| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
6. நேரயிகக்³கி³உண்ஹபா⁴வபஞ்ஹோ
6. Nerayikaggiuṇhabhāvapañho
6. ராஜா ஆஹ ‘‘ப⁴ந்தே நாக³ஸேன, தும்ஹே ப⁴ணத² ‘பாகதிகஅக்³கி³தோ நேரயிகோ அக்³கி³ மஹாபி⁴தாபதரோ ஹோதி, கு²த்³த³கோபி பாஸாணோ பாகதிகே அக்³கி³ம்ஹி பக்கி²த்தோ தி³வஸம்பி பச்சமானோ 1 ந விலயங் க³ச்ச²தி, கூடாகா³ரமத்தோபி பாஸாணோ நேரயிகக்³கி³ம்ஹி பக்கி²த்தோ க²ணேன விலயங் க³ச்ச²தீ’தி, ஏதங் வசனங் ந ஸத்³த³ஹாமி, ஏவஞ்ச பன வதே³த² ‘யே ச தத்த² உப்பன்னா ஸத்தா, தே அனேகானிபி வஸ்ஸஸஹஸ்ஸானி நிரயே பச்சமானா ந விலயங் க³ச்ச²ந்தீ’தி, தம்பி வசனங் ந ஸத்³த³ஹாமீ’’தி.
6. Rājā āha ‘‘bhante nāgasena, tumhe bhaṇatha ‘pākatikaaggito nerayiko aggi mahābhitāpataro hoti, khuddakopi pāsāṇo pākatike aggimhi pakkhitto divasampi paccamāno 2 na vilayaṃ gacchati, kūṭāgāramattopi pāsāṇo nerayikaggimhi pakkhitto khaṇena vilayaṃ gacchatī’ti, etaṃ vacanaṃ na saddahāmi, evañca pana vadetha ‘ye ca tattha uppannā sattā, te anekānipi vassasahassāni niraye paccamānā na vilayaṃ gacchantī’ti, tampi vacanaṃ na saddahāmī’’ti.
தே²ரோ ஆஹ ‘‘தங் கிங் மஞ்ஞஸி, மஹாராஜ, யா தா ஸந்தி மகரினியோபி ஸுஸுமாரினியோபி கச்ச²பினியோபி மோரினியோபி கபோதினியோபி, கிங்னு தா கக்க²ளானி பாஸாணானி ஸக்க²ராயோ ச கா²த³ந்தீ’’தி? ‘‘ஆம, ப⁴ந்தே, கா²த³ந்தீ’’தி. ‘‘கிங் பன தானி தாஸங் குச்சி²யங் கொட்ட²ப்³ப⁴ந்தரக³தானி விலயங் க³ச்ச²ந்தீ’’தி? ‘‘ஆம, ப⁴ந்தே, விலயங் க³ச்ச²ந்தீ’’தி. ‘‘யோ பன தாஸங் குச்சி²யங் க³ப்³போ⁴, ஸோபி விலயங் க³ச்ச²தீ’’தி? ‘‘ந ஹி ப⁴ந்தே’’தி. ‘‘கேன காரணேனா’’தி? ‘‘மஞ்ஞாமி, ப⁴ந்தே, கம்மாதி⁴கதேன ந விலயங் க³ச்ச²தீ’’தி. ‘‘ஏவமேவ கோ², மஹாராஜ, கம்மாதி⁴கதேன நேரயிகா ஸத்தா அனேகானிபி வஸ்ஸஸஹஸ்ஸானி நிரயே பச்சமானா ந விலயங் க³ச்ச²ந்தி. பா⁴ஸிதம்பேதங், மஹாராஜ, ப⁴க³வதா – ‘ஸோ ந தாவ காலங் கரோதி, யாவ ந தங் பாபகம்மங் ப்³யந்தீஹோதீ’’’தி.
Thero āha ‘‘taṃ kiṃ maññasi, mahārāja, yā tā santi makariniyopi susumāriniyopi kacchapiniyopi moriniyopi kapotiniyopi, kiṃnu tā kakkhaḷāni pāsāṇāni sakkharāyo ca khādantī’’ti? ‘‘Āma, bhante, khādantī’’ti. ‘‘Kiṃ pana tāni tāsaṃ kucchiyaṃ koṭṭhabbhantaragatāni vilayaṃ gacchantī’’ti? ‘‘Āma, bhante, vilayaṃ gacchantī’’ti. ‘‘Yo pana tāsaṃ kucchiyaṃ gabbho, sopi vilayaṃ gacchatī’’ti? ‘‘Na hi bhante’’ti. ‘‘Kena kāraṇenā’’ti? ‘‘Maññāmi, bhante, kammādhikatena na vilayaṃ gacchatī’’ti. ‘‘Evameva kho, mahārāja, kammādhikatena nerayikā sattā anekānipi vassasahassāni niraye paccamānā na vilayaṃ gacchanti. Bhāsitampetaṃ, mahārāja, bhagavatā – ‘so na tāva kālaṃ karoti, yāva na taṃ pāpakammaṃ byantīhotī’’’ti.
