| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༦. ནེརཡིཀགྒིཨུཎྷབྷཱཝཔཉྷོ
6. Nerayikaggiuṇhabhāvapañho
༦. རཱཛཱ ཨཱཧ ‘‘བྷནྟེ ནཱགསེན, ཏུམྷེ བྷཎཐ ‘པཱཀཏིཀཨགྒིཏོ ནེརཡིཀོ ཨགྒི མཧཱབྷིཏཱཔཏརོ ཧོཏི, ཁུདྡཀོཔི པཱསཱཎོ པཱཀཏིཀེ ཨགྒིམྷི པཀྑིཏྟོ དིཝསམྤི པཙྩམཱནོ 1 ན ཝིལཡཾ གཙྪཏི, ཀཱུཊཱགཱརམཏྟོཔི པཱསཱཎོ ནེརཡིཀགྒིམྷི པཀྑིཏྟོ ཁཎེན ཝིལཡཾ གཙྪཏཱི’ཏི, ཨེཏཾ ཝཙནཾ ན སདྡཧཱམི, ཨེཝཉྩ པན ཝདེཐ ‘ཡེ ཙ ཏཏྠ ཨུཔྤནྣཱ སཏྟཱ, ཏེ ཨནེཀཱནིཔི ཝསྶསཧསྶཱནི ནིརཡེ པཙྩམཱནཱ ན ཝིལཡཾ གཙྪནྟཱི’ཏི, ཏམྤི ཝཙནཾ ན སདྡཧཱམཱི’’ཏི།
6. Rājā āha ‘‘bhante nāgasena, tumhe bhaṇatha ‘pākatikaaggito nerayiko aggi mahābhitāpataro hoti, khuddakopi pāsāṇo pākatike aggimhi pakkhitto divasampi paccamāno 2 na vilayaṃ gacchati, kūṭāgāramattopi pāsāṇo nerayikaggimhi pakkhitto khaṇena vilayaṃ gacchatī’ti, etaṃ vacanaṃ na saddahāmi, evañca pana vadetha ‘ye ca tattha uppannā sattā, te anekānipi vassasahassāni niraye paccamānā na vilayaṃ gacchantī’ti, tampi vacanaṃ na saddahāmī’’ti.
ཐེརོ ཨཱཧ ‘‘ཏཾ ཀིཾ མཉྙསི, མཧཱརཱཛ, ཡཱ ཏཱ སནྟི མཀརིནིཡོཔི སུསུམཱརིནིཡོཔི ཀཙྪཔིནིཡོཔི མོརིནིཡོཔི ཀཔོཏིནིཡོཔི, ཀིཾནུ ཏཱ ཀཀྑལཱ༹ནི པཱསཱཎཱནི སཀྑརཱཡོ ཙ ཁཱདནྟཱི’’ཏི? ‘‘ཨཱམ, བྷནྟེ, ཁཱདནྟཱི’’ཏི། ‘‘ཀིཾ པན ཏཱནི ཏཱསཾ ཀུཙྪིཡཾ ཀོཊྛབྦྷནྟརགཏཱནི ཝིལཡཾ གཙྪནྟཱི’’ཏི? ‘‘ཨཱམ, བྷནྟེ, ཝིལཡཾ གཙྪནྟཱི’’ཏི། ‘‘ཡོ པན ཏཱསཾ ཀུཙྪིཡཾ གབྦྷོ, སོཔི ཝིལཡཾ གཙྪཏཱི’’ཏི? ‘‘ན ཧི བྷནྟེ’’ཏི། ‘‘ཀེན ཀཱརཎེནཱ’’ཏི? ‘‘མཉྙཱམི, བྷནྟེ, ཀམྨཱདྷིཀཏེན ན ཝིལཡཾ གཙྪཏཱི’’ཏི། ‘‘ཨེཝམེཝ ཁོ, མཧཱརཱཛ, ཀམྨཱདྷིཀཏེན ནེརཡིཀཱ སཏྟཱ ཨནེཀཱནིཔི ཝསྶསཧསྶཱནི ནིརཡེ པཙྩམཱནཱ ན ཝིལཡཾ གཙྪནྟི། བྷཱསིཏམྤེཏཾ, མཧཱརཱཛ, བྷགཝཏཱ – ‘སོ ན ཏཱཝ ཀཱལཾ ཀརོཏི, ཡཱཝ ན ཏཾ པཱཔཀམྨཾ བྱནྟཱིཧོཏཱི’’’ཏི།
Thero āha ‘‘taṃ kiṃ maññasi, mahārāja, yā tā santi makariniyopi susumāriniyopi kacchapiniyopi moriniyopi kapotiniyopi, kiṃnu tā kakkhaḷāni pāsāṇāni sakkharāyo ca khādantī’’ti? ‘‘Āma, bhante, khādantī’’ti. ‘‘Kiṃ pana tāni tāsaṃ kucchiyaṃ koṭṭhabbhantaragatāni vilayaṃ gacchantī’’ti? ‘‘Āma, bhante, vilayaṃ gacchantī’’ti. ‘‘Yo pana tāsaṃ kucchiyaṃ gabbho, sopi vilayaṃ gacchatī’’ti? ‘‘Na hi bhante’’ti. ‘‘Kena kāraṇenā’’ti? ‘‘Maññāmi, bhante, kammādhikatena na vilayaṃ gacchatī’’ti. ‘‘Evameva kho, mahārāja, kammādhikatena nerayikā sattā anekānipi vassasahassāni niraye paccamānā na vilayaṃ gacchanti. Bhāsitampetaṃ, mahārāja, bhagavatā – ‘so na tāva kālaṃ karoti, yāva na taṃ pāpakammaṃ byantīhotī’’’ti.
‘‘བྷིཡྻོ ཨོཔམྨཾ ཀརོཧཱི’’ཏི། ‘‘ཏཾ ཀིཾ མཉྙསི, མཧཱརཱཛ, ཡཱ ཏཱ སནྟི སཱིཧིནིཡོཔི བྱགྒྷིནིཡོཔི དཱིཔིནིཡོཔི ཀུཀྐུརིནིཡོཔི, ཀིཾནུ ཏཱ ཀཀྑལཱ༹ནི ཨཊྛིཀཱནི མཾསཱནི ཁཱདནྟཱིཏི? ‘‘ཨཱམ, བྷནྟེ, ཁཱདནྟཱི’’ཏི། ‘‘ཀིཾ པན ཏཱནི ཏཱསཾ ཀུཙྪིཡཾ ཀོཊྛབྦྷནྟརགཏཱནི ཝིལཡཾ གཙྪནྟཱི’’ཏི? ‘‘ཨཱམ, བྷནྟེ, ཝིལཡཾ གཙྪནྟཱི’’ཏི། ‘‘ཡོ པན ཏཱསཾ ཀུཙྪིཡཾ གབྦྷོ, སོཔི ཝིལཡཾ གཙྪཏཱི’’ཏི? ‘‘ན ཧི བྷནྟེ’’ཏི། ‘‘ཀེན ཀཱརཎེནཱ’’ཏི? ‘‘མཉྙཱམི, བྷནྟེ, ཀམྨཱདྷིཀཏེན ན ཝིལཡཾ གཙྪཏཱི’’ཏི། ‘‘ཨེཝམེཝ ཁོ, མཧཱརཱཛ, ཀམྨཱདྷིཀཏེན ནེརཡིཀཱ སཏྟཱ ཨནེཀཱནིཔི ཝསྶསཧསྶཱནི ནིརཡེ པཙྩམཱནཱ ན ཝིལཡཾ གཙྪནྟཱི’’ཏི།
‘‘Bhiyyo opammaṃ karohī’’ti. ‘‘Taṃ kiṃ maññasi, mahārāja, yā tā santi sīhiniyopi byagghiniyopi dīpiniyopi kukkuriniyopi, kiṃnu tā kakkhaḷāni aṭṭhikāni maṃsāni khādantīti? ‘‘Āma, bhante, khādantī’’ti. ‘‘Kiṃ pana tāni tāsaṃ kucchiyaṃ koṭṭhabbhantaragatāni vilayaṃ gacchantī’’ti? ‘‘Āma, bhante, vilayaṃ gacchantī’’ti. ‘‘Yo pana tāsaṃ kucchiyaṃ gabbho, sopi vilayaṃ gacchatī’’ti? ‘‘Na hi bhante’’ti. ‘‘Kena kāraṇenā’’ti? ‘‘Maññāmi, bhante, kammādhikatena na vilayaṃ gacchatī’’ti. ‘‘Evameva kho, mahārāja, kammādhikatena nerayikā sattā anekānipi vassasahassāni niraye paccamānā na vilayaṃ gacchantī’’ti.
‘‘བྷིཡྻོ ཨོཔམྨཾ ཀརོཧཱི’’ཏི། ‘‘ཏཾ ཀིཾ མཉྙསི, མཧཱརཱཛ, ཡཱ ཏཱ སནྟི ཡོནཀསུཁུམཱལིནིཡོཔི ཁཏྟིཡསུཁུམཱལིནིཡོཔི བྲཱཧྨཎསུཁུམཱལིནིཡོཔི གཧཔཏིསུཁུམཱལིནིཡོཔི, ཀིཾནུ ཏཱ ཀཀྑལཱ༹ནི ཁཛྫཀཱནི མཾསཱནི ཁཱདནྟཱི’’ཏི? ‘‘ཨཱམ, བྷནྟེ, ཁཱདནྟཱི’’ཏི། ‘‘ཀིཾ པན ཏཱནི ཏཱསཾ ཀུཙྪིཡཾ ཀོཊྛབྦྷནྟརགཏཱནི ཝིལཡཾ གཙྪནྟཱི’’ཏི? ‘‘ཨཱམ, བྷནྟེ, ཝིལཡཾ གཙྪནྟཱི’’ཏི། ‘‘ཡོ པན ཏཱསཾ ཀུཙྪིཡཾ གབྦྷོ སོཔི ཝིལཡཾ གཙྪཏཱི’’ཏི? ‘‘ན ཧི བྷནྟེ’’ཏི། ‘‘ཀེན ཀཱརཎེནཱ’’ཏི། ‘‘མཉྙཱམི, བྷནྟེ, ཀམྨཱདྷིཀཏེན ན ཝིལཡཾ གཙྪཏཱི’’ཏི། ‘‘ཨེཝམེཝ ཁོ, མཧཱརཱཛ, ཀམྨཱདྷིཀཏེན ནེརཡིཀཱ སཏྟཱ ཨནེཀཱནིཔི ཝསྶསཧསྶཱནི ནིརཡེ པཙྩམཱནཱ ན ཝིལཡཾ གཙྪནྟི། བྷཱསིཏམྤེཏཾ, མཧཱརཱཛ, བྷགཝཏཱ – ‘‘སོ ན ཏཱཝ ཀཱལཾ ཀརོཏི, ཡཱཝ ན ཏཾ པཱཔཀམྨཾ བྱནྟཱིཧོཏཱི’’ཏི།
‘‘Bhiyyo opammaṃ karohī’’ti. ‘‘Taṃ kiṃ maññasi, mahārāja, yā tā santi yonakasukhumāliniyopi khattiyasukhumāliniyopi brāhmaṇasukhumāliniyopi gahapatisukhumāliniyopi, kiṃnu tā kakkhaḷāni khajjakāni maṃsāni khādantī’’ti? ‘‘Āma, bhante, khādantī’’ti. ‘‘Kiṃ pana tāni tāsaṃ kucchiyaṃ koṭṭhabbhantaragatāni vilayaṃ gacchantī’’ti? ‘‘Āma, bhante, vilayaṃ gacchantī’’ti. ‘‘Yo pana tāsaṃ kucchiyaṃ gabbho sopi vilayaṃ gacchatī’’ti? ‘‘Na hi bhante’’ti. ‘‘Kena kāraṇenā’’ti. ‘‘Maññāmi, bhante, kammādhikatena na vilayaṃ gacchatī’’ti. ‘‘Evameva kho, mahārāja, kammādhikatena nerayikā sattā anekānipi vassasahassāni niraye paccamānā na vilayaṃ gacchanti. Bhāsitampetaṃ, mahārāja, bhagavatā – ‘‘so na tāva kālaṃ karoti, yāva na taṃ pāpakammaṃ byantīhotī’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
ནེརཡིཀགྒིཨུཎྷབྷཱཝཔཉྷོ ཚཊྛོ།
Nerayikaggiuṇhabhāvapañho chaṭṭho.
Footnotes:
