitā suññataṃ vimokkhamukhaṃ. Dhammesu dhammānupassitā animittaṃ vimokkhamukhaṃ.
தத்த² பட²மஞ்ச ஜா²னங் து³தியஞ்ச ஜா²னங் அப்பணிஹிதங் விமொக்க²முக²ங், ததியங் ஜா²னங் ஸுஞ்ஞதங் விமொக்க²முக²ங், சதுத்த²ங் ஜா²னங் அனிமித்தங் விமொக்க²முக²ங்.
Tattha paṭhamañca jhānaṃ dutiyañca jhānaṃ appaṇihitaṃ vimokkhamukhaṃ, tatiyaṃ jhānaṃ suññataṃ vimokkhamukhaṃ, catutthaṃ jhānaṃ animittaṃ vimokkhamukhaṃ.
தத்த² பட²மோ ச விஹாரோ து³தியோ ச விஹாரோ அப்பணிஹிதங் விமொக்க²முக²ங், ததியோ விஹாரோ ஸுஞ்ஞதங் விமொக்க²முக²ங், சதுத்தோ² விஹாரோ அனிமித்தங் விமொக்க²முக²ங்.
Tattha paṭhamo ca vihāro dutiyo ca vihāro appaṇihitaṃ vimokkhamukhaṃ, tatiyo vihāro suññataṃ vimokkhamukhaṃ, catuttho vihāro animittaṃ vimokkhamukhaṃ.
யத்த² பட²மஞ்ச ஸம்மப்பதா⁴னங் து³தியஞ்ச ஸம்மப்பதா⁴னங் அப்பணிஹிதங் விமொக்க²முக²ங், ததியங் ஸம்மப்பதா⁴னங் ஸுஞ்ஞதங் விமொக்க²முக²ங், சதுத்த²ங் ஸம்மப்பதா⁴னங் அனிமித்தங் விமொக்க²முக²ங்.
Yattha paṭhamañca sammappadhānaṃ dutiyañca sammappadhānaṃ appaṇihitaṃ vimokkhamukhaṃ, tatiyaṃ sammappadhānaṃ suññataṃ vimokkhamukhaṃ, catutthaṃ sammappadhānaṃ animittaṃ vimokkhamukhaṃ.
தத்த² மானப்பஹானஞ்ச ஆலயஸமுக்³கா⁴தோ ச அப்பணிஹிதங் விமொக்க²முக²ங், அவிஜ்ஜாபஹானங் ஸுஞ்ஞதங் விமொக்க²முக²ங், ப⁴வூபஸமோ அனிமித்தங் விமொக்க²முக²ங்.
Tattha mānappahānañca ālayasamugghāto ca appaṇihitaṃ vimokkhamukhaṃ, avijjāpahānaṃ suññataṃ vimokkhamukhaṃ, bhavūpasamo animittaṃ vimokkhamukhaṃ.
தத்த² ஸச்சாதி⁴ட்டா²னஞ்ச சாகா³தி⁴ட்டா²னஞ்ச அப்பணிஹிதங் விமொக்க²முக²ங், பஞ்ஞாதி⁴ட்டா²னங் ஸுஞ்ஞதங் விமொக்க²முக²ங், உபஸமாதி⁴ட்டா²னங் அனிமித்தங் விமொக்க²முக²ங்.
Tattha saccādhiṭṭhānañca cāgādhiṭṭhānañca appaṇihitaṃ vimokkhamukhaṃ, paññādhiṭṭhānaṃ suññataṃ vimokkhamukhaṃ, upasamādhiṭṭhānaṃ animittaṃ vimokkhamukhaṃ.
தத்த² ச²ந்த³ஸமாதி⁴ ச வீரியஸமாதி⁴ ச அப்பணிஹிதங் விமொக்க²முக²ங், சித்தஸமாதி⁴ ஸுஞ்ஞதங் விமொக்க²முக²ங், வீமங்ஸாஸமாதி⁴ அனிமித்தங் விமொக்க²முக²ங்.
