Library / Tipiṭaka / ཏིཔིཊཀ • Tipiṭaka / ནེཏྟིཔྤཀརཎ-ཨཊྛཀཐཱ • Nettippakaraṇa-aṭṭhakathā

    ནཡསམུཊྛཱནཝཱརཝཎྞནཱ

    Nayasamuṭṭhānavāravaṇṇanā

    ༧༩. ཨེཝཾ ནཱནཱསུཏྟཝསེན ཨེཀསུཏྟཝསེན ཙ ཧཱརཝིཙཱརཾ དསྶེཏྭཱ ཨིདཱནི ནཡཝིཙཱརཾ དསྶེཏུཾ ‘‘ཏཏྠ ཀཏམཾ ནཡསམུཊྛཱན’’ནྟིཨཱདི ཨཱརདྡྷཾ། ཀསྨཱ པནེཏྠ ཡཐཱ ‘‘ཏཏྠ ཀཏམོ དེསནཱཧཱརོ, ཨསྶཱདཱདཱིནཝཏཱཏི གཱཐཱ། ཨཡཾ དེསནཱཧཱརོ ཀིཾ དེསཡཏཱི’’ཏིཨཱདིནཱ ཧཱརནིདྡེསོ ཨཱརདྡྷོ, ཨེཝཾ ‘‘ཏཏྠ ཀཏམོ ནནྡིཡཱཝཊྚོ, ཏཎྷཉྩ ཨཝིཛྫམྤི ཙཱཏི གཱཐཱ, ཨཡཾ ནནྡིཡཱཝཊྚོ ཀིཾ ནཡཏཱི’’ཏིཨཱདིནཱ ཨནཱརབྷིཏྭཱ སམུཊྛཱནམུཁེན ཨཱརདྡྷནྟི? ཝུཙྩཏེ – ཧཱརནཡཱནཾ ཝིསཡབྷེདཏོ། ཡཐཱ ཧི ཧཱརཱ བྱཉྫནམུཁེན སུཏྟསྶ ཨཏྠསཾཝཎྞནཱ, ན ཨེཝཾ ནཡཱ། ནཡཱ པན ནཱནཱསུཏྟཏོ ནིདྡྷཱརིཏེཧི ཏཎྷཱཝིཛྫཱདཱིཧི མཱུལཔདེཧི ཙཏུསཙྩཡོཛནཱཡ ནཡཏོ ཨནུབུཛ྄ཛྷིཡམཱནོ དུཀྑཱདིཨཏྠོ། སོ ཧི མགྒཉཱཎཾ ནཡཏི སམྤཱཔེཏཱིཏི ནཡོ། པཊིཝིཛ྄ཛྷནྟཱནཾ པན ཨུགྒྷཊིཏཉྙུཨཱདཱིནཾ ཏིཎྞཾ ཝེནེཡྻཱནཾ ཝསེན མཱུལཔདཝིབྷཱགཏོ ཏིདྷཱ ཝིབྷཏྟཱ། ཨེཀམེཀོ ཙེཏྠ ཡཏོ ནེཏི, ཡཉྩ ནེཏི, ཏེསཾ སཾཀིལེསཝོདཱནཱནཾ ཝིབྷཱགཏོ དྭིསངྒཧོ ཙཏུཚཨཊྛདིསོ ཙཱཏི བྷིནྣོ ཧཱརནཡཱནཾ ཝིསཡོ། ཏཐཱ ཧི ཝུཏྟཾ – ‘‘ཧཱརཱ བྱཉྫནཝིཙཡོ, སུཏྟསྶ ནཡཱ ཏཡོ ཙ སུཏྟཏྠོ’’ཏི (ནེཏྟི॰ སངྒཧཝཱར)། ཨེཝཾ ཝིསིཊྛཝིསཡཏྟཱ ཧཱརནཡཱནཾ ཧཱརེཧི ཨཉྙཐཱ ནཡེ ནིདྡིསནྟོ ‘‘ཏཏྠ ཀཏམཾ ནཡསམུཊྛཱན’’ནྟིཨཱདིམཱཧ།

    79. Evaṃ nānāsuttavasena ekasuttavasena ca hāravicāraṃ dassetvā idāni nayavicāraṃ dassetuṃ ‘‘tattha katamaṃ nayasamuṭṭhāna’’ntiādi āraddhaṃ. Kasmā panettha yathā ‘‘tattha katamo desanāhāro, assādādīnavatāti gāthā. Ayaṃ desanāhāro kiṃ desayatī’’tiādinā hāraniddeso āraddho, evaṃ ‘‘tattha katamo nandiyāvaṭṭo, taṇhañca avijjampi cāti gāthā, ayaṃ nandiyāvaṭṭo kiṃ nayatī’’tiādinā anārabhitvā samuṭṭhānamukhena āraddhanti? Vuccate – hāranayānaṃ visayabhedato. Yathā hi hārā byañjanamukhena suttassa atthasaṃvaṇṇanā, na evaṃ nayā. Nayā pana nānāsuttato niddhāritehi taṇhāvijjādīhi mūlapadehi catusaccayojanāya nayato anubujjhiyamāno dukkhādiattho. So hi maggañāṇaṃ nayati sampāpetīti nayo. Paṭivijjhantānaṃ pana ugghaṭitaññuādīnaṃ tiṇṇaṃ veneyyānaṃ vasena mūlapadavibhāgato tidhā vibhattā. Ekameko cettha yato neti, yañca neti, tesaṃ saṃkilesavodānānaṃ vibhāgato dvisaṅgaho catuchaaṭṭhadiso cāti bhinno hāranayānaṃ visayo. Tathā hi vuttaṃ – ‘‘hārā byañjanavicayo, suttassa nayā tayo ca suttattho’’ti (netti. saṅgahavāra). Evaṃ visiṭṭhavisayattā hāranayānaṃ hārehi aññathā naye niddisanto ‘‘tattha katamaṃ nayasamuṭṭhāna’’ntiādimāha.

    ཏཏྠཱཡཾ ཝཙནཏྠོ – སམུཊྛཧནྟི ཨེཏེནཱཏི སམུཊྛཱནཾ། ཀེ སམུཊྛཧནྟི? ནཡཱ། ནཡཱནཾ སམུཊྛཱནཾ ནཡསམུཊྛཱནཾ། ཀིཾ པན ཏཾ? ཏཾཏཾམཱུལཔདེཧི ཙཏུསཙྩཡོཛནཱ། སཱ ཧི ནནྡིཡཱཝཊྚཱདཱིནཾ ནཡཱནཾ ཨུཔྤཏྟིཊྛཱནཏཱཡ སམུཊྛཱནཾ བྷཱུམཱིཏི ཙ ཝུཙྩཏི། ཏཐཱ ཙ ཝཀྑཏི – ‘‘ཨཡཾ ཝུཙྩཏི ནནྡིཡཱཝཊྚསྶ ནཡསྶ བྷཱུམཱི’’ཏི (ནེཏྟི॰ ༨༡)། པུབྦཱ ཀོཊི ན པཉྙཱཡཏི ཨཝིཛྫཱཡ ཙ བྷཝཏཎྷཱཡ ཙཱཏིཨཱདི ནནྡིཡཱཝཊྚསྶ ནཡསྶ བྷཱུམིདསྶནཾ། ཏཏྠ པུབྦཱ ཀོཊི ན པཉྙཱཡཏཱིཏི ཨསུཀསྶ ནཱམ བུདྡྷསྶ བྷགཝཏོ, ཨསུཀསྶ ཝཱ ཙཀྐཝཏྟིནོ ཀཱལེ ཨཝིཛྫཱ བྷཝཏཎྷཱ ཙ ཨུཔྤནྣཱ། ཏཏོ པུབྦེ ནཱཧོསཱིཏི ཨེཝཾ ཨཝིཛྫཱབྷཝཏཎྷཱནཾ ན ཀཱཙི པུརིམཱ མརིཡཱདཱ ཨུཔལབྦྷཏི། ཀསྨཱ? ཨནམཏགྒཏྟཱ སཾསཱརསྶ། ཝུཏྟཉྷེཏཾ – ‘‘ཨནམཏགྒོཡཾ, བྷིཀྑཝེ, སཾསཱརོ, པུབྦཱ ཀོཊི ན པཉྙཱཡཏཱི’’ཏི (སཾ॰ ནི॰ ༢.༡༢༤; ཀཐཱ॰ ༧༥) ཝིཏྠཱརོ། ཏཏྠཱཏི ཨཝིཛྫཱབྷཝཏཎྷཱསུ། ཡདིཔི ཨཝིཛྫཱཡ སཾཡོཛནབྷཱཝོ, ཏཎྷཱཡ ཙ ནཱིཝརཎབྷཱཝོ པཱལི༹ཡཾ ཝུཏྟོ, ཏཐཱཔི ཨཝིཛྫཱཡ པཊིཙྪཱདིཏཱདཱིནཝེཧི བྷཝེཧི ཏཎྷཱ སཾཡོཛེཏཱིཏི ཨིམསྶ ཨཏྠསྶ དསྶནཏྠཾ ‘‘ཨཝིཛྫཱནཱིཝརཎཾ ཏཎྷཱསཾཡོཛན’’ནྟི ཝུཏྟཾ།

    Tatthāyaṃ vacanattho – samuṭṭhahanti etenāti samuṭṭhānaṃ. Ke samuṭṭhahanti? Nayā. Nayānaṃ samuṭṭhānaṃ nayasamuṭṭhānaṃ. Kiṃ pana taṃ? Taṃtaṃmūlapadehi catusaccayojanā. Sā hi nandiyāvaṭṭādīnaṃ nayānaṃ uppattiṭṭhānatāya samuṭṭhānaṃ bhūmīti ca vuccati. Tathā ca vakkhati – ‘‘ayaṃ vuccati nandiyāvaṭṭassa nayassa bhūmī’’ti (netti. 81). Pubbā koṭi na paññāyati avijjāya ca bhavataṇhāya cātiādi nandiyāvaṭṭassa nayassa bhūmidassanaṃ. Tattha pubbā koṭi na paññāyatīti asukassa nāma buddhassa bhagavato, asukassa vā cakkavattino kāle avijjā bhavataṇhā ca uppannā. Tato pubbe nāhosīti evaṃ avijjābhavataṇhānaṃ na kāci purimā mariyādā upalabbhati. Kasmā? Anamataggattā saṃsārassa. Vuttañhetaṃ – ‘‘anamataggoyaṃ, bhikkhave, saṃsāro, pubbā koṭi na paññāyatī’’ti (saṃ. ni. 2.124; kathā. 75) vitthāro. Tatthāti avijjābhavataṇhāsu. Yadipi avijjāya saṃyojanabhāvo, taṇhāya ca nīvaraṇabhāvo pāḷiyaṃ vutto, tathāpi avijjāya paṭicchāditādīnavehi bhavehi taṇhā saṃyojetīti imassa atthassa dassanatthaṃ ‘‘avijjānīvaraṇaṃ taṇhāsaṃyojana’’nti vuttaṃ.

    ཨཝིཛྫཱསཾཡུཏྟཱཏི ཨཝིཛྫཱཡ མིསྶིཏཱ, ཨཝིཛྫཱཡ ཝཱ ཨབྷིནིཝེསཝཏྠཱུསུ བདྡྷཱ། ཨཝིཛྫཱཔཀྑེན ཝིཙརནྟཱིཏི ཨཝིཛྫཱཔཀྑེན ཨཝིཛྫཱསཧཱཡེན དྭཱདསཝིདྷེན ཝིཔལླཱསེན ཨབྷིནིཝེསཝཏྠུབྷཱུཏེ ཨཱརམྨཎེ པཝཏྟནྟི། ཏེ ཝུཙྩནྟི དིཊྛིཙརིཏཱཏི ཏེ ཨཝིཛྫཱབྷིབྷཱུཏཱ རཱུཔཱདཱིནི ནིཙྩཱདིཏོ ཨབྷིནིཝིསནྟཱ དིཊྛིཙརིཏཱཏི ཝུཙྩནྟི, དིཊྛིཙརིཏཱ ནཱམཱཏི ཨཏྠོ། ཏཎྷཱཔཀྑེནཱཏི ཨཊྛསཏཏཎྷཱཝིཙརིཏེན། དིཊྛིཝིཙརིཏེ ཏཎྷཱཝིཙརིཏེ ཙ པཊིཔཏྟིཡཱ ཝིབྷཛིཏྭཱ དསྶེཏུཾ ‘‘དིཊྛིཙརིཏཱ’’ཏིཨཱདི ཝུཏྟཾ། ཏཏྠ ཨཏྟཀིལམཐཱནུཡོགནྟི ཨཏྟནོ ཀཱཡསྶ ཀིལིསྶནཔཡོགཾ ཨཏྟཔརིཏཱཔནཔཊིཔཏྟིཾ། ཀཱམསུཁལླིཀཱནུཡོགནྟི ཀཱམསུཁསྶ ཨལླཱིཡནཔཡོགཾ ཀཱམེསུ པཱཏབྱཏཾ།

    Avijjāsaṃyuttāti avijjāya missitā, avijjāya vā abhinivesavatthūsu baddhā. Avijjāpakkhena vicarantīti avijjāpakkhena avijjāsahāyena dvādasavidhena vipallāsena abhinivesavatthubhūte ārammaṇe pavattanti. Te vuccanti diṭṭhicaritāti te avijjābhibhūtā rūpādīni niccādito abhinivisantā diṭṭhicaritāti vuccanti, diṭṭhicaritā nāmāti attho. Taṇhāpakkhenāti aṭṭhasatataṇhāvicaritena. Diṭṭhivicarite taṇhāvicarite ca paṭipattiyā vibhajitvā dassetuṃ ‘‘diṭṭhicaritā’’tiādi vuttaṃ. Tattha attakilamathānuyoganti attano kāyassa kilissanapayogaṃ attaparitāpanapaṭipattiṃ. Kāmasukhallikānuyoganti kāmasukhassa allīyanapayogaṃ kāmesu pātabyataṃ.

    ཡདིཔི བཱཧིརཀཱ ‘‘དུཀྑཾ ཏཎྷཱ’’ཏི ཙ ཛཱནནྟི ‘‘ཨིདཾ དུཀྑཾ, ཨེཏྟཀཾ དུཀྑ’’ནྟི, ‘‘ཨཡཾ ཏཎྷཱ, ཨཡཾ ཏསྶཱ ཝིརཱགོ’’ཏི པརིཉྙེཡྻཔཧཱཏབྦབྷཱཝེན པན ན ཛཱནནྟི, ཨིཏི པཝཏྟིཔཝཏྟིཧེཏུམཏྟམྤི ན ཛཱནནྟི། ཀཱ པན ཀཐཱ ནིཝཏྟིནིཝཏྟིཧེཏཱུསཱུཏི ཨཱཧ – ‘‘ཨིཏོ བཧིདྡྷཱ ནཏྠི སཙྩཝཝཏྠཱན’’ནྟིཨཱདི། ཏཏྠ སཙྩཔྤཀཱསནཱཏི སཙྩདེསནཱ། སམཐཝིཔསྶནཱཀོསལླནྟི སམཐཝིཔསྶནཱསུ བྷཱཝནཱཀོསལླཾ, ཏཱསུ ཨུགྒཧཔརིཔུཙྪཱསཝནམནསིཀཱརཀོསལླཾ ཝཱ། ཝིཔསྶནཱདྷིཊྛཱནཉྩེཏྠ སམཐཾ ཨདྷིཔྤེཏཾ། ཨུཔསམསུཁཔྤཏྟཱིཏི ཀིལེསཱནཾ ཝཱུཔསམསུཁཱདྷིགམོ། ཝིཔརཱིཏཙེཏཱཏི མིཙྪཱབྷིནིཝིཊྛཙེཏཱ། ནཏྠི སུཁེན སུཁནྟི ཡཾ ཨནཝཛྫཔཙྩཡཔརིབྷོགསུཁེན ཀཱཡཾ ཙིཏྟཉྩ པཊིཔྤསྶདྡྷདརཐཾ ཀཏྭཱ ཨརིཡེཧི པཏྟབྦཾ ཨུཔསམསུཁཾ, ཏཾ པཊིཀྑིཔཏི། དུཀྑེནཱཏི ཀཱཡཁེདནདུཀྑེན།

    Yadipi bāhirakā ‘‘dukkhaṃ taṇhā’’ti ca jānanti ‘‘idaṃ dukkhaṃ, ettakaṃ dukkha’’nti, ‘‘ayaṃ taṇhā, ayaṃ tassā virāgo’’ti pariññeyyapahātabbabhāvena pana na jānanti, iti pavattipavattihetumattampi na jānanti. Kā pana kathā nivattinivattihetūsūti āha – ‘‘ito bahiddhā natthi saccavavatthāna’’ntiādi. Tattha saccappakāsanāti saccadesanā. Samathavipassanākosallanti samathavipassanāsu bhāvanākosallaṃ, tāsu uggahaparipucchāsavanamanasikārakosallaṃ vā. Vipassanādhiṭṭhānañcettha samathaṃ adhippetaṃ. Upasamasukhappattīti kilesānaṃ vūpasamasukhādhigamo. Viparītacetāti micchābhiniviṭṭhacetā. Natthi sukhena sukhanti yaṃ anavajjapaccayaparibhogasukhena kāyaṃ cittañca paṭippassaddhadarathaṃ katvā ariyehi pattabbaṃ upasamasukhaṃ, taṃ paṭikkhipati. Dukkhenāti kāyakhedanadukkhena.

    སོ ལོཀཾ ཝཌྜྷཡཏཱིཏི སོ ཀཱམེ པཊིསེཝེནྟོ ཨཏྟབྷཱཝསངྑཱཏཾ ལོཀཾ ཝཌྜྷེཏི པཱིནེཏི། པུཏྟནཏྟུཔརམྤརཱཡ ཝཱ སཾསཱརསྶ ཨནུཔཙྪེདནཏོ སཏྟལོཀཾ ཝཌྜྷེཏི། བཧུཾ པུཉྙཾ པསཝཏཱིཏི ཨཏྟནོ པཉྩཧི ཀཱམགུཎེཧི སནྟཔྤནེན པུཏྟམུཁདསྶནེན ཙ བཧུཾ པུཉྙཾ ཨུཔྤཱདེཏི། ཨབྷིནིཝེསསྶ ནཱཏིདལ༹ྷཏཱཡ ཨེཝཾསཉྙཱི། དལ༹ྷཏཱཡ ཨེཝཾདིཊྛཱི དུཀྑེན སུཁཾ པཏྠཡམཱནཱ ཨཏྟཀིལམཐཱནུཡོགམནུཡུཏྟཱ ཀཱམེསུ པུཉྙསཉྙཱི ཀཱམསུཁལླིཀཱནུཡོགམནུཡུཏྟཱ ཙ ཝིཧརནྟཱིཏི ཡོཛེཏབྦཾ།

    So lokaṃ vaḍḍhayatīti so kāme paṭisevento attabhāvasaṅkhātaṃ lokaṃ vaḍḍheti pīneti. Puttanattuparamparāya vā saṃsārassa anupacchedanato sattalokaṃ vaḍḍheti. Bahuṃ puññaṃ pasavatīti attano pañcahi kāmaguṇehi santappanena puttamukhadassanena ca bahuṃ puññaṃ uppādeti. Abhinivesassa nātidaḷhatāya evaṃsaññī. Daḷhatāya evaṃdiṭṭhī dukkhena sukhaṃ patthayamānā attakilamathānuyogamanuyuttā kāmesu puññasaññī kāmasukhallikānuyogamanuyuttā ca viharantīti yojetabbaṃ.

    ཏདབྷིཉྙཱ སནྟཱཏི ཏཐཱསཉྙིནོ སམཱནཱ། རོགམེཝ ཝཌྜྷཡནྟཱིཏི ཨཏྟབྷཱཝརོགམེཝ ཀིལེསརོགམེཝ ཝཱ ཨཔརཱཔརཾ ཝཌྜྷེནྟི། གཎྜསལླེསུཔི ཨེསེཝ ནཡོ། རོགཱབྷིཏུནྣཱཏི ཡཐཱཝུཏྟརོགབྱཱདྷིཏཱ། གཎྜཔཊིཔཱིལི༹ཏཱཏི ཡཐཱཝུཏྟགཎྜབཱདྷིཏཱ། སལླཱནུཝིདྡྷཱཏི ཡཐཱཝུཏྟསལླེན ཨནུཔཝིཊྛཱ། ཨུམྨུཛྫནིམུཛྫཱནཱིཏི ཨུཔཔཛྫནཙཝནཱནི། ཨུགྒྷཱཏནིགྒྷཱཏནྟི ཨུཙྩཱཝཙབྷཱཝཾ། རོགགཎྜསལླབྷེསཛྫནྟི ཡཐཱཝུཏྟརོགཱདིཏིཀིཙྪནཾ, སམཐཝིཔསྶནཾ སནྡྷཱཡ ཝདཏི། ཏེནེཝཱཧ – ‘‘སམཐཝིཔསྶནཱ རོགནིགྒྷཱཏཀབྷེསཛྫ’’ནྟི། ཏཏྠ རོགནིགྒྷཱཏཀནྟི རོགཝཱུཔསམནཾ། ‘‘སཾཀིལེསོ དུཀྑ’’ནྟིཨཱདིནཱ སཙྩཱནི ཏེསཾ པརིཉྙེཡྻཱདིབྷཱཝེན ཀཐེཏི།

    Tadabhiññā santāti tathāsaññino samānā. Rogameva vaḍḍhayantīti attabhāvarogameva kilesarogameva vā aparāparaṃ vaḍḍhenti. Gaṇḍasallesupi eseva nayo. Rogābhitunnāti yathāvuttarogabyādhitā. Gaṇḍapaṭipīḷitāti yathāvuttagaṇḍabādhitā. Sallānuviddhāti yathāvuttasallena anupaviṭṭhā. Ummujjanimujjānīti upapajjanacavanāni. Ugghātanigghātanti uccāvacabhāvaṃ. Rogagaṇḍasallabhesajjanti yathāvuttarogāditikicchanaṃ, samathavipassanaṃ sandhāya vadati. Tenevāha – ‘‘samathavipassanā roganigghātakabhesajja’’nti. Tattha roganigghātakanti rogavūpasamanaṃ. ‘‘Saṃkileso dukkha’’ntiādinā saccāni tesaṃ pariññeyyādibhāvena katheti.

    ཏཏྠ སཾཀིལེསོ དུཀྑནྟི ཨཏྟཀིལམཐཱནུཡོགཀཱམསུཁལླིཀཱནུཡོགསཾཀིལེསཝནྟོ, ཏེཧི ཝཱ སཾཀིལིསྶམཱནོ རཱུཔཱརཱུཔཀཱཡོ དུཀྑཾ ཨརིཡསཙྩཾ། ཏདབྷིསངྒོ ཏཎྷཱཏི ཏཏྠ ཨབྷིསངྒོ ཨཱསངྒོཏི ལདྡྷནཱམཱ ཏཎྷཱ།

    Tattha saṃkileso dukkhanti attakilamathānuyogakāmasukhallikānuyogasaṃkilesavanto, tehi vā saṃkilissamāno rūpārūpakāyo dukkhaṃ ariyasaccaṃ. Tadabhisaṅgo taṇhāti tattha abhisaṅgo āsaṅgoti laddhanāmā taṇhā.

    ༨༠. ཨིདཱནི དིཊྛིཙརིཏཏཎྷཱཙརིཏཱནཾ སཀྐཱཡདིཊྛིདསྶནེ པཝཏྟིབྷེདཾ དསྶེཏུཾ ‘‘དིཊྛིཙརིཏཱ’’ཏིཨཱདི ཝུཏྟཾ། ཏཏྠ དིཊྛིཙརིཏཱ རཱུཔཾ ཨཏྟཏོ ཨུཔགཙྪནྟཱིཏི དིཊྛིཙརིཏཱ དིཊྛཱབྷིནིཝེསསྶ བལཝབྷཱཝཏོ རཱུཔཾ ‘‘ཨཏྟཱ’’ཏི གཎྷནྟི། ཏེསཉྷི ཨཏྟཱབྷིནིཝེསོ བལཝཱ, ན ཏཐཱ ཨཏྟནིཡཱབྷིནིཝེསོ། ཨེས ནཡོ ཝེདནནྟིཨཱདཱིསུཔི། ཏཎྷཱཙརིཏཱ རཱུཔཝནྟཾ ཨཏྟཱནནྟི ཏཎྷཱཙརིཏཱ ཏཎྷཱབྷིནིཝེསསྶ བལཝབྷཱཝཏོ རཱུཔཾ ཨཏྟནོ ཀིཉྩནཔལིབོདྷབྷཱཝེ ཋཔེཏྭཱ ཨཝསེསཾ ཝེདནཱདིཾ ‘‘ཨཏྟཱ’’ཏི གཎྷནྟི། ཨཏྟནི ཝཱ རཱུཔནྟི ཨཏྟཱདྷཱརཾ ཝཱ རཱུཔཾ། རཱུཔསྨིཾ ཝཱ ཨཏྟཱནནྟི རཱུཔཱདྷཱརཾ ཝཱ ཨཏྟཱནཾ། ཝེདནཱཝནྟནྟིཨཱདཱིསུཔི ཨེསེཝ ནཡོ། ཨེཏེསཉྷི ཨཏྟནིཡཱབྷིནིཝེསོ བལཝཱ, ན ཏཐཱ ཨཏྟཱབྷིནིཝེསོ། ཏསྨཱ ཡཐཱལདྡྷཾ ཨཏྟནིཡནྟི ཀཔྤེཏྭཱ ཏདཉྙཾ ‘‘ཨཏྟཱ’’ཏི གཎྷནྟི། ཨཡཾ ཝུཙྩཏི ཝཱིསཏིཝཏྠུཀཱ སཀྐཱཡདིཊྛཱིཏི ཨཡཾ པཉྩསུ ཨུཔཱདཱནཀྑནྡྷེསུ ཨེཀེཀསྨིཾ ཙཏུནྣཾ ཙཏུནྣཾ གཱཧཱནཾ ཝསེན ཝཱིསཏིཝཏྠུཀཱ སཏི ཝིཛྫམཱནེ ཁནྡྷཔཉྩཀསངྑཱཏེ ཀཱཡེ, སཏཱི ཝཱ ཝིཛྫམཱནཱ ཏཏྠ དིཊྛཱིཏི སཀྐཱཡདིཊྛི།

    80. Idāni diṭṭhicaritataṇhācaritānaṃ sakkāyadiṭṭhidassane pavattibhedaṃ dassetuṃ ‘‘diṭṭhicaritā’’tiādi vuttaṃ. Tattha diṭṭhicaritā rūpaṃ attato upagacchantīti diṭṭhicaritā diṭṭhābhinivesassa balavabhāvato rūpaṃ ‘‘attā’’ti gaṇhanti. Tesañhi attābhiniveso balavā, na tathā attaniyābhiniveso. Esa nayo vedanantiādīsupi. Taṇhācaritā rūpavantaṃ attānanti taṇhācaritā taṇhābhinivesassa balavabhāvato rūpaṃ attano kiñcanapalibodhabhāve ṭhapetvā avasesaṃ vedanādiṃ ‘‘attā’’ti gaṇhanti. Attani vā rūpanti attādhāraṃ vā rūpaṃ. Rūpasmiṃ vāattānanti rūpādhāraṃ vā attānaṃ. Vedanāvantantiādīsupi eseva nayo. Etesañhi attaniyābhiniveso balavā, na tathā attābhiniveso. Tasmā yathāladdhaṃ attaniyanti kappetvā tadaññaṃ ‘‘attā’’ti gaṇhanti. Ayaṃ vuccati vīsativatthukā sakkāyadiṭṭhīti ayaṃ pañcasu upādānakkhandhesu ekekasmiṃ catunnaṃ catunnaṃ gāhānaṃ vasena vīsativatthukā sati vijjamāne khandhapañcakasaṅkhāte kāye, satī vā vijjamānā tattha diṭṭhīti sakkāyadiṭṭhi.

    ལོཀུཏྟརཱ སམྨཱདིཊྛཱིཏི པཋམམགྒསམྨཱདིཊྛི། ཨནྭཱཡིཀཱཏི སམྨཱདིཊྛིཡཱ ཨནུགཱམིནོ། ཡདཱ སམྨཱདིཊྛི སཀྐཱཡདིཊྛིཡཱ པཛཧནཝསེན པཝཏྟཱ, ཏདཱ ཏསྶཱ ཨནུགུཎབྷཱཝེན པཝཏྟམཱནཀཱཏི ཨཏྠོ། ཀེ པན ཏེཏི? ཨཱཧ ‘‘སམྨཱསངྐཔྤོ’’ཏིཨཱདི། ‘‘ཏེ ཏཡོ ཁནྡྷཱ’’ཏིཨཱདིནཱ ཨརིཡམགྒཏོ ཁནྡྷམུཁེན སམཐཝིཔསྶནཱ ནིདྡྷཱརེཏི། ‘‘ཏཏྠ སཀྐཱཡོ’’ཏིཨཱདི ཙཏུསཙྩནིདྡྷཱརཎཾ། ཏཾ སབྦཾ སུཝིཉྙེཡྻམེཝ།

    Lokuttarā sammādiṭṭhīti paṭhamamaggasammādiṭṭhi. Anvāyikāti sammādiṭṭhiyā anugāmino. Yadā sammādiṭṭhi sakkāyadiṭṭhiyā pajahanavasena pavattā, tadā tassā anuguṇabhāvena pavattamānakāti attho. Ke pana teti? Āha ‘‘sammāsaṅkappo’’tiādi. ‘‘Te tayo khandhā’’tiādinā ariyamaggato khandhamukhena samathavipassanā niddhāreti. ‘‘Tattha sakkāyo’’tiādi catusaccaniddhāraṇaṃ. Taṃ sabbaṃ suviññeyyameva.