‘‘பி⁴ய்யோ ஓபம்மங் கரோஹீ’’தி. ‘‘தங் கிங் மஞ்ஞஸி, மஹாராஜ, யா தா ஸந்தி ஸீஹினியோபி ப்³யக்³கி⁴னியோபி தீ³பினியோபி குக்குரினியோபி, கிங்னு தா கக்க²ளானி அட்டி²கானி மங்ஸானி கா²த³ந்தீதி? ‘‘ஆம, ப⁴ந்தே, கா²த³ந்தீ’’தி. ‘‘கிங் பன தானி தாஸங் குச்சி²யங் கொட்ட²ப்³ப⁴ந்தரக³தானி விலயங் க³ச்ச²ந்தீ’’தி? ‘‘ஆம, ப⁴ந்தே, விலயங் க³ச்ச²ந்தீ’’தி. ‘‘யோ பன தாஸங் குச்சி²யங் க³ப்³போ⁴, ஸோபி விலயங் க³ச்ச²தீ’’தி? ‘‘ந ஹி ப⁴ந்தே’’தி. ‘‘கேன காரணேனா’’தி? ‘‘மஞ்ஞாமி, ப⁴ந்தே, கம்மாதி⁴கதேன ந விலயங் க³ச்ச²தீ’’தி. ‘‘ஏவமேவ கோ², மஹாராஜ, கம்மாதி⁴கதேன நேரயிகா ஸத்தா அனேகானிபி வஸ்ஸஸஹஸ்ஸானி நிரயே பச்சமானா ந விலயங் க³ச்ச²ந்தீ’’தி.
‘‘Bhiyyo opammaṃ karohī’’ti. ‘‘Taṃ kiṃ maññasi, mahārāja, yā tā santi sīhiniyopi byagghiniyopi dīpiniyopi kukkuriniyopi, kiṃnu tā kakkhaḷāni aṭṭhikāni maṃsāni khādantīti? ‘‘Āma, bhante, khādantī’’ti. ‘‘Kiṃ pana tāni tāsaṃ kucchiyaṃ koṭṭhabbhantaragatāni vilayaṃ gacchantī’’ti? ‘‘Āma, bhante, vilayaṃ gacchantī’’ti. ‘‘Yo pana tāsaṃ kucchiyaṃ gabbho, sopi vilayaṃ gacchatī’’ti? ‘‘Na hi bhante’’ti. ‘‘Kena kāraṇenā’’ti? ‘‘Maññāmi, bhante, kammādhikatena na vilayaṃ gacchatī’’ti. ‘‘Evameva kho, mahārāja, kammādhikatena nerayikā sattā anekānipi vassasahassāni niraye paccamānā na vilayaṃ gacchantī’’ti.
‘‘பி⁴ய்யோ ஓபம்மங் கரோஹீ’’தி. ‘‘தங் கிங் மஞ்ஞஸி, மஹாராஜ, யா தா ஸந்தி யோனகஸுகு²மாலினியோபி க²த்தியஸுகு²மாலினியோபி ப்³ராஹ்மணஸுகு²மாலினியோபி க³ஹபதிஸுகு²மாலினியோபி, கிங்னு தா கக்க²ளானி க²ஜ்ஜகானி மங்ஸானி கா²த³ந்தீ’’தி? ‘‘ஆம, ப⁴ந்தே, கா²த³ந்தீ’’தி. ‘‘கிங் பன தானி தாஸங் குச்சி²யங் கொட்ட²ப்³ப⁴ந்தரக³தானி விலயங் க³ச்ச²ந்தீ’’தி? ‘‘ஆம, ப⁴ந்தே, விலயங் க³ச்ச²ந்தீ’’தி. ‘‘யோ பன தாஸங் குச்சி²யங் க³ப்³போ⁴ ஸோபி விலயங் க³ச்ச²தீ’’தி? ‘‘ந ஹி ப⁴ந்தே’’தி. ‘‘கேன காரணேனா’’தி. ‘‘மஞ்ஞாமி, ப⁴ந்தே, கம்மாதி⁴கதேன ந விலயங் க³ச்ச²தீ’’தி. ‘‘ஏவமேவ கோ², மஹாராஜ, கம்மாதி⁴கதேன நேரயிகா ஸத்தா அனேகானிபி வஸ்ஸஸஹஸ்ஸானி நிரயே பச்சமானா ந விலயங் க³ச்ச²ந்தி. பா⁴ஸிதம்பேதங், மஹாராஜ, ப⁴க³வதா – ‘‘ஸோ ந தாவ காலங் கரோதி, யாவ ந தங் பாபகம்மங் ப்³யந்தீஹோதீ’’தி.
‘‘Bhiyyo opammaṃ karohī’’ti. ‘‘Taṃ kiṃ maññasi, mahārāja, yā tā santi yonakasukhumāliniyopi khattiyasukhumāliniyopi brāhmaṇasukhumāliniyopi gahapatisukhumāliniyopi, kiṃnu tā kakkhaḷāni khajjakāni maṃsāni khādantī’’ti? ‘‘Āma, bhante, khādantī’’ti. ‘‘Kiṃ pana tāni tāsaṃ kucchiyaṃ koṭṭhabbhantaragatāni vilayaṃ gacchantī’’ti? ‘‘Āma, bhante, vilayaṃ gacchantī’’ti. ‘‘Yo pana tāsaṃ kucchiyaṃ gabbho sopi vilayaṃ gacchatī’’ti? ‘‘Na hi bhante’’ti. ‘‘Kena kāraṇenā’’ti. ‘‘Maññāmi, bhante, kammādhikatena na vilayaṃ gacchatī’’ti. ‘‘Evameva kho, mahārāja, kammādhikatena nerayikā sattā anekānipi vassasahassāni niraye paccamānā na vilayaṃ gacchanti. Bhāsitampetaṃ, mahārāja, bhagavatā – ‘‘so na tāva kālaṃ karoti, yāva na taṃ pāpakammaṃ byantīhotī’’ti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
நேரயிகக்³கி³உண்ஹபா⁴வபஞ்ஹோ ச²ட்டோ².
Nerayikaggiuṇhabhāvapañho chaṭṭho.
Footnotes:
