| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
9. நயதா²சித்தஸ்ஸ வாசாதிகதா²வண்ணனா
9. Nayathācittassa vācātikathāvaṇṇanā
564. இதா³னி நயதா²சித்தஸ்ஸ வாசாதிகதா² நாம ஹோதி. தத்த² யஸ்மா கோசி அஞ்ஞங் ப⁴ணிஸ்ஸாமீதி அஞ்ஞங் ப⁴ணதி, தஸ்மா நயதா²சித்தஸ்ஸ வாசா சித்தானுரூபா சித்தானுக³திகா ந ஹோதி, வினாபி சித்தேன பவத்ததீதி யேஸங் லத்³தி⁴; ஸெய்யதா²பி புப்³ப³ஸேலியானங்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் ‘‘யதி³ தங்ஸமுட்டா²பகங் சித்தங் ந ஸியா, ப²ஸ்ஸாத³யோபி தஸ்மிங் க²ணே ந ஸியு’’ந்தி சோதே³துங் அப²ஸ்ஸகஸ்ஸாதிஆதி³மாஹ. ந ப⁴ணிதுகாமோதிஆதீ³ஸு யஸ்மா அஞ்ஞங் ப⁴ணிஸ்ஸாமீதி அஞ்ஞங் ப⁴ணந்தோபி ப⁴ணிதுகாமோயேவ நாம ஹோதி, தஸ்மா ந ஹேவாதி படிக்கி²பதி.
564. Idāni nayathācittassa vācātikathā nāma hoti. Tattha yasmā koci aññaṃ bhaṇissāmīti aññaṃ bhaṇati, tasmā nayathācittassa vācā cittānurūpā cittānugatikā na hoti, vināpi cittena pavattatīti yesaṃ laddhi; seyyathāpi pubbaseliyānaṃ; te sandhāya pucchā sakavādissa, paṭiññā itarassa. Atha naṃ ‘‘yadi taṃsamuṭṭhāpakaṃ cittaṃ na siyā, phassādayopi tasmiṃ khaṇe na siyu’’nti codetuṃ aphassakassātiādimāha. Na bhaṇitukāmotiādīsu yasmā aññaṃ bhaṇissāmīti aññaṃ bhaṇantopi bhaṇitukāmoyeva nāma hoti, tasmā na hevāti paṭikkhipati.
565. நனு அத்தி² கோசி அஞ்ஞங் ப⁴ணிஸ்ஸாமீதிஆதீ³ஸு சீவரந்தி ப⁴ணிதுகாமோ சீரந்தி ப⁴ணெய்ய. தத்த² அஞ்ஞங் ப⁴ணிதுகாமதாசித்தங், அஞ்ஞங் ப⁴ணனசித்தங், இதி புப்³ப³பா⁴கே³ன சித்தேன அஸதி³ஸத்தா அயதா²சித்தோ நாம ஹோதி, தேனஸ்ஸ கேவலங் அனாபத்தி நாம ஹோதி, ந பன சீரந்தி வசனஸமுட்டா²பகசித்தங் நத்தி², இதி அசித்தகா ஸா வாசாதி அத்த²ங் ஸந்தா⁴ய இமினா உதா³ஹரணேன ‘‘நயதா²சித்தஸ்ஸ வாசா’’தி பதிட்டா²பிதாபி அப்பதிட்டா²பிதாவ ஹோதீதி.
565. Nanu atthi koci aññaṃ bhaṇissāmītiādīsu cīvaranti bhaṇitukāmo cīranti bhaṇeyya. Tattha aññaṃ bhaṇitukāmatācittaṃ, aññaṃ bhaṇanacittaṃ, iti pubbabhāgena cittena asadisattā ayathācitto nāma hoti, tenassa kevalaṃ anāpatti nāma hoti, na pana cīranti vacanasamuṭṭhāpakacittaṃ natthi, iti acittakā sā vācāti atthaṃ sandhāya iminā udāharaṇena ‘‘nayathācittassa vācā’’ti patiṭṭhāpitāpi appatiṭṭhāpitāva hotīti.
நயதா²சித்தஸ்ஸ வாசாதிகதா²வண்ணனா.
Nayathācittassa vācātikathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (92) 9. ந யதா²சித்தஸ்ஸ வாசாதிகதா² • (92) 9. Na yathācittassa vācātikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 9. நயதா²சித்தஸ்ஸவாசாதிகதா²வண்ணனா • 9. Nayathācittassavācātikathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 9. நயதா²சித்தஸ்ஸவாசாதிகதா²வண்ணனா • 9. Nayathācittassavācātikathāvaṇṇanā