    པུན ‘‘ཏཏྠ ཡེ རཱུཔཾ ཨཏྟཏོ ཨུཔགཙྪནྟཱི’’ཏིཨཱདིནཱ སཀྐཱཡདསྶནམུཁེན ཨུཙྪེདཱདིཨནྟདྭཡཾ, མཛ྄ཛྷིམཉྩ པཊིཔདཾ ནིདྡྷཱརེཏི། ཏཏྠ ཨིམེ ཝུཙྩནྟི ཨུཙྪེདཝཱདིནོཏི ཨིམེ རཱུཔཱདིཀེ པཉྩཀྑནྡྷེ ཨཏྟཏོ ཨུཔགཙྪནྟཱ རཱུཔཱདཱིནཾ ཨནིཙྩབྷཱཝཏོ ཨུཙྪིཛྫཏི ཨཏྟཱ ཝིནསྶཏི ན ཧོཏི པརཾ མརཎཱཏི ཨེཝཾ ཨབྷིནིཝིསནཏོ ‘‘ཨུཙྪེདཝཱདིནོ’’ཏི ཝུཙྩནྟི། ཨིམེ ཝུཙྩནྟི སསྶཏཝཱདིནོཏི ཨིམེ ‘‘རཱུཔཝནྟཾ ཝཱ ཨཏྟཱན’’ནྟིཨཱདིནཱ རཱུཔཱདིཝིནིམུཏྟོ ཨཉྙོ ཀོཙི ཨཏྟཱཏི ཨུཔགཙྪནྟཱ ‘‘སོ ནིཙྩོ དྷུཝོ སསྶཏོ’’ཏི ཨབྷིནིཝིསནཏོ ‘‘སསྶཏཝཱདིནོ’’ཏི ཝུཙྩནྟི། ‘‘ཨུཙྪེདསསྶཏཝཱདཱ ཨུབྷོ ཨནྟཱ, ཨཡཾ སཾསཱརཔཝཏྟཱི’’ཏིཨཱདི སཙྩནིདྡྷཱརཎཾ, ཏཾ སུཝིཉྙེཡྻཾ།

    Puna ‘‘tattha ye rūpaṃ attato upagacchantī’’tiādinā sakkāyadassanamukhena ucchedādiantadvayaṃ, majjhimañca paṭipadaṃ niddhāreti. Tattha ime vuccanti ucchedavādinoti ime rūpādike pañcakkhandhe attato upagacchantā rūpādīnaṃ aniccabhāvato ucchijjati attā vinassati na hoti paraṃ maraṇāti evaṃ abhinivisanato ‘‘ucchedavādino’’ti vuccanti. Ime vuccanti sassatavādinoti ime ‘‘rūpavantaṃ vā attāna’’ntiādinā rūpādivinimutto añño koci attāti upagacchantā ‘‘so nicco dhuvo sassato’’ti abhinivisanato ‘‘sassatavādino’’ti vuccanti. ‘‘Ucchedasassatavādā ubho antā, ayaṃ saṃsārapavattī’’tiādi saccaniddhāraṇaṃ, taṃ suviññeyyaṃ.

    ཨུཙྪེདསསྶཏཾ སམཱསཏོ ཝཱིསཏིཝཏྠུཀཱ སཀྐཱཡདིཊྛཱིཏི ཨཏྟཱ ཨུཙྪིཛྫཏི ཨཏྟཱ ནིཙྩོཏི ཙ ཨཱདིཔྤཝཏྟནཏོ ཨུཙྪེདསསྶཏདསྶནཾ སངྑེཔཏོ ཝཱིསཏིཝཏྠུཀཱ སཀྐཱཡདིཊྛི ཨེཝ ཧོཏི། སབྦོཔི ཧི ཨཏྟཝཱདོ སཀྐཱཡདིཊྛིཨནྟོགདྷོ ཨེཝཱཏི། ཝིཏྠཱརཏོ དྭཱསཊྛི དིཊྛིགཏཱནཱིཏི ཨུཙྪེདསསྶཏདསྶནཾ ཝིཏྠཱརེན བྲཧྨཛཱལེ (དཱི॰ ནི॰ ༡.༢༨ ཨཱདཡོ) ཨཱགཏཱནི དྭཱསཊྛི དིཊྛིགཏཱནི། ཏེསནྟི ཨེཝཾ སངྑེཔཝིཏྠཱརཝནྟཱནཾ ཨུཙྪེདསསྶཏདསྶནཱནཾ། པཊིཔཀྑོཏི པཧཱཡཀཔཊིཔཀྑོ། ཏེཙཏྟཱལཱིསཾ བོདྷིཔཀྑིཡཱ དྷམྨཱཏི ཨནིཙྩསཉྙཱ དུཀྑསཉྙཱ ཨནཏྟསཉྙཱ པཧཱནསཉྙཱ ཝིརཱགསཉྙཱ ནིརོདྷསཉྙཱ ཙཏྟཱརོ སཏིཔཊྛཱནཱ…པེ॰… ཨརིཡོ ཨཊྛངྒིཀོ མགྒོཏི ཨེཏེ ཏེཙཏྟཱལཱིསཾ བོདྷིཔཀྑིཡཱ དྷམྨཱ།

    Ucchedasassataṃ samāsato vīsativatthukā sakkāyadiṭṭhīti attā ucchijjati attā niccoti ca ādippavattanato ucchedasassatadassanaṃ saṅkhepato vīsativatthukā sakkāyadiṭṭhi eva hoti. Sabbopi hi attavādo sakkāyadiṭṭhiantogadho evāti. Vitthārato dvāsaṭṭhi diṭṭhigatānīti ucchedasassatadassanaṃ vitthārena brahmajāle (dī. ni. 1.28 ādayo) āgatāni dvāsaṭṭhi diṭṭhigatāni. Tesanti evaṃ saṅkhepavitthāravantānaṃ ucchedasassatadassanānaṃ. Paṭipakkhoti pahāyakapaṭipakkho. Tecattālīsaṃ bodhipakkhiyā dhammāti aniccasaññā dukkhasaññā anattasaññā pahānasaññā virāgasaññā nirodhasaññā cattāro satipaṭṭhānā…pe… ariyo aṭṭhaṅgiko maggoti ete tecattālīsaṃ bodhipakkhiyā dhammā.

    ཨེཝཾ ཝིཔསྶནཱཝསེན པཊིཔཀྑཾ དསྶེཏྭཱ པུན སམཐཝསེན དསྶེཏུཾ ‘‘ཨཊྛ ཝིམོཀྑཱ དས ཙ ཀསིཎཱཡཏནཱནཱི’’ཏི ཝུཏྟཾ། དྭཱསཊྛི དིཊྛིགཏཱནི མོཧཛཱལནྟི དྭཱསཊྛི དིཊྛིགཏཱནི མོཧཛཱལཧེཏུཀཏྟཱ མོཧཛཱལཉྩ། ཨནཱདིཨནིདྷནཔྤཝཏྟནྟི པུརིམཱཡ ཀོཊིཡཱ ཨབྷཱཝཏོ ཨནཱདི། ཨསཏི པཊིཔཀྑཱདྷིགམེ སནྟཱནཝསེན ཨནུཔཙྪེདེན པཝཏྟནཏོ ཨནིདྷནཔྤཝཏྟཾ། ཡསྨཱ པན མོཧཛཱལཧེཏུཀཱནི དིཊྛིགཏཱནི མོཧཛཱལེ པདཱལིཏེ པདཱལིཏཱནི ཧོནྟི, ཏསྨཱ ཝུཏྟཾ – ‘‘ཏེཙཏྟཱལཱིསཾ བོདྷིཔཀྑིཡཱ དྷམྨཱ ཉཱཎཝཛིརཾ མོཧཛཱལཔྤདཱལན’’ནྟི།

    Evaṃ vipassanāvasena paṭipakkhaṃ dassetvā puna samathavasena dassetuṃ ‘‘aṭṭha vimokkhā dasa ca kasiṇāyatanānī’’ti vuttaṃ. Dvāsaṭṭhi diṭṭhigatāni mohajālanti dvāsaṭṭhi diṭṭhigatāni mohajālahetukattā mohajālañca. Anādianidhanappavattanti purimāya koṭiyā abhāvato anādi. Asati paṭipakkhādhigame santānavasena anupacchedena pavattanato anidhanappavattaṃ. Yasmā pana mohajālahetukāni diṭṭhigatāni mohajāle padālite padālitāni honti, tasmā vuttaṃ – ‘‘tecattālīsaṃ bodhipakkhiyā dhammā ñāṇavajiraṃ mohajālappadālana’’nti.

    ཏཏྠ ཉཱཎཝཛིརནྟི ཝཛིརཱུཔམཉཱཎཾ། ཨཊྛ སམཱཔཏྟིཡོ སམཱཔཛྫིཏྭཱ ཏེཛེཏྭཱ ཏིཀྑསབྷཱཝཾ ཨཱཔཱདིཏཾ ཝིཔསྶནཱཉཱཎཾ མགྒཉཱཎཉྩ ཉཱཎཝཛིརཾ། ཨིདམེཝ ཧི ཉཱཎཾ བྷགཝཏོ པཝཏྟཾ ‘‘མཧཱཝཛིརཉཱཎ’’ནྟི ཝུཙྩཏི། ཏཾ པན སསམྦྷཱརཾ ཀཏྭཱ དསྶེནྟོ ‘‘ཏེཙཏྟཱལཱིསཾ བོདྷིཔཀྑིཡཱ དྷམྨཱ’’ཏི ཨཱཧ། མོཧཛཱལཔྤདཱལནནྟི པུབྦབྷཱགེ ཝིཀྑམྦྷནཝསེན མགྒཀྑཎེ སམུཙྪེདཝསེན ཨཝིཛྫཱབྷཝཏཎྷཱནཾ པདཱལནཾ། ཨཏཱིཏཱདིབྷེདབྷིནྣེསུ རཱུཔཱདཱིསུ སཀཨཏྟབྷཱཝཱདཱིསུ ཙ སཾསིབྦནཝསེན པཝཏྟནཏོ ཛཱལཾ བྷཝཏཎྷཱ། ཏསྶཱ ཧི ཏཎྷཱ ཛཱལིནཱི སིབྦིནཱི ཛཱལནྟི ཙ ཨདྷིཝཙནནྟི། ཨེཝཾ ཨཏྟཀིལམཐཱནུཡོགཀཱམསུཁལླིཀཱནུཡོགདིཊྛིཏཎྷཱབྷིནིཝེསསསྶཏུཙྪེདཱནཾ ནིདྡྷཱརཎཝསེན མོཧཛཱལཔརིཡཱཡཝིསེསཏོ ཨཝིཛྫཱཏཎྷཱ ཝིབྷཛིཏྭཱ ཡཐཱནུསནྡྷིནཱ སཾཀིལེསཔཀྑཾ ནིགམེནྟོ ‘‘ཏེན ཝུཙྩཏི པུབྦཱ ཀོཊི ན པཉྙཱཡཏི ཨཝིཛྫཱཡ ཙ བྷཝཏཎྷཱཡ ཙཱ’’ཏི ཨཱཧ།

    Tattha ñāṇavajiranti vajirūpamañāṇaṃ. Aṭṭha samāpattiyo samāpajjitvā tejetvā tikkhasabhāvaṃ āpāditaṃ vipassanāñāṇaṃ maggañāṇañca ñāṇavajiraṃ. Idameva hi ñāṇaṃ bhagavato pavattaṃ ‘‘mahāvajirañāṇa’’nti vuccati. Taṃ pana sasambhāraṃ katvā dassento ‘‘tecattālīsaṃ bodhipakkhiyā dhammā’’ti āha. Mohajālappadālananti pubbabhāge vikkhambhanavasena maggakkhaṇe samucchedavasena avijjābhavataṇhānaṃ padālanaṃ. Atītādibhedabhinnesu rūpādīsu sakaattabhāvādīsu ca saṃsibbanavasena pavattanato jālaṃ bhavataṇhā. Tassā hi taṇhā jālinī sibbinī jālanti ca adhivacananti. Evaṃ attakilamathānuyogakāmasukhallikānuyogadiṭṭhitaṇhābhinivesasassatucchedānaṃ niddhāraṇavasena mohajālapariyāyavisesato avijjātaṇhā vibhajitvā yathānusandhinā saṃkilesapakkhaṃ nigamento ‘‘tena vuccati pubbā koṭi na paññāyati avijjāya ca bhavataṇhāya cā’’ti āha.

    ༨༡. ‘‘ཏཏྠ དིཊྛིཙརིཏོ’’ཏིཨཱདིནཱ ཝོདཱནཔཀྑཾ དསྶེཏི། ཏཏྠ སལླེཁཱནུསནྟཏཝུཏྟཱིཏི ཨནུཔདྡུཏསལླེཁཝུཏྟི། ཀསྨཱ? ཡསྨཱ སལླེཁེ ཏིབྦགཱརཝོ། དིཊྛིཙརིཏོ ཧི ཏཔོཛིགུཙྪཱདིནཱ ཨནུཔཱཡེནཔི ཡེབྷུཡྻེན ཀིལེསཱནཾ སལླེཁནཱདྷིཔྤཱཡེན ཙརཏི, ཏསྨཱ སོ སཱསནེ པབྦཛིཏོ དྷུཏདྷམྨཝསེན སལླེཁཔཊིཔདཾ པཱུརེཏི། སིཀྑཱནུསནྟཏཝུཏྟཱིཏི ཨཙྪིདྡཙཏུཔཱརིསུདྡྷིསཱིལཝུཏྟི། དིཊྛིཡཱ སཝིསཡེ པཉྙཱསདིསཱི པཝཏྟཱིཏི སོ ཝིསུཛ྄ཛྷམཱནོ པཉྙཱདྷིཀོ ཧོཏཱིཏི ཨཱཧ – ‘‘དིཊྛིཙརིཏོ སམྨཏྟནིཡཱམཾ ཨོཀྐམནྟོ དྷམྨཱནུསཱརཱི བྷཝཏཱི’’ཏི། ཏཎྷཱཝསེན མིཙྪཱཝིམོཀྑོ ཧོཏཱིཏི ཏཎྷཱཙརིཏོ ཝིསུཛ྄ཛྷམཱནོ སདྡྷཱདྷིཀོཝ ཧོཏི, ཏསྨཱ ཝུཏྟཾ – ‘‘ཏཎྷཱཙརིཏོ སམྨཏྟནིཡཱམཾ ཨོཀྐམནྟོ སདྡྷཱནུསཱརཱི བྷཝཏཱི’’ཏི། དིཊྛིཙརིཏོ སུཁཱཡ པཊིཔདཱཡཱཏིཨཱདི པཊིཔདཱནིདྡེསོ ཧེཊྛཱ དེསནཱཧཱརཝིབྷངྒེ (ནེཏྟི॰ ༥ ཨཱདཡོ) ཨཱགཏོ ཨེཝ, ཨཏྠོཔི ཏཏྠ སབྦཔྤཀཱརཏོ ཝུཏྟོ ཨེཝ།

    81.‘‘Tatthadiṭṭhicarito’’tiādinā vodānapakkhaṃ dasseti. Tattha sallekhānusantatavuttīti anupaddutasallekhavutti. Kasmā? Yasmā sallekhe tibbagāravo. Diṭṭhicarito hi tapojigucchādinā anupāyenapi yebhuyyena kilesānaṃ sallekhanādhippāyena carati, tasmā so sāsane pabbajito dhutadhammavasena sallekhapaṭipadaṃ pūreti. Sikkhānusantatavuttīti acchiddacatupārisuddhisīlavutti. Diṭṭhiyā savisaye paññāsadisī pavattīti so visujjhamāno paññādhiko hotīti āha – ‘‘diṭṭhicarito sammattaniyāmaṃ okkamanto dhammānusārī bhavatī’’ti. Taṇhāvasena micchāvimokkho hotīti taṇhācarito visujjhamāno saddhādhikova hoti, tasmā vuttaṃ – ‘‘taṇhācarito sammattaniyāmaṃ okkamanto saddhānusārī bhavatī’’ti. Diṭṭhicarito sukhāya paṭipadāyātiādi paṭipadāniddeso heṭṭhā desanāhāravibhaṅge (netti. 5 ādayo) āgato eva, atthopi tattha sabbappakārato vutto eva.

    ཨཔུབྦཔདེསུ པན ཝིཝེཙིཡམཱནོཏི ཝིམོཙིཡམཱནོ། པཊིནིསྶརཏཱིཏི ནིཡྻཱཏི ཝིམུཙྩཏཱིཏི ཨཏྠོ། དནྡྷཉྩ དྷམྨཾ ཨཱཛཱནཱཏཱིཏི ཏཎྷཱཙརིཏསྶ མནྡཔཉྙསྶ ཝསེན ཝུཏྟཾ། ཏིཀྑཔཉྙོ པན ཁིཔྤཾ དྷམྨཾ ཨཱཛཱནཱཏཱིཏི། ‘‘སཏྟཱཔི དུཝིདྷཱ’’ཏིཨཱདིནཱ ཨིནྡྲིཡཝིབྷཱགེན པུན པཊིཔདཱཝིབྷཱགཾ དསྶེཏི, ཏཾ སུཝིཉྙེཡྻཾ།

    Apubbapadesu pana viveciyamānoti vimociyamāno. Paṭinissaratīti niyyāti vimuccatīti attho. Dandhañca dhammaṃ ājānātīti taṇhācaritassa mandapaññassa vasena vuttaṃ. Tikkhapañño pana khippaṃ dhammaṃ ājānātīti. ‘‘Sattāpi duvidhā’’tiādinā indriyavibhāgena puna paṭipadāvibhāgaṃ dasseti, taṃ suviññeyyaṃ.

    ‘‘ཡེ ཧི ཀེཙཱི’’ཏིཨཱདིནཱ ཏཱསཾ པཊིཔདཱནཾ ནིཡྻཱནེ ཏཱིསུཔི ཀཱལེསུ ཨེཀནྟིཀབྷཱཝཾ དསྶེཏི། ཏཏྠ ཨིམཱཧི ཨེཝ ཙཏཱུཧི པཊིཔདཱཧཱིཏི ཨིམཱཧི ཨེཝ ཙཏཱུཧི པཊིཔདཱཧི, ཏབྦིནིམུཏྟཱཡ ཨཉྙཱཡ པཊིཔདཱཡ ཨབྷཱཝཏོ། ཙཏུཀྐམགྒནྟི པཊིཔདཱཙཏུཀྐཾ, པཊིཔདཱ ཧི མགྒོཏི། ཨཐ ཝཱ ཙཏུཀྐམགྒནྟི ནནྡིཡཱཝཊྚསྶ ཙཏུདྡིསཱསངྑཱཏཾ མགྒཾ། ཏཱ པན ཙཏསྶོ དིསཱ དིསཱལོཙནནཡེ ཨཱགམིསྶནྟི། ཀིམཏྠཾ པན ཙཏུཀྐམགྒཾ པཉྙཔེནྟཱིཏི ཨཱཧ ‘‘ཨབུདྷཛནསེཝིཏཱཡཱ’’ཏིཨཱདི། ཏཏྠ ཨབུདྷཛནསེཝིཏཱཡཱཏི ཨཔཎྜིཏཛནསེཝིཏཱཡ། བཱལཀནྟཱཡཱཏི བཱལཛནཀཱམིཏཱཡ། རཏྟཝཱསིནིཡཱཏི རཏྟེསུ རཱགཱབྷིབྷཱུཏེསུ ཝསཏཱིཏི རཏྟཝཱསིནཱི, ཏསྶཱ། ནནྡིཡཱཏི ཏཏྲ ཏཏྲཱབྷིནནྡནཊྛེན ནནྡཱིསངྑཱཏཱཡ། ཨཝཊྚནཏྠནྟི སམུཙྪིནྡནཏྠཾ། ཨཡཾ ཝུཙྩཏི ནནྡིཡཱཝཊྚསྶ ནཡསྶ བྷཱུམཱིཏི ཨཡཾ ཏཎྷཱཝིཛྫཱནཾ ཝསེན སཾཀིལེསཔཀྑེ དྭེ དིསཱ སམཐཝིཔསྶནཱནཾ ཝསེན ཝོདཱནཔཀྑེཔི དྭེ དིསཱ ཙཏུསཙྩཡོཛནཱ ནནྡིཡཱཝཊྚསྶ ནཡསྶ སམུཊྛཱནཏཱཡ བྷཱུམཱིཏི།

    ‘‘Ye hi kecī’’tiādinā tāsaṃ paṭipadānaṃ niyyāne tīsupi kālesu ekantikabhāvaṃ dasseti. Tattha imāhi eva catūhi paṭipadāhīti imāhi eva catūhi paṭipadāhi, tabbinimuttāya aññāya paṭipadāya abhāvato. Catukkamagganti paṭipadācatukkaṃ, paṭipadā hi maggoti. Atha vā catukkamagganti nandiyāvaṭṭassa catuddisāsaṅkhātaṃ maggaṃ. Tā pana catasso disā disālocananaye āgamissanti. Kimatthaṃ pana catukkamaggaṃ paññapentīti āha ‘‘abudhajanasevitāyā’’tiādi. Tattha abudhajanasevitāyāti apaṇḍitajanasevitāya. Bālakantāyāti bālajanakāmitāya. Rattavāsiniyāti rattesu rāgābhibhūtesu vasatīti rattavāsinī, tassā. Nandiyāti tatra tatrābhinandanaṭṭhena nandīsaṅkhātāya. Avaṭṭanatthanti samucchindanatthaṃ. Ayaṃ vuccati nandiyāvaṭṭassa nayassa bhūmīti ayaṃ taṇhāvijjānaṃ vasena saṃkilesapakkhe dve disā samathavipassanānaṃ vasena vodānapakkhepi dve disā catusaccayojanā nandiyāvaṭṭassa nayassa samuṭṭhānatāya bhūmīti.

    ༨༢. ཨེཝཾ ནནྡིཡཱཝཊྚསྶ ནཡསྶ བྷཱུམིཾ ནིདྡིསིཏྭཱ ཨིདཱནི ཏསྶ དིསཱབྷཱུཏདྷམྨེ ནིདྡིསནྟེན ཡསྨཱ ཙསྶ དིསཱབྷཱུཏདྷམྨེསུ ཝུཏྟེསུ དིསཱལོཙནནཡོ ཝུཏྟོཡེཝ ཧོཏི, ཏསྨཱ ‘‘ཝེཡྻཱཀརཎེསུ ཧི ཡེ ཀུསལཱཀུསལཱ’’ཏི དིསཱལོཙནལཀྑཎཾ ཨེཀདེསེན པཙྩཱམསིཏྭཱ ‘‘ཏེ དུཝིདྷཱ ཨུཔཔརིཀྑིཏབྦཱ’’ཏིཨཱདི ཨཱརདྡྷཾ། ཏཏྠ ཏེཏི དིསཱབྷཱུཏདྷམྨཱ། དུཝིདྷཱཏི ‘‘ཨིམེ སཾཀིལེསདྷམྨཱ, ཨིམེ ཝོདཱནདྷམྨཱ’’ཏི ཨེཝཾ དུཝིདྷེན། ཨུཔཔརིཀྑིཏབྦཱཏི ཨུཔཔཏྟིཏོ པརིཏོ ཨིཀྑིཏབྦཱ, དྷམྨཡུཏྟིཏོ ཏཾཏཾདིསཱབྷཱཝེན པེཀྑིཏབྦཱ ཨཱལོཙིཏབྦཱཏི ཨཏྠོ།

    82. Evaṃ nandiyāvaṭṭassa nayassa bhūmiṃ niddisitvā idāni tassa disābhūtadhamme niddisantena yasmā cassa disābhūtadhammesu vuttesu disālocananayo vuttoyeva hoti, tasmā ‘‘veyyākaraṇesu hi ye kusalākusalā’’ti disālocanalakkhaṇaṃ ekadesena paccāmasitvā ‘‘te duvidhā upaparikkhitabbā’’tiādi āraddhaṃ. Tattha teti disābhūtadhammā. Duvidhāti ‘‘ime saṃkilesadhammā, ime vodānadhammā’’ti evaṃ duvidhena. Upaparikkhitabbāti upapattito parito ikkhitabbā, dhammayuttito taṃtaṃdisābhāvena pekkhitabbā ālocitabbāti attho.

    ཡཾ པཀཱརཾ སནྡྷཱཡ ‘‘དུཝིདྷཱ ཨུཔཔརིཀྑིཏབྦཱ’’ཏི ཝུཏྟཾ, ཏཾ དསྶེཏི ‘‘ལོཀཝཊྚཱནུསཱརཱི ཙ ལོཀཝིཝཊྚཱནུསཱརཱི ཙཱ’’ཏི། ཏསྶཏྠོ – ལོཀོ ཨེཝ ཝཊྚཾ ལོཀཝཊྚཾ། ལོཀཝཊྚབྷཱཝེན ཨནུསརཏི པཝཏྟཏཱིཏི ལོཀཝཊྚཱནུསཱརཱི, སཾཀིལེསདྷམྨོཏི ཨཏྠོ། ལོཀསྶ, ལོཀཏོ ཝཱ ཝིཝཊྚཾ ལོཀཝིཝཊྚཾ, ནིབྦཱནཾ། ཏཾ ཨནུསརཏི ཨནུལོམནཝསེན གཙྪཏཱིཏི ལོཀཝིཝཊྚཱནུསཱརཱི, ཝོདཱནདྷམྨོཏི ཨཏྠོ། ཏེནེཝཱཧ – ‘‘ཝཊྚཾ ནཱམ སཾསཱརོ, ཝིཝཊྚཾ ནིབྦཱན’’ནྟི།

    Yaṃ pakāraṃ sandhāya ‘‘duvidhā upaparikkhitabbā’’ti vuttaṃ, taṃ dasseti ‘‘lokavaṭṭānusārī ca lokavivaṭṭānusārī cā’’ti. Tassattho – loko eva vaṭṭaṃ lokavaṭṭaṃ. Lokavaṭṭabhāvena anusarati pavattatīti lokavaṭṭānusārī, saṃkilesadhammoti attho. Lokassa, lokato vā vivaṭṭaṃ lokavivaṭṭaṃ, nibbānaṃ. Taṃ anusarati anulomanavasena gacchatīti lokavivaṭṭānusārī, vodānadhammoti attho. Tenevāha – ‘‘vaṭṭaṃ nāma saṃsāro, vivaṭṭaṃ nibbāna’’nti.

    ཏཾ ཀཐཾ དཊྛབྦནྟི ཏཾ ཀཐཾ ཀེན པཀཱརེན དཊྛབྦནྟི ཙེ? ཨུཔཙཡེན། ཡཐཱ ཀཏཾ ཀམྨཾ ཕལདཱནསམཏྠཾ ཧོཏི, ཏཐཱ ཀཏཾ ཨུཔཙིཏནྟི ཝུཙྩཏི། ཨེཝཾ ཨུཔཙིཏབྷཱཝེ ཀམྨཾ ནཱམ ཧོཏི, ཝིཔཱཀཝཊྚསྶ ཀཱརཎཾ ཧོཏཱིཏི ཨཏྠོ། སབྦེཔི ཀིལེསཱ ཙཏཱུཧི ཝིཔལླཱསེཧི ནིདྡིསིཏབྦཱ, དསནྣམྤི ཀིལེསཱནཾ ཝིཔལླཱསཧེཏུབྷཱཝཏོ། ཏེ ཀཏྠ དཊྛབྦཱཏི ཏེ པན ཝིཔལླཱསཱ ཀཏྠ པསྶིཏབྦཱཏི ཨཱཧ – ‘‘དས ཝཏྠུཀེ ཀིལེསཔུཉྫེ’’ཏི། དསཝིདྷཀཱརཎེ ཀིལེསསམཱུཧེཏི ཨཏྠོ། ཏཏྠ ཀིལེསཱཔི ཀིལེསཝཏྠུ, ཀིལེསཱནཾ པཙྩཡདྷམྨཱཔི ཀིལེསཝཏྠུ། ཏེསུ ཀཱརཎབྷཱཝེན པུརིམསིདྡྷཱ ཀིལེསཱ པརཏོ པརེསཾ ཀིལེསཱནཾ པཙྩཡབྷཱཝཏོ ཀིལེསཱཔི ཀིལེསཝཏྠུ། ཨཡོནིསོམནསིཀཱརོ, ཨཡོནིསོམནསིཀཱརཔརིཀྑཏཱ ཙ དྷམྨཱ ཀིལེསུཔྤཏྟིཧེཏུབྷཱཝཏོ ཀིལེསཔྤཙྩཡཱཔི ཀིལེསཝཏྠཱུཏི དཊྛབྦཾ།

    Taṃkathaṃ daṭṭhabbanti taṃ kathaṃ kena pakārena daṭṭhabbanti ce? Upacayena. Yathā kataṃ kammaṃ phaladānasamatthaṃ hoti, tathā kataṃ upacitanti vuccati. Evaṃ upacitabhāve kammaṃ nāma hoti, vipākavaṭṭassa kāraṇaṃ hotīti attho. Sabbepi kilesā catūhi vipallāsehi niddisitabbā, dasannampi kilesānaṃ vipallāsahetubhāvato. Te kattha daṭṭhabbāti te pana vipallāsā kattha passitabbāti āha – ‘‘dasa vatthuke kilesapuñje’’ti. Dasavidhakāraṇe kilesasamūheti attho. Tattha kilesāpi kilesavatthu, kilesānaṃ paccayadhammāpi kilesavatthu. Tesu kāraṇabhāvena purimasiddhā kilesā parato paresaṃ kilesānaṃ paccayabhāvato kilesāpi kilesavatthu. Ayonisomanasikāro, ayonisomanasikāraparikkhatā ca dhammā kilesuppattihetubhāvato kilesappaccayāpi kilesavatthūti daṭṭhabbaṃ.

    ཙཏྟཱརོ ཨཱཧཱརཱཏི ཨེཏྠ ཨཱཧཱརསཱིསེན ཏབྦིསཡཱ ཀིལེསཱཔི ཨདྷིཔྤེཏཱ། ཙཏསྶོ ཝིཉྙཱཎཊྛིཏིཡོཏི ཨེཏྠཱཔི ཨེསེཝ ནཡོ། ‘‘པཋམེ ཨཱཧཱརེ’’ཏིཨཱདིནཱ དསཝཏྠུཀེ ཀིལེསཔུཉྫེ པུརིམཾ པུརིམཾ པཙྪིམསྶ པཙྪིམསྶ ཀཱརཎནྟི དསྶེཏི། ཏཏྠ པཋམེ ཨཱཧཱརེཏི ཝིསཡབྷཱུཏེ པཋམེ ཨཱཧཱརེ པཋམོ ཝིཔལླཱསོ པཝཏྟཏཱིཏི ཨཏྠོ། སེསཱཧཱརེསུཔི ཨེསེཝ ནཡོ། པཋམེ ཝིཔལླཱསེཏི པཋམེ ཝིཔལླཱསེ ཨཔྤཧཱིནེ སཏི པཋམཾ ཨུཔཱདཱནཾ པཝཏྟཏཱིཏི ཨཏྠོ། སེསཔདེསུཔི ཨེསེཝ ནཡོ། ཡཾ པནེཏྠ ཝཏྟབྦཾ, ཏཾ ནིདྡེསེཡེཝ ཀཐཡིསྶཱམ།

    Cattāroāhārāti ettha āhārasīsena tabbisayā kilesāpi adhippetā. Catasso viññāṇaṭṭhitiyoti etthāpi eseva nayo. ‘‘Paṭhame āhāre’’tiādinā dasavatthuke kilesapuñje purimaṃ purimaṃ pacchimassa pacchimassa kāraṇanti dasseti. Tattha paṭhame āhāreti visayabhūte paṭhame āhāre paṭhamo vipallāso pavattatīti attho. Sesāhāresupi eseva nayo. Paṭhame vipallāseti paṭhame vipallāse appahīne sati paṭhamaṃ upādānaṃ pavattatīti attho. Sesapadesupi eseva nayo. Yaṃ panettha vattabbaṃ, taṃ niddeseyeva kathayissāma.

    ༨༣. ཨིདཱནི དསཝཏྠུཀཾ ཀིལེསཔུཉྫཾ ཏཎྷཱཝིཛྫཱཝསེན དྭེ ཀོཊྛཱསེ ཀརོནྟོ ‘‘ཡོ ཙ ཀབལཱི༹ཀཱརོ ཨཱཧཱརོ’’ཏིཨཱདིམཱཧ། ཏཏྠ ཀབལཱི༹ཀཱརཱཧཱརཾ ཕསྶཱཧཱརཉྩ ཨཔརིཛཱནནྟསྶ ཏཎྷཱཙརིཏསྶ ཡཐཱཀྐམཾ ཀཱཡཝེདནཱསུ ཏིབྦོ ཚནྡརཱགོ ཧོཏི, ཨིཏི ཨུཔཀྐིལེསསྶ ཚནྡརཱགསྶ ཧེཏུབྷཱཝཏོ ཡོ ཙ ཀབལཱི༹ཀཱརོ ཨཱཧཱརོ, ཡོ ཙ ཕསྶོ ཨཱཧཱརོ, ཨིམེ ཏཎྷཱཙརིཏསྶ པུགྒལསྶ ཨུཔཀྐིལེསཱཏི ཝུཏྟཱ། ཏཐཱ མནོསཉྩེཏནཱཧཱརཾ ཝིཉྙཱཎཱཧཱརཉྩ ཨཔརིཛཱནནྟོ དིཊྛིཙརིཏོ ཏེསུ ཨཏྟསཉྙཱི ནིཙྩསཉྙཱི ཙ ཧོཏཱིཏི ཝུཏྟནཡེནེཝ ཏེ དིཊྛིཙརིཏསྶ པུགྒལསྶ ཨུཔཀྐིལེསཱཏི ཝུཏྟཱ། ཏཐཱ པུརིམཀཱ དྭེ ཝིཔལླཱསཱ པུརིམཀཱནི ཨེཝ ཙ དྭེ དྭེཨུཔཱདཱནཡོགགནྠཱསཝཨོགྷསལླཝིཉྙཱཎཊྛིཏིཨགཏིགམནཱནི ཏཎྷཱཔདྷཱནཏྟཱ ཏཎྷཱསབྷཱཝཏྟཱ ཏཎྷཱཝིསཡཏྟཱ ཙ ཏཎྷཱཙརིཏསྶ ཨུཔཀྐིལེསཱཏི ཝུཏྟཱ། པཙྪིམཀཱནི པན ཏཱནི དིཊྛིཔདྷཱནཏྟཱ དིཊྛིསབྷཱཝཏྟཱ དིཊྛིཝིསཡཏྟཱ ཙ དིཊྛིཙརིཏསྶ ཨུཔཀྐིལེསཱཏི ཝུཏྟཱཏི དཊྛབྦཱ།

    83. Idāni dasavatthukaṃ kilesapuñjaṃ taṇhāvijjāvasena dve koṭṭhāse karonto ‘‘yo ca kabaḷīkāro āhāro’’tiādimāha. Tattha kabaḷīkārāhāraṃ phassāhārañca aparijānantassa taṇhācaritassa yathākkamaṃ kāyavedanāsu tibbo chandarāgo hoti, iti upakkilesassa chandarāgassa hetubhāvato yo ca kabaḷīkāro āhāro, yo ca phasso āhāro, ime taṇhācaritassa puggalassa upakkilesāti vuttā. Tathā manosañcetanāhāraṃ viññāṇāhārañca aparijānanto diṭṭhicarito tesu attasaññī niccasaññī ca hotīti vuttanayeneva te diṭṭhicaritassa puggalassa upakkilesāti vuttā. Tathā purimakā dve vipallāsā purimakāni eva ca dve dveupādānayogaganthāsavaoghasallaviññāṇaṭṭhitiagatigamanāni taṇhāpadhānattā taṇhāsabhāvattā taṇhāvisayattā ca taṇhācaritassa upakkilesāti vuttā. Pacchimakāni pana tāni diṭṭhipadhānattā diṭṭhisabhāvattā diṭṭhivisayattā ca diṭṭhicaritassa upakkilesāti vuttāti daṭṭhabbā.

    ༨༤. ཀབལཱི༹ཀཱརེ ཨཱཧཱརེ ‘‘ཨསུབྷེ སུབྷ’’ནྟི ཝིཔལླཱསོཏི ཙཏཱུསུ ཨཱཧཱརེསུ ཀབལཱི༹ཀཱརེ ཨཱཧཱརེ ཙཏཱུསུ ཙ ཝིཔལླཱསེསུ ‘‘ཨསུབྷེ སུབྷ’’ནྟི ཝིཔལླཱསོ དཊྛབྦོ ཀབལཱི༹ཀཱརཱཧཱརསྶ ཨསུབྷསབྷཱཝཏྟཱ ཨསུབྷསམུཊྛཱནཏྟཱ ཙ། ཏཐཱ ཕསྶཱཧཱརསྶ དུཀྑསབྷཱཝཏྟཱ དུཀྑཔཙྩཡཏྟཱ ཙ ཝིསེསཏོ ཏཏྠ ‘‘དུཀྑེ སུཁ’’ནྟི ཝིཔལླཱསོ། ཏཐཱ ཡེབྷུཡྻེན སཏྟཱ ཝིཉྙཱཎེ ནིཙྩསཉྙིནོ, སངྑཱརེསུ ཙ ཨཏྟསཉྙིནོ, ཙེཏནཱཔདྷཱནཱ ཙ སངྑཱརཱཏི ཝུཏྟཾ – ‘‘ཝིཉྙཱཎེ ཨཱཧཱརེ…པེ॰… ཨཏྟཱཏི ཝིཔལླཱསོ’’ཏི། པཋམེ ཝིཔལླཱསེ ཋིཏོ ཀཱམེ ཨུཔཱདིཡཏཱིཏི ‘‘ཨསུབྷེ སུབྷ’’ནྟི ཝིཔརིཡེསགྒཱཧཱི ཀིལེསཀཱམེན ཝཏྠུཀཱམེ དལ༹ྷཾ གཎྷཱཏི ། ཨིདཾ ཝུཙྩཏི ཀཱམུཔཱདཱནནྟི ཡཾ ཏཐཱ ཀཱམཱནཾ གཧཎཾ, ཨིདཾ ཝུཙྩཏི ཀཱམུཔཱདཱནཾ། ‘‘དུཀྑེ སུཁ’’ནྟི ཝིཔརིཡེསགྒཱཧཱི ‘‘སཱིལབྦཏེཧི ཨནཱགཏེ བྷཝཝིསུདྡྷཱིཏི ཏཾ ནིབྦུཏིསུཁ’’ནྟི དལ༹ྷཾ གཎྷཱཏི། ‘‘ཨནིཙྩེ ནིཙྩ’’ནྟི ཝིཔརིཡེསགྒཱཧཱི ‘‘སབྦེ བྷཝཱ ནིཙྩཱ དྷུཝཱ སསྶཏཱ ཨཝིཔརིཎཱམདྷམྨཱ’’ཏི སཾསཱརཱབྷིནནྡིནིཾ བྷཝདིཊྛིཾ དལ༹ྷཾ གཎྷཱཏི། ‘‘ཨནཏྟནི ཨཏྟཱ’’ཏི ཝིཔརིཡེསགྒཱཧཱི ‘‘ཨསཏི ཨཏྟནི ཀསྶིདཾ ཀམྨཕལཾ, ཏསྨཱ སོ ཀརོཏི, སོ པཊིསཾཝེདེཏཱི’’ཏི ཨཏྟདིཊྛིཾ དལ༹ྷཾ གཎྷཱཏཱིཏི ཨིམམཏྠཾ དསྶེཏི ‘‘དུཏིཡེ ཝིཔལླཱསེ ཋིཏོ’’ཏིཨཱདིནཱ།

    84.Kabaḷīkāre āhāre ‘‘asubhe subha’’nti vipallāsoti catūsu āhāresu kabaḷīkāre āhāre catūsu ca vipallāsesu ‘‘asubhe subha’’nti vipallāso daṭṭhabbo kabaḷīkārāhārassa asubhasabhāvattā asubhasamuṭṭhānattā ca. Tathā phassāhārassa dukkhasabhāvattā dukkhapaccayattā ca visesato tattha ‘‘dukkhe sukha’’nti vipallāso. Tathā yebhuyyena sattā viññāṇe niccasaññino, saṅkhāresu ca attasaññino, cetanāpadhānā ca saṅkhārāti vuttaṃ – ‘‘viññāṇe āhāre…pe… attāti vipallāso’’ti. Paṭhame vipallāse ṭhito kāme upādiyatīti ‘‘asubhe subha’’nti vipariyesaggāhī kilesakāmena vatthukāme daḷhaṃ gaṇhāti . Idaṃ vuccati kāmupādānanti yaṃ tathā kāmānaṃ gahaṇaṃ, idaṃ vuccati kāmupādānaṃ. ‘‘Dukkhe sukha’’nti vipariyesaggāhī ‘‘sīlabbatehi anāgate bhavavisuddhīti taṃ nibbutisukha’’nti daḷhaṃ gaṇhāti. ‘‘Anicce nicca’’nti vipariyesaggāhī ‘‘sabbe bhavā niccā dhuvā sassatā avipariṇāmadhammā’’ti saṃsārābhinandiniṃ bhavadiṭṭhiṃ daḷhaṃ gaṇhāti. ‘‘Anattani attā’’ti vipariyesaggāhī ‘‘asati attani kassidaṃ kammaphalaṃ, tasmā so karoti, so paṭisaṃvedetī’’ti attadiṭṭhiṃ daḷhaṃ gaṇhātīti imamatthaṃ dasseti ‘‘dutiye vipallāse ṭhito’’tiādinā.

    ཨཡཾ ཝུཙྩཏི ཀཱམཡོགོཏི ཡེན ཀཱམརཱགསངྑཱཏེན ཀཱམུཔཱདཱནེན ཝཏྠུཀཱམེཧི སཧ སཏྟོ སཾཡོཛཱིཡཏི, ཨཡཾ ཀཱམརཱགོ ‘‘ཀཱམཡོགོ’’ཏི ཝུཙྩཏི། ཨཡཾ ཝུཙྩཏི བྷཝཡོགོཏི ཡཏོ སཱིལབྦཏུཔཱདཱནསངྑཱཏེན བྷཝུཔཱདཱནེན བྷཝེན སཧ སཏྟོ སཾཡོཛཱིཡཏི, ཨཡཾ བྷཝརཱགོ ‘‘བྷཝཡོགོ’’ཏི ཝུཙྩཏི། ཨཡཾ ཝུཙྩཏི དིཊྛིཡོགོཏི ཡཱཡ ཨཧེཏུཀདིཊྛིཨཱདིསངྑཱཏཱཡ པཱཔིཀཱཡ དིཊྛིཡཱ, སཀྐཱཡདིཊྛིཨཱདིཨཝསིཊྛདིཊྛིཡཱ ཙ སཏྟོ དུཀྑེན སཧ སཾཡོཛཱིཡཏི, ཨཡཾ པཱཔིཀཱ དིཊྛི ‘‘དིཊྛིཡོགོ’’ཏི ཝུཙྩཏི། ཨཡཾ ཝུཙྩཏི ཨཝིཛྫཱཡོགོཏི ཡཱཡ ཨཏྟཝཱདུཔཱདཱནེན སཀལཝཊྚདུཀྑེན ཙ སཧ སཏྟོ སཾཡོཛཱིཡཏི, ཨཡཾ ཨཝིཛྫཱ ‘‘ཨཝིཛྫཱཡོགོ’’ཏི ཝུཙྩཏི།

    Ayaṃ vuccati kāmayogoti yena kāmarāgasaṅkhātena kāmupādānena vatthukāmehi saha satto saṃyojīyati, ayaṃ kāmarāgo ‘‘kāmayogo’’ti vuccati. Ayaṃ vuccati bhavayogoti yato sīlabbatupādānasaṅkhātena bhavupādānena bhavena saha satto saṃyojīyati, ayaṃ bhavarāgo ‘‘bhavayogo’’ti vuccati. Ayaṃ vuccati diṭṭhiyogoti yāya ahetukadiṭṭhiādisaṅkhātāya pāpikāya diṭṭhiyā, sakkāyadiṭṭhiādiavasiṭṭhadiṭṭhiyā ca satto dukkhena saha saṃyojīyati, ayaṃ pāpikā diṭṭhi ‘‘diṭṭhiyogo’’ti vuccati. Ayaṃ vuccati avijjāyogoti yāya attavādupādānena sakalavaṭṭadukkhena ca saha satto saṃyojīyati, ayaṃ avijjā ‘‘avijjāyogo’’ti vuccati.

    ཡསྨཱ པན ཀཱམཡོགཱདཡོ ཨབྷིཛ྄ཛྷཱཀཱཡགནྠཱདཱིནཾ པཙྩཡཱ ཧོནྟི, ཏསྨཱ ‘‘པཋམེ ཡོགེ ཋིཏོ ཨབྷིཛ྄ཛྷཱཡ ཀཱཡཾ གནྠཏཱི’’ཏིཨཱདི ཝུཏྟཾ། ཏཏྠ ཨབྷིཛ྄ཛྷཱཡ ཀཱཡཾ གནྠཏཱིཏི པརཱབྷིཛ྄ཛྷཱཡནལཀྑཎཱཡ ཨབྷིཛ྄ཛྷཱཡ ནཱམཀཱཡཾ གནྠཏི གྷཊྚེཏཱིཏི ཨཏྠོ། ཏཐཱ བྷཝཔཏྠནཱཡ ཨཔྤཧཱིནཏྟཱ བྷཝདིཊྛིབྷཝརཱགཝསེན ཨཱགྷཱཏཝཏྠཱུསུ སཏྟཱ ཙིཏྟཱནི པདཱུསེནྟཱིཏི ཨཱཧ – ‘‘དུཏིཡེ ཡོགེ ཋིཏོ བྱཱཔཱདེན ཀཱཡཾ གནྠཏཱི’’ཏི། ཏཐཱ དིཊྛིཝསེན ཨཝིཛྫཱཝསེན ཙ སཱིལབྦཏེཧི སུཛ྄ཛྷཏི, ཨིདམེཝ སཙྩཾ མོགྷམཉྙནྟི ཙ ཨབྷིནིཝིསཏཱིཏི ཨཱཧ – ‘‘ཏཏིཡེ…པེ॰… ཨིདཾསཙྩཱབྷིནིཝེསེན ཀཱཡཾ གནྠཏཱི’’ཏི།

    Yasmā pana kāmayogādayo abhijjhākāyaganthādīnaṃ paccayā honti, tasmā ‘‘paṭhame yoge ṭhito abhijjhāya kāyaṃ ganthatī’’tiādi vuttaṃ. Tattha abhijjhāya kāyaṃ ganthatīti parābhijjhāyanalakkhaṇāya abhijjhāya nāmakāyaṃ ganthati ghaṭṭetīti attho. Tathā bhavapatthanāya appahīnattā bhavadiṭṭhibhavarāgavasena āghātavatthūsu sattā cittāni padūsentīti āha – ‘‘dutiye yoge ṭhito byāpādena kāyaṃ ganthatī’’ti. Tathā diṭṭhivasena avijjāvasena ca sīlabbatehi sujjhati, idameva saccaṃ moghamaññanti ca abhinivisatīti āha – ‘‘tatiye…pe… idaṃsaccābhinivesena kāyaṃ ganthatī’’ti.

    ཏསྶཱཏི ཏསྶ ཨབྷིཛ྄ཛྷཱདཱིཧི སམནྣཱགཏསྶ པུགྒལསྶ། ཨེཝཾ གནྠིཏཱཏི ཨེཝཾ ཨབྷིཛ྄ཛྷཱཡནཱདིཝསེན ནཱམཀཱཡཾ གནྠིཏྭཱ ཋིཏཱ། ཨཱསཝནྟཱིཏི ཨཱསཝབྷཱཝེན པཝཏྟནྟི། ཀུཏོ ཙ ཝུཙྩཏི ཨཱསཝནྟཱིཏི ཀུཏོ པན ཧེཏུཏོ ཏེ ཀིལེསཱ ཨཱསཝནྟཱིཏི ཨཱསཝཧེཏུཾ པུཙྪཏི། ཡསྨཱ པན ཀིལེསཱ ཀུསལཔྤཝཏྟིཾ ནིཝཱརེཏྭཱ ཙིཏྟཾ པརིཡཱདཱཡ ཏིཊྛནྟཱ, མགྒེན ཨསམུཙྪིནྣཱ ཨེཝ ཝཱ ཨཱསཝཱནཾ ཨུཔྤཏྟིཧེཏུ ཧོནྟི, ཏསྨཱ ‘‘ཨནུསཡཏོ ཝཱ པརིཡུཊྛཱནཏོ ཝཱ’’ཏི ཝུཏྟཾ། ཨབྷིཛ྄ཛྷཱཀཱཡགནྠེན ཀཱམཱསཝོཏི ཨབྷིཛ྄ཛྷཱཀཱཡགནྠེན སིདྡྷེན ཀཱམརཱགསབྷཱཝཏྟཱ ཀཱམཱསཝོ སིདྡྷོ ཧོཏི། ཀཏྠཙིདེཝ ཝིསཡེ དོམནསྶིཏོ ཏཔྤཊིཔཀྑེ ཝིསཡེ ཏབྦིསཡབཧུལེ ཙ བྷཝེ པཏྠེཏཱིཏི ཨཱཧ – ‘‘བྱཱཔཱདཀཱཡགནྠེན བྷཝཱསཝོ’’ཏི། པརཱམཱསཀཱཡགནྠེན དིཊྛཱསཝོཏི སཱིལབྦཏཔརཱམཱསཀཱཡགནྠེན སིདྡྷེན ཏཾསབྷཱཝཏྟཱ ཨཔརཱཔརཾ ཝཱ དིཊྛིཡོ གནྠེནྟསྶ དིཊྛཱསཝོ སིདྡྷོ ཧོཏི། ཨིདཾསཙྩཱབྷིནིཝེསཀཱཡགནྠེན ཨཝིཛྫཱསཝོཏི ‘‘ཨིདམེཝ སཙྩཾ མོགྷམཉྙ’’ནྟི ཨབྷིནིཝིསནྟསྶ ཨཡོནིསོམནསིཀཱརཏོ ཨནེཀེཧི ཨཀུསལེཧི དྷམྨེཧི སདྡྷིཾ ཨཝིཛྫཱསཝོ ཨུཔྤཛྫཏི, སབྦེསཾ ཝཱ ཨཀུསལདྷམྨཱནཾ ཨཝིཛྫཱཔུབྦངྒམཏྟཱ ཨིདཾསཙྩཱབྷིནིཝེསཀཱཡགནྠེན སིདྡྷེན ཏསྶ ཧེཏུབྷཱུཏོ ཨཝིཛྫཱསཝོ སིདྡྷོ ཧོཏི།

    Tassāti tassa abhijjhādīhi samannāgatassa puggalassa. Evaṃ ganthitāti evaṃ abhijjhāyanādivasena nāmakāyaṃ ganthitvā ṭhitā. Āsavantīti āsavabhāvena pavattanti. Kuto ca vuccati āsavantīti kuto pana hetuto te kilesā āsavantīti āsavahetuṃ pucchati. Yasmā pana kilesā kusalappavattiṃ nivāretvā cittaṃ pariyādāya tiṭṭhantā, maggena asamucchinnā eva vā āsavānaṃ uppattihetu honti, tasmā ‘‘anusayato vā pariyuṭṭhānato vā’’ti vuttaṃ. Abhijjhākāyaganthena kāmāsavoti abhijjhākāyaganthena siddhena kāmarāgasabhāvattā kāmāsavo siddho hoti. Katthacideva visaye domanassito tappaṭipakkhe visaye tabbisayabahule ca bhave patthetīti āha – ‘‘byāpādakāyaganthena bhavāsavo’’ti. Parāmāsakāyaganthena diṭṭhāsavoti sīlabbataparāmāsakāyaganthena siddhena taṃsabhāvattā aparāparaṃ vā diṭṭhiyo ganthentassa diṭṭhāsavo siddho hoti. Idaṃsaccābhinivesakāyaganthena avijjāsavoti ‘‘idameva saccaṃ moghamañña’’nti abhinivisantassa ayonisomanasikārato anekehi akusalehi dhammehi saddhiṃ avijjāsavo uppajjati, sabbesaṃ vā akusaladhammānaṃ avijjāpubbaṅgamattā idaṃsaccābhinivesakāyaganthena siddhena tassa hetubhūto avijjāsavo siddho hoti.

    ཡསྨཱ པན ཨཱསཝཱ ཨེཝ པརིབུདྡྷཱ ཝཊྚསྨིཾ ཨོཧནནྟི ཨོསཱདེནྟཱིཏི ‘‘ཨོགྷཱ’’ཏི ཝུཙྩནྟི, ཏསྨཱ ཝུཏྟཾ – ‘‘ཏསྶ ཨིམེ ཙཏྟཱརོ ཨཱསཝཱ’’ཏིཨཱདི།

    Yasmā pana āsavā eva paribuddhā vaṭṭasmiṃ ohananti osādentīti ‘‘oghā’’ti vuccanti, tasmā vuttaṃ – ‘‘tassa ime cattāro āsavā’’tiādi.

    ཨནུསཡསཧགཏཱཏི ཨནུསཡབྷཱཝཾ ཨཔྤཊིཀྑིཔིཏྭཱ གཏཱ པཝཏྟཱ, ཨནུསཡབྷཱུཏཱ ཝཱ། ཨཛ྄ཛྷཱསཡནྟི ཙིཏྟཾ། ཨནུཔཝིཊྛཱཏི ཨོགཱལ༹ྷཱ། ཧདཡཾ ཨཱཧཙྩ ཏིཊྛནྟཱིཏི ཙིཏྟསྶ ཨབྦྷནྟརསངྑཱཏཾ ཧདཡཾ ཨཱཧནྟྭཱ ཏིཊྛནྟི། ཏཐཱ ཧི ཝུཏྟཾ ཨཊྛསཱལིནིཡཾ (དྷ॰ ས॰ ཨཊྛ॰ ༥) ‘‘ཨབྦྷནྟརཊྛེན ཧདཡ’’ནྟི། ཏེན ཝུཙྩནྟི སལླཱཏི ཡསྨཱ ཨཛ྄ཛྷཱསཡཾ ཨནུཔཝིཊྛཱ ཧདཡཾ ཨཱཧཙྩ ཏིཊྛནྟི, ཏེན ཝུཙྩནྟི ‘‘སལླཱ’’ཏི། པཱིལཱ༹ཛནནཾ དུརུདྡྷརཎཏཱ ཙ སལླཊྛོ། ‘‘ཨེསོ མེ ཨཏྟཱ’’ཏི གཧཎམུཁེན ‘‘ཨེསོཧམསྨཱི’’ཏི གཧཎཾ ཧོཏཱིཏི དིཊྛིཾ ནིསྶཱཡཔི མཱནཾ ཛཔྤེནྟཱིཏི ཨཱཧ ‘‘དིཊྛོགྷེན མཱནསལློ’’ཏི།

    Anusayasahagatāti anusayabhāvaṃ appaṭikkhipitvā gatā pavattā, anusayabhūtā vā. Ajjhāsayanti cittaṃ. Anupaviṭṭhāti ogāḷhā. Hadayaṃ āhacca tiṭṭhantīti cittassa abbhantarasaṅkhātaṃ hadayaṃ āhantvā tiṭṭhanti. Tathā hi vuttaṃ aṭṭhasāliniyaṃ (dha. sa. aṭṭha. 5) ‘‘abbhantaraṭṭhena hadaya’’nti. Tena vuccanti sallāti yasmā ajjhāsayaṃ anupaviṭṭhā hadayaṃ āhacca tiṭṭhanti, tena vuccanti ‘‘sallā’’ti. Pīḷājananaṃ duruddharaṇatā ca sallaṭṭho. ‘‘Eso me attā’’ti gahaṇamukhena ‘‘esohamasmī’’ti gahaṇaṃ hotīti diṭṭhiṃ nissāyapi mānaṃ jappentīti āha ‘‘diṭṭhoghena mānasallo’’ti.

    པརིཡཱདིནྣནྟི ཨཉྙསྶ ཨོཀཱསཾ ཨདཏྭཱ སམནྟཏོ གཧིཏཾ། ཙཏཱུསུ དྷམྨེསུ སཎྛཧཏཱིཏི ཨཱརམྨཎཔཙྩཡཏཱཡ ཨཱརམྨཎབྷཱུཏེསུ ཙཏཱུསུ དྷམྨེསུ པཏིཊྛཧཏི། ཏཱནི སརཱུཔཏོ དསྶེཏི ‘‘རཱུཔེ ཝེདནཱཡ སཉྙཱཡ སངྑཱརེསཱུ’’ཏི། ནནྡཱུཔསེཙནེནཱཏི ལོབྷསཧགཏསྶ སམྤཡུཏྟཱ ནནྡཱི སཧཛཱཏཀོཊིཡཱ , ཨིཏརསྶ ཨུཔནིསྶཡཀོཊིཡཱ ཨུཔསེཙནནྟི ནནྡཱུཔསེཙནཾ, ཏེན ནནྡཱུཔསེཙནེན། ཀེན པན ཏཾ ནནྡཱུཔསེཙནནྟི ཨཱཧ – ‘‘རཱགསལླེན ནནྡཱུཔསེཙནེན ཝིཉྙཱཎེནཱ’’ཏི།

    Pariyādinnanti aññassa okāsaṃ adatvā samantato gahitaṃ. Catūsu dhammesu saṇṭhahatīti ārammaṇapaccayatāya ārammaṇabhūtesu catūsu dhammesu patiṭṭhahati. Tāni sarūpato dasseti ‘‘rūpe vedanāya saññāya saṅkhāresū’’ti. Nandūpasecanenāti lobhasahagatassa sampayuttā nandī sahajātakoṭiyā , itarassa upanissayakoṭiyā upasecananti nandūpasecanaṃ, tena nandūpasecanena. Kena pana taṃ nandūpasecananti āha – ‘‘rāgasallena nandūpasecanena viññāṇenā’’ti.

    ཏཏྠ རཱགསལླེནཱཏི རཱགསལླེན ཧེཏུབྷཱུཏེན ནནྡཱུཔསེཙནེན ཝིཉྙཱཎེནཱཏི ཨིཏྠམྦྷཱུཏལཀྑཎེ ཀརཎཝཙནཾ། རཱུཔཱུཔགཱ ཝིཉྙཱཎཊྛིཏཱིཏི རཱུཔམེཝ ཨཱརམྨཎཀརཎཝསེན ཨུཔགནྟབྦཏོ, ཝིཉྙཱཎསྶ པཏིཊྛཱབྷཱཝཏོ ཙ རཱུཔཱུཔགཱ ཝིཉྙཱཎཊྛིཏི། ཏིཊྛཏི ཨེཏྠཱཏི ཋིཏི། པཉྩཝོཀཱརབྷཝསྨིཉྷི ཨབྷིསངྑཱརཝིཉྙཱཎཾ རཱུཔཀྑནྡྷཾ ནིསྶཱཡ ཏིཊྛཏི། དོསསལླེནཱཏི སཧཛཱཏེན དོསསལླེན། ཡདཱ ཝེདནཱུཔགཱ ཝིཉྙཱཎཊྛིཏི ཝུཙྩཏི, ཏདཱ ཨུཔནིསྶཡཀོཊིཡཱཝ ནནྡིཡཱ ཨུཔསིཏྟཾ ཝིཉྙཱཎཾ དཊྛབྦཾ། ཝེདནཱཔི དོམནསྶཝེདནཱཝ། ཡདཱ ཙ ཨུཔནིསྶཡཔཙྩཡབྷཱུཏེན དོསསལླེན ཝེདནཱུཔགཱ ཝིཉྙཱཎཊྛིཏི ཝུཙྩཏི, ཏདཱ སཧཛཱཏཀོཊིཡཱ, ཨུཔནིསྶཡཀོཊིཡཱ ཝཱ ནནྡིཡཱ ཨུཔསིཏྟཾ ཝིཉྙཱཎཾ དཊྛབྦཾ། ཝེདནཱ པན ཏིསྶོཔི ཏིསྶནྣཾ ཝེདནཱནཾ ཨཱརམྨཎཱུཔནིསྶཡབྷཱཝཏོ། ཏཏྠ པཋམནཡོ དོམནསྶཱརམྨཎསྶ ཨབྷིསངྑཱརཝིཉྙཱཎསྶ ཝསེན ཝུཏྟོ། དུཏིཡོ སབྦཝེདནཱརམྨཎསྶ ཝསེནཱཔི དཊྛབྦཾ།

    Tattha rāgasallenāti rāgasallena hetubhūtena nandūpasecanena viññāṇenāti itthambhūtalakkhaṇe karaṇavacanaṃ. Rūpūpagā viññāṇaṭṭhitīti rūpameva ārammaṇakaraṇavasena upagantabbato, viññāṇassa patiṭṭhābhāvato ca rūpūpagā viññāṇaṭṭhiti. Tiṭṭhati etthāti ṭhiti. Pañcavokārabhavasmiñhi abhisaṅkhāraviññāṇaṃ rūpakkhandhaṃ nissāya tiṭṭhati. Dosasallenāti sahajātena dosasallena. Yadā vedanūpagā viññāṇaṭṭhiti vuccati, tadā upanissayakoṭiyāva nandiyā upasittaṃ viññāṇaṃ daṭṭhabbaṃ. Vedanāpi domanassavedanāva. Yadā ca upanissayapaccayabhūtena dosasallena vedanūpagā viññāṇaṭṭhiti vuccati, tadā sahajātakoṭiyā, upanissayakoṭiyā vā nandiyā upasittaṃ viññāṇaṃ daṭṭhabbaṃ. Vedanā pana tissopi tissannaṃ vedanānaṃ ārammaṇūpanissayabhāvato. Tattha paṭhamanayo domanassārammaṇassa abhisaṅkhāraviññāṇassa vasena vutto. Dutiyo sabbavedanārammaṇassa vasenāpi daṭṭhabbaṃ.

    མཱནསལླེནཱཏི མཱནསལླེན སཧཛཱཏེན, ཨུཔནིསྶཡབྷཱུཏེན ཝཱ། མོཧསལླེནཱཏི ཨེཏྠཱཔི ཨེསེཝ ནཡོ། ཨེཏྠ ཙ ཨནཱདིམཏིསཾསཱརེ ཨིཏྠིཔུརིསཱ རཱུཔཱབྷིརཱམཱཏི རཱགསལླཝསེན པཋམཱ ཝིཉྙཱཎཊྛིཏི ཡོཛིཏཱ། སབྦཱཡཔི ཝེདནཱཡ དུཀྑཔརིཡཱཡསབྦྷཱཝཏོ དུཀྑཱཡ ཙ དོསོ ཨནུསེཏཱིཏི དོསསལླཝསེན དུཏིཡཱ, སཉྙཱཝསེན ‘‘སེཡྻོཧམསྨཱི’’ཏི མཉྙནཱ ཧོཏཱིཏི མཱནསལླཝསེན ཏཏིཡཱ, སངྑཱརེསུ སམཱུཧགྷནཾ དུབྦིནིབྦྷོགནྟི མོཧསལླཝསེན ཙཏུཏྠཱི ཝིཉྙཱཎཊྛིཏི ཡོཛིཏཱཏི དཊྛབྦཱ།

    Mānasallenāti mānasallena sahajātena, upanissayabhūtena vā. Mohasallenāti etthāpi eseva nayo. Ettha ca anādimatisaṃsāre itthipurisā rūpābhirāmāti rāgasallavasena paṭhamā viññāṇaṭṭhiti yojitā. Sabbāyapi vedanāya dukkhapariyāyasabbhāvato dukkhāya ca doso anusetīti dosasallavasena dutiyā, saññāvasena ‘‘seyyohamasmī’’ti maññanā hotīti mānasallavasena tatiyā, saṅkhāresu samūhaghanaṃ dubbinibbhoganti mohasallavasena catutthī viññāṇaṭṭhiti yojitāti daṭṭhabbā.

    ཨུཔཏྠདྡྷནྟི ཨོལུབྦྷཱརམྨཎབྷཱུཏཱཧི ཝིཉྙཱཎཊྛིཏཱིཧི ཨུཔཏྠམྦྷིཏཾ། ཏཉྩ ཀམྨནྟི ཡཾ ‘‘ཙེཏནཱ ཙེཏསིཀ’’ནྟི པུབྦེ (ནེཏྟི॰ ༨༢) ཝུཏྟཾ། ཨིམེ ཙ ཀིལེསཱཏི ཨིམེ ཙ དསཝཏྠུཀཱ ཀིལེསཱ། སེསཾ སུཝིཉྙེཡྻམེཝ།

    Upatthaddhanti olubbhārammaṇabhūtāhi viññāṇaṭṭhitīhi upatthambhitaṃ. Tañca kammanti yaṃ ‘‘cetanā cetasika’’nti pubbe (netti. 82) vuttaṃ. Ime ca kilesāti ime ca dasavatthukā kilesā. Sesaṃ suviññeyyameva.

    ༨༥. ཨིདཱནི ཨཱཧཱརཱདཡོ ནཡཱནཾ སཾཀིལེསཔཀྑེ དིསཱབྷཱཝེན ཝཝཏྠཔེཏུཾ ‘‘ཨིམཱ ཙཏསྶོ དིསཱ’’ཏིཨཱདི ཨཱརདྡྷཾ, ཏཾ ཨུཏྟཱནམེཝ། པུན ཀབལཱི༹ཀཱརོ ཨཱཧཱརོཏིཨཱདི ཨཱཧཱརཱདཱིསུཡེཝ ཡསྶ པུགྒལསྶ ཨུཔཀྐིལེསཱ, ཏཾ ཝིབྷཛིཏྭཱ དསྶེཏུཾ ཨཱརདྡྷཾ། ཏཏྠ དསནྣཾ སུཏྟཱནནྟི ཨེཀདེསེསུ སམུདཱཡཝོཧཱརེན ཝུཏྟཾ། སམུདཱཡེསུ ཧི པཝཏྟཱ སམཉྙཱ ཨཝཡཝེསུཔི དིསྶཏི , ‘‘ཡཐཱ པཊོ དཌྜྷོ, སམུདྡོ དིཊྛོ’’ཏི ཙ། ཨེཀོ ཨཏྠོཏི ཨེཀསྶ ཨཏྠསྶ ནིཔྥཱདནཏོ ཝུཏྟཾ། བྱཉྫནམེཝ ནཱནནྟི ཨེཏྠ བྱཉྫནགྒཧཎེན བྱཉྫནཏྠོཔི གཧིཏོཏི དཊྛབྦཾ། དསཧིཔི སུཏྟཔདེཧི སཝཏྠུཀཱ ཏཎྷཱ ཝུཏྟཱ། ཏཎྷཱ ཙ རཱགཙརིཏཾ པུགྒལཾ ཁིཔྤཾ དཱུསེཏཱིཏི ཨཱཧ – ‘‘ཨིམེ རཱགཙརིཏསྶ པུགྒལསྶ ཨུཔཀྐིལེསཱ’’ཏི། ཡཐཱ ཙ པཋམདིསཱབྷཱཝེན ཝུཏྟདྷམྨཱ རཱགཙརིཏསྶ ཨུཔཀྐིལེསཱ, ཨེཝཾ དུཏིཡདིསཱབྷཱཝེན ཝུཏྟདྷམྨཱ དོསཙརིཏསྶ། ཏཏིཡཙཏུཏྠདིསཱབྷཱཝེན ཝུཏྟདྷམྨཱ ཡཐཱཀྐམཾ དིཊྛིཙརིཏསྶ མནྡསྶ ཏིཀྑསྶ ཙ ཨུཔཀྐིལེསཱ ཝུཏྟཱ། ཏེསཾ ཨུཔཀྐིལེསབྷཱཝོ ཝུཏྟནཡཱནུསཱརེན ཝེདིཏབྦོ།

    85. Idāni āhārādayo nayānaṃ saṃkilesapakkhe disābhāvena vavatthapetuṃ ‘‘imā catasso disā’’tiādi āraddhaṃ, taṃ uttānameva. Puna kabaḷīkāro āhārotiādi āhārādīsuyeva yassa puggalassa upakkilesā, taṃ vibhajitvā dassetuṃ āraddhaṃ. Tattha dasannaṃ suttānanti ekadesesu samudāyavohārena vuttaṃ. Samudāyesu hi pavattā samaññā avayavesupi dissati , ‘‘yathā paṭo daḍḍho, samuddo diṭṭho’’ti ca. Eko atthoti ekassa atthassa nipphādanato vuttaṃ. Byañjanameva nānanti ettha byañjanaggahaṇena byañjanatthopi gahitoti daṭṭhabbaṃ. Dasahipi suttapadehi savatthukā taṇhā vuttā. Taṇhā ca rāgacaritaṃ puggalaṃ khippaṃ dūsetīti āha – ‘‘ime rāgacaritassa puggalassa upakkilesā’’ti. Yathā ca paṭhamadisābhāvena vuttadhammā rāgacaritassa upakkilesā, evaṃ dutiyadisābhāvena vuttadhammā dosacaritassa. Tatiyacatutthadisābhāvena vuttadhammā yathākkamaṃ diṭṭhicaritassa mandassa tikkhassa ca upakkilesā vuttā. Tesaṃ upakkilesabhāvo vuttanayānusārena veditabbo.

    ཨཱཧཱརཝིཔལླཱསཱདཡོ ཡདིཔི སབྦེཧི ཏཱིཧི ཝིམོཀྑམུཁེཧི པུབྦབྷཱགེ ཡཐཱརཧཾ པརིཉྙེཡྻཱ པཧཱཏབྦཱ ཙ། ཡསྶ པན དུཀྑཱནུཔསྶནཱ པུརིམེ ཨཱཧཱརདྭཡེ དུཀྑཱཀཱརེན བཧུལཾ པཝཏྟཏི, ཏསྶ ཝསེན ཡོ ཙ ཀབལཱི༹ཀཱརོ ཨཱཧཱརོ, ཡོ ཙ ཕསྶོ ཨཱཧཱརོ, ཨིམེ ཨཔྤཎིཧིཏེན ཝིམོཀྑམུཁེན པརིཉྙཾ གཙྪནྟཱིཏི ཝུཏྟཾ། ཨེས ནཡོ སེསེསུ། ཨེཝཉྩེཏཾ, ན ཨཉྙཐཱ། ན ཧི ཨརིཡམགྒཱནཾ ཝིཡ པཧཱཏབྦེསུ ཝིམོཀྑམུཁཱནཾ པརིཉྙེཡྻཔཧཱཏབྦེསུ ཀོཙི ནིཡམོ སམྦྷཝཏི། ཨིཏི སབྦེ ལོཀཝཊྚཱནུསཱརིནོ དྷམྨཱ ནིཡྻནྟི, ཏེ ལོཀཱ ཏཱིཧི ཝིམོཀྑམུཁེཧཱིཏི ནིགམནཾ། ཏསྶཏྠོ – ཨིཏི ཨེཝཾ ཝུཏྟཔྤཀཱརཱ སབྦེ ཨཱཧཱརཱདཡོ ལོཀསངྑཱཏཝཊྚཱནུསཱརིནོ དྷམྨཱ ཏེ ལོཀབྷཱུཏཱ ཝཊྚཏོ ནིཡྻནྟི ཨནིཙྩཱནུཔསྶནཱདཱིཧི ཏཱིཧི ཝིམོཀྑམུཁེཧཱིཏི།

    Āhāravipallāsādayo yadipi sabbehi tīhi vimokkhamukhehi pubbabhāge yathārahaṃ pariññeyyā pahātabbā ca. Yassa pana dukkhānupassanā purime āhāradvaye dukkhākārena bahulaṃ pavattati, tassa vasena yo ca kabaḷīkāro āhāro, yo ca phasso āhāro, ime appaṇihitena vimokkhamukhena pariññaṃ gacchantīti vuttaṃ. Esa nayo sesesu. Evañcetaṃ, na aññathā. Na hi ariyamaggānaṃ viya pahātabbesu vimokkhamukhānaṃ pariññeyyapahātabbesu koci niyamo sambhavati. Iti sabbe lokavaṭṭānusārino dhammā niyyanti, te lokā tīhi vimokkhamukhehīti nigamanaṃ. Tassattho – iti evaṃ vuttappakārā sabbe āhārādayo lokasaṅkhātavaṭṭānusārino dhammā te lokabhūtā vaṭṭato niyyanti aniccānupassanādīhi tīhi vimokkhamukhehīti.

    ༨༦. ཨེཝཾ སཾཀིལེསཔཀྑེ དིསཱབྷཱུཏདྷམྨེ ནིདྡིསིཏྭཱ ཨིདཱནི ཝོདཱནཔཀྑེ དིསཱབྷཱུཏདྷམྨེ དསྶེཏུཾ ‘‘ཙཏསྶོ པཊིཔདཱ’’ཏིཨཱདི ཝུཏྟཾ། ཏཏྠ དིབྦབྲཧྨཨརིཡཨཱནེཉྫཝིཧཱརོཏི ཙཏྟཱརོ ཝིཧཱརཱ། མཱནཔྤཧཱནཨཱལཡསམུགྒྷཱཏཨཝིཛྫཱཔཧཱནབྷཝཱུཔསམཱ ཙཏྟཱརོ ཨཙྪརིཡཱ ཨབྦྷུཏཱ དྷམྨཱ། སཙྩཱདྷིཊྛཱནཱདཱིནི ཙཏྟཱརི ཨདྷིཊྛཱནཱནི། ཚནྡསམཱདྷིབྷཱཝནཱདཡོ ཙཏསྶོ སམཱདྷིབྷཱཝནཱ། ཨིནྡྲིཡསཾཝརོ ཏཔསངྑཱཏོ པུཉྙདྷམྨོ བོཛ྄ཛྷངྒབྷཱཝནཱ སབྦཱུཔདྷིཔཊིནིསྶགྒསངྑཱཏཾ ནིབྦཱནཉྩཱཏི ཙཏྟཱརོ སུཁབྷཱགིཡཱ དྷམྨཱ ཝེདིཏབྦཱཏི།

    86. Evaṃ saṃkilesapakkhe disābhūtadhamme niddisitvā idāni vodānapakkhe disābhūtadhamme dassetuṃ ‘‘catasso paṭipadā’’tiādi vuttaṃ. Tattha dibbabrahmaariyaāneñjavihāroti cattāro vihārā. Mānappahānaālayasamugghātaavijjāpahānabhavūpasamā cattāro acchariyā abbhutā dhammā. Saccādhiṭṭhānādīni cattāri adhiṭṭhānāni. Chandasamādhibhāvanādayo catasso samādhibhāvanā. Indriyasaṃvaro tapasaṅkhāto puññadhammo bojjhaṅgabhāvanā sabbūpadhipaṭinissaggasaṅkhātaṃ nibbānañcāti cattāro sukhabhāgiyā dhammā veditabbāti.

    པཋམཱ པཊིཔདཱཏིཨཱདི པཊིཔདཱསཏིཔཊྛཱནཱདཱིནཾ ཨབྷེདསནྡསྶནཾ། ཡདི ཨེཝཾ ཀསྨཱ ཝིསུཾ གཧཎཾ ཀཏནྟི? དསཝཏྠུཀསྶ ཀིལེསཔུཉྫསྶ པཊིཔཀྑབྷཱཝདསྶནཏྠཾ པཊིཔདཱདིདསཀནིདྡེསོ། ཏཐཱ ཧི ཝཀྑཏི – ‘‘ཙཏྟཱརོ ཨཱཧཱརཱ ཏེསཾ པཊིཔཀྑོ ཙཏསྶོ པཊིཔདཱ’’ཏིཨཱདི (ནེཏྟི॰ ༨༧)། ཀིཉྩཱཔི ཙཏཱུསུ སཏིཔཊྛཱནེསུ ‘‘ཨིདཾ ནཱམ སཏིཔཊྛཱནཾ ཨིམཱཡ ཨེཝ པཊིཔདཱཡ ཨིཛ྄ཛྷཏཱི’’ཏི ནིཡམོ ནཏྠི, ཏཐཱཔི པཋམཱཡ པཊིཔདཱཡ པཋམཾ སཏིཔཊྛཱནཾ སམྦྷཝཏཱིཏི སམྦྷཝཝསེན ཨེཝཾ ཝུཏྟཾ – ‘‘པཋམཱ པཊིཔདཱ, པཋམཾ སཏིཔཊྛཱན’’ནྟི། ཡསྨཱ པན ཨཱཧཱརཝིཔལླཱསཱདཱིནཾ ཝིཡ པཊིཔདཱསཏིཔཊྛཱནཱདཱིནཾ ཨཏྠཏོ ནཱནཏྟཾ ནཏྠི། སཏིཔཊྛཱནཱནིཡེཝ ཧི ཏཐཱ ཏཐཱ པཊིཔཛྫམཱནཱནི དུཀྑཱཔཊིཔདཱདནྡྷཱབྷིཉྙཱདིནཱམཀཱནི ཧོནྟི, ཏསྨཱ ཡཐཱ སཾཀིལེསཔཀྑེ ‘‘པཋམེ ཨཱཧཱརེ པཋམོ ཝིཔལླཱསོ’’ཏིཨཱདིནཱ ཨདྷིཀརཎབྷེདེན ཝུཏྟཾ, ཨེཝཾ ཨདྷིཀརཎབྷེདཾ ཨཀཏྭཱ ‘‘པཋམཱ པཊིཔདཱ, པཋམཾ སཏིཔཊྛཱན’’ནྟིཨཱདི ཝུཏྟཾ། སེསེསུཔི ཨེསེཝ ནཡོ།

    Paṭhamā paṭipadātiādi paṭipadāsatipaṭṭhānādīnaṃ abhedasandassanaṃ. Yadi evaṃ kasmā visuṃ gahaṇaṃ katanti? Dasavatthukassa kilesapuñjassa paṭipakkhabhāvadassanatthaṃ paṭipadādidasakaniddeso. Tathā hi vakkhati – ‘‘cattāro āhārā tesaṃ paṭipakkho catasso paṭipadā’’tiādi (netti. 87). Kiñcāpi catūsu satipaṭṭhānesu ‘‘idaṃ nāma satipaṭṭhānaṃ imāya eva paṭipadāya ijjhatī’’ti niyamo natthi, tathāpi paṭhamāya paṭipadāya paṭhamaṃ satipaṭṭhānaṃ sambhavatīti sambhavavasena evaṃ vuttaṃ – ‘‘paṭhamā paṭipadā, paṭhamaṃ satipaṭṭhāna’’nti. Yasmā pana āhāravipallāsādīnaṃ viya paṭipadāsatipaṭṭhānādīnaṃ atthato nānattaṃ natthi. Satipaṭṭhānāniyeva hi tathā tathā paṭipajjamānāni dukkhāpaṭipadādandhābhiññādināmakāni honti, tasmā yathā saṃkilesapakkhe ‘‘paṭhame āhāre paṭhamo vipallāso’’tiādinā adhikaraṇabhedena vuttaṃ, evaṃ adhikaraṇabhedaṃ akatvā ‘‘paṭhamā paṭipadā, paṭhamaṃ satipaṭṭhāna’’ntiādi vuttaṃ. Sesesupi eseva nayo.

    ཨནྡྷསྶ པབྦཏཱརོཧནཾ ཝིཡ ཀདཱཙིདེཝ ཨུཔྤཛྫནཀཾ ཨཙྪརིཡཾ, ཨཙྪརཱཡོགྒཾ ཨཙྪརིཡནྟི པོརཱཎཱ། ཨབྷཱུཏཔུབྦཾ བྷཱུཏནྟི ཨབྦྷུཏཾ། ཨུབྷཡམྤེཏཾ ཝིམྷཡཱཝཧསྶ ཨདྷིཝཙནཾ། ན ཧི མཱནཔྤཧཱནཱདིཏོ ཨཉྙཾ དུརབྷིསམྦྷཝཏརཾ ཝིམྷནཱིཡཉྩ ཨུཔལབྦྷཏཱིཏི ཨདྷིཏིཊྛཏི ཨེཏེན, ཨེཏྠ ཝཱ ཨདྷིཊྛཱནམཏྟམེཝ ཝཱ ཏནྟི ཨདྷིཊྛཱནཾ། སཙྩཉྩ ཏཾ ཨདྷིཊྛཱནཉྩ, སཙྩསྶ ཝཱ ཨདྷིཊྛཱནཾ, སཙྩཾ ཨདྷིཊྛཱནཾ ཨེཏསྶཱཏི ཝཱ སཙྩཱདྷིཊྛཱནཾ། སེསེསུཔི ཨེསེཝ ནཡོ། སམཱདྷི ཨེཝ བྷཱཝེཏབྦཏཱཡ སམཱདྷིབྷཱཝནཱ། སུཁཾ བྷཛཏཱིཏི སུཁབྷཱགིཡོ, སུཁབྷཱགསྶ ཝཱ སུཁཀོཊྛཱསསྶ ཧིཏོཏི སུཁབྷཱགིཡོ། ཨེཀསྶཔི སཏྟསྶ ཨསུབྷབྷཱཝནཱདཡོ ཝིཡ ཨེཀདེསེ ཨཝཏྟིཏྭཱ ཨནཝསེསཔརིཡཱདཱནཏོ ནཏྠི ཨེཏིསྶཱ པམཱཎནྟི ཨཔྤམཉྙཱ།

    Andhassa pabbatārohanaṃ viya kadācideva uppajjanakaṃ acchariyaṃ, accharāyoggaṃ acchariyanti porāṇā. Abhūtapubbaṃ bhūtanti abbhutaṃ. Ubhayampetaṃ vimhayāvahassa adhivacanaṃ. Na hi mānappahānādito aññaṃ durabhisambhavataraṃ vimhanīyañca upalabbhatīti adhitiṭṭhati etena, ettha vā adhiṭṭhānamattameva vā tanti adhiṭṭhānaṃ. Saccañca taṃ adhiṭṭhānañca, saccassa vā adhiṭṭhānaṃ, saccaṃ adhiṭṭhānaṃ etassāti vā saccādhiṭṭhānaṃ. Sesesupi eseva nayo. Samādhi eva bhāvetabbatāya samādhibhāvanā. Sukhaṃ bhajatīti sukhabhāgiyo, sukhabhāgassa vā sukhakoṭṭhāsassa hitoti sukhabhāgiyo. Ekassapi sattassa asubhabhāvanādayo viya ekadese avattitvā anavasesapariyādānato natthi etissā pamāṇanti appamaññā.

    པཋམཱ པཊིཔདཱ བྷཱཝིཏཱ བཧུལཱིཀཏཱ པཋམཾ སཏིཔཊྛཱནཾ པརིཔཱུརེཏཱིཏི པཋམཱཡ པཊིཔདཱཡ བྷཱཝནཱབཧུལཱིཀཱརོ པཋམསྶ སཏིཔཊྛཱནསྶ བྷཱཝནཱཔཱརིཔཱུརཱིཏི ཨཏྠོ། སེསཔདེསུཔི ཨེསེཝ ནཡོ། ཡཐཱ ཧི ཨརིཡམགྒེ བྷཱཝིཏེ སཏིཔཊྛཱནཱདཡོ བོདྷིཔཀྑིཡདྷམྨཱ སབྦེཔི བྷཱཝིཏཱ ཨེཝ ཧོནྟི, ཨེཝཾསམྤདམིདཾ དཊྛབྦཾ།

    Paṭhamā paṭipadā bhāvitā bahulīkatā paṭhamaṃ satipaṭṭhānaṃ paripūretīti paṭhamāya paṭipadāya bhāvanābahulīkāro paṭhamassa satipaṭṭhānassa bhāvanāpāripūrīti attho. Sesapadesupi eseva nayo. Yathā hi ariyamagge bhāvite satipaṭṭhānādayo bodhipakkhiyadhammā sabbepi bhāvitā eva honti, evaṃsampadamidaṃ daṭṭhabbaṃ.

    ཀཱཡཱནུཔསྶནཱཡ ཀཱམརཱགསྶ ཨུཛུཝིཔཙྩནཱིཀབྷཱཝཏོ ‘‘པཋམོ སཏིཔཊྛཱནོ བྷཱཝིཏོ བཧུལཱིཀཏོ ཀཱམཔཊིཔཀྑཾ པཋམཾ ཛྷཱནཾ པརིཔཱུརེཏཱི’’ཏི ཝུཏྟཾ། ཏཐཱ པཱིཏིཔཊིསཾཝེདནཱདིཝསེན པཝཏྟམཱནཾ དུཏིཡཾ སཏིཔཊྛཱནཾ, སཔྤཱིཏིཀསྶ དུཏིཡཛ྄ཛྷཱནསྶ ཙིཏྟསྶ ཨབྷིཔྤམོདནཝསེན པཝཏྟམཱནཾ ཏཏིཡཾ སཏིཔཊྛཱནཾ ཨུཀྐཾསགཏསུཁསྶ ཏཏིཡཛ྄ཛྷཱནསྶ ཨནིཙྩཝིརཱགཱདིཝསེན པཝཏྟིཡཱ སངྑཱརེསུ ཨུཔེཀྑཀཾ ཙཏུཏྠཾ སཏིཔཊྛཱནཾ ཨུཔེཀྑཱསཏིཔཱརིསུདྡྷིབྷཱཝཏོ ཙཏུཏྠཛ྄ཛྷཱནསྶ པཱརིཔཱུརིཡཱ སཾཝཏྟཏི།

    Kāyānupassanāya kāmarāgassa ujuvipaccanīkabhāvato ‘‘paṭhamo satipaṭṭhāno bhāvito bahulīkato kāmapaṭipakkhaṃ paṭhamaṃ jhānaṃ paripūretī’’ti vuttaṃ. Tathā pītipaṭisaṃvedanādivasena pavattamānaṃ dutiyaṃ satipaṭṭhānaṃ, sappītikassa dutiyajjhānassa cittassa abhippamodanavasena pavattamānaṃ tatiyaṃ satipaṭṭhānaṃ ukkaṃsagatasukhassa tatiyajjhānassa aniccavirāgādivasena pavattiyā saṅkhāresu upekkhakaṃ catutthaṃ satipaṭṭhānaṃ upekkhāsatipārisuddhibhāvato catutthajjhānassa pāripūriyā saṃvattati.