Tattha chandasamādhi ca vīriyasamādhi ca appaṇihitaṃ vimokkhamukhaṃ, cittasamādhi suññataṃ vimokkhamukhaṃ, vīmaṃsāsamādhi animittaṃ vimokkhamukhaṃ.
தத்த² இந்த்³ரியஸங்வரோ ச தபோ ச அப்பணிஹிதங் விமொக்க²முக²ங், பு³த்³தி⁴ ஸுஞ்ஞதங் விமொக்க²முக²ங் ஸப்³பூ³பதி⁴படினிஸ்ஸக்³கோ³ அனிமித்தங் விமொக்க²முக²ங்.
Tattha indriyasaṃvaro ca tapo ca appaṇihitaṃ vimokkhamukhaṃ, buddhi suññataṃ vimokkhamukhaṃ sabbūpadhipaṭinissaggo animittaṃ vimokkhamukhaṃ.
தத்த² மெத்தா ச கருணா ச அப்பணிஹிதங் விமொக்க²முக²ங், முதி³தா ஸுஞ்ஞதங் விமொக்க²முக²ங் உபெக்கா² அனிமித்தங் விமொக்க²முக²ங்.
Tattha mettā ca karuṇā ca appaṇihitaṃ vimokkhamukhaṃ, muditā suññataṃ vimokkhamukhaṃ upekkhā animittaṃ vimokkhamukhaṃ.
தேஸங் விக்கீளிதங். சத்தாரோ ஆஹாரா தேஸங் படிபக்கோ² சதஸ்ஸோ படிபதா³…பே॰… சத்தாரோ விபல்லாஸா தேஸங் படிபக்கோ² சத்தாரோ ஸதிபட்டா²னா. சத்தாரி உபாதா³னானி தேஸங் படிபக்கோ² சத்தாரி ஜா²னானி. சத்தாரோ யோகா³ தேஸங் படிபக்கோ² சத்தாரோ விஹாரா. சத்தாரோ க³ந்தா² தேஸங் படிபக்கோ² சத்தாரோ ஸம்மப்பதா⁴னா. சத்தாரோ ஆஸவா தேஸங் படிபக்கோ² சத்தாரோ அச்ச²ரியா அப்³பு⁴தா த⁴ம்மா. சத்தாரோ ஓகா⁴ தேஸங் படிபக்கோ² சத்தாரி அதி⁴ட்டா²னானி. சத்தாரோ ஸல்லா தேஸங் படிபக்கோ² சதஸ்ஸோ ஸமாதி⁴பா⁴வனா. சதஸ்ஸோ விஞ்ஞாணட்டி²தியோ தாஸங் படிபக்கோ² சத்தாரோ ஸுக²பா⁴கி³யா த⁴ம்மா. சத்தாரி அக³திக³மனானி தேஸங் படிபக்கோ² சதஸ்ஸோ அப்பமாணா.
Tesaṃ vikkīḷitaṃ. Cattāro āhārā tesaṃ paṭipakkho catasso paṭipadā…pe… cattāro vipallāsā tesaṃ paṭipakkho cattāro satipaṭṭhānā. Cattāri upādānāni tesaṃ paṭipakkho cattāri jhānāni. Cattāro yogā tesaṃ paṭipakkho cattāro vihārā. Cattāro ganthā tesaṃ paṭipakkho cattāro sammappadhānā. Cattāro āsavā tesaṃ paṭipakkho cattāro acchariyā abbhutā dhammā. Cattāro oghā tesaṃ paṭipakkho cattāri adhiṭṭhānāni. Cattāro sallā tesaṃ paṭipakkho catasso samādhibhāvanā. Catasso viññāṇaṭṭhitiyo tāsaṃ paṭipakkho cattāro sukhabhāgiyā dhammā. Cattāri agatigamanāni tesaṃ paṭipakkho catasso appamāṇā.
