| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৯. নযথাচিত্তস্স ৰাচাতিকথাৰণ্ণনা
9. Nayathācittassa vācātikathāvaṇṇanā
৫৬৪. ইদানি নযথাচিত্তস্স ৰাচাতিকথা নাম হোতি। তত্থ যস্মা কোচি অঞ্ঞং ভণিস্সামীতি অঞ্ঞং ভণতি, তস্মা নযথাচিত্তস্স ৰাচা চিত্তানুরূপা চিত্তানুগতিকা ন হোতি, ৰিনাপি চিত্তেন পৰত্ততীতি যেসং লদ্ধি; সেয্যথাপি পুব্বসেলিযানং; তে সন্ধায পুচ্ছা সকৰাদিস্স, পটিঞ্ঞা ইতরস্স। অথ নং ‘‘যদি তংসমুট্ঠাপকং চিত্তং ন সিযা, ফস্সাদযোপি তস্মিং খণে ন সিযু’’ন্তি চোদেতুং অফস্সকস্সাতিআদিমাহ। ন ভণিতুকামোতিআদীসু যস্মা অঞ্ঞং ভণিস্সামীতি অঞ্ঞং ভণন্তোপি ভণিতুকামোযেৰ নাম হোতি, তস্মা ন হেৰাতি পটিক্খিপতি।
564. Idāni nayathācittassa vācātikathā nāma hoti. Tattha yasmā koci aññaṃ bhaṇissāmīti aññaṃ bhaṇati, tasmā nayathācittassa vācā cittānurūpā cittānugatikā na hoti, vināpi cittena pavattatīti yesaṃ laddhi; seyyathāpi pubbaseliyānaṃ; te sandhāya pucchā sakavādissa, paṭiññā itarassa. Atha naṃ ‘‘yadi taṃsamuṭṭhāpakaṃ cittaṃ na siyā, phassādayopi tasmiṃ khaṇe na siyu’’nti codetuṃ aphassakassātiādimāha. Na bhaṇitukāmotiādīsu yasmā aññaṃ bhaṇissāmīti aññaṃ bhaṇantopi bhaṇitukāmoyeva nāma hoti, tasmā na hevāti paṭikkhipati.
৫৬৫. ননু অত্থি কোচি অঞ্ঞং ভণিস্সামীতিআদীসু চীৰরন্তি ভণিতুকামো চীরন্তি ভণেয্য। তত্থ অঞ্ঞং ভণিতুকামতাচিত্তং, অঞ্ঞং ভণনচিত্তং, ইতি পুব্বভাগেন চিত্তেন অসদিসত্তা অযথাচিত্তো নাম হোতি, তেনস্স কেৰলং অনাপত্তি নাম হোতি, ন পন চীরন্তি ৰচনসমুট্ঠাপকচিত্তং নত্থি, ইতি অচিত্তকা সা ৰাচাতি অত্থং সন্ধায ইমিনা উদাহরণেন ‘‘নযথাচিত্তস্স ৰাচা’’তি পতিট্ঠাপিতাপি অপ্পতিট্ঠাপিতাৰ হোতীতি।
565. Nanu atthi koci aññaṃ bhaṇissāmītiādīsu cīvaranti bhaṇitukāmo cīranti bhaṇeyya. Tattha aññaṃ bhaṇitukāmatācittaṃ, aññaṃ bhaṇanacittaṃ, iti pubbabhāgena cittena asadisattā ayathācitto nāma hoti, tenassa kevalaṃ anāpatti nāma hoti, na pana cīranti vacanasamuṭṭhāpakacittaṃ natthi, iti acittakā sā vācāti atthaṃ sandhāya iminā udāharaṇena ‘‘nayathācittassa vācā’’ti patiṭṭhāpitāpi appatiṭṭhāpitāva hotīti.
নযথাচিত্তস্স ৰাচাতিকথাৰণ্ণনা।
Nayathācittassa vācātikathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৯২) ৯. ন যথাচিত্তস্স ৰাচাতিকথা • (92) 9. Na yathācittassa vācātikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৯. নযথাচিত্তস্সৰাচাতিকথাৰণ্ণনা • 9. Nayathācittassavācātikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৯. নযথাচিত্তস্সৰাচাতিকথাৰণ্ণনা • 9. Nayathācittassavācātikathāvaṇṇanā