    ཡསྨཱ པན རཱུཔཱཝཙརཔཋམཛ྄ཛྷཱནཾ རཱུཔཱཝཙརསམཱཔཏྟཱིནཾ, དུཏིཡཛ྄ཛྷཱནཾ བྱཱཔཱདཝིཏཀྐཱདིདཱུརཱིབྷཱཝེན བྲཧྨཝིཧཱརཱནཾ, ཏཏིཡཛ྄ཛྷཱནཾ པཱིཏིཝིརཱགེན སུཁེན ཝིཔསྶནཱཡ ཨདྷིཊྛཱནབྷཱུཏཾ ཨརིཡཝིཧཱརཱནཾ, ཙཏུཏྠཛ྄ཛྷཱནཾ ཨུཔེཀྑཱསཏིཔཱརིསུདྡྷིཨཱནེཉྫཔྤཏྟཾ ཨཱནེཉྫཝིཧཱརཱནཾ ཝིསེསཏོ པཙྩཡོ ཧོཏི, ཏསྨཱ ‘‘པཋམཾ ཛྷཱནཾ བྷཱཝིཏཾ བཧུལཱིཀཏཾ པཋམཾ ཝིཧཱརཾ པརིཔཱུརེཏཱི’’ཏིཨཱདི ཝུཏྟཾ། ཨིཏི ཡོ ཡསྶ ཝིསེསཔཙྩཡོ, སོ ཏཾ པརིཔཱུརེཏཱིཏི ཝུཏྟོཏི དཊྛབྦཾ།

    Yasmā pana rūpāvacarapaṭhamajjhānaṃ rūpāvacarasamāpattīnaṃ, dutiyajjhānaṃ byāpādavitakkādidūrībhāvena brahmavihārānaṃ, tatiyajjhānaṃ pītivirāgena sukhena vipassanāya adhiṭṭhānabhūtaṃ ariyavihārānaṃ, catutthajjhānaṃ upekkhāsatipārisuddhiāneñjappattaṃ āneñjavihārānaṃ visesato paccayo hoti, tasmā ‘‘paṭhamaṃ jhānaṃ bhāvitaṃ bahulīkataṃ paṭhamaṃ vihāraṃ paripūretī’’tiādi vuttaṃ. Iti yo yassa visesapaccayo, so taṃ paripūretīti vuttoti daṭṭhabbaṃ.

    ༨༧. ཨིདཱནི པཊིཔདཱདཡོ ཝོདཱནཔཀྑེ དིསཱབྷཱཝེན ཝཝཏྠཔེཏུཾ ‘‘ཏཏྠ ཨིམཱ ཙཏསྶོ དིསཱ’’ཏིཨཱདི ཝུཏྟཾ། ཏཾ སུཝིཉྙེཡྻམེཝ། པུན ‘‘པཋམཱ པཊིཔདཱ’’ཏིཨཱདི པཊིཔདཱཙཏུཀྐཱདཱིསུ ཡེན ཡསྶ པུགྒལསྶ ཝོདཱནཾ, ཏཾ ཝིབྷཛིཏྭཱ དསྶེཏུཾ ཨཱརདྡྷཾ། ཏཾ ཧེཊྛཱ ཝུཏྟནཡམེཝ། ཡདིཔི ཏཱིསུ ཝིམོཀྑམུཁེསུ ‘‘ཨིདཾ ནཱམ ཝིམོཀྑམུཁཾ ཨིམཱཡ ཨེཝ པཊིཔདཱཡ ཨིཛ྄ཛྷཏཱི’’ཏི ནིཡམོ ནཏྠི། ཡེསཾ པན པུགྒལཱནཾ པུརིམཱཧི དྭཱིཧི པཊིཔདཱཧི ཨཔྤཎིཧིཏེན ཝིམོཀྑམུཁེན ཨརིཡམགྒཱདྷིགམོ། ཏཐཱ ཡསྶ ཏཏིཡཱཡ པཊིཔདཱཡ སུཉྙཏཝིམོཀྑམུཁེན, ཡསྶ ཙ ཙཏུཏྠཱཡ པཊིཔདཱཡ ཨནིམིཏྟཝིམོཀྑམུཁེན ཨརིཡམགྒཱདྷིགམོ, ཏེསཾ པུགྒལཱནཾ ཝསེན ཨཡཾ པཊིཔདཱཝིམོཀྑམུཁསཾསནྡནཱ། སཏིཔཊྛཱནཱདཱིཧི ཝིམོཀྑམུཁསཾསནྡནཱཡཔི ཨེསེཝ ནཡོ།

    87. Idāni paṭipadādayo vodānapakkhe disābhāvena vavatthapetuṃ ‘‘tattha imā catasso disā’’tiādi vuttaṃ. Taṃ suviññeyyameva. Puna ‘‘paṭhamā paṭipadā’’tiādi paṭipadācatukkādīsu yena yassa puggalassa vodānaṃ, taṃ vibhajitvā dassetuṃ āraddhaṃ. Taṃ heṭṭhā vuttanayameva. Yadipi tīsu vimokkhamukhesu ‘‘idaṃ nāma vimokkhamukhaṃ imāya eva paṭipadāya ijjhatī’’ti niyamo natthi. Yesaṃ pana puggalānaṃ purimāhi dvīhi paṭipadāhi appaṇihitena vimokkhamukhena ariyamaggādhigamo. Tathā yassa tatiyāya paṭipadāya suññatavimokkhamukhena, yassa ca catutthāya paṭipadāya animittavimokkhamukhena ariyamaggādhigamo, tesaṃ puggalānaṃ vasena ayaṃ paṭipadāvimokkhamukhasaṃsandanā. Satipaṭṭhānādīhi vimokkhamukhasaṃsandanāyapi eseva nayo.

    ཏེསཾ ཝིཀྐཱིལི༹ཏནྟི ཏེསཾ ཨསནྟཱསནཛཝཔརཀྐམཱདིཝིསེསཡོགེན སཱིཧཱནཾ བུདྡྷཱནཾ པཙྩེཀབུདྡྷཱནཾ བུདྡྷསཱཝཀཱནཉྩ ཝིཀྐཱིལི༹ཏཾ ཝིཧརཎཾ། ཡདིདཾ ཨཱཧཱརཱདིཀིལེསཝཏྠུསམཏིཀྐམནམུཁེན སཔརསནྟཱནེ པཊིཔདཱདིསམྤཱདནཱ། ཨིདཱནི ཨཱཧཱརཱདཱིནཾ པཊིཔདཱདཱིཧི ཡེན སམཏིཀྐམནཾ, ཏཾ ནེསཾ པཊིཔཀྑབྷཱཝཾ དསྶེནྟོ ‘‘ཙཏྟཱརོ ཨཱཧཱརཱ ཏེསཾ པཊིཔཀྑོ ཙཏསྶོ པཊིཔདཱ’’ཏིཨཱདིམཱཧ། ཏཏྠ ཏེསཾ པཊིཔཀྑབྷཱཝོ པཧཱཏབྦབྷཱཝོ པཧཱཡཀབྷཱཝོ ཙ ཨཱཧཱརཝིཉྙཱཎཊྛིཏཱིནཉྩེཏྠ པཧཱཏབྦབྷཱཝོ ཏཔྤཊིབནྡྷཚནྡརཱགཝསེན དཊྛབྦོ། ཏཏྠ ‘‘ཝིཀྐཱིལི༹ཏཾ བྷཱཝནཱ སཙྪིཀིརིཡཱ ཙཱ’’ཏིཨཱདི ཏསྶཱཡཾ སངྑེཔཏྠོ – ཏེསཾ ཝིཀྐཱིལི༹ཏནྟི ཨེཏྠ ཡདེཏཾ ཝིཀྐཱིལི༹ཏཾ ནཱམ བྷཱཝེཏབྦཱནཾ བོདྷིཔཀྑིཡདྷམྨཱནཾ བྷཱཝནཱ, སཙྪིཀཱཏབྦཱནཾ ཕལནིབྦཱནཱནཾ སཙྪིཀིརིཡཱ ཙ། ཏཐཱ པཧཱཏབྦསྶ དསཝཏྠུཀསྶ ཀིལེསཔུཉྫསྶ ཏདངྒཱདིཝསེན པཧཱནཾ བྱནྟཱིཀིརིཡཱ ཨནཝསེསནནྟི། ཨིདཱནི ཏཾ སངྑེཔེན དསྶེནྟོ ‘‘ཨིནྡྲིཡཱདྷིཊྛཱནཾ ཝིཀྐཱིལི༹ཏཾ ཝིཔརིཡཱསཱནདྷིཊྛཱན’’ནྟི ཨཱཧ།

    Tesaṃ vikkīḷitanti tesaṃ asantāsanajavaparakkamādivisesayogena sīhānaṃ buddhānaṃ paccekabuddhānaṃ buddhasāvakānañca vikkīḷitaṃ viharaṇaṃ. Yadidaṃ āhārādikilesavatthusamatikkamanamukhena saparasantāne paṭipadādisampādanā. Idāni āhārādīnaṃ paṭipadādīhi yena samatikkamanaṃ, taṃ nesaṃ paṭipakkhabhāvaṃ dassento ‘‘cattāro āhārā tesaṃ paṭipakkho catassopaṭipadā’’tiādimāha. Tattha tesaṃ paṭipakkhabhāvo pahātabbabhāvo pahāyakabhāvo ca āhāraviññāṇaṭṭhitīnañcettha pahātabbabhāvo tappaṭibandhachandarāgavasena daṭṭhabbo. Tattha ‘‘vikkīḷitaṃ bhāvanā sacchikiriyā cā’’tiādi tassāyaṃ saṅkhepattho – tesaṃ vikkīḷitanti ettha yadetaṃ vikkīḷitaṃ nāma bhāvetabbānaṃ bodhipakkhiyadhammānaṃ bhāvanā, sacchikātabbānaṃ phalanibbānānaṃ sacchikiriyā ca. Tathā pahātabbassa dasavatthukassa kilesapuñjassa tadaṅgādivasena pahānaṃ byantīkiriyā anavasesananti. Idāni taṃ saṅkhepena dassento ‘‘indriyādhiṭṭhānaṃ vikkīḷitaṃ vipariyāsānadhiṭṭhāna’’nti āha.

    ཨིནྡྲིཡཱདྷིཊྛཱནནྟི ཨིནྡྲིཡཱནཾ པཝཏྟནཾ བྷཱཝནཱ སཙྪིཀིརིཡཱ ཙ། ཝིཔརིཡཱསཱནདྷིཊྛཱནནྟི ཝིཔལླཱསཱནཾ ཨཔཝཏྟནཾ པཧཱནཾ ཨནུཔྤཱདནཾ། ཨིནྡྲིཡཱནི སདྡྷམྨགོཙརོཏི ཨིནྡྲིཡཱནི ཙེཏྠ སདྡྷམྨསྶ གོཙརབྷཱུཏཱནི པཝཏྟིཧེཏཱུཏི ཨདྷིཔྤེཏཱནི སདྡྷིནྡྲིཡཱདཱིནཱིཏི ཨཏྠོ། ཝིཔརིཡཱསཱ ཀིལེསགོཙརོཏི ཝིཔལླཱསཱ སཾཀིལེསཔཀྑསྶ པཝཏྟིཊྛཱནཾ པཝཏྟིཧེཏཱུཏི། ཨཡཾ ཝུཙྩཏི སཱིཧཝིཀྐཱིལི༹ཏསྶ ནཡསྶ བྷཱུམཱིཏི ཡཱཡཾ ‘‘ཙཏྟཱརོ ཨཱཧཱརཱ’’ཏིཨཱདིནཱ སཾཀིལེསཔཀྑེ དསནྣཾ ཙཏུཀྐཱནཾ, ‘‘ཙཏསྶོ པཊིཔདཱ’’ཏིཨཱདིནཱ ཝོདཱནཔཀྑེཔི དསནྣཾ ཙཏུཀྐཱནཾ ཏཎྷཱཙརིཏཱདཱིནཾ ཨུཔཀྐིལེསཝོདཱནཝིབྷཱཝནཱམུཁེན ནིདྡྷཱརཎཱ, ཨཡཾ སཱིཧཝིཀྐཱིལི༹ཏསྶ ནཡསྶ བྷཱུམི ནཱམ།

    Indriyādhiṭṭhānanti indriyānaṃ pavattanaṃ bhāvanā sacchikiriyā ca. Vipariyāsānadhiṭṭhānanti vipallāsānaṃ apavattanaṃ pahānaṃ anuppādanaṃ. Indriyāni saddhammagocaroti indriyāni cettha saddhammassa gocarabhūtāni pavattihetūti adhippetāni saddhindriyādīnīti attho. Vipariyāsā kilesagocaroti vipallāsā saṃkilesapakkhassa pavattiṭṭhānaṃ pavattihetūti. Ayaṃ vuccati sīhavikkīḷitassa nayassa bhūmīti yāyaṃ ‘‘cattāro āhārā’’tiādinā saṃkilesapakkhe dasannaṃ catukkānaṃ, ‘‘catasso paṭipadā’’tiādinā vodānapakkhepi dasannaṃ catukkānaṃ taṇhācaritādīnaṃ upakkilesavodānavibhāvanāmukhena niddhāraṇā, ayaṃ sīhavikkīḷitassa nayassa bhūmi nāma.

    ༨༨. ཨིདཱནི ཨུགྒྷཊིཏཉྙུཨཱདིཔུགྒལཏྟཡཝསེན ཏིཔུཀྑལནཡསྶ བྷཱུམིཾ ཝིབྷཱཝེཏུཀཱམོ ཡསྨཱ པན ནཡཱནཾ ཨཉྙམཉྙཱནུཔྤཝེསསྶ ཨིཙྪིཏཏྟཱ སཱིཧཝིཀྐཱིལི༹ཏནཡཏོ ཏིཔུཀྑལནཡོ ནིགྒཙྪཏི, ཏསྨཱ པཊིཔདཱཝིབྷཱགཏོ ཙཏྟཱརོ པུགྒལེ སཱིཧཝིཀྐཱིལི༹ཏནཡསྶ བྷཱུམིཾ ནིདྡིསིཏྭཱ ཏཏོ ཨེཝ ཨུགྒྷཊིཏཉྙུཨཱདིཔུགྒལཏྟཡེ ནིདྡྷཱརེཏུཾ ‘‘ཏཏྠ ཡེ དུཀྑཱཡ པཊིཔདཱཡཱ’’ཏིཨཱདི ཨཱརདྡྷཾ། ཏཏྠ ཨིམེ དྭེ པུགྒལཱཏི ཨིམེ པུརིམཱནཾ དྭིནྣཾ པཊིཔདཱནཾ ཝསེན དྭེ པུགྒལཱ། ཨེས ནཡོ ཨིཏརཏྠཱཔི། པུན ‘‘ཏཏྠ ཡེ དུཀྑཱཡ པཊིཔདཱཡཱ’’ཏིཨཱདི ཡཐཱཝུཏྟཔུགྒལཙཏུཀྐཏོ ཨུགྒྷཊིཏཉྙུཨཱདིཔུགྒལཏྟཡཾ ནིདྡྷཱརེཏུཾ ཝུཏྟཾ། ཏཏྠ ཡོ སཱདྷཱརཎཱཡཱཏི དུཀྑཱཔཊིཔདཱཡ ཁིཔྤཱབྷིཉྙཱཡ, སུཁཱཔཊིཔདཱཡ དནྡྷཱབྷིཉྙཱཡ ཙ ནིཡྻཱཏཱིཏི སམྦནྡྷོ། ཀཐཾ པན པཊིཔདཱདྭཡཾ ཨེཀསྶ སམྦྷཝཏཱིཏི? ནཡིདམེཝཾ དཊྛབྦཾ། ཨེཀསྶ པུགྒལསྶ ཨེཀསྨིཾ དྭེ པཊིཔདཱ སམྦྷཝནྟཱིཏི། ཡཐཱཝུཏྟཱསུ པན དྭཱིསུ པཊིཔདཱསུ ཡོ ཡཱཡ ཀཱཡཙི ནིཡྻཱཏི, ཨཡཾ ཝིཔཉྩིཏཉྙཱུཏི ཨཡམེཏྠ ཨདྷིཔྤཱཡོ། ཡསྨཱ པན ཨཊྛསཱལིནིཡཾ (དྷ॰ ས॰ ཨཊྛ॰ ༣༥༠) པཊིཔདཱ ཙལཏི ན ཙལཏཱིཏི ཝིཙཱརཎཱཡཾ ‘‘ཙལཏཱི’’ཏི ཝུཏྟཾ, ཏསྨཱ ཨེཀསྶཔི པུགྒལསྶ ཛྷཱནནྟརམགྒནྟརེསུ པཊིཔདཱབྷེདོ ཨིཙྪིཏོཝཱཏི།

    88. Idāni ugghaṭitaññuādipuggalattayavasena tipukkhalanayassa bhūmiṃ vibhāvetukāmo yasmā pana nayānaṃ aññamaññānuppavesassa icchitattā sīhavikkīḷitanayato tipukkhalanayo niggacchati, tasmā paṭipadāvibhāgato cattāro puggale sīhavikkīḷitanayassa bhūmiṃ niddisitvā tato eva ugghaṭitaññuādipuggalattaye niddhāretuṃ ‘‘tattha ye dukkhāya paṭipadāyā’’tiādi āraddhaṃ. Tattha ime dve puggalāti ime purimānaṃ dvinnaṃ paṭipadānaṃ vasena dve puggalā. Esa nayo itaratthāpi. Puna ‘‘tattha ye dukkhāya paṭipadāyā’’tiādi yathāvuttapuggalacatukkato ugghaṭitaññuādipuggalattayaṃ niddhāretuṃ vuttaṃ. Tattha yo sādhāraṇāyāti dukkhāpaṭipadāya khippābhiññāya, sukhāpaṭipadāya dandhābhiññāya ca niyyātīti sambandho. Kathaṃ pana paṭipadādvayaṃ ekassa sambhavatīti? Nayidamevaṃ daṭṭhabbaṃ. Ekassa puggalassa ekasmiṃ dve paṭipadā sambhavantīti. Yathāvuttāsu pana dvīsu paṭipadāsu yo yāya kāyaci niyyāti, ayaṃ vipañcitaññūti ayamettha adhippāyo. Yasmā pana aṭṭhasāliniyaṃ (dha. sa. aṭṭha. 350) paṭipadā calati na calatīti vicāraṇāyaṃ ‘‘calatī’’ti vuttaṃ, tasmā ekassapi puggalassa jhānantaramaggantaresu paṭipadābhedo icchitovāti.

    ‘‘ཏཏྠ བྷགཝཱ’’ཏིཨཱདིནཱ དེསནཱཝིབྷཱགེཧིཔི ཏམེཝ པུགྒལཝིབྷཱགཾ ཝིབྷཱཝེཏི། ཏཾ ཧེཊྛཱ ཝུཏྟནཡམེཝ། ཏཏྠ ཨདྷིཙིཏྟནྟི ཨདྷིཙིཏྟསིཀྑཉྩཱཏི ཙ-སདྡོ ལུཏྟནིདྡིཊྛོ། ཏེན ཨདྷིཙིཏྟསིཀྑཉྩ ཨདྷིཔཉྙཱསིཀྑཉྩ ཝིཔཉྩིཏཉྙུསྶ པཉྙཔེཏཱིཏི ཨཏྠོ། ཨདྷིསཱིལནྟི ཨེཏྠཱཔི ཨེསེཝ ནཡོ། ཨདྷིསཱིལསིཀྑཾ ཨདྷིཙིཏྟསིཀྑཾ ཨདྷིཔཉྙཱསིཀྑཉྩཱཏི ཡོཛེཏབྦཾ།

    ‘‘Tattha bhagavā’’tiādinā desanāvibhāgehipi tameva puggalavibhāgaṃ vibhāveti. Taṃ heṭṭhā vuttanayameva. Tattha adhicittanti adhicittasikkhañcāti ca-saddo luttaniddiṭṭho. Tena adhicittasikkhañca adhipaññāsikkhañca vipañcitaññussa paññapetīti attho. Adhisīlanti etthāpi eseva nayo. Adhisīlasikkhaṃ adhicittasikkhaṃ adhipaññāsikkhañcāti yojetabbaṃ.

    ཙཏྟཱརི ཧུཏྭཱ ཏཱིཎི བྷཝནྟཱིཏི ལིངྒཝིཔལླཱསེན ཝུཏྟཾ, ཙཏྟཱརོ པུགྒལཱ ཧུཏྭཱ ཏཡོ པུགྒལཱ ཧོནྟཱིཏི ཨཏྠོ།

    Cattāri hutvā tīṇi bhavantīti liṅgavipallāsena vuttaṃ, cattāro puggalā hutvā tayo puggalā hontīti attho.

    ཨཡཾ སཾཀིལེསོཏི ཨཡཾ ཨཀུསལམཱུལཱདིདྭཱདསཏྟིཀསངྒཧོ སཾཀིལིསྶཏི ཨེཏེནཱཏི སཾཀིལེསོཏི ཀཏྭཱ། ཨིདཾ ཝོདཱནནྟི ཨེཏྠཱཔི ཨེསེཝ ནཡོ།

    Ayaṃsaṃkilesoti ayaṃ akusalamūlādidvādasattikasaṅgaho saṃkilissati etenāti saṃkilesoti katvā. Idaṃ vodānanti etthāpi eseva nayo.

    ཏཱིཎི ཧུཏྭཱ དྭེ བྷཝནྟཱིཏི ནནྡིཡཱཝཊྚནཡསྶ དིསཱབྷཱུཏདྷམྨདསྶནཏྠཾ ཝུཏྟཾ། ཏེནེཝཱཧ – ‘‘ཏཎྷཱ ཙ ཨཝིཛྫཱ ཙཱ’’ཏིཨཱདི, ཏཾ སབྦཾ སུཝིཉྙེཡྻམེཝ།

    Tīṇi hutvā dve bhavantīti nandiyāvaṭṭanayassa disābhūtadhammadassanatthaṃ vuttaṃ. Tenevāha – ‘‘taṇhā ca avijjā cā’’tiādi, taṃ sabbaṃ suviññeyyameva.

    ཀསྨཱ པནེཏྠ ནཡཱནཾ ཨུདྡེསཱནུཀྐམེན ནིདྡེསོ ན ཀཏོཏི? ནཡཱནཾ ནཡེཧི སམྦྷཝདསྶནཏྠཾ། པཋམནཡཏོ ཧི པུགྒལཱདྷིཊྛཱནཝསེན ཏཏིཡནཡསྶ, ཏཏིཡནཡཏོ ཙ དུཏིཡནཡསྶ སམྦྷཝོཏི ཨིམསྶ ཝིསེསསྶ དསྶནཏྠཾ པཋམནཡཱནནྟརཾ ཏཏིཡནཡོ, ཏཏིཡནཡཱནནྟརཉྩ དུཏིཡནཡོ ནིདྡིཊྛོ། དྷམྨཱདྷིཊྛཱནཝསེན པན ཏཏིཡནཡཏོ དུཏིཡནཡོ, དུཏིཡནཡཏོ པཋམནཡོཔི སམྦྷཝཏཱིཏི ཨིམསྶ ཝིསེསསྶ དསྶནཏྠཾ ཨནྟེ ‘‘ཏཎྷཱ ཙ ཨཝིཛྫཱ ཙཱ’’ཏིཨཱདིནཱ པཋམནཡསྶ བྷཱུམི དསྶིཏཱ། ཏེནེཝ ཧི ‘‘ཙཏྟཱརི ཧུཏྭཱ ཏཱིཎི བྷཝནྟི, ཏཱིཎི ཧུཏྭཱ དྭེ བྷཝནྟཱི’’ཏི ཝུཏྟཾ། ཡདི ཨེཝཾ ‘‘དྭེ ཧུཏྭཱ ཙཏྟཱརི བྷཝནྟི, དྭེ ཧུཏྭཱ ཏཱིཎི བྷཝནྟི, ཏཱིཎི ཧུཏྭཱ ཙཏྟཱརི བྷཝནྟཱི’’ཏི ཨཡམྤི ནཡོ ཝཏྟབྦོ སིཡཱཏི? སཙྩམེཏཾ, ཨཡཾ པན ནཡོ ཨཏྠཏོ དསྶིཏོ ཨེཝཱཏི ཀཏྭཱ ན ཝུཏྟོ། ཡསྨཱ ཏིཎྞཾ ཨཏྠནཡཱནཾ ཨཉྙམཉྙཾ ཨནུཔྤཝེསོ ཨིཙྪིཏོ, སཏི ཙ ཨནུཔྤཝེསེ ཏཏོ ཝིནིགྒམོཔི སམྦྷཝཏི ཨེཝཱཏི། ཨཡཉྩ ཨཏྠོ པེཊཀོཔདེསེན ཝིབྷཱཝེཏབྦོ།

    Kasmā panettha nayānaṃ uddesānukkamena niddeso na katoti? Nayānaṃ nayehi sambhavadassanatthaṃ. Paṭhamanayato hi puggalādhiṭṭhānavasena tatiyanayassa, tatiyanayato ca dutiyanayassa sambhavoti imassa visesassa dassanatthaṃ paṭhamanayānantaraṃ tatiyanayo, tatiyanayānantarañca dutiyanayo niddiṭṭho. Dhammādhiṭṭhānavasena pana tatiyanayato dutiyanayo, dutiyanayato paṭhamanayopi sambhavatīti imassa visesassa dassanatthaṃ ante ‘‘taṇhā ca avijjā cā’’tiādinā paṭhamanayassa bhūmi dassitā. Teneva hi ‘‘cattāri hutvā tīṇi bhavanti, tīṇi hutvā dve bhavantī’’ti vuttaṃ. Yadi evaṃ ‘‘dve hutvā cattāri bhavanti, dve hutvā tīṇi bhavanti, tīṇi hutvā cattāri bhavantī’’ti ayampi nayo vattabbo siyāti? Saccametaṃ, ayaṃ pana nayo atthato dassito evāti katvā na vutto. Yasmā tiṇṇaṃ atthanayānaṃ aññamaññaṃ anuppaveso icchito, sati ca anuppavese tato viniggamopi sambhavati evāti. Ayañca attho peṭakopadesena vibhāvetabbo.

    ཏཏྠཱཡཾ ཨཱདིཏོ པཊྛཱཡ ཝིབྷཱཝནཱ – ཙཏྟཱརོ པུགྒལཱ ཏཎྷཱཙརིཏོ དུཝིདྷོ མུདིནྡྲིཡོ ཏིཀྑིནྡྲིཡོ ཙ། ཏཐཱ དིཊྛིཙརིཏོཏི། ཏཏྠ ཏཎྷཱཙརིཏོ མུདིནྡྲིཡོ དུཀྑཱཡ པཊིཔདཱཡ དནྡྷཱབྷིཉྙཱཡ ནིཡྻཱཏི, ཏིཀྑིནྡྲིཡོ དུཀྑཱཡ པཊིཔདཱཡ ཁིཔྤཱབྷིཉྙཱཡ ནིཡྻཱཏི, དིཊྛིཙརིཏོ པན མུདིནྡྲིཡོ སུཁཱཡ པཊིཔདཱཡ དནྡྷཱབྷིཉྙཱཡ ནིཡྻཱཏི, ཏིཀྑིནྡྲིཡོ སུཁཱཡ པཊིཔདཱཡ ཁིཔྤཱབྷིཉྙཱཡ ནིཡྻཱཏི། ཨིཏི ཨིམཱསུ པཊིཔདཱསུ ཡཐཱརཧཾ ཋིཏེཧི ཏཎྷཱཙརིཏདིཊྛིཙརིཏེཧི ཙཏྟཱརོ ཨཱཧཱརཱ ཏཔྤཊིབནྡྷཚནྡརཱགཔྤཧཱནེན པཧཱཏབྦཱ། ཙཏྟཱརོ སཏིཔཊྛཱནེ བྷཱཝེཏྭཱ ཙཏྟཱརོ ཝིཔལླཱསཱ དཊྛབྦཱཏི སབྦོ ཡཐཱཝུཏྟནཡོ ཨནུགནྟབྦོ།

    Tatthāyaṃ ādito paṭṭhāya vibhāvanā – cattāro puggalā taṇhācarito duvidho mudindriyo tikkhindriyo ca. Tathā diṭṭhicaritoti. Tattha taṇhācarito mudindriyo dukkhāya paṭipadāya dandhābhiññāya niyyāti, tikkhindriyo dukkhāya paṭipadāya khippābhiññāya niyyāti, diṭṭhicarito pana mudindriyo sukhāya paṭipadāya dandhābhiññāya niyyāti, tikkhindriyo sukhāya paṭipadāya khippābhiññāya niyyāti. Iti imāsu paṭipadāsu yathārahaṃ ṭhitehi taṇhācaritadiṭṭhicaritehi cattāro āhārā tappaṭibandhachandarāgappahānena pahātabbā. Cattāro satipaṭṭhāne bhāvetvā cattāro vipallāsā daṭṭhabbāti sabbo yathāvuttanayo anugantabbo.

    ཏཏྠཱཡཾ པཱལི༹ – ཏཏྠ ཡེ དིཊྛིཙརིཏཱ སཏྟཱ, ཏེ ཀཱམེསུ དོསདིཊྛཱི, ན ཙ ཡེ ཀཱམེསུ ཨནུསཡཱ སམཱུཧཏཱ, ཏེ ཨཏྟཀིལམཐཱནུཡོགམནུཡུཏྟཱ ཝིཧརནྟི། ཏེསཾ སཏྠཱ ཝཱ དྷམྨཾ དེསེཏི ཨཉྙཏརོ ཝཱ གརུཊྛཱནིཡོ སབྲཧྨཙཱརཱི ‘‘ཀཱམེཧི ནཏྠི ཨཏྠོ’’ཏི, ཏེ ཙ པུབྦེཡེཝ ཀཱམེཧི ཨནཏྠིཀཱ , ཨིཏི ཀཱམེ ཨཔྤཀསིརེན པཊིནིསྶཛྫནྟི, ཏེ ཙེཏསིཀེན དུཀྑེན ཨནཛ྄ཛྷོསིཏཱ། ཏེན ཝུཙྩཏི ‘‘སུཁཱ པཊིཔདཱ’’ཏི། ཡེ པན ཏཎྷཱཙརིཏཱ སཏྟཱ, ཏེ ཀཱམེསུ ཨཛ྄ཛྷོསིཏཱ, ཏེསཾ སཏྠཱ ཝཱ དྷམྨཾ དེསེཏི ཨཉྙཏརོ ཝཱ བྷིཀྑུ ‘‘ཀཱམེཧི ནཏྠི ཨཏྠོ’’ཏི, ཏེ པིཡརཱུཔཾ དུཀྑེན པཊིནིསྶཛྫནྟི། ཏེན ཝུཙྩཏི ‘‘དུཀྑཱ པཊིཔདཱ’’ཏི། ཨིཏི ཨིམེ སབྦེ སཏྟཱ དྭཱིསུ པཊིཔདཱསུ སམོསརཎཾ གཙྪནྟི དུཀྑཱཡཉྩ སུཁཱཡཉྩ།

    Tatthāyaṃ pāḷi – tattha ye diṭṭhicaritā sattā, te kāmesu dosadiṭṭhī, na ca ye kāmesu anusayā samūhatā, te attakilamathānuyogamanuyuttā viharanti. Tesaṃ satthā vā dhammaṃ deseti aññataro vā garuṭṭhāniyo sabrahmacārī ‘‘kāmehi natthi attho’’ti, te ca pubbeyeva kāmehi anatthikā , iti kāme appakasirena paṭinissajjanti, te cetasikena dukkhena anajjhositā. Tena vuccati ‘‘sukhā paṭipadā’’ti. Ye pana taṇhācaritā sattā, te kāmesu ajjhositā, tesaṃ satthā vā dhammaṃ deseti aññataro vā bhikkhu ‘‘kāmehi natthi attho’’ti, te piyarūpaṃ dukkhena paṭinissajjanti. Tena vuccati ‘‘dukkhā paṭipadā’’ti. Iti ime sabbe sattā dvīsu paṭipadāsu samosaraṇaṃ gacchanti dukkhāyañca sukhāyañca.

    ཏཏྠ ཡེ དིཊྛིཙརིཏཱ སཏྟཱ, ཏེ དྭིདྷཱ ཏིཀྑིནྡྲིཡཱ ཙ མུདིནྡྲིཡཱ ཙ། ཏཏྠ ཡེ དིཊྛིཙརིཏཱ སཏྟཱ ཏིཀྑིནྡྲིཡཱ, ཏེ སུཁེན པཊིནིསྶཛྫནྟི, ཁིཔྤཉྩ ཨབྷིསམེནྟི། ཏེན ཝུཙྩཏི – ‘‘སུཁཱ པཊིཔདཱ ཁིཔྤཱབྷིཉྙཱ’’ཏི། ཏཏྠ ཡེ དིཊྛིཙརིཏཱ སཏྟཱ མུདིནྡྲིཡཱ པཋམཾ ཏིཀྑིནྡྲིཡཾ ཨུཔཱདཱཡ དནྡྷཏརཾ ཨབྷིསམེནྟི, ཏེ སུཁེན པཊིནིསྶཛྫནྟི, དནྡྷཉྩ ཨབྷིསམེནྟི། ཏེན ཝུཙྩཏི – ‘‘སུཁཱ པཊིཔདཱ དནྡྷཱབྷིཉྙཱ’’ཏི། ཏཏྠ ཏཎྷཱཙརིཏཱ སཏྟཱ དུཝིདྷཱ ཏིཀྑིནྡྲིཡཱ ཙ མུདིནྡྲིཡཱ ཙ། ཏཏྠ ཡེ ཏཎྷཱཙརིཏཱ སཏྟཱ ཏིཀྑིནྡྲིཡཱ, ཏེ དུཀྑེན པཊིནིསྶཛྫནྟི, ཁིཔྤཉྩ ཨབྷིསམེནྟི། ཏེན ཝུཙྩཏི – ‘‘དུཀྑཱ པཊིཔདཱ ཁིཔྤཱབྷིཉྙཱ’’ཏི། ཏཏྠ ཡེ ཏཎྷཱཙརིཏཱ སཏྟཱ མུདིནྡྲིཡཱ པཋམཾ ཏིཀྑིནྡྲིཡཾ ཨུཔཱདཱཡ དནྡྷཏརཾ ཨབྷིསམེནྟི, ཏེ དུཀྑེན པཊིནིསྶཛྫནྟི, དནྡྷཉྩ ཨབྷིསམེནྟི། ཏེན ཝུཙྩཏི – ‘‘དུཀྑཱ པཊིཔདཱ དནྡྷཱབྷིཉྙཱ’’ཏི། ཨིམཱ ཙཏསྶོ པཊིཔདཱཡོ ཨཔཉྩམཱ ཨཚཊྛཱ། ཡེ ཧི ཀེཙི ནིབྦུཏཱ ནིབྦཱཡནྟི ནིབྦཱཡིསྶནྟི ཝཱ ཨིམཱཧི ཙཏཱུཧི པཊིཔདཱཧི ཨནཉྙཱཧི, ཨཡཾ པཊིཔདཱ ཙཏུཀྐམགྒེན ཀིལེསེ ནིདྡིསཏི། ཡཱ ཙཏུཀྐམགྒེན ཨརིཡདྷམྨེསུ ནིདྡིསིཏབྦཱ, ཨཡཾ ཝུཙྩཏི སཱིཧཝིཀྐཱིལི༹ཏོ ནཱམ ནཡོ།

    Tattha ye diṭṭhicaritā sattā, te dvidhā tikkhindriyā ca mudindriyā ca. Tattha ye diṭṭhicaritā sattā tikkhindriyā, te sukhena paṭinissajjanti, khippañca abhisamenti. Tena vuccati – ‘‘sukhā paṭipadā khippābhiññā’’ti. Tattha ye diṭṭhicaritā sattā mudindriyā paṭhamaṃ tikkhindriyaṃ upādāya dandhataraṃ abhisamenti, te sukhena paṭinissajjanti, dandhañca abhisamenti. Tena vuccati – ‘‘sukhā paṭipadā dandhābhiññā’’ti. Tattha taṇhācaritā sattā duvidhā tikkhindriyā ca mudindriyā ca. Tattha ye taṇhācaritā sattā tikkhindriyā, te dukkhena paṭinissajjanti, khippañca abhisamenti. Tena vuccati – ‘‘dukkhā paṭipadā khippābhiññā’’ti. Tattha ye taṇhācaritā sattā mudindriyā paṭhamaṃ tikkhindriyaṃ upādāya dandhataraṃ abhisamenti, te dukkhena paṭinissajjanti, dandhañca abhisamenti. Tena vuccati – ‘‘dukkhā paṭipadā dandhābhiññā’’ti. Imā catasso paṭipadāyo apañcamā achaṭṭhā. Ye hi keci nibbutā nibbāyanti nibbāyissanti vā imāhi catūhi paṭipadāhi anaññāhi, ayaṃ paṭipadā catukkamaggena kilese niddisati. Yā catukkamaggena ariyadhammesu niddisitabbā, ayaṃ vuccati sīhavikkīḷito nāma nayo.

    ཏཏྲིམེ ཙཏྟཱརོ ཨཱཧཱརཱ, ཙཏྟཱརོ ཝིཔལླཱསཱ ཨུཔཱདཱནཱ ཡོགཱ གནྠཱ ཨཱསཝཱ ཨོགྷཱ སལླཱ ཝིཉྙཱཎཊྛིཏིཡོ ཨགཏིགམནཱནཱིཏི ཨེཝཾ ཨིམཱནི སབྦཱནི དས པདཱནི། ཨཡཾ སུཏྟསྶ སཾསནྡནཱ།

    Tatrime cattāro āhārā, cattāro vipallāsā upādānā yogā ganthā āsavā oghā sallā viññāṇaṭṭhitiyo agatigamanānīti evaṃ imāni sabbāni dasa padāni. Ayaṃ suttassa saṃsandanā.

    ཙཏྟཱརོ ཨཱཧཱརཱ, ཏཏྠ ཡོ ཙ ཀབལཱི༹ཀཱརོ ཨཱཧཱརོ, ཡོ ཙ ཕསྶོ ཨཱཧཱརོ, ཨིམེ ཏཎྷཱཙརིཏེན པཧཱཏབྦཱ། ཏཏྠ ཡོ ཙ མནོསཉྩེཏནཱཧཱརོ, ཡོ ཙ ཝིཉྙཱཎཱཧཱརོ, ཨིམེ དིཊྛིཙརིཏེན པཧཱཏབྦཱ།

    Cattāro āhārā, tattha yo ca kabaḷīkāro āhāro, yo ca phasso āhāro, ime taṇhācaritena pahātabbā. Tattha yo ca manosañcetanāhāro, yo ca viññāṇāhāro, ime diṭṭhicaritena pahātabbā.

    ཏཏྠ པཋམོ ཨཱཧཱརོ པཋམོ ཝིཔལླཱསོ, དུཏིཡོ ཨཱཧཱརོ དུཏིཡོ ཝིཔལླཱསོ, ཏཏིཡོ ཨཱཧཱརོ ཏཏིཡོ ཝིཔལླཱསོ, ཙཏུཏྠོ ཨཱཧཱརོ ཙཏུཏྠོ ཝིཔལླཱསོ, ཨིམེ ཙཏྟཱརོ ཝིཔལླཱསཱ ཨཔཉྩམཱ ཨཚཊྛཱ། ཨིདཉྩ པམཱཎཱ ཙཏྟཱརོ ཨཱཧཱརཱ།

    Tattha paṭhamo āhāro paṭhamo vipallāso, dutiyo āhāro dutiyo vipallāso, tatiyo āhāro tatiyo vipallāso, catuttho āhāro catuttho vipallāso, ime cattāro vipallāsā apañcamā achaṭṭhā. Idañca pamāṇā cattāro āhārā.

    ཏཏྠ པཋམེ ཝིཔལླཱསེ ཋིཏོ ཀཱམེ ཨུཔཱདིཡཏི, ཨིདཾ ཀཱམུཔཱདཱནཾ། དུཏིཡེ ཝིཔལླཱསེ ཋིཏོ ཨནཱགཏཾ བྷཝཾ ཨུཔཱདིཡཏི, ཨིདཾ སཱིལབྦཏུཔཱདཱནཾ། ཏཏིཡེ ཝིཔལླཱསེ ཋིཏོ ཝིཔརཱིཏདིཊྛིཾ ཨུཔཱདིཡཏི, ཨིདཾ དིཊྛུཔཱདཱནཾ། ཙཏུཏྠེ ཝིཔལླཱསེ ཋིཏོ ཁནྡྷེ ཨཏྟཏོ ཨུཔཱདིཡཏི, ཨིདཾ ཨཏྟཝཱདུཔཱདཱནཾ།

    Tattha paṭhame vipallāse ṭhito kāme upādiyati, idaṃ kāmupādānaṃ. Dutiye vipallāse ṭhito anāgataṃ bhavaṃ upādiyati, idaṃ sīlabbatupādānaṃ. Tatiye vipallāse ṭhito viparītadiṭṭhiṃ upādiyati, idaṃ diṭṭhupādānaṃ. Catutthe vipallāse ṭhito khandhe attato upādiyati, idaṃ attavādupādānaṃ.

    ཏཏྠ ཀཱམུཔཱདཱནེ ཋིཏོ ཀཱམེ ཨབྷིཛ྄ཛྷཱཡ གནྠཏི, ཨཡཾ ཨབྷིཛ྄ཛྷཱཀཱཡགནྠོ། སཱིལབྦཏུཔཱདཱནེ ཋིཏོ བྱཱཔཱདཾ གནྠཏི, ཨཡཾ བྱཱཔཱདཀཱཡགནྠོ། དིཊྛུཔཱདཱནེ ཋིཏོ པརཱམཱསཾ གནྠཏི, ཨཡཾ པརཱམཱསཀཱཡགནྠོ། ཨཏྟཝཱདུཔཱདཱནེ ཋིཏོ པཔཉྩེནྟོ གནྠཏི, ཨཡཾ ཨིདཾསཙྩཱབྷིནིཝེསཀཱཡགནྠོ།

    Tattha kāmupādāne ṭhito kāme abhijjhāya ganthati, ayaṃ abhijjhākāyagantho. Sīlabbatupādāne ṭhito byāpādaṃ ganthati, ayaṃ byāpādakāyagantho. Diṭṭhupādāne ṭhito parāmāsaṃ ganthati, ayaṃ parāmāsakāyagantho. Attavādupādāne ṭhito papañcento ganthati, ayaṃ idaṃsaccābhinivesakāyagantho.

    ཏསྶ གནྠགནྠིཏཱ ཀིལེསཱ ཨཱསཝནྟི། ཀིཾ པན ཝུཙྩཏི ཨཱསཝནྟཱིཏི? ཝིཔྤཊིསཱརཱ། ཡེ ཝིཔྤཊིསཱརཱ, ཏེ ཨནུསཡཱ། ཏཏྠ ཨབྷིཛ྄ཛྷཱཀཱཡགནྠེན ཀཱམཱསཝོ, བྱཱཔཱདཀཱཡགནྠེན བྷཝཱསཝོ, པརཱམཱསཀཱཡགནྠེན དིཊྛཱསཝོ, ཨིདཾསཙྩཱབྷིནིཝེསཀཱཡགནྠེན ཨཝིཛྫཱསཝོ།

    Tassa ganthaganthitā kilesā āsavanti. Kiṃ pana vuccati āsavantīti? Vippaṭisārā. Ye vippaṭisārā, te anusayā. Tattha abhijjhākāyaganthena kāmāsavo, byāpādakāyaganthena bhavāsavo, parāmāsakāyaganthena diṭṭhāsavo, idaṃsaccābhinivesakāyaganthena avijjāsavo.

    ཏེ ཙཏྟཱརོ ཨཱསཝཱ ཝེཔུལླཾ གཏཱ ཨོགྷཱ ཧོནྟི, ཏེན ཝུཙྩནྟི ‘‘ཨོགྷཱ’’ཏི། ཏཏྠ ཀཱམཱསཝོ ཀཱམོགྷོ, བྷཝཱསཝོ བྷཝོགྷོ, ཨཝིཛྫཱསཝོ ཨཝིཛྫོགྷོ, དིཊྛཱསཝོ དིཊྛོགྷོ།

    Te cattāro āsavā vepullaṃ gatā oghā honti, tena vuccanti ‘‘oghā’’ti. Tattha kāmāsavo kāmogho, bhavāsavo bhavogho, avijjāsavo avijjogho, diṭṭhāsavo diṭṭhogho.

    ཏེ ཙཏྟཱརོ ཨོགྷཱ ཨཱསཡམནུཔཝིཊྛཱ ཨནུསཡསཧགཏཱ ཝུཙྩནྟི སལླཱཏི ཧདཡམཱཧཙྩ ཏིཊྛནྟི། ཏཏྠ ཀཱམོགྷོ རཱགསལླཾ, བྷཝོགྷོ དོསསལླཾ, ཨཝིཛྫོགྷོ མོཧསལླཾ, དིཊྛོགྷོ དིཊྛིསལླཾ།

    Te cattāro oghā āsayamanupaviṭṭhā anusayasahagatā vuccanti sallāti hadayamāhacca tiṭṭhanti. Tattha kāmogho rāgasallaṃ, bhavogho dosasallaṃ, avijjogho mohasallaṃ, diṭṭhogho diṭṭhisallaṃ.

    ཨིམེཧི ཙཏཱུཧི སལླེཧི པརིཡཱདིནྣཾ ཝིཉྙཱཎཾ ཙཏཱུསུ དྷམྨེསུ ཏིཊྛཏི རཱུཔེ ཝེདནཱཡ སཉྙཱཡ སངྑཱརེསུ། ཨིམཱ ཙཏསྶོ ཝིཉྙཱཎཊྛིཏིཡོ། ཏཏྠ རཱགསལླེན ནནྡཱུཔསེཙནཾ རཱུཔཱུཔགཾ ཝིཉྙཱཎཾ ཏིཊྛཏི། དོསསལླེན ཝེདནཱུཔགཾ། མོཧསལླེན སཉྙཱུཔགཾ། དིཊྛིསལླེན ནནྡཱུཔསེཙནཾ སངྑཱརཱུཔགཾ ཝིཉྙཱཎཾ ཏིཊྛཏི།

    Imehi catūhi sallehi pariyādinnaṃ viññāṇaṃ catūsu dhammesu tiṭṭhati rūpe vedanāya saññāya saṅkhāresu. Imā catasso viññāṇaṭṭhitiyo. Tattha rāgasallena nandūpasecanaṃ rūpūpagaṃ viññāṇaṃ tiṭṭhati. Dosasallena vedanūpagaṃ. Mohasallena saññūpagaṃ. Diṭṭhisallena nandūpasecanaṃ saṅkhārūpagaṃ viññāṇaṃ tiṭṭhati.

    ཙཏཱུཧི ཝིཉྙཱཎཊྛིཏཱིཧི ཙཏུབྦིདྷཾ ཨགཏིཾ གཙྪནྟི ཚནྡཱ དོསཱ བྷཡཱ མོཧཱ། རཱགེན ཚནྡཱ ཨགཏིཾ གཙྪཏི, དོསེན དོསཱ ཨགཏིཾ གཙྪཏི, མོཧེན མོཧཱ ཨགཏིཾ གཙྪཏི, དིཊྛིཡཱ བྷཡཱ ཨགཏིཾ གཙྪཏི, ཨིཏི ཨིམཱནི ཙ ཀམྨཱནི ཨིམེ ཙ ཀིལེསཱ ཨཡཾ སཾསཱརཧེཏུ།

    Catūhi viññāṇaṭṭhitīhi catubbidhaṃ agatiṃ gacchanti chandā dosā bhayā mohā. Rāgena chandā agatiṃ gacchati, dosena dosā agatiṃ gacchati, mohena mohā agatiṃ gacchati, diṭṭhiyā bhayā agatiṃ gacchati, iti imāni ca kammāni ime ca kilesā ayaṃ saṃsārahetu.

    ཏཏྠིམཱ ཙཏསྶོ དིསཱ ཀབལཱི༹ཀཱརོ ཨཱཧཱརོ ‘‘ཨསུབྷེ སུབྷ’’ནྟི ཝིཔལླཱསོ ཀཱམུཔཱདཱནཾ ཀཱམཡོགོ ཨབྷིཛ྄ཛྷཱཀཱཡགནྠོ ཀཱམཱསཝོ ཀཱམོགྷོ རཱགསལླཾ རཱུཔཱུཔགཱ ཝིཉྙཱཎཊྛིཏི ཚནྡཱ ཨགཏིགམནཾ, ཨཡཾ པཋམཱ དིསཱ།

    Tatthimā catasso disā kabaḷīkāro āhāro ‘‘asubhe subha’’nti vipallāso kāmupādānaṃ kāmayogo abhijjhākāyagantho kāmāsavo kāmogho rāgasallaṃ rūpūpagā viññāṇaṭṭhiti chandā agatigamanaṃ, ayaṃ paṭhamā disā.

    ཕསྶོ ཨཱཧཱརོ ‘‘དུཀྑེ སུཁ’’ནྟི ཝིཔལླཱསོ སཱིལབྦཏུཔཱདཱནཾ བྷཝཡོགོ བྱཱཔཱདཀཱཡགནྠོ བྷཝཱསཝོ བྷཝོགྷོ དོསསལླཾ ཝེདནཱུཔགཱ ཝིཉྙཱཎཊྛིཏི དོསཱ ཨགཏིགམནཾ, ཨཡཾ དུཏིཡཱ དིསཱ།

    Phasso āhāro ‘‘dukkhe sukha’’nti vipallāso sīlabbatupādānaṃ bhavayogo byāpādakāyagantho bhavāsavo bhavogho dosasallaṃ vedanūpagā viññāṇaṭṭhiti dosā agatigamanaṃ, ayaṃ dutiyā disā.

    མནོསཉྩེཏནཱཧཱརོ ‘‘ཨནཏྟནི ཨཏྟཱ’’ཏི ཝིཔལླཱསོ དིཊྛུཔཱདཱནཾ དིཊྛིཡོགོ པརཱམཱསཀཱཡགནྠོ དིཊྛཱསཝོ དིཊྛོགྷོ དིཊྛིསལླཾ སཉྙཱུཔགཱ ཝིཉྙཱཎཊྛིཏི བྷཡཱ ཨགཏིགམནཾ, ཨཡཾ ཏཏིཡཱ དིསཱ།

    Manosañcetanāhāro ‘‘anattani attā’’ti vipallāso diṭṭhupādānaṃ diṭṭhiyogo parāmāsakāyagantho diṭṭhāsavo diṭṭhogho diṭṭhisallaṃ saññūpagā viññāṇaṭṭhiti bhayā agatigamanaṃ, ayaṃ tatiyā disā.

    ཝིཉྙཱཎཱཧཱརོ ‘‘ཨནིཙྩེ ནིཙྩ’’ནྟི ཝིཔལླཱསོ ཨཏྟཝཱདུཔཱདཱནཾ ཨཝིཛྫཱཡོགོ ཨིདཾསཙྩཱབྷིནིཝེསོཀཱཡགནྠོ ཨཝིཛྫཱསཝོ ཨཝིཛྫོགྷོ མོཧསལླཾ སངྑཱརཱུཔགཱ ཝིཉྙཱཎཊྛིཏི མོཧཱ ཨགཏིགམནཾ, ཨཡཾ ཙཏུཏྠཱི དིསཱ། ཨིཏི ཨིམེསཾ དསནྣཾ སུཏྟཱནཾ པཋམེན པདེན པཋམཱཡ དིསཱཡ ཨཱལོཀནཾ, དུཏིཡེན པདེན དུཏིཡཱཡ དིསཱཡ, ཏཏིཡེན པདེན ཏཏིཡཱཡ དིསཱཡ, ཙཏུཏྠེན པདེན ཙཏུཏྠིཡཱ དིསཱཡ ཨཱལོཀནཾ, ཨཡཾ ཝུཙྩཏི དིསཱ ཨཱལོཀནཱ། ཨིམིནཱ ནཡེན སབྦེ ཀིལེསཱ ཙཏཱུསུ པདེསུ པཀྑིཔིཏབྦཱ། ཨཡཾ ཨཀུསལཔཀྑོ།

    Viññāṇāhāro ‘‘anicce nicca’’nti vipallāso attavādupādānaṃ avijjāyogo idaṃsaccābhinivesokāyagantho avijjāsavo avijjogho mohasallaṃ saṅkhārūpagā viññāṇaṭṭhiti mohā agatigamanaṃ, ayaṃ catutthī disā. Iti imesaṃ dasannaṃ suttānaṃ paṭhamena padena paṭhamāya disāya ālokanaṃ, dutiyena padena dutiyāya disāya, tatiyena padena tatiyāya disāya, catutthena padena catutthiyā disāya ālokanaṃ, ayaṃ vuccati disā ālokanā. Iminā nayena sabbe kilesā catūsu padesu pakkhipitabbā. Ayaṃ akusalapakkho.

    ཙཏསྶོ པཊིཔདཱ, ཙཏྟཱརི ཛྷཱནཱནི, ཙཏྟཱརོ སཏིཔཊྛཱནཱ, ཙཏྟཱརོ ཝིཧཱརཱ དིབྦོ བྲཧྨཱ ཨརིཡོ ཨཱནེཉྫོ, ཙཏྟཱརོ སམྨཔྤདྷཱནཱ, ཙཏྟཱརོ ཨཙྪརིཡཱ ཨབྦྷུཏཱ དྷམྨཱ, ཙཏྟཱརོ ཨདྷིཊྛཱནཱ, ཙཏྟཱརོ སམཱདྷཡོ ཚནྡསམཱདྷི ཝཱིརིཡསམཱདྷི ཙིཏྟསམཱདྷི ཝཱིམཾསཱསམཱདྷི, ཙཏྟཱརོ དྷམྨཱ སུཁབྷཱགིཡཱ ནཱཉྙཏྲ བོཛ྄ཛྷངྒཱ ནཱཉྙཏྲ ཏཔསཱ ནཱཉྙཏྲ ཨིནྡྲིཡསཾཝརཱ ནཱཉྙཏྲ སབྦནིསྶགྒཱ, ཙཏྟཱརི ཨཔྤམཱཎཱནི།

    Catasso paṭipadā, cattāri jhānāni, cattāro satipaṭṭhānā, cattāro vihārā dibbo brahmā ariyo āneñjo, cattāro sammappadhānā, cattāro acchariyā abbhutā dhammā, cattāro adhiṭṭhānā, cattāro samādhayo chandasamādhi vīriyasamādhi cittasamādhi vīmaṃsāsamādhi, cattāro dhammā sukhabhāgiyā nāññatra bojjhaṅgā nāññatra tapasā nāññatra indriyasaṃvarā nāññatra sabbanissaggā, cattāri appamāṇāni.

    ཏཏྠ དུཀྑཱ པཊིཔདཱ དནྡྷཱབྷིཉྙཱ བྷཱཝིཡམཱནཱ བཧུལཱིཀརིཡམཱནཱ པཋམཾ ཛྷཱནཾ པརིཔཱུརེཏི, པཋམཾ ཛྷཱནཾ པརིཔུཎྞཾ པཋམཾ སཏིཔཊྛཱནཾ པརིཔཱུརེཏི, པཋམཾ སཏིཔཊྛཱནཾ པརིཔུཎྞཾ པཋམཾ ཝིཧཱརཾ པརིཔཱུརེཏི, པཋམོ ཝིཧཱརོ པརིཔུཎྞོ པཋམཾ སམྨཔྤདྷཱནཾ པརིཔཱུརེཏི, པཋམཾ སམྨཔྤདྷཱནཾ པརིཔུཎྞཾ པཋམཾ ཨཙྪརིཡཾ ཨབྦྷུཏཾ དྷམྨཾ པརིཔཱུརེཏི, པཋམོ ཨཙྪརིཡོ ཨབྦྷུཏོ དྷམྨོ པརིཔུཎྞོ པཋམཾ ཨདྷིཊྛཱནཾ པརིཔཱུརེཏི, པཋམཾ ཨདྷིཊྛཱནཾ པརིཔུཎྞཾ ཚནྡསམཱདྷིཾ པརིཔཱུརེཏི, ཚནྡསམཱདྷི པརིཔུཎྞོ ཨིནྡྲིཡསཾཝརཾ པརིཔཱུརེཏི, ཨིནྡྲིཡསཾཝརོ པརིཔུཎྞོ པཋམཾ ཨཔྤམཱཎཾ པརིཔཱུརེཏི། ཨེཝཾ ཡཱཝ སབྦནིསྶགྒཱ ཙཏུཏྠཾ ཨཔྤམཱཎཾ པརིཔཱུརེཏི།

    Tattha dukkhā paṭipadā dandhābhiññā bhāviyamānā bahulīkariyamānā paṭhamaṃ jhānaṃ paripūreti, paṭhamaṃ jhānaṃ paripuṇṇaṃ paṭhamaṃ satipaṭṭhānaṃ paripūreti, paṭhamaṃ satipaṭṭhānaṃ paripuṇṇaṃ paṭhamaṃ vihāraṃ paripūreti, paṭhamo vihāro paripuṇṇo paṭhamaṃ sammappadhānaṃ paripūreti, paṭhamaṃ sammappadhānaṃ paripuṇṇaṃ paṭhamaṃ acchariyaṃ abbhutaṃ dhammaṃ paripūreti, paṭhamo acchariyo abbhuto dhammo paripuṇṇo paṭhamaṃ adhiṭṭhānaṃ paripūreti, paṭhamaṃ adhiṭṭhānaṃ paripuṇṇaṃ chandasamādhiṃ paripūreti, chandasamādhi paripuṇṇo indriyasaṃvaraṃ paripūreti, indriyasaṃvaro paripuṇṇo paṭhamaṃ appamāṇaṃ paripūreti. Evaṃ yāva sabbanissaggā catutthaṃ appamāṇaṃ paripūreti.