ஸீஹா பு³த்³தா⁴ பச்சேகபு³த்³தா⁴ ஸாவகா ச ஹதராக³தோ³ஸமோஹா, தேஸங் விக்கீளிதங் பா⁴வனா ஸச்சி²கிரியா ப்³யந்தீகிரியா ச. விக்கீளிதங் இந்த்³ரியாதி⁴ட்டா²னங் விக்கீளிதங் விபரியாஸானதி⁴ட்டா²னஞ்ச. இந்த்³ரியானி ஸத்³த⁴ம்மகோ³சரோ விபரியாஸா கிலேஸகோ³சரோ. அயங் வுச்சதி ஸீஹவிக்கீளிதஸ்ஸ ச நயஸ்ஸ தி³ஸாலோசனஸ்ஸ ச நயஸ்ஸ பூ⁴மீதி. தேனாஹ ‘‘யோ நேதி விபல்லாஸேஹி ஸங்கிலேஸே’’தி. வெய்யாகரணேஸு ஹி யே ‘‘குஸலாகுஸலா’’தி ச.
Sīhā buddhā paccekabuddhā sāvakā ca hatarāgadosamohā, tesaṃ vikkīḷitaṃ bhāvanā sacchikiriyā byantīkiriyā ca. Vikkīḷitaṃ indriyādhiṭṭhānaṃ vikkīḷitaṃ vipariyāsānadhiṭṭhānañca. Indriyāni saddhammagocaro vipariyāsā kilesagocaro. Ayaṃ vuccati sīhavikkīḷitassa ca nayassa disālocanassa ca nayassa bhūmīti. Tenāha ‘‘yo neti vipallāsehi saṃkilese’’ti. Veyyākaraṇesu hi ye ‘‘kusalākusalā’’ti ca.
தத்த² யே து³க்கா²ய படிபதா³ய த³ந்தா⁴பி⁴ஞ்ஞாய கி²ப்பாபி⁴ஞ்ஞாய ச நிய்யந்தி, இமே த்³வே புக்³க³லா; யே ஸுகா²ய படிபதா³ய த³ந்தா⁴பி⁴ஞ்ஞாய கி²ப்பாபி⁴ஞ்ஞாய ச நிய்யந்தி, இமே த்³வே புக்³க³லா. தேஸங் சதுன்னங் புக்³க³லானங் அயங் ஸங்கிலேஸோ, சத்தாரோ ஆஹாரா, சத்தாரோ விபல்லாஸா, சத்தாரி உபாதா³னானி, சத்தாரோ யோகா³, சத்தாரோ க³ந்தா², சத்தாரோ ஆஸவா, சத்தாரோ ஓகா⁴, சத்தாரோ ஸல்லா, சதஸ்ஸோ விஞ்ஞாணட்டி²தியோ, சத்தாரி அக³திக³மனானீதி. தேஸங் சதுன்னங் புக்³க³லானங் இத³ங் வோதா³னங், சதஸ்ஸோ படிபதா³, சத்தாரோ ஸதிபட்டா²னா, சத்தாரி ஜா²னானி, சத்தாரோ விஹாரா, சத்தாரோ ஸம்மப்பதா⁴னா, சத்தாரோ அச்ச²ரியா அப்³பு⁴தா த⁴ம்மா, சத்தாரி அதி⁴ட்டா²னானி, சதஸ்ஸோ ஸமாதி⁴பா⁴வனா, சத்தாரோ ஸுக²பா⁴கி³யா த⁴ம்மா, சதஸ்ஸோ அப்பமாணா இதி.
Tattha ye dukkhāya paṭipadāya dandhābhiññāya khippābhiññāya ca niyyanti, ime dve puggalā; ye sukhāya paṭipadāya dandhābhiññāya khippābhiññāya ca niyyanti, ime dve puggalā. Tesaṃ catunnaṃ puggalānaṃ ayaṃ saṃkileso, cattāro āhārā, cattāro vipallāsā, cattāri upādānāni, cattāro yogā, cattāro ganthā, cattāro āsavā, cattāro oghā, cattāro sallā, catasso viññāṇaṭṭhitiyo, cattāri agatigamanānīti. Tesaṃ catunnaṃ puggalānaṃ idaṃ vodānaṃ, catasso paṭipadā, cattāro satipaṭṭhānā, cattāri jhānāni, cattāro vihārā, cattāro sammappadhānā, cattāro acchariyā abbhutā dhammā, cattāri adhiṭṭhānāni, catasso samādhibhāvanā, cattāro sukhabhāgiyā dhammā, catasso appamāṇā iti.
88. தத்த² யே து³க்கா²ய படிபதா³ய த³ந்தா⁴பி⁴ஞ்ஞாய கி²ப்பாபி⁴ஞ்ஞாய ச நிய்யந்தி இமே த்³வே புக்³க³லா. யே ஸுகா²ய படிபதா³ய த³ந்தா⁴பி⁴ஞ்ஞாய கி²ப்பாபி⁴ஞ்ஞாய ச நிய்யந்தி, இமே த்³வே புக்³க³லா. தத்த² யோ ஸுகா²ய படிபதா³ய கி²ப்பாபி⁴ஞ்ஞாய நிய்யாதி, அயங் உக்³க⁴டிதஞ்ஞூ. யோ ஸாதா⁴ரணாய, அயங் விபஞ்சிதஞ்ஞூ. யோ து³க்கா²ய படிபதா³ய த³ந்தா⁴பி⁴ஞ்ஞாய நிய்யாதி, அயங் நெய்யோ.
88. Tattha ye dukkhāya paṭipadāya dandhābhiññāya khippābhiññāya ca niyyanti ime dve puggalā. Ye sukhāya paṭipadāya dandhābhiññāya khippābhiññāya ca niyyanti, ime dve puggalā. Tattha yo sukhāya paṭipadāya khippābhiññāya niyyāti, ayaṃ ugghaṭitaññū. Yo sādhāraṇāya, ayaṃ vipañcitaññū. Yo dukkhāya paṭipadāya dandhābhiññāya niyyāti, ayaṃ neyyo.
தத்த² ப⁴க³வா உக்³க⁴டிதஞ்ஞுஸ்ஸ புக்³க³லஸ்ஸ ஸமத²ங் உபதி³ஸதி, நெய்யஸ்ஸ விபஸ்ஸனங், ஸமத²விபஸ்ஸனங் விபஞ்சிதஞ்ஞுஸ்ஸ. தத்த² ப⁴க³வா உக்³க⁴டிதஞ்ஞுஸ்ஸ புக்³க³லஸ்ஸ முது³கங் த⁴ம்மதே³ஸனங் உபதி³ஸதி, திக்க²ங் நெய்யஸ்ஸ, முது³திக்க²ங் விபஞ்சிதஞ்ஞுஸ்ஸ, தத்த² ப⁴க³வா உக்³க⁴டிதஞ்ஞுஸ்ஸ புக்³க³லஸ்ஸ ஸங்கி²த்தேன த⁴ம்மங் தே³ஸயதி, ஸங்கி²த்தவித்தா²ரேன விபஞ்சிதஞ்ஞுஸ்ஸ, வித்தா²ரேன நெய்யஸ்ஸ. தத்த² ப⁴க³வா உக்³க⁴டிதஞ்ஞுஸ்ஸ புக்³க³லஸ்ஸ நிஸ்ஸரணங் உபதி³ஸதி, விபஞ்சிதஞ்ஞுஸ்ஸ ஆதீ³னவஞ்ச நிஸ்ஸரணஞ்ச உபதி³ஸதி, நெய்யஸ்ஸ அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச உபதி³ஸதி. தத்த² ப⁴க³வா உக்³க⁴டிதஞ்ஞுஸ்ஸ அதி⁴பஞ்ஞாஸிக்க²ங் பஞ்ஞாபயதி, அதி⁴சித்தங் விபஞ்சிதஞ்ஞுஸ்ஸ, அதி⁴ஸீலங் நெய்யஸ்ஸ.
Tattha bhagavā ugghaṭitaññussa puggalassa samathaṃ upadisati, neyyassa vipassanaṃ, samathavipassanaṃ vipañcitaññussa. Tattha bhagavā ugghaṭitaññussa puggalassa mudukaṃ dhammadesanaṃ upadisati, tikkhaṃ neyyassa, mudutikkhaṃ vipañcitaññussa, tattha bhagavā ugghaṭitaññussa puggalassa saṃkhittena dhammaṃ desayati, saṃkhittavitthārena vipañcitaññussa, vitthārena neyyassa. Tattha bhagavā ugghaṭitaññussa puggalassa nissaraṇaṃ upadisati, vipañcitaññussa ādīnavañca nissaraṇañca upadisati, neyyassa assādañca ādīnavañca nissaraṇañca upadisati. Tattha bhagavā ugghaṭitaññussa adhipaññāsikkhaṃ paññāpayati, adhicittaṃ vipañcitaññussa, adhisīlaṃ neyyassa.
தத்த² யே து³க்கா²ய படிபதா³ய த³ந்தா⁴பி⁴ஞ்ஞாய கி²ப்பாபி⁴ஞ்ஞாய ச நிய்யந்தி, இமே த்³வே புக்³க³லா. யே ஸுகா²ய படிபதா³ய த³ந்தா⁴பி⁴ஞ்ஞாய கி²ப்பாபி⁴ஞ்ஞாய ச நிய்யந்தி. இமே த்³வே புக்³க³லா. இதி கோ² சத்தாரி ஹுத்வா தீணி ப⁴வந்தி உக்³க⁴டிதஞ்ஞூ விபஞ்சிதஞ்ஞூ நெய்யோதி.
Tattha ye dukkhāya paṭipadāya dandhābhiññāya khippābhiññāya ca niyyanti, ime dve puggalā. Ye sukhāya paṭipadāya dandhābhiññāya khippābhiññāya ca niyyanti. Ime dve puggalā. Iti kho cattāri hutvā tīṇi bhavanti ugghaṭitaññū vipañcitaññū neyyoti.
தேஸங் திண்ணங் புக்³க³லானங் அயங் ஸங்கிலேஸோ, தீணி அகுஸலமூலானி லோபோ⁴ அகுஸலமூலங் தோ³ஸோ அகுஸலமூலங் மோஹோ அகுஸலமூலங் , தீணி து³ச்சரிதானி – காயது³ச்சரிதங் வசீது³ச்சரிதங் மனோது³ச்சரிதங்; தயோ அகுஸலவிதக்கா – காமவிதக்கோ ப்³யாபாத³விதக்கோ விஹிங்ஸாவிதக்கோ; திஸ்ஸோ அகுஸலஸஞ்ஞா – காமஸஞ்ஞா ப்³யாபாத³ஸஞ்ஞா விஹிங்ஸாஸஞ்ஞா; திஸ்ஸோ விபரீதஸஞ்ஞா – நிச்சஸஞ்ஞா ஸுக²ஸஞ்ஞா அத்தஸஞ்ஞா; திஸ்ஸோ வேத³னா – ஸுகா² வேத³னா து³க்கா² வேத³னா அது³க்க²மஸுகா² வேத³னா; திஸ்ஸோ து³க்க²தா – து³க்க²து³க்க²தா ஸங்கா²ரது³க்க²தா விபரிணாமது³க்க²தா; தயோ அக்³கீ³ – ராக³க்³கி³ தோ³ஸக்³கி³ மோஹக்³கி³; தயோ ஸல்லா – ராக³ஸல்லோ தோ³ஸஸல்லோ மோஹஸல்லோ; திஸ்ஸோ ஜடா – ராக³ஜடா தோ³ஸஜடா மோஹஜடா; திஸ்ஸோ அகுஸலூபபரிக்கா² – அகுஸலங் காயகம்மங் அகுஸலங் வசீகம்மங் அகுஸலங் மனோகம்மங். திஸ்ஸோ விபத்தியோ – ஸீலவிபத்தி தி³ட்டி²விபத்தி ஆசாரவிபத்தீதி. தேஸங் திண்ணங் புக்³க³லானங் இத³ங் வோதா³னங். தீணி குஸலமூலானி – அலோபோ⁴ குஸலமூலங் அதோ³ஸோ குஸலமூலங் அமோஹோ குஸலமூலங். தீணி ஸுசரிதானி – காயஸுசரிதங் வசீஸுசரிதங் மனோஸுசரிதங். தயோ குஸலவிதக்கா – நெக்க²ம்மவிதக்கோ அப்³யாபாத³விதக்கோ அவிஹிங்ஸாவிதக்கோ. தயோ ஸமாதீ⁴ – ஸவிதக்கோ ஸவிசாரோ ஸமாதி⁴ அவிதக்கோ விசாரமத்தோ ஸமாதி⁴ அவிதக்கோ அவிசாரோ ஸமாதி⁴. திஸ்ஸோ குஸலஸஞ்ஞா – நெக்க²ம்மஸஞ்ஞா அப்³யாபாத³ஸஞ்ஞா அவிஹிங்ஸாஸஞ்ஞா. திஸ்ஸோ அவிபரீதஸஞ்ஞா – அனிச்சஸஞ்ஞா து³க்க²ஸஞ்ஞா அனத்தஸஞ்ஞா. திஸ்ஸோ குஸலூபபரிக்கா² – குஸலங் காயகம்மங் குஸலங் வசீகம்மங் குஸலங் மனோகம்மங். தீணி ஸோசெய்யானி – காயஸோசெய்யங் வசீஸோசெய்யங் மனோஸோசெய்யங்; திஸ்ஸோ ஸம்பத்தியோ – ஸீலஸம்பத்தி ஸமாதி⁴ஸம்பத்தி பஞ்ஞாஸம்பத்தி. திஸ்ஸோ ஸிக்கா² – அதி⁴ஸீலஸிக்கா² அதி⁴சித்தஸிக்கா² அதி⁴பஞ்ஞாஸிக்கா²; தயோ க²ந்தா⁴ – ஸீலக்க²ந்தோ⁴ ஸமாதி⁴க்க²ந்தோ⁴ பஞ்ஞாக்க²ந்தோ⁴. தீணி விமொக்க²முகா²னி – ஸுஞ்ஞதங் அனிமித்தங் அப்பணிஹிதந்தி.
Tesaṃ tiṇṇaṃ puggalānaṃ ayaṃ saṃkileso, tīṇi akusalamūlāni lobho akusalamūlaṃ doso akusalamūlaṃ moho akusalamūlaṃ , tīṇi duccaritāni – kāyaduccaritaṃ vacīduccaritaṃ manoduccaritaṃ; tayo akusalavitakkā – kāmavitakko byāpādavitakko vihiṃsāvitakko; tisso akusalasaññā – kāmasaññā byāpādasaññā vihiṃsāsaññā; tisso viparītasaññā – niccasaññā sukhasaññā attasaññā; tisso vedanā – sukhā vedanā dukkhā vedanā adukkhamasukhā vedanā; tisso dukkhatā – dukkhadukkhatā saṅkhāradukkhatā vipariṇāmadukkhatā; tayo aggī – rāgaggi dosaggi mohaggi; tayo sallā – rāgasallo dosasallo mohasallo; tisso jaṭā – rāgajaṭā dosajaṭā mohajaṭā; tisso akusalūpaparikkhā – akusalaṃ kāyakammaṃ akusalaṃ vacīkammaṃ akusalaṃ manokammaṃ. Tisso vipattiyo – sīlavipatti diṭṭhivipatti ācāravipattīti. Tesaṃ tiṇṇaṃ puggalānaṃ idaṃ vodānaṃ. Tīṇi kusalamūlāni – alobho kusalamūlaṃ adoso kusalamūlaṃ amoho kusalamūlaṃ. Tīṇi sucaritāni – kāyasucaritaṃ vacīsucaritaṃ manosucaritaṃ. Tayo kusalavitakkā – nekkhammavitakko abyāpādavitakko avihiṃsāvitakko. Tayo samādhī – savitakko savicāro samādhi avitakko vicāramatto samādhi avitakko avicāro samādhi. Tisso kusalasaññā – nekkhammasaññā abyāpādasaññā avihiṃsāsaññā. Tisso aviparītasaññā – aniccasaññā dukkhasaññā anattasaññā. Tisso kusalūpaparikkhā – kusalaṃ kāyakammaṃ kusalaṃ vacīkammaṃ kusalaṃ manokammaṃ. Tīṇi soceyyāni – kāyasoceyyaṃ vacīsoceyyaṃ manosoceyyaṃ; tisso sampattiyo – sīlasampatti samādhisampatti paññāsampatti. Tisso sikkhā – adhisīlasikkhā adhicittasikkhā adhipaññāsikkhā; tayo khandhā – sīlakkhandho samādhikkhandho paññākkhandho. Tīṇi vimokkhamukhāni – suññataṃ animittaṃ appaṇihitanti.
இதி கோ² சத்தாரி ஹுத்வா தீணி ப⁴வந்தி, தீணி ஹுத்வா த்³வே ப⁴வந்தி தண்ஹாசரிதோ ச தி³ட்டி²சரிதோ ச.
Iti kho cattāri hutvā tīṇi bhavanti, tīṇi hutvā dve bhavanti taṇhācarito ca diṭṭhicarito ca.
தேஸங் த்³வின்னங் புக்³க³லானங் அயங் ஸங்கிலேஸோ, தண்ஹா ச அவிஜ்ஜா ச அஹிரிகஞ்ச அனொத்தப்பஞ்ச அஸ்ஸதி ச அஸம்பஜஞ்ஞஞ்ச அயோனிஸோ மனஸிகாரோ ச கோஸஜ்ஜஞ்ச தோ³வசஸ்ஸஞ்ச அஹங்காரோ ச மமங்காரோ ச அஸ்ஸத்³தா⁴ ச பமாதோ³ ச அஸத்³த⁴ம்மஸ்ஸவனஞ்ச அஸங்வரோ ச அபி⁴ஜ்ஜா² ச ப்³யாபாதோ³ ச நீவரணஞ்ச ஸங்யோஜனஞ்ச கோதோ⁴ ச உபனாஹோ ச மக்கோ² ச பலாஸோ ச இஸ்ஸா ச மச்சே²ரஞ்ச மாயா ச ஸாடெ²ய்யஞ்ச ஸஸ்ஸததி³ட்டி² ச உச்சே²த³தி³ட்டி²சாதி.
Tesaṃ dvinnaṃ puggalānaṃ ayaṃ saṃkileso, taṇhā ca avijjā ca ahirikañca anottappañca assati ca asampajaññañca ayoniso manasikāro ca kosajjañca dovacassañca ahaṃkāro ca mamaṃkāro ca assaddhā ca pamādo ca asaddhammassavanañca asaṃvaro ca abhijjhā ca byāpādo ca nīvaraṇañca saṃyojanañca kodho ca upanāho ca makkho ca palāso ca issā ca maccherañca māyā ca sāṭheyyañca sassatadiṭṭhi ca ucchedadiṭṭhicāti.
தேஸங் த்³வின்னங் புக்³க³லானங் இத³ங் வோதா³னங், ஸமதோ² ச விபஸ்ஸனா ச ஹிரீ ச ஒத்தப்பஞ்ச ஸதி ச ஸம்பஜஞ்ஞஞ்ச யோனிஸோ மனஸிகாரோ ச வீரியாரம்போ⁴ ச ஸோவசஸ்ஸஞ்ச த⁴ம்மே ஞாணஞ்ச அன்வயே ஞாணஞ்ச க²யே ஞாணஞ்ச அனுப்பாதே³ ஞாணஞ்ச ஸத்³தா⁴ ச அப்பமாதோ³ ச ஸத்³த⁴ம்மஸ்ஸவனஞ்ச ஸங்வரோ ச அனபி⁴ஜ்ஜா² ச அப்³யாபாதோ³ ச ராக³விராகா³ ச சேதோவிமுத்தி அவிஜ்ஜாவிராகா³ ச பஞ்ஞாவிமுத்தி அபி⁴ஸமயோ ச அப்பிச்ச²தா ச ஸந்துட்டி² ச அக்கோதோ⁴ ச அனுபனாஹோ ச அமக்கோ² ச அபலாஸோ ச இஸ்ஸாபஹானஞ்ச மச்ச²ரியப்பஹானஞ்ச விஜ்ஜா ச விமுத்தி ச ஸங்க²தாரம்மணோ ச விமொக்கோ² அஸங்க²தாரம்மணோ ச விமொக்கோ² ஸஉபாதி³ஸேஸா ச நிப்³பா³னதா⁴து அனுபாதி³ஸேஸா ச நிப்³பா³னதா⁴தூதி.
Tesaṃ dvinnaṃ puggalānaṃ idaṃ vodānaṃ, samatho ca vipassanā ca hirī ca ottappañca sati ca sampajaññañca yoniso manasikāro ca vīriyārambho ca sovacassañca dhamme ñāṇañca anvaye ñāṇañca khaye ñāṇañca anuppāde ñāṇañca saddhā ca appamādo ca saddhammassavanañca saṃvaro ca anabhijjhā ca abyāpādo ca rāgavirāgā ca cetovimutti avijjāvirāgā ca paññāvimutti abhisamayo ca appicchatā ca santuṭṭhi ca akkodho ca anupanāho ca amakkho ca apalāso ca issāpahānañca macchariyappahānañca vijjā ca vimutti ca saṅkhatārammaṇo ca vimokkho asaṅkhatārammaṇo ca vimokkho saupādisesā ca nibbānadhātu anupādisesā ca nibbānadhātūti.
அயங் வுச்சதி திபுக்க²லஸ்ஸ ச நயஸ்ஸ அங்குஸஸ்ஸ ச நயஸ்ஸ பூ⁴மீதி. தேனாஹ ‘‘யோ அகுஸலே ஸமூலேஹி நேதீ’’தி ‘‘ஓலோகெத்வா தி³ஸலோசனேனா’’தி ச.
Ayaṃ vuccati tipukkhalassa ca nayassa aṅkusassa ca nayassa bhūmīti. Tenāha ‘‘yo akusale samūlehi netī’’ti ‘‘oloketvā disalocanenā’’ti ca.
நியுத்தங் நயஸமுட்டா²னங்.
Niyuttaṃ nayasamuṭṭhānaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / நயஸமுட்டா²னவாரவண்ணனா • Nayasamuṭṭhānavāravaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / நயஸமுட்டா²னவாரவண்ணனா • Nayasamuṭṭhānavāravaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / நயஸமுட்டா²னவிபா⁴வனா • Nayasamuṭṭhānavibhāvanā