    ཏཏྠ པཋམཱ ཙ པཊིཔདཱ པཋམཉྩ ཛྷཱནཾ པཋམཉྩ སཏིཔཊྛཱནཾ དིབྦོ ཙ ཝིཧཱརོ པཋམཉྩ སམྨཔྤདྷཱནཾ པཋམོ ཙ ཨཙྪརིཡོ ཨབྦྷུཏོ དྷམྨོ སཙྩཱདྷིཊྛཱནཉྩ ཚནྡསམཱདྷི ཙ ཨིནྡྲིཡསཾཝརོ ཙ མེཏྟཱ ཙ ཨཔྤམཱཎཾ། ཨཡཾ པཋམཱ དིསཱ།

    Tattha paṭhamā ca paṭipadā paṭhamañca jhānaṃ paṭhamañca satipaṭṭhānaṃ dibbo ca vihāro paṭhamañca sammappadhānaṃ paṭhamo ca acchariyo abbhuto dhammo saccādhiṭṭhānañca chandasamādhi ca indriyasaṃvaro ca mettā ca appamāṇaṃ. Ayaṃ paṭhamā disā.

    དུཏིཡཱ ཙ པཊིཔདཱ ཁིཔྤཱབྷིཉྙཱ དུཏིཡཉྩ ཛྷཱནཾ དུཏིཡཉྩ སཏིཔཊྛཱནཾ བྲཧྨཱ ཙ ཝིཧཱརོ དུཏིཡཉྩ སམྨཔྤདྷཱནཾ དུཏིཡོ ཙ ཨཙྪརིཡོ ཨབྦྷུཏོ དྷམྨོ ཙཱགཱདྷིཊྛཱནཉྩ ཙིཏྟསམཱདྷི ཙ ཏཔོ ཙ ཀརུཎཱ ཙ ཨཔྤམཱཎཾ། ཨཡཾ དུཏིཡཱ དིསཱ།

    Dutiyā ca paṭipadā khippābhiññā dutiyañca jhānaṃ dutiyañca satipaṭṭhānaṃ brahmā ca vihāro dutiyañca sammappadhānaṃ dutiyo ca acchariyo abbhuto dhammo cāgādhiṭṭhānañca cittasamādhi ca tapo ca karuṇā ca appamāṇaṃ. Ayaṃ dutiyā disā.

    ཏཏིཡཱ ཙ པཊིཔདཱ དནྡྷཱབྷིཉྙཱ ཏཏིཡཉྩ ཛྷཱནཾ ཏཏིཡཉྩ སཏིཔཊྛཱནཾ ཨརིཡོ ཙ ཝིཧཱརོ ཏཏིཡཉྩ སམྨཔྤདྷཱནཾ ཏཏིཡོ ཙ ཨཙྪརིཡོ ཨབྦྷུཏོ དྷམྨོ སཙྩཱདྷིཊྛཱནཉྩ ཝཱིརིཡསམཱདྷི ཙ བོཛ྄ཛྷངྒཱ ཙ མུདིཏཱ ཙ ཨཔྤམཱཎཾ། ཨཡཾ ཏཏིཡཱ དིསཱ།

    Tatiyā ca paṭipadā dandhābhiññā tatiyañca jhānaṃ tatiyañca satipaṭṭhānaṃ ariyo ca vihāro tatiyañca sammappadhānaṃ tatiyo ca acchariyo abbhuto dhammo saccādhiṭṭhānañca vīriyasamādhi ca bojjhaṅgā ca muditā ca appamāṇaṃ. Ayaṃ tatiyā disā.

    ཙཏུཏྠཱི ཙ པཊིཔདཱ ཁིཔྤཱབྷིཉྙཱ ཙཏུཏྠཉྩ ཛྷཱནཾ ཙཏུཏྠཉྩ སཏིཔཊྛཱནཾ ཨཱནེཉྫོ ཙ ཝིཧཱརོ ཙཏུཏྠཉྩ སམྨཔྤདྷཱནཾ ཙཏུཏྠོ ཙ ཨཙྪརིཡོ ཨབྦྷུཏོ དྷམྨོ ཨུཔསམཱདྷིཊྛཱནཉྩ ཝཱིམཾསཱསམཱདྷི ཙ སབྦནིསྶགྒོ ཙ ཨུཔེཀྑཱ ཙ ཨཔྤམཱཎཾ། ཨཡཾ ཙཏུཏྠཱི དིསཱ། ཨིམཱསཾ ཙཏུནྣཾ དིསཱནཾ ཡཱ ཨཱལོཀནཱ, ཨཡཾ ཝུཙྩཏི དིསཱལོཙནོ ནཱམ ནཡོ།

    Catutthī ca paṭipadā khippābhiññā catutthañca jhānaṃ catutthañca satipaṭṭhānaṃ āneñjo ca vihāro catutthañca sammappadhānaṃ catuttho ca acchariyo abbhuto dhammo upasamādhiṭṭhānañca vīmaṃsāsamādhi ca sabbanissaggo ca upekkhā ca appamāṇaṃ. Ayaṃ catutthī disā. Imāsaṃ catunnaṃ disānaṃ yā ālokanā, ayaṃ vuccati disālocano nāma nayo.

    ཏཏྠཱཡཾ ཡོཛནཱ – ཙཏྟཱརོ ཙ ཨཱཧཱརཱ, ཙཏསྶོ ཙ པཊིཔདཱ, ཙཏྟཱརོ ཙ ཝིཔལླཱསཱ, ཙཏྟཱརོ ཙ སཏིཔཊྛཱནཱ, ཙཏྟཱརི ཙ ཨུཔཱདཱནཱནི, ཙཏྟཱརི ཙ ཛྷཱནཱནི, ཙཏྟཱརོ ཙ ཡོགཱ, ཙཏྟཱརོ ཙ ཝིཧཱརཱ, ཙཏྟཱརོ ཙ གནྠཱ, ཙཏྟཱརོ ཙ སམྨཔྤདྷཱནཱ, ཙཏྟཱརོ ཙ ཨཱསཝཱ, ཙཏྟཱརོ ཙ ཨཙྪརིཡཱ ཨབྦྷུཏཱ དྷམྨཱ, ཙཏྟཱརོ ཙ ཨོགྷཱ, ཙཏྟཱརི ཙ ཨདྷིཊྛཱནཱནི, ཙཏྟཱརི ཙ སལླཱནི, ཙཏྟཱརོ ཙ སམཱདྷཡོ, ཙཏསྶོ ཙ ཝིཉྙཱཎཊྛིཏིཡོ, ཙཏྟཱརོ ཙ སུཁབྷཱགིཡཱ དྷམྨཱ, ཙཏྟཱརི ཙ ཨགཏིགམནཱནི ཙཏྟཱརི ཙ ཨཔྤམཱཎཱནི། ཨིཏི ཀུསལཱཀུསལཱནཾ པཀྑཔཊིཔཀྑཝསེན ཡོཛནཱ། ཨཡཾ སཱིཧཝིཀྐཱིལི༹ཏེ དིསཱལོཙནོ ནཡོ།

    Tatthāyaṃ yojanā – cattāro ca āhārā, catasso ca paṭipadā, cattāro ca vipallāsā, cattāro ca satipaṭṭhānā, cattāri ca upādānāni, cattāri ca jhānāni, cattāro ca yogā, cattāro ca vihārā, cattāro ca ganthā, cattāro ca sammappadhānā, cattāro ca āsavā, cattāro ca acchariyā abbhutā dhammā, cattāro ca oghā, cattāri ca adhiṭṭhānāni, cattāri ca sallāni, cattāro ca samādhayo, catasso ca viññāṇaṭṭhitiyo, cattāro ca sukhabhāgiyā dhammā, cattāri ca agatigamanāni cattāri ca appamāṇāni. Iti kusalākusalānaṃ pakkhapaṭipakkhavasena yojanā. Ayaṃ sīhavikkīḷite disālocano nayo.

    ཏསྶ ཙཏྟཱརི སཱམཉྙཕལཱནི པརིཡོསཱནཾ, ཏཏྠ པཋམཱཡ དིསཱཡ སོཏཱཔཏྟིཕལཾ པརིཡོསཱནཾ, དུཏིཡཱཡ སཀདཱགཱམིཕལཾ, ཏཏིཡཱཡ ཨནཱགཱམིཕལཾ, ཙཏུཏྠིཡཱ ཨརཧཏྟཕལཾ པརིཡོསཱནནྟི།

    Tassa cattāri sāmaññaphalāni pariyosānaṃ, tattha paṭhamāya disāya sotāpattiphalaṃ pariyosānaṃ, dutiyāya sakadāgāmiphalaṃ, tatiyāya anāgāmiphalaṃ, catutthiyā arahattaphalaṃ pariyosānanti.

    ཏཏྠ ཀཏམོ ཏིཔུཀྑལནཡོ? པཊིཔདཱཝིབྷཱགེན ཙཏཱུསུ པུགྒལེསུ ཡོ སུཁཱཡ པཊིཔདཱཡ ཁིཔྤཱབྷིཉྙཱཡ ནིཡྻཱཏི, ཨཡཾ ཨུགྒྷཊིཏཉྙཱུ། ཡོ སུཁཱཡ ཝཱ པཊིཔདཱཡ, དནྡྷཱབྷིཉྙཱཡ, དུཀྑཱཡ ཝཱ པཊིཔདཱཡ ཁིཔྤཱབྷིཉྙཱཡ ནིཡྻཱཏི, ཨཡཾ ཝིཔཉྩིཏཉྙཱུ། ཡོ དུཀྑཱཡ པཊིཔདཱཡ དནྡྷཱབྷིཉྙཱཡ ནིཡྻཱཏི, ཨཡཾ ནེཡྻོ། ཨིཏི ཙཏྟཱརོ ཧུཏྭཱ ཏཡོ ཧོནྟི། ཏཏྠ ཨུགྒྷཊིཏཉྙུསྶ སམཐཔུབྦངྒམཱ ཝིཔསྶནཱ སཔྤཱཡཱ ། ནེཡྻསྶ ཝིཔསྶནཱཔུབྦངྒམོ སམཐོ, ཝིཔཉྩིཏཉྙུསྶ སམཐཝིཔསྶནཱ ཡུགནདྡྷཱ། ཨུགྒྷཊིཏཉྙུསྶ མུདུཀཱ དེསནཱ, ནེཡྻསྶ ཏིཀྑཱ དེསནཱ, ཝིཔཉྩིཏཉྙུསྶ ཏིཀྑམུདུཀཱ དེསནཱ།

    Tattha katamo tipukkhalanayo? Paṭipadāvibhāgena catūsu puggalesu yo sukhāya paṭipadāya khippābhiññāya niyyāti, ayaṃ ugghaṭitaññū. Yo sukhāya vā paṭipadāya, dandhābhiññāya, dukkhāya vā paṭipadāya khippābhiññāya niyyāti, ayaṃ vipañcitaññū. Yo dukkhāya paṭipadāya dandhābhiññāya niyyāti, ayaṃ neyyo. Iti cattāro hutvā tayo honti. Tattha ugghaṭitaññussa samathapubbaṅgamā vipassanā sappāyā . Neyyassa vipassanāpubbaṅgamo samatho, vipañcitaññussa samathavipassanā yuganaddhā. Ugghaṭitaññussa mudukā desanā, neyyassa tikkhā desanā, vipañcitaññussa tikkhamudukā desanā.

    ཨུགྒྷཊིཏཉྙུསྶ ཨདྷིཔཉྙཱསིཀྑཱ, ཝིཔཉྩིཏཉྙུསྶ ཨདྷིཙིཏྟསིཀྑཱ ཙ ཨདྷིཔཉྙཱསིཀྑཱ ཙ, ནེཡྻསྶ ཨདྷིསཱིལསིཀྑཱ ཙ ཨདྷིཙིཏྟསིཀྑཱ ཙ ཨདྷིཔཉྙཱསིཀྑཱ ཙ། ཨིཏི ཨིམེསཾ པུགྒལཱནཾ ཙཏཱུཧི པཊིཔདཱཧི ནིཡྻཱནཾ།

    Ugghaṭitaññussa adhipaññāsikkhā, vipañcitaññussa adhicittasikkhā ca adhipaññāsikkhā ca, neyyassa adhisīlasikkhā ca adhicittasikkhā ca adhipaññāsikkhā ca. Iti imesaṃ puggalānaṃ catūhi paṭipadāhi niyyānaṃ.

    ཏཏྠཱཡཾ སཾཀིལེསཔཀྑོ, ཏཱིཎི ཨཀུསལམཱུལཱནི, ཏཡོ ཕསྶཱ, ཏིསྶོ ཝེདནཱ, ཏཡོ ཨུཔཝིཙཱརཱ, ཏཡོ ཀིལེསཱ, ཏཡོ ཝིཏཀྐཱ, ཏཡོ པརིལཱ༹ཧཱ, ཏཱིཎི སངྑཏལཀྑཎཱནི, ཏིསྶོ དུཀྑཏཱ།

    Tatthāyaṃ saṃkilesapakkho, tīṇi akusalamūlāni, tayo phassā, tisso vedanā, tayo upavicārā, tayo kilesā, tayo vitakkā, tayo pariḷāhā, tīṇi saṅkhatalakkhaṇāni, tisso dukkhatā.

    ཏཱིཎི ཨཀུསལམཱུལཱནཱིཏི ལོབྷོ ཨཀུསལམཱུལཾ, དོསོ ཨཀུསལམཱུལཾ, མོཧོ ཨཀུསལམཱུལཾ། ཏཡོ ཕསྶཱཏི སུཁཝེདནཱིཡོ ཕསྶོ, དུཀྑཝེདནཱིཡོ ཕསྶོ, ཨདུཀྑམསུཁཝེདནཱིཡོ ཕསྶོ། ཏིསྶོ ཝེདནཱཏི སུཁཱ ཝེདནཱ, དུཀྑཱ ཝེདནཱ, ཨདུཀྑམསུཁཱ ཝེདནཱ། ཏཡོ ཨུཔཝིཙཱརཱཏི སོམནསྶཱུཔཝིཙཱརོ, དོམནསྶཱུཔཝིཙཱརོ, ཨུཔེཀྑཱུཔཝིཙཱརོ། ཏཡོ ཀིལེསཱཏི ལོབྷོ, དོསོ, མོཧོ། ཏཡོ ཝིཏཀྐཱཏི ཀཱམཝིཏཀྐོ, བྱཱཔཱདཝིཏཀྐོ, ཝིཧིཾསཱཝིཏཀྐོ། ཏཡོ པརིལཱ༹ཧཱཏི རཱགཛོ, དོསཛོ, མོཧཛོ། ཏཱིཎི སངྑཏལཀྑཎཱནཱིཏི ཨུཔྤཱདོ, ཋིཏི, ཝཡོ། ཏིསྶོ དུཀྑཏཱཏི དུཀྑདུཀྑཏཱ, ཝིཔརིཎཱམདུཀྑཏཱ, སངྑཱརདུཀྑཏཱ།

    Tīṇi akusalamūlānīti lobho akusalamūlaṃ, doso akusalamūlaṃ, moho akusalamūlaṃ. Tayo phassāti sukhavedanīyo phasso, dukkhavedanīyo phasso, adukkhamasukhavedanīyo phasso. Tisso vedanāti sukhā vedanā, dukkhā vedanā, adukkhamasukhā vedanā. Tayo upavicārāti somanassūpavicāro, domanassūpavicāro, upekkhūpavicāro. Tayo kilesāti lobho, doso, moho. Tayo vitakkāti kāmavitakko, byāpādavitakko, vihiṃsāvitakko. Tayo pariḷāhāti rāgajo, dosajo, mohajo. Tīṇi saṅkhatalakkhaṇānīti uppādo, ṭhiti, vayo. Tisso dukkhatāti dukkhadukkhatā, vipariṇāmadukkhatā, saṅkhāradukkhatā.

    ཏཏྠ ལོབྷོ ཨཀུསལམཱུལཾ མནཱཔིཀེན ཨཱརམྨཎེན སམུཊྛཧཏི། ཏདེཝ མནཱཔིཀཱརམྨཎཾ པཊིཙྩ ཨུཔྤཛྫཏི སུཁཝེདནཱིཡོ ཕསྶོ, སུཁཝེདནཱིཡཾ ཕསྶཾ པཊིཙྩ ཨུཔྤཛྫཏི སུཁཱ ཝེདནཱ, སུཁཾ ཝེདནཾ པཊིཙྩ ཨུཔྤཛྫཏི སོམནསྶཱུཔཝིཙཱརོ, སོམནསྶཱུཔཝིཙཱརཾ པཊིཙྩ ཨུཔྤཛྫཏི རཱགོ, རཱགཾ པཊིཙྩ ཨུཔྤཛྫཏི ཀཱམཝིཏཀྐོ, ཀཱམཝིཏཀྐཾ པཊིཙྩ ཨུཔྤཛྫཏི རཱགཛོ པརིལཱ༹ཧོ, རཱགཛཾ པརིལཱ༹ཧཾ པཊིཙྩ ཨུཔྤཛྫཏི ཨུཔྤཱདོ སངྑཏལཀྑཎཾ, ཨུཔྤཱདཾ སངྑཏལཀྑཎཾ པཊིཙྩ ཨུཔྤཛྫཏི ཝིཔརིཎཱམདུཀྑཏཱ།

    Tattha lobho akusalamūlaṃ manāpikena ārammaṇena samuṭṭhahati. Tadeva manāpikārammaṇaṃ paṭicca uppajjati sukhavedanīyo phasso, sukhavedanīyaṃ phassaṃ paṭicca uppajjati sukhā vedanā, sukhaṃ vedanaṃ paṭicca uppajjati somanassūpavicāro, somanassūpavicāraṃ paṭicca uppajjati rāgo, rāgaṃ paṭicca uppajjati kāmavitakko, kāmavitakkaṃ paṭicca uppajjati rāgajo pariḷāho, rāgajaṃ pariḷāhaṃ paṭicca uppajjati uppādo saṅkhatalakkhaṇaṃ, uppādaṃ saṅkhatalakkhaṇaṃ paṭicca uppajjati vipariṇāmadukkhatā.

    དོསོ ཨཀུསལམཱུལཾ ཨམནཱཔིཀེན ཨཱརམྨཎེན སམུཊྛཧཏི། ཏདེཝ ཨམནཱཔིཀཱརམྨཎཾ པཊིཙྩ ཨུཔྤཛྫཏི དུཀྑཝེདནཱིཡོ ཕསྶོ, དུཀྑཝེདནཱིཡཾ ཕསྶཾ པཊིཙྩ ཨུཔྤཛྫཏི དུཀྑཱ ཝེདནཱ, དུཀྑཾ ཝེདནཾ པཊིཙྩ ཨུཔྤཛྫཏི དོམནསྶཱུཔཝིཙཱརོ, དོམནསྶཱུཔཝིཙཱརཾ པཊིཙྩ ཨུཔྤཛྫཏི དོསོ, དོསཾ པཊིཙྩ ཨུཔྤཛྫཏི བྱཱཔཱདཝིཏཀྐོ, བྱཱཔཱདཝིཏཀྐཾ པཊིཙྩ ཨུཔྤཛྫཏི དོསཛོ པརིལཱ༹ཧོ, དོསཛཾ པརིལཱ༹ཧཾ པཊིཙྩ ཨུཔྤཛྫཏི ཋིཏསྶ ཨཉྙཐཏྟཾ སངྑཏལཀྑཎཾ, ཋིཏསྶ ཨཉྙཐཏྟཾ སངྑཏལཀྑཎཾ པཊིཙྩ ཨུཔྤཛྫཏི དུཀྑདུཀྑཏཱ།

    Doso akusalamūlaṃ amanāpikena ārammaṇena samuṭṭhahati. Tadeva amanāpikārammaṇaṃ paṭicca uppajjati dukkhavedanīyo phasso, dukkhavedanīyaṃ phassaṃ paṭicca uppajjati dukkhā vedanā, dukkhaṃ vedanaṃ paṭicca uppajjati domanassūpavicāro, domanassūpavicāraṃ paṭicca uppajjati doso, dosaṃ paṭicca uppajjati byāpādavitakko, byāpādavitakkaṃ paṭicca uppajjati dosajo pariḷāho, dosajaṃ pariḷāhaṃ paṭicca uppajjati ṭhitassa aññathattaṃ saṅkhatalakkhaṇaṃ, ṭhitassa aññathattaṃ saṅkhatalakkhaṇaṃ paṭicca uppajjati dukkhadukkhatā.

    མོཧོ ཨཀུསལམཱུལཾ ཨུཔེཀྑཱཋཱནིཡཾ ཨཱརམྨཎེན སམུཊྛཧཏི། ཏདེཝ ཨུཔེཀྑཱཋཱནིཡཾ ཨཱརམྨཎཾ པཊིཙྩ ཨུཔྤཛྫཏི ཨདུཀྑམསུཁཝེདནཱིཡོ ཕསྶོ, ཨདུཀྑམསུཁཝེདནཱིཡཾ ཕསྶཾ པཊིཙྩ ཨུཔྤཛྫཏི ཨདུཀྑམསུཁཱ ཝེདནཱ, ཨདུཀྑམསུཁཾ ཝེདནཾ པཊིཙྩ ཨུཔྤཛྫཏི ཨུཔེཀྑཱུཔཝིཙཱརོ, ཨུཔེཀྑཱུཔཝིཙཱརཾ པཊིཙྩ ཨུཔྤཛྫཏི མོཧོ, མོཧཾ པཊིཙྩ ཨུཔྤཛྫཏི ཝིཧིཾསཱཝིཏཀྐོ, ཝིཧིཾསཱཝིཏཀྐཾ པཊིཙྩ ཨུཔྤཛྫཏི མོཧཛོ པརིལཱ༹ཧོ, མོཧཛཾ པརིལཱ༹ཧཾ པཊིཙྩ ཨུཔྤཛྫཏི ཝཡོ སངྑཏལཀྑཎཾ, ཝཡཾ སངྑཏལཀྑཎཾ པཊིཙྩ ཨུཔྤཛྫཏི སངྑཱརདུཀྑཏཱ། ཨིཏི ཨཡཾ ཏཱིཧི ཨཱཀཱརེཧི ཀིལེསཱནཾ ནིདྡེསོ། ཡོ ཀོཙི ཨཀུསལཔཀྑོ, སབྦོ སོ ཏཱིསུ ཨཀུསལམཱུལེསུ སམོསརཏཱིཏི།

    Moho akusalamūlaṃ upekkhāṭhāniyaṃ ārammaṇena samuṭṭhahati. Tadeva upekkhāṭhāniyaṃ ārammaṇaṃ paṭicca uppajjati adukkhamasukhavedanīyo phasso, adukkhamasukhavedanīyaṃ phassaṃ paṭicca uppajjati adukkhamasukhā vedanā, adukkhamasukhaṃ vedanaṃ paṭicca uppajjati upekkhūpavicāro, upekkhūpavicāraṃ paṭicca uppajjati moho, mohaṃ paṭicca uppajjati vihiṃsāvitakko, vihiṃsāvitakkaṃ paṭicca uppajjati mohajo pariḷāho, mohajaṃ pariḷāhaṃ paṭicca uppajjati vayo saṅkhatalakkhaṇaṃ, vayaṃ saṅkhatalakkhaṇaṃ paṭicca uppajjati saṅkhāradukkhatā. Iti ayaṃ tīhi ākārehi kilesānaṃ niddeso. Yo koci akusalapakkho, sabbo so tīsu akusalamūlesu samosaratīti.

    ཏཏྠ ཀཏམོ ཀུསལཔཀྑོ? ཏཱིཎི ཀུསལམཱུལཱནི ཨལོབྷོ, ཨདོསོ, ཨམོཧོ། ཏིསྶོ པཉྙཱ སུཏམཡཱི, ཙིནྟཱམཡཱི, བྷཱཝནཱམཡཱི། ཏཡོ སམཱདྷཱི སཝིཏཀྐསཝིཙཱརོ, ཨཝིཏཀྐཝིཙཱརམཏྟོ, ཨཝིཏཀྐཨཝིཙཱརོ། ཏིསྶོ སིཀྑཱ ཨདྷིསཱིལསིཀྑཱ, ཨདྷིཙིཏྟསིཀྑཱ , ཨདྷིཔཉྙཱསིཀྑཱ། ཏཱིཎི ནིམིཏྟཱནི སམཐནིམིཏྟཾ, པགྒཧནིམིཏྟཾ, ཨུཔེཀྑཱནིམིཏྟཾ། ཏཡོ ཝིཏཀྐཱ ནེཀྑམྨཝིཏཀྐོ, ཨབྱཱཔཱདཝིཏཀྐོ, ཨཝིཧིཾསཱཝིཏཀྐོ། ཏཱིཎི ཨིནྡྲིཡཱནི ཨནཉྙཱཏཉྙསྶཱམཱིཏིནྡྲིཡཾ, ཨཉྙིནྡྲིཡཾ, ཨཉྙཱཏཱཝིནྡྲིཡཾ། ཏཡོ ཨུཔཝིཙཱརཱ ནེཀྑམྨཱུཔཝིཙཱརོ, ཨབྱཱཔཱདཱུཔཝིཙཱརོ, ཨཝིཧིཾསཱུཔཝིཙཱརོ ཏིསྶོ ཨེསནཱ ཀཱམེསནཱ, བྷཝེསནཱ, བྲཧྨཙརིཡེསནཱ། ཏཡོ ཁནྡྷཱ སཱིལཀྑནྡྷོ, སམཱདྷིཀྑནྡྷོ, པཉྙཱཀྑནྡྷོ།

    Tattha katamo kusalapakkho? Tīṇi kusalamūlāni alobho, adoso, amoho. Tisso paññā sutamayī, cintāmayī, bhāvanāmayī. Tayo samādhī savitakkasavicāro, avitakkavicāramatto, avitakkaavicāro. Tisso sikkhā adhisīlasikkhā, adhicittasikkhā , adhipaññāsikkhā. Tīṇi nimittāni samathanimittaṃ, paggahanimittaṃ, upekkhānimittaṃ. Tayo vitakkā nekkhammavitakko, abyāpādavitakko, avihiṃsāvitakko. Tīṇi indriyāni anaññātaññassāmītindriyaṃ, aññindriyaṃ, aññātāvindriyaṃ. Tayo upavicārā nekkhammūpavicāro, abyāpādūpavicāro, avihiṃsūpavicāro tisso esanā kāmesanā, bhavesanā, brahmacariyesanā. Tayo khandhā sīlakkhandho, samādhikkhandho, paññākkhandho.

    ཏཏྠ ཨལོབྷོ ཀུསལམཱུལཾ སུཏམཡིཔཉྙཾ པརིཔཱུརེཏི། སུཏམཡི པཉྙཱ པརིཔུཎྞཱ སཝིཏཀྐསཝིཙཱརཾ སམཱདྷིཾ པརིཔཱུརེཏི, སཝིཏཀྐསཝིཙཱརོ སམཱདྷི པརིཔུཎྞོ ཨདྷིསཱིལསིཀྑཾ པརིཔཱུརེཏི, ཨདྷིསཱིལསིཀྑཱ པརིཔུཎྞཱ སམཐནིམིཏྟཾ པརིཔཱུརེཏི, སམཐནིམིཏྟཾ པརིཔུཎྞཾ ནེཀྑམྨཝིཏཀྐཾ པརིཔཱུརེཏི, ནེཀྑམྨཝིཏཀྐོ པརིཔུཎྞོ ཨནཉྙཱཏཉྙསྶཱམཱིཏིནྡྲིཡཾ པརིཔཱུརེཏི, ཨནཉྙཱཏཉྙསྶཱམཱིཏིནྡྲིཡཾ པརིཔུཎྞཾ ནེཀྑམྨསིཏཱུཔཝིཙཱརཾ པརིཔཱུརེཏི, ནེཀྑམྨཱུཔཝིཙཱརཾ པརིཔུཎྞོ ཀཱམེསནཾ པཛཧཏི། ཀཱམེསནཔྤཧཱནཾ སཱིལཀྑནྡྷཾ པརིཔཱུརེཏི།

    Tattha alobho kusalamūlaṃ sutamayipaññaṃ paripūreti. Sutamayi paññā paripuṇṇā savitakkasavicāraṃ samādhiṃ paripūreti, savitakkasavicāro samādhi paripuṇṇo adhisīlasikkhaṃ paripūreti, adhisīlasikkhā paripuṇṇā samathanimittaṃ paripūreti, samathanimittaṃ paripuṇṇaṃ nekkhammavitakkaṃ paripūreti, nekkhammavitakko paripuṇṇo anaññātaññassāmītindriyaṃ paripūreti, anaññātaññassāmītindriyaṃ paripuṇṇaṃ nekkhammasitūpavicāraṃ paripūreti, nekkhammūpavicāraṃ paripuṇṇo kāmesanaṃ pajahati. Kāmesanappahānaṃ sīlakkhandhaṃ paripūreti.

    ཨདོསོ ཀུསལམཱུལཾ ཙིནྟཱམཡིཔཉྙཾ པརིཔཱུརེཏི, ཙིནྟཱམཡིཔཉྙཱ པརིཔུཎྞཱ ཨཝིཏཀྐཝིཙཱརམཏྟཾ སམཱདྷིཾ པརིཔཱུརེཏི, ཨཝིཏཀྐཝིཙཱརམཏྟོ སམཱདྷི པརིཔུཎྞོ ཨདྷིཙིཏྟསིཀྑཾ པརིཔཱུརེཏི, ཨདྷིཙིཏྟསིཀྑཱ པརིཔུཎྞཱ ཨུཔེཀྑཱནིམིཏྟཾ པརིཔཱུརེཏི, ཨུཔེཀྑཱནིམིཏྟཾ པརིཔུཎྞཾ ཨབྱཱཔཱདཝིཏཀྐཾ པརིཔཱུརེཏི, ཨབྱཱཔཱདཝིཏཀྐོ པརིཔུཎྞོ ཨཉྙིནྡྲིཡཾ པརིཔཱུརེཏི, ཨཉྙིནྡྲིཡཾ པརིཔུཎྞཾ ཨབྱཱཔཱདཱུཔཝིཙཱརཾ པརིཔཱུརེཏི, ཨབྱཱཔཱདཱུཔཝིཙཱརོ པརིཔུཎྞོ བྷཝེསནཾ པཛཧཏི, བྷཝེསནཔྤཧཱནཾ སམཱདྷིཀྑནྡྷཾ པརིཔཱུརེཏི།

    Adoso kusalamūlaṃ cintāmayipaññaṃ paripūreti, cintāmayipaññā paripuṇṇā avitakkavicāramattaṃ samādhiṃ paripūreti, avitakkavicāramatto samādhi paripuṇṇo adhicittasikkhaṃ paripūreti, adhicittasikkhā paripuṇṇā upekkhānimittaṃ paripūreti, upekkhānimittaṃ paripuṇṇaṃ abyāpādavitakkaṃ paripūreti, abyāpādavitakko paripuṇṇo aññindriyaṃ paripūreti, aññindriyaṃ paripuṇṇaṃ abyāpādūpavicāraṃ paripūreti, abyāpādūpavicāro paripuṇṇo bhavesanaṃ pajahati, bhavesanappahānaṃ samādhikkhandhaṃ paripūreti.

    ཨམོཧོ ཀུསལམཱུལཾ བྷཱཝནཱམཡིཔཉྙཾ པརིཔཱུརེཏི, བྷཱཝནཱམཡིཔཉྙཱ པརིཔུཎྞཱ ཨཝིཏཀྐཨཝིཙཱརཾ སམཱདྷིཾ པརིཔཱུརེཏི, ཨཝིཏཀྐཨཝིཙཱརོ སམཱདྷི པརིཔུཎྞོ ཨདྷིཔཉྙཱསིཀྑཾ པརིཔཱུརེཏི, ཨདྷིཔཉྙཱསིཀྑཱ པརིཔུཎྞཱ པགྒཧནིམིཏྟཾ པརིཔཱུརེཏི, པགྒཧནིམིཏྟཾ པརིཔུཎྞཾ ཨཝིཧིཾསཱཝིཏཀྐཾ པརིཔཱུརེཏི, ཨཝིཧིཾསཱཝིཏཀྐོ པརིཔུཎྞོ ཨཉྙཱཏཱཝིནྡྲིཡཾ པརིཔཱུརེཏི, ཨཉྙཱཏཱཝིནྡྲིཡཾ པརིཔུཎྞཾ ཨཝིཧིཾསཱུཔཝིཙཱརཾ པརིཔཱུརེཏི, ཨཝིཧིཾསཱུཔཝིཙཱརོ པརིཔུཎྞོ བྲཧྨཙརིཡེསནཾ པརིཔཱུརེཏི, བྲཧྨཙརིཡེསནཱ པརིཔུཎྞཱ པཉྙཱཀྑནྡྷཾ པརིཔཱུརེཏི།

    Amoho kusalamūlaṃ bhāvanāmayipaññaṃ paripūreti, bhāvanāmayipaññā paripuṇṇā avitakkaavicāraṃ samādhiṃ paripūreti, avitakkaavicāro samādhi paripuṇṇo adhipaññāsikkhaṃ paripūreti, adhipaññāsikkhā paripuṇṇā paggahanimittaṃ paripūreti, paggahanimittaṃ paripuṇṇaṃ avihiṃsāvitakkaṃ paripūreti, avihiṃsāvitakko paripuṇṇo aññātāvindriyaṃ paripūreti, aññātāvindriyaṃ paripuṇṇaṃ avihiṃsūpavicāraṃ paripūreti, avihiṃsūpavicāro paripuṇṇo brahmacariyesanaṃ paripūreti, brahmacariyesanā paripuṇṇā paññākkhandhaṃ paripūreti.

    ཨིཏི ཨིམེ ཏཡོ དྷམྨཱ ཨཀུསལཔཀྑིཀཱ ཀུསལཔཀྑིཀཱ ཙ ཏིཀནིདྡེསེཧི ནིདྡིཊྛཱ ཏིཔུཀྑལནཡསྶ དིསཱ ནཱམ། ཏསྶ པརིཡོསཱནཾ ཏཡོ ཝིམོཀྑཱ ཨཔྤཎིཧིཏོ སུཉྙཏོ ཨནིམིཏྟོ, ཨཡཾ ཏིཔུཀྑལོ ནཱམ དུཏིཡོ ནཡོ།

    Iti ime tayo dhammā akusalapakkhikā kusalapakkhikā ca tikaniddesehi niddiṭṭhā tipukkhalanayassa disā nāma. Tassa pariyosānaṃ tayo vimokkhā appaṇihito suññato animitto, ayaṃ tipukkhalo nāma dutiyo nayo.

    ཏཏྠ ཡེ ཨིམེ ཏཡོ པུགྒལཱ ཨུགྒྷཊིཏཉྙཱུ ཝིཔཉྩིཏཉྙཱུ ནེཡྻོཏི ཨིམེསཾ ཏིཎྞཾ པུགྒལཱནཾ དྭེ པུགྒལཱ སུཁཱཡ པཊིཔདཱཡ ཁིཔྤཱབྷིཉྙཱཡ, སུཁཱཡ པཊིཔདཱཡ དནྡྷཱབྷིཉྙཱཡ ཙ ནིཡྻནྟི, དྭེཡེཝ པུགྒལཱ དུཀྑཱཡ པཊིཔདཱཡ ཁིཔྤཱབྷིཉྙཱཡ, དུཀྑཱཡ པཊིཔདཱཡ དནྡྷཱབྷིཉྙཱཡ ཙ ནིཡྻནྟི, ཨིམེ ཙཏྟཱརོ། ཏེ ཝིསེསེན དྭེ ཧོནྟི དིཊྛིཙརིཏོ ཙ ཏཎྷཱཙརིཏོ ཙ། ཨིམེ ཙཏྟཱརོ ཧུཏྭཱ ཏཡོ ཧོནྟི, ཏཡོ ཧུཏྭཱ དྭེ ཧོནྟི། ཨིམེསཾ དྭིནྣཾ པུགྒལཱནཾ ཨཡཾ སཾཀིལེསོ – ཨཝིཛྫཱ ཙ ཏཎྷཱ ཙ ཨཧིརཱིཀཉྩ ཨནོཏྟཔྤཉྩ ཨསཏི ཙ ཨསམྤཛཉྙཉྩ ནཱིཝརཎཱནི ཙ སཾཡོཛནཱནི ཙ ཨཛ྄ཛྷོསཱནཉྩ ཨབྷིནིཝེསོ ཙ ཨཧཾཀཱརོ ཙ མམཾཀཱརོ ཙ ཨསྶདྡྷིཡཉྩ དོཝཙསྶཏཱ ཙ ཀོསཛྫཉྩ ཨཡོནིསོམནསིཀཱརོ ཙ ཝིཙིཀིཙྪཱ ཙ ཨཝིཛྫཱ ཙ ཨསདྡྷམྨསྶཝནཉྩ ཨསམཱཔཏྟི ཙ།

    Tattha ye ime tayo puggalā ugghaṭitaññū vipañcitaññū neyyoti imesaṃ tiṇṇaṃ puggalānaṃ dve puggalā sukhāya paṭipadāya khippābhiññāya, sukhāya paṭipadāya dandhābhiññāya ca niyyanti, dveyeva puggalā dukkhāya paṭipadāya khippābhiññāya, dukkhāya paṭipadāya dandhābhiññāya ca niyyanti, ime cattāro. Te visesena dve honti diṭṭhicarito ca taṇhācarito ca. Ime cattāro hutvā tayo honti, tayo hutvā dve honti. Imesaṃ dvinnaṃ puggalānaṃ ayaṃ saṃkileso – avijjā ca taṇhā ca ahirīkañca anottappañca asati ca asampajaññañca nīvaraṇāni ca saṃyojanāni ca ajjhosānañca abhiniveso ca ahaṃkāro ca mamaṃkāro ca assaddhiyañca dovacassatā ca kosajjañca ayonisomanasikāro ca vicikicchā ca avijjā ca asaddhammassavanañca asamāpatti ca.

    ཏཏྠ ཨཝིཛྫཱ ཙ ཨཧིརཱིཀཉྩ ཨསཏི ཙ ནཱིཝརཎཱནི ཙ ཨཛ྄ཛྷོསཱནཉྩ ཨཧཾཀཱརོ ཙ ཨསྶདྡྷིཡཉྩ ཀོསཛྫཉྩ ཝིཙིཀིཙྪཱ ཙ ཨསདྡྷམྨསྶཝནཉྩ, ཨཡཾ ཨེཀཱ དིསཱ།

    Tattha avijjā ca ahirīkañca asati ca nīvaraṇāni ca ajjhosānañca ahaṃkāro ca assaddhiyañca kosajjañca vicikicchā ca asaddhammassavanañca, ayaṃ ekā disā.

    ཏཎྷཱ ཙ ཨནོཏྟཔྤཉྩ ཨསམྤཛཉྙཉྩ སཾཡོཛནཱནི ཙ ཨབྷིནིཝེསོ ཙ མམཾཀཱརོ ཙ དོཝཙསྶཏཱ ཙ ཨཡོནིསོམནསིཀཱརོ ཙ ཨཝིཛྫཱ ཙ ཨསམཱཔཏྟི ཙ, ཨཡཾ དུཏིཡཱ དིསཱ། དསནྣཾ དུཀཱནཾ དས པདཱནི པཋམཱ དིསཱཏི ཀཱཏབྦཱནི། སཾཁིཏྟེན ཨཏྠཾ ཉཱཔེནྟི པཊིཔཀྑེ ཀཎྷཔཀྑསྶ དསནྣཾ དུཀཱནཾ དས པདཱནི དུཏིཡཀཱནི, ཨཡཾ དུཏིཡཱ དིསཱ།

    Taṇhā ca anottappañca asampajaññañca saṃyojanāni ca abhiniveso ca mamaṃkāro ca dovacassatā ca ayonisomanasikāro ca avijjā ca asamāpatti ca, ayaṃ dutiyā disā. Dasannaṃ dukānaṃ dasa padāni paṭhamā disāti kātabbāni. Saṃkhittena atthaṃ ñāpenti paṭipakkhe kaṇhapakkhassa dasannaṃ dukānaṃ dasa padāni dutiyakāni, ayaṃ dutiyā disā.

    ཏཏྠ ཀཏམོ ཀུསལཔཀྑོ? སམཐོ ཙ ཝིཔསྶནཱ ཙ ཝིཛྫཱ ཙ ཙརཎཉྩ སཏི ཙ སམྤཛཉྙཉྩ ཧིརཱི ཙ ཨོཏྟཔྤཉྩ ཨཧཾཀཱརཔྤཧཱནཉྩ མམཾཀཱརཔྤཧཱནཉྩ སམྨཱཝཱཡཱམོ ཙ ཡོནིསོམནསིཀཱརོ ཙ སམྨཱསཏི ཙ སམྨཱསམཱདྷི ཙ པཉྙཱ ཙ ནིབྦིདཱ ཙ སམཱཔཏྟི ཙ སདྡྷམྨསྶཝནཉྩ སོམནསྶཉྩ དྷམྨཱནུདྷམྨཔཊིཔཏྟི ཙ།

    Tattha katamo kusalapakkho? Samatho ca vipassanā ca vijjā ca caraṇañca sati ca sampajaññañca hirī ca ottappañca ahaṃkārappahānañca mamaṃkārappahānañca sammāvāyāmo ca yonisomanasikāro ca sammāsati ca sammāsamādhi ca paññā ca nibbidā ca samāpatti ca saddhammassavanañca somanassañca dhammānudhammapaṭipatti ca.

    དསནྣཾ དུཀཱནཾ སམཐཱདཱིནི སོམནསྶཔརིཡོསཱནཱནི པཋམཱནི དས པདཱནི པཋམཱ དིསཱ, ཝིཔསྶནཱདཱིནི དྷམྨཱནུདྷམྨཔཊིཔཏྟིཔརིཡོསཱནཱནི དུཏིཡཱནི དས པདཱནི དུཏིཡཱ དིསཱ། ཨིཏི ཨཀུསལཔཀྑེ ཀུསལཔཀྑེ ཙ ནནྡིཡཱཝཊྚསྶ ནཡསྶ ཙཏསྶོ དིསཱ།

    Dasannaṃ dukānaṃ samathādīni somanassapariyosānāni paṭhamāni dasa padāni paṭhamā disā, vipassanādīni dhammānudhammapaṭipattipariyosānāni dutiyāni dasa padāni dutiyā disā. Iti akusalapakkhe kusalapakkhe ca nandiyāvaṭṭassa nayassa catasso disā.

    ཏཱསུ ཀུསལཔཀྑེ སམཐཱདཱིཧི ཨཀུསལཔཀྑེ ཏཎྷཱདཡོ པཧཱནཾ གཙྪནྟི, ཏེསཾ པཧཱནཱ རཱགཝིརཱགཱ ཙེཏོཝིམུཏྟི, ཀུསལཔཀྑེ ཝིཔསྶནཱདཱིཧི ཨཀུསལཔཀྑེ ཨཝིཛྫཱདཡོ པཧཱནཾ གཙྪནྟི, ཏེསཾ པཧཱནཱ ཨཝིཛྫཱཝིརཱགཱ པཉྙཱཝིམུཏྟི། ཨིཏི ཨིམཱ དྭེ ཝིམུཏྟིཡོ ནནྡིཡཱཝཊྚནཡེ པརིཡོསཱནཾ།

    Tāsu kusalapakkhe samathādīhi akusalapakkhe taṇhādayo pahānaṃ gacchanti, tesaṃ pahānā rāgavirāgā cetovimutti, kusalapakkhe vipassanādīhi akusalapakkhe avijjādayo pahānaṃ gacchanti, tesaṃ pahānā avijjāvirāgā paññāvimutti. Iti imā dve vimuttiyo nandiyāvaṭṭanaye pariyosānaṃ.

    ཏཏྠ ཏཎྷཱ ཨཝིཛྫཱ སམཐོ ཝིཔསྶནཱཏི ཙཏྟཱརི པདཱནི, ཏེསུ ཨཊྛཱརས མཱུལཔདཱནི སམོསརནྟི། ཀཐཾ? སམཐོ ཙ ཨལོབྷོ ཙ ཨདོསོ ཙ ཨསུབྷསཉྙཱ ཙ དུཀྑསཉྙཱ ཙཱཏི ཨིམཱནི པཉྩ པདཱནི སམཐཾ བྷཛནྟི, ཝིཔསྶནཱ ཙ ཨམོཧོ ཙ ཨནིཙྩསཉྙཱ ཙ ཨནཏྟསཉྙཱ ཙཱཏི ཨིམཱནི ཙཏྟཱརི པདཱནི ཝིཔསྶནཾ བྷཛནྟི། ཨེཝཾ ནཝ པདཱནི ཀུསལཱནི དྭཱིསུ པདེསུ སམོསརནྟི། ཏཎྷཱ ཙ ལོབྷོ ཙ དོསོ ཙ སུབྷསཉྙཱ ཙ སུཁསཉྙཱ ཙཱཏི ཨིམཱནི པཉྩ པདཱནི ཏཎྷཾ བྷཛནྟི, ཨཝིཛྫཱ ཙ མོཧོ ཙ ནིཙྩསཉྙཱ ཙ ཨཏྟསཉྙཱ ཙཱཏི ཨིམཱནི ཙཏྟཱརི པདཱནི ཨཝིཛྫཾ བྷཛནྟི། ཨེཝཾ ནཝ པདཱནི ཨཀུསལཱནི དྭཱིསུ པདེསུ སམོསརནྟི། ཨིཏི ཏིཔུཀྑལོ ཙ སཱིཧཝིཀྐཱིལི༹ཏོ ཙ ནནྡིཡཱཝཊྚནཡཾ ཨནུཔྤཝིསནྟི།

    Tattha taṇhā avijjā samatho vipassanāti cattāri padāni, tesu aṭṭhārasa mūlapadāni samosaranti. Kathaṃ? Samatho ca alobho ca adoso ca asubhasaññā ca dukkhasaññā cāti imāni pañca padāni samathaṃ bhajanti, vipassanā ca amoho ca aniccasaññā ca anattasaññā cāti imāni cattāri padāni vipassanaṃ bhajanti. Evaṃ nava padāni kusalāni dvīsu padesu samosaranti. Taṇhā ca lobho ca doso ca subhasaññā ca sukhasaññā cāti imāni pañca padāni taṇhaṃ bhajanti, avijjā ca moho ca niccasaññā ca attasaññā cāti imāni cattāri padāni avijjaṃ bhajanti. Evaṃ nava padāni akusalāni dvīsu padesu samosaranti. Iti tipukkhalo ca sīhavikkīḷito ca nandiyāvaṭṭanayaṃ anuppavisanti.

    ཀཐཾ ཏིཔུཀྑལེ ནཡེ ཨིཏརེ དྭེ ནཡཱ ཨནུཔྤཝིསནྟི? ཝིཔསྶནཱ ཙ ཨམོཧོ ཙ ཨནིཙྩསཉྙཱ ཙ ཨནཏྟསཉྙཱ ཙཱཏི ཨིམཱནི ཙཏྟཱརི པདཱནི ཨམོཧོ, སམཐོ ཙ ཨལོབྷོ ཙ ཨསུབྷསཉྙཱ ཙ དུཀྑསཉྙཱ ཙཱཏི ཨིམཱནི ཙཏྟཱརི པདཱནི ཨལོབྷོ, ཨདོསོ ཨདོསོ ཨེཝ། ཨེཝཾ ནཝ པདཱནི ཀུསལཱནི ཏཱིསུ པདེསུ སམོསརནྟི། ཏཎྷཱ ཙ ལོབྷོ ཙ སུབྷསཉྙཱ ཙ སུཁསཉྙཱ ཙཱཏི ཨིམཱནི ཙཏྟཱརི པདཱནི ལོབྷོ, ཨཝིཛྫཱ ཙ མོཧོ ཙ ནིཙྩསཉྙཱ ཙ ཨཏྟསཉྙཱ ཙཱཏི ཨིམཱནི ཙཏྟཱརི པདཱནི མོཧོ, དོསོ དོསོ ཨེཝ། ཨེཝཾ ནཝ པདཱནི ཨཀུསལཱནི ཏཱིསུ པདེསུ སམོསརནྟི། ཨིཏི ཏིཔུཀྑལེ ནཡེ ཨིཏརེ དྭེ ནཡཱ ཨནུཔྤཝིསནྟི།

    Kathaṃ tipukkhale naye itare dve nayā anuppavisanti? Vipassanā ca amoho ca aniccasaññā ca anattasaññā cāti imāni cattāri padāni amoho, samatho ca alobho ca asubhasaññā ca dukkhasaññā cāti imāni cattāri padāni alobho, adoso adoso eva. Evaṃ nava padāni kusalāni tīsu padesu samosaranti. Taṇhā ca lobho ca subhasaññā ca sukhasaññā cāti imāni cattāri padāni lobho, avijjā ca moho ca niccasaññā ca attasaññā cāti imāni cattāri padāni moho, doso doso eva. Evaṃ nava padāni akusalāni tīsu padesu samosaranti. Iti tipukkhale naye itare dve nayā anuppavisanti.

    ཀཐཾ ཙཏཱུསུ པདེསུ ཨཊྛཱརས མཱུལཔདཱནི སམོསརནྟི? ཏཎྷཱ ཙ སུབྷསཉྙཱ ཙ, ཨཡཾ པཋམོ ཝིཔལླཱསོ། ལོབྷོ ཙ སུཁསཉྙཱ ཙ, ཨཡཾ དུཏིཡོ ཝིཔལླཱསོ། ཨཝིཛྫཱ ཙ ནིཙྩསཉྙཱ ཙ, ཨཡཾ ཏཏིཡོ ཝིཔལླཱསོ། མོཧོ ཙ ཨཏྟསཉྙཱ ཙ, ཨཡཾ ཙཏུཏྠོ ཝིཔལླཱསོ། ཨིཏི ནཝ པདཱནི ཨཀུསལཱནི ཙཏཱུསུ པདེསུ སམོསརནྟི། སམཐོ ཙ ཨསུབྷསཉྙཱ ཙ པཋམཾ སཏིཔཊྛཱནཾ, ཨལོབྷོ ཙ དུཀྑསཉྙཱ ཙ དུཏིཡཾ སཏིཔཊྛཱནཾ, ཝིཔསྶནཱ ཙ ཨནིཙྩསཉྙཱ ཙ ཏཏིཡཾ སཏིཔཊྛཱནཾ, ཨམོཧོ ཙ ཨནཏྟསཉྙཱ ཙ ཙཏུཏྠཾ སཏིཔཊྛཱནཾ། ཨིཏི ནཝ པདཱནི ཀུསལཱནི ཙཏཱུསུ པདེསུ སམོསརནྟི། ཨེཝཾ སཱིཧཝིཀྐཱིལི༹ཏནཡེ ཨིཏརེ དྭེ ནཡཱ ཨནུཔྤཝིསནྟི། ཏིཎྞཉྷི ནཡཱནཾ ཡཱ བྷཱུམིཡོ གོཙརོ, སོ ཨེཀེཀཾ ནཡཾ ཨནུཔྤཝིསཏི། ཏསྨཱ ཨེཀེཀསྶ ནཡསྶ ཨཀུསལེ ཝཱ དྷམྨེ ཝིཉྙཱཏེ ཀུསལེ ཝཱ པཊིཔཀྑོ ཨནྭེསིཏབྦོ། པཊིཔཀྑཾ ཨནྭེསིཏྭཱ སོ ནཡོ ནིདྡིསིཏབྦོ། ཏམྷི ནཡེ ནིདྡིཊྛེ ཡཐཱ ཨེཀམྷི ནཡེ ཨིཏརེསཾ ནཡཱནཾ མཱུལཔདཱནི ཨནུཔྤཝིཊྛཱནི, ཏཏོ ཏཏོ ནཱིཧརིཏྭཱ ནིདྡིསིཏབྦཱནི། ཨེཀེཀསྨིཉྷི ནཡེ ཨཊྛཱརས མཱུལཔདཱནི ཨནུཔྤཝིཊྛཱནི།

    Kathaṃ catūsu padesu aṭṭhārasa mūlapadāni samosaranti? Taṇhā ca subhasaññā ca, ayaṃ paṭhamo vipallāso. Lobho ca sukhasaññā ca, ayaṃ dutiyo vipallāso. Avijjā ca niccasaññā ca, ayaṃ tatiyo vipallāso. Moho ca attasaññā ca, ayaṃ catuttho vipallāso. Iti nava padāni akusalāni catūsu padesu samosaranti. Samatho ca asubhasaññā ca paṭhamaṃ satipaṭṭhānaṃ, alobho ca dukkhasaññā ca dutiyaṃ satipaṭṭhānaṃ, vipassanā ca aniccasaññā ca tatiyaṃ satipaṭṭhānaṃ, amoho ca anattasaññā ca catutthaṃ satipaṭṭhānaṃ. Iti nava padāni kusalāni catūsu padesu samosaranti. Evaṃ sīhavikkīḷitanaye itare dve nayā anuppavisanti. Tiṇṇañhi nayānaṃ yā bhūmiyo gocaro, so ekekaṃ nayaṃ anuppavisati. Tasmā ekekassa nayassa akusale vā dhamme viññāte kusale vā paṭipakkho anvesitabbo. Paṭipakkhaṃ anvesitvā so nayo niddisitabbo. Tamhi naye niddiṭṭhe yathā ekamhi naye itaresaṃ nayānaṃ mūlapadāni anuppaviṭṭhāni, tato tato nīharitvā niddisitabbāni. Ekekasmiñhi naye aṭṭhārasa mūlapadāni anuppaviṭṭhāni.

    ཏཏྠ ཨེཀེཀསྨིཾ དྷམྨེ ཝིཉྙཱཏེ སབྦེ དྷམྨཱ ཝིཉྙཱཏཱ ཧོནྟི། ཨིམེསཾ ཏིཎྞཾ ནཡཱནཾ སཱིཧཝིཀྐཱིལི༹ཏསྶ ནཡསྶ ཙཏྟཱརི ཕལཱནི པརིཡོསཱནཾ པཋམཱཡ དིསཱཡ པཋམཾ ཕལཾ, དུཏིཡཱཡ དིསཱཡ དུཏིཡཾ ཕལཾ, ཏཏིཡཱཡ དིསཱཡ ཏཏིཡཾ ཕལཾ, ཙཏུཏྠཱཡ དིསཱཡ ཙཏུཏྠཾ ཕལཾ པརིཡོསཱནཾ།

    Tattha ekekasmiṃ dhamme viññāte sabbe dhammā viññātā honti. Imesaṃ tiṇṇaṃ nayānaṃ sīhavikkīḷitassa nayassa cattāri phalāni pariyosānaṃ paṭhamāya disāya paṭhamaṃ phalaṃ, dutiyāya disāya dutiyaṃ phalaṃ, tatiyāya disāya tatiyaṃ phalaṃ, catutthāya disāya catutthaṃ phalaṃ pariyosānaṃ.

    ཏིཔུཀྑལསྶ ནཡསྶ ཏཡོ ཝིམོཀྑཱ པརིཡོསཱནཾ པཋམཱཡ དིསཱཡ ཨཔྤཎིཧིཏོ, དུཏིཡཱཡ སུཉྙཏོ, ཏཏིཡཱཡ ཨནིམིཏྟོ ཝིམོཀྑོ པརིཡོསཱནཾ།

    Tipukkhalassa nayassa tayo vimokkhā pariyosānaṃ paṭhamāya disāya appaṇihito, dutiyāya suññato, tatiyāya animitto vimokkho pariyosānaṃ.

    ནནྡིཡཱཝཊྚསྶ ནཡསྶ དྭེ ཝིམུཏྟིཡོ པརིཡོསཱནཾ པཋམཱཡ དིསཱཡ ཏཎྷཱཝིརཱགཱ ཙེཏོཝིམུཏྟི, དུཏིཡཱཡ དིསཱཡ ཨཝིཛྫཱཝིརཱགཱ པཉྙཱཝིམུཏྟི པརིཡོསཱནཾ། ཨིམེསུ ཏཱིསུ ནཡེསུ ཡཱ ཨཊྛཱརསནྣཾ པདཱནཾ ཨཱལོཙནཱ, ཨཡཾ དིསཱལོཙནོ ནཡོ། ཡཱ ཨཱལོཀེཏྭཱ ཀུསལཔཀྑེ ཨཀུསལཔཀྑེ ཙ ‘‘ཨཡཾ དྷམྨོ ཨིམཾ དྷམྨཾ བྷཛཏཱི’’ཏི ཛཱནནྟེན སམྨཱ ཡོཛནཱ, ཨཡཾ ཨངྐུསོ ནཡོཏི ཨིམེ པཉྩ ནཡཱ།

    Nandiyāvaṭṭassa nayassa dve vimuttiyo pariyosānaṃ paṭhamāya disāya taṇhāvirāgā cetovimutti, dutiyāya disāya avijjāvirāgā paññāvimutti pariyosānaṃ. Imesu tīsu nayesu yā aṭṭhārasannaṃ padānaṃ ālocanā, ayaṃ disālocano nayo. Yā āloketvā kusalapakkhe akusalapakkhe ca ‘‘ayaṃ dhammo imaṃ dhammaṃ bhajatī’’ti jānantena sammā yojanā, ayaṃ aṅkuso nayoti ime pañca nayā.

    ནཡསམུཊྛཱནཝཱརཝཎྞནཱ ནིཊྛིཏཱ།

    Nayasamuṭṭhānavāravaṇṇanā niṭṭhitā.




    Next: སཱསནཔཊྛཱནཝཱརཝཎྞནཱ • Sāsanapaṭṭhānavāravaṇṇanā




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ནེཏྟིཔྤཀརཎཔཱལི༹ • Nettippakaraṇapāḷi / ནཡསམུཊྛཱནཾ • Nayasamuṭṭhānaṃ

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཔྤཀརཎ-ཊཱིཀཱ • Nettippakaraṇa-ṭīkā / ནཡསམུཊྛཱནཝཱརཝཎྞནཱ • Nayasamuṭṭhānavāravaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཝིབྷཱཝིནཱི • Nettivibhāvinī / ནཡསམུཊྛཱནཝིབྷཱཝནཱ • Nayasamuṭṭhānavibhāvanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact