| Library / Tipiṭaka / д̇ибидага • Tipiṭaka / д̇хаммасан̇г̇ан̣и-адтагат̇аа • Dhammasaṅgaṇi-aṭṭhakathā |
нзвасан̃н̃аанаасан̃н̃ааяад̇анам̣
Nevasaññānāsaññāyatanaṃ
аагин̃жан̃н̃ааяад̇анам̣ самад̇иггаммаад̇и зд̇т̇ааби буб̣б̣з вуд̇д̇анаязнзва аагин̃жан̃н̃ам̣ ааяад̇анамасса ад̇хидтаанадтзнаад̇и жхаанамби аагин̃жан̃н̃ааяад̇анам̣. вуд̇д̇анаязнзва аарамман̣амби. звамзд̇ам̣ жхаанан̃жа аарамман̣ан̃жаад̇и убхаяамби аббавад̇д̇игаран̣зна жа аманасигаран̣з жа самад̇иггамид̇ваава яасмаа ид̣̇ам̣ нзвасан̃н̃аанаасан̃н̃ааяад̇анам̣ убасамбаж̇ж̇а вихаад̇аб̣б̣ам̣, д̇асмаа убхаяамбзд̇ам̣ згаж̇жхам̣ гад̇ваа ‘аагин̃жан̃н̃ааяад̇анам̣ самад̇иггаммаа’д̇и ид̣̇ам̣ вуд̇д̇анд̇и взд̣̇ид̇аб̣б̣ам̣.
Ākiñcaññāyatanaṃ samatikkammāti etthāpi pubbe vuttanayeneva ākiñcaññaṃ āyatanamassa adhiṭṭhānaṭṭhenāti jhānampi ākiñcaññāyatanaṃ. Vuttanayeneva ārammaṇampi. Evametaṃ jhānañca ārammaṇañcāti ubhayampi appavattikaraṇena ca amanasikaraṇe ca samatikkamitvāva yasmā idaṃ nevasaññānāsaññāyatanaṃ upasampajja vihātabbaṃ, tasmā ubhayampetaṃ ekajjhaṃ katvā ‘ākiñcaññāyatanaṃ samatikkammā’ti idaṃ vuttanti veditabbaṃ.
нзвасан̃н̃аанаасан̃н̃ааяад̇анасан̃н̃аасахаг̇ад̇анд̇и зд̇т̇а бана яааяа сан̃н̃ааяа бхаавад̇о д̇ам̣ нзвасан̃н̃аанаасан̃н̃ааяад̇ананд̇и вужжад̇и, яат̇аа бадибаннасса саа сан̃н̃аа ход̇и, д̇ам̣ д̇аава д̣̇ассзд̇ум̣ вибхан̇г̇з ‘‘нзвасан̃н̃ийнаасан̃н̃ий’’д̇и уд̣̇д̇харид̇ваа ‘‘д̇ан̃н̃зва аагин̃жан̃н̃ааяад̇анам̣ санд̇ад̇о манасигарод̇и сан̇каараавасзсасамаабад̇д̇им̣ бхаавзд̇и, д̇зна вужжад̇и нзвасан̃н̃ийнаасан̃н̃ий’’д̇и (вибха. 619) вуд̇д̇ам̣. д̇ад̇т̇а ‘санд̇ад̇о манасигарод̇ий’д̇и ‘санд̇аа вад̇ааяам̣ самаабад̇д̇и, яад̇ра хи наама над̇т̇ибхаавамби аарамман̣ам̣ гарид̇ваа тассад̇ий’д̇и звам̣ санд̇аарамман̣ад̇ааяа нам̣ ‘санд̇аа’д̇и манасигарод̇и. санд̇ад̇о жз манасигарод̇и, гат̇ам̣ самад̇иггамо ход̇ийд̇и? анааваж̇ж̇ид̇угаамад̇ааяа. со хи гин̃жааби нам̣ санд̇ад̇о манасигарод̇и, ат̇а квасса ‘ахамзд̇ам̣ ааваж̇ж̇иссаами самаабаж̇ж̇иссаами ад̇хидтахиссаами вудтахиссаами бажжавзгкиссаамий’д̇и зса аабхог̇о саманнаахааро манасигааро на ход̇и. гасмаа? аагин̃жан̃н̃ааяад̇анад̇о нзвасан̃н̃аанаасан̃н̃ааяад̇анасса санд̇ад̇арабан̣ийд̇ад̇арад̇ааяа.
Nevasaññānāsaññāyatanasaññāsahagatanti ettha pana yāya saññāya bhāvato taṃ nevasaññānāsaññāyatananti vuccati, yathā paṭipannassa sā saññā hoti, taṃ tāva dassetuṃ vibhaṅge ‘‘nevasaññīnāsaññī’’ti uddharitvā ‘‘taññeva ākiñcaññāyatanaṃ santato manasikaroti saṅkhārāvasesasamāpattiṃ bhāveti, tena vuccati nevasaññīnāsaññī’’ti (vibha. 619) vuttaṃ. Tattha ‘santato manasikarotī’ti ‘santā vatāyaṃ samāpatti, yatra hi nāma natthibhāvampi ārammaṇaṃ karitvā ṭhassatī’ti evaṃ santārammaṇatāya naṃ ‘santā’ti manasikaroti. Santato ce manasikaroti, kathaṃ samatikkamo hotīti? Anāvajjitukāmatāya. So hi kiñcāpi naṃ santato manasikaroti, atha khvassa ‘ahametaṃ āvajjissāmi samāpajjissāmi adhiṭṭhahissāmi vuṭṭhahissāmi paccavekkhissāmī’ti esa ābhogo samannāhāro manasikāro na hoti. Kasmā? Ākiñcaññāyatanato nevasaññānāsaññāyatanassa santatarapaṇītataratāya.
яат̇аа хи рааж̇аа махажжарааж̇аанубхаавзна хад̇т̇игканд̇хаг̇ад̇о наг̇аравийт̇ияам̣ вижаранд̇о д̣̇анд̇агаараад̣̇аяо сиббигз згам̣ вад̇т̇ам̣ д̣̇ал̣хам̣ ниваасзд̇ваа згзна сийсам̣ взтзд̇ваа д̣̇анд̇ажун̣н̣аад̣̇ийхи самогин̣н̣аг̇ад̇д̇з анзгаани д̣̇анд̇авигад̇иаад̣̇ийни гаронд̇з д̣̇исваа ‘ахо вад̇а рз чзгаа аажарияаа, ийд̣̇исааниби наама сиббаани гариссанд̇ий’д̇и, звам̣ д̇зсам̣ чзгад̇ааяа д̇уссад̇и, на жасса звам̣ ход̇и – ‘ахо вад̇аахам̣ раж̇ж̇ам̣ бахааяа зваруубо сиббиго бхавзяяа’нд̇и. д̇ам̣ гисса хзд̇у? раж̇ж̇асирияаа махаанисам̣сад̇ааяа. со сиббигз самад̇иггамид̇ваава г̇ажчад̇и. звамзвзса гин̃жааби д̇ам̣ самаабад̇д̇им̣ санд̇ад̇о манасигарод̇и, ат̇а квасса ‘ахамзд̇ам̣ самаабад̇д̇им̣ ааваж̇ж̇иссаами самаабаж̇ж̇иссаами ад̇хидтахиссаами вудтахиссаами бажжавзгкиссаамий’д̇и нзва зса аабхог̇о саманнаахааро манасигааро ход̇и. со д̇ам̣ санд̇ад̇о манаси гаронд̇о д̇ам̣ барамасукумам̣ аббанааббад̇д̇ам̣ сан̃н̃ам̣ баабун̣аад̇и, яааяа ‘нзвасан̃н̃ийнаасан̃н̃ий наама ход̇и, сан̇каараавасзсасамаабад̇д̇им̣ бхаавзд̇ий’д̇и вужжад̇и. ‘сан̇каараавасзсасамаабад̇д̇и’нд̇и ажжанд̇асукумабхааваббад̇д̇асан̇каарам̣ жад̇уд̇т̇ааруббасамаабад̇д̇им̣.
Yathā hi rājā mahaccarājānubhāvena hatthikkhandhagato nagaravīthiyaṃ vicaranto dantakārādayo sippike ekaṃ vatthaṃ daḷhaṃ nivāsetvā ekena sīsaṃ veṭhetvā dantacuṇṇādīhi samokiṇṇagatte anekāni dantavikatiādīni karonte disvā ‘aho vata re chekā ācariyā, īdisānipi nāma sippāni karissantī’ti, evaṃ tesaṃ chekatāya tussati, na cassa evaṃ hoti – ‘aho vatāhaṃ rajjaṃ pahāya evarūpo sippiko bhaveyya’nti. Taṃ kissa hetu? Rajjasiriyā mahānisaṃsatāya. So sippike samatikkamitvāva gacchati. Evamevesa kiñcāpi taṃ samāpattiṃ santato manasikaroti, atha khvassa ‘ahametaṃ samāpattiṃ āvajjissāmi samāpajjissāmi adhiṭṭhahissāmi vuṭṭhahissāmi paccavekkhissāmī’ti neva esa ābhogo samannāhāro manasikāro hoti. So taṃ santato manasi karonto taṃ paramasukhumaṃ appanāppattaṃ saññaṃ pāpuṇāti, yāya ‘nevasaññīnāsaññī nāma hoti, saṅkhārāvasesasamāpattiṃ bhāvetī’ti vuccati. ‘Saṅkhārāvasesasamāpatti’nti accantasukhumabhāvappattasaṅkhāraṃ catutthāruppasamāpattiṃ.
ид̣̇аани яам̣ д̇ам̣ звам̣ ад̇хиг̇ад̇ааяа сан̃н̃ааяа васзна нзвасан̃н̃аанаасан̃н̃ааяад̇ананд̇и вужжад̇и, д̇ам̣ ад̇т̇ад̇о д̣̇ассзд̇ум̣ ‘‘нзвасан̃н̃аанаасан̃н̃ааяад̇ананд̇и нзвасан̃н̃аанаасан̃н̃ааяад̇анам̣ самаабаннасса ваа, убабаннасса ваа, д̣̇идтад̇хаммасукавихаарисса ваа жид̇д̇ажзд̇асигаа д̇хаммаа’’д̇и (вибха. 620) вуд̇д̇ам̣. д̇зсу ид̇ха самаабаннасса жид̇д̇ажзд̇асигаа д̇хаммаа ад̇хиббзд̇аа.
Idāni yaṃ taṃ evaṃ adhigatāya saññāya vasena nevasaññānāsaññāyatananti vuccati, taṃ atthato dassetuṃ ‘‘nevasaññānāsaññāyatananti nevasaññānāsaññāyatanaṃ samāpannassa vā, upapannassa vā, diṭṭhadhammasukhavihārissa vā cittacetasikā dhammā’’ti (vibha. 620) vuttaṃ. Tesu idha samāpannassa cittacetasikā dhammā adhippetā.
важанад̇т̇о банзд̇т̇а – ол̣ааригааяа сан̃н̃ааяа абхаавад̇о, сукумааяа жа бхаавад̇о, нзвасса сасамбаяуд̇д̇ад̇хаммасса жхаанасса сан̃н̃аа, наасан̃н̃аад̇и нзвасан̃н̃аанаасан̃н̃ам̣. нзвасан̃н̃аанаасан̃н̃ан̃жа д̇ам̣ манааяад̇анад̇хаммааяад̇анабарияаабаннад̇д̇аа ааяад̇анан̃жаад̇и нзвасан̃н̃аанаасан̃н̃ааяад̇анам̣. ат̇а ваа яааяамзд̇т̇а сан̃н̃аа, саа бадусан̃н̃аагижжам̣ гаад̇ум̣ асамад̇т̇ад̇ааяа нзвасан̃н̃аа , сан̇каараавасзсасукумабхаавзна виж̇ж̇амаанад̇д̇аа наасан̃н̃аад̇и нзвасан̃н̃аанаасан̃н̃аа. нзвасан̃н̃аанаасан̃н̃аа жа саа сзсад̇хаммаанам̣ ад̇хидтаанадтзна ааяад̇анан̃жаад̇и нзвасан̃н̃аанаасан̃н̃ааяад̇анам̣.
Vacanattho panettha – oḷārikāya saññāya abhāvato, sukhumāya ca bhāvato, nevassa sasampayuttadhammassa jhānassa saññā, nāsaññāti nevasaññānāsaññaṃ. Nevasaññānāsaññañca taṃ manāyatanadhammāyatanapariyāpannattā āyatanañcāti nevasaññānāsaññāyatanaṃ. Atha vā yāyamettha saññā, sā paṭusaññākiccaṃ kātuṃ asamatthatāya nevasaññā , saṅkhārāvasesasukhumabhāvena vijjamānattā nāsaññāti nevasaññānāsaññā. Nevasaññānāsaññā ca sā sesadhammānaṃ adhiṭṭhānaṭṭhena āyatanañcāti nevasaññānāsaññāyatanaṃ.
на гзвалан̃жзд̇т̇а сан̃н̃аава зд̣̇исий, ат̇а ко взд̣̇анааби нзвавзд̣̇анаа наавзд̣̇анаа, жид̇д̇амби нзважид̇д̇ам̣ наажид̇д̇ам̣, пассоби нзвапассо наапассод̇и. зса наяо сзсасамбаяуд̇д̇ад̇хаммзсу. сан̃н̃аасийсзна банааяам̣ д̣̇зсанаа гад̇аад̇и взд̣̇ид̇аб̣б̣аа. бад̇д̇амагканад̇злаббабхуд̇ийхи жа убамаахи зсамад̇т̇о вибхаавзд̇аб̣б̣о – сааман̣зро гира д̇злзна бад̇д̇ам̣ магкзд̇ваа табзси. д̇ам̣ яааг̇убаанагаалз т̇зро ‘бад̇д̇амаахараа’д̇и ааха. со ‘бад̇д̇з д̇зламад̇т̇и, бханд̇з’д̇и ааха. д̇ад̇о ‘аахара, сааман̣зра, д̇злам̣ наал̣им̣ буурзссаамий’д̇и вуд̇д̇з ‘над̇т̇и, бханд̇з, д̇зла’нд̇и ааха. д̇ад̇т̇а яат̇аа анд̇овуд̇т̇ад̇д̇аа яааг̇уяаа сад̣̇д̇хим̣ агаббияадтзна д̇злам̣ ад̇т̇ийд̇и ход̇и, наал̣ибууран̣аад̣̇ийнам̣ абхаававасзна над̇т̇ийд̇и ход̇и, звам̣ сааби сан̃н̃аа бадусан̃н̃аагижжам̣ гаад̇ум̣ асамад̇т̇ад̇ааяа нзвасан̃н̃аа, сан̇каараавасзсасукумабхаавзна виж̇ж̇амаанад̇д̇аа наасан̃н̃аа ход̇и.
Na kevalañcettha saññāva edisī, atha kho vedanāpi nevavedanā nāvedanā, cittampi nevacittaṃ nācittaṃ, phassopi nevaphasso nāphassoti. Esa nayo sesasampayuttadhammesu. Saññāsīsena panāyaṃ desanā katāti veditabbā. Pattamakkhanatelappabhutīhi ca upamāhi esamattho vibhāvetabbo – sāmaṇero kira telena pattaṃ makkhetvā ṭhapesi. Taṃ yāgupānakāle thero ‘pattamāharā’ti āha. So ‘patte telamatthi, bhante’ti āha. Tato ‘āhara, sāmaṇera, telaṃ nāḷiṃ pūressāmī’ti vutte ‘natthi, bhante, tela’nti āha. Tattha yathā antovutthattā yāguyā saddhiṃ akappiyaṭṭhena telaṃ atthīti hoti, nāḷipūraṇādīnaṃ abhāvavasena natthīti hoti, evaṃ sāpi saññā paṭusaññākiccaṃ kātuṃ asamatthatāya nevasaññā, saṅkhārāvasesasukhumabhāvena vijjamānattā nāsaññā hoti.
гимбанзд̇т̇а сан̃н̃аагижжанд̇и? аарамман̣асан̃ж̇аананан̃жзва вибассанааяа жа висаяабхаавам̣ убаг̇анд̇ваа ниб̣б̣ид̣̇ааж̇ананам̣. д̣̇аханагижжамива хи сукод̣̇агз д̇зж̇од̇хаад̇у, сан̃ж̇аананагижжамбзсаа бадум̣ гаад̇ум̣ на саггод̇и. сзсасамаабад̇д̇ийсу сан̃н̃аа вияа вибассанааяа висаяабхаавам̣ убаг̇анд̇ваа ниб̣б̣ид̣̇ааж̇ананамби гаад̇ум̣ на саггод̇и. ан̃н̃зсу хи канд̇хзсу агад̇аабхинивзсо бхигку нзвасан̃н̃аанаасан̃н̃ааяад̇анагканд̇хз саммасид̇ваа ниб̣б̣ид̣̇ам̣ бад̇д̇ум̣ самад̇т̇о наама над̇т̇и. абижа ааяасмаа саарибуд̇д̇о, багад̇ивибассаго бана махаабан̃н̃о саарибуд̇д̇асад̣̇исова саггун̣зяяа. соби ‘‘звам̣ гиримз д̇хаммаа ахуд̇ваа самбхонд̇и, худ̇ваа бадивзнд̇ий’’д̇и (ма. ни. 3.95) звам̣ галаабасаммасанавасзнзва, но анубад̣̇ад̇хаммавибассанаавасзна. звам̣ сукумад̇д̇ам̣ г̇ад̇аа зсаа самаабад̇д̇и.
Kimpanettha saññākiccanti? Ārammaṇasañjānanañceva vipassanāya ca visayabhāvaṃ upagantvā nibbidājananaṃ. Dahanakiccamiva hi sukhodake tejodhātu, sañjānanakiccampesā paṭuṃ kātuṃ na sakkoti. Sesasamāpattīsu saññā viya vipassanāya visayabhāvaṃ upagantvā nibbidājananampi kātuṃ na sakkoti. Aññesu hi khandhesu akatābhiniveso bhikkhu nevasaññānāsaññāyatanakkhandhe sammasitvā nibbidaṃ pattuṃ samattho nāma natthi. Apica āyasmā sāriputto, pakativipassako pana mahāpañño sāriputtasadisova sakkuṇeyya. Sopi ‘‘evaṃ kirime dhammā ahutvā sambhonti, hutvā paṭiventī’’ti (ma. ni. 3.95) evaṃ kalāpasammasanavaseneva, no anupadadhammavipassanāvasena. Evaṃ sukhumattaṃ gatā esā samāpatti.
яат̇аа жа бад̇д̇амагканад̇злуубамааяа звам̣ маг̇г̇уд̣̇агуубамааяаби аяамад̇т̇о вибхаавзд̇аб̣б̣о. маг̇г̇абадибаннасса гира т̇зрасса бурад̇о г̇ажчанд̇о сааман̣зро т̇огамуд̣̇агам̣ д̣̇исваа ‘уд̣̇агам̣, бханд̇з, убааханаа омун̃жат̇аа’д̇и ааха. д̇ад̇о т̇зрзна ‘сажз уд̣̇агамад̇т̇и, аахара нхаанасаадагам̣, нхааяиссаамий’д̇и вуд̇д̇з ‘над̇т̇и, бханд̇з’д̇и ааха. д̇ад̇т̇а яат̇аа убааханад̇зманамад̇д̇адтзна уд̣̇агам̣ ад̇т̇ийд̇и ход̇и , нхаанадтзна над̇т̇ийд̇и ход̇и, звамби саа бадусан̃н̃аагижжам̣ гаад̇ум̣ асамад̇т̇ад̇ааяа нзва сан̃н̃аа, сан̇каараавасзсасукумабхаавзна виж̇ж̇амаанад̇д̇аа наасан̃н̃аа ход̇и. на гзвалан̃жа зд̇аахзва, ан̃н̃аахиби ануруубаахи убамаахи зса ад̇т̇о вибхаавзд̇аб̣б̣о. ид̇и имааяа нзвасан̃н̃аанаасан̃н̃ааяад̇анз бавад̇д̇ааяа сан̃н̃ааяа нзвасан̃н̃аанаасан̃н̃ааяад̇анабхууд̇ааяа ваа сан̃н̃ааяа сахаг̇ад̇анд̇и нзвасан̃н̃аанаасан̃н̃ааяад̇анасан̃н̃аасахаг̇ад̇ам̣. аагин̃жан̃н̃ааяад̇анасамаабад̇д̇иаарамман̣асса жхаанассзд̇ам̣ ад̇хиважанам̣.
Yathā ca pattamakkhanatelūpamāya evaṃ maggudakūpamāyapi ayamattho vibhāvetabbo. Maggapaṭipannassa kira therassa purato gacchanto sāmaṇero thokamudakaṃ disvā ‘udakaṃ, bhante, upāhanā omuñcathā’ti āha. Tato therena ‘sace udakamatthi, āhara nhānasāṭakaṃ, nhāyissāmī’ti vutte ‘natthi, bhante’ti āha. Tattha yathā upāhanatemanamattaṭṭhena udakaṃ atthīti hoti , nhānaṭṭhena natthīti hoti, evampi sā paṭusaññākiccaṃ kātuṃ asamatthatāya neva saññā, saṅkhārāvasesasukhumabhāvena vijjamānattā nāsaññā hoti. Na kevalañca etāheva, aññāhipi anurūpāhi upamāhi esa attho vibhāvetabbo. Iti imāya nevasaññānāsaññāyatane pavattāya saññāya nevasaññānāsaññāyatanabhūtāya vā saññāya sahagatanti nevasaññānāsaññāyatanasaññāsahagataṃ. Ākiñcaññāyatanasamāpattiārammaṇassa jhānassetaṃ adhivacanaṃ.
ид̇ха аагин̃жан̃н̃ааяад̇анасамаабад̇д̇ияаа ниганд̇ибарияаад̣̇аанад̣̇угкад̇ааяа д̣̇угкаа бадибад̣̇аа, барияаад̣̇иннаниганд̇игасса аббанаабариваасад̣̇анд̇хад̇ааяа д̣̇анд̇хаабхин̃н̃аа. вибарияааязна сукаа бадибад̣̇аа киббаабхин̃н̃аа жа. барид̇д̇агасин̣уг̇гхаадимаагаасз бавад̇д̇ид̇авин̃н̃аан̣аабаг̇амаарамман̣ам̣ самаабад̇д̇им̣ аараб̣бха бавад̇д̇ид̇ааяа барид̇д̇аарамман̣ад̇аа, вибарияааязна аббамаан̣аарамман̣ад̇аа взд̣̇ид̇аб̣б̣аа. сзсам̣ буримасад̣̇исамзва.
Idha ākiñcaññāyatanasamāpattiyā nikantipariyādānadukkhatāya dukkhā paṭipadā, pariyādinnanikantikassa appanāparivāsadandhatāya dandhābhiññā. Vipariyāyena sukhā paṭipadā khippābhiññā ca. Parittakasiṇugghāṭimākāse pavattitaviññāṇāpagamārammaṇaṃ samāpattiṃ ārabbha pavattitāya parittārammaṇatā, vipariyāyena appamāṇārammaṇatā veditabbā. Sesaṃ purimasadisameva.
асад̣̇исаруубо наат̇о, ааруббам̣ яам̣ жад̇уб̣б̣ид̇хам̣ ааха;
Asadisarūpo nātho, āruppaṃ yaṃ catubbidhaṃ āha;
д̇ам̣ ид̇и н̃ад̇ваа д̇асмим̣, багин̣н̣агагат̇ааби вин̃н̃зяяаа.
Taṃ iti ñatvā tasmiṃ, pakiṇṇakakathāpi viññeyyā.
аруубасамаабад̇д̇ияо хи –
Arūpasamāpattiyo hi –
аарамман̣аад̇иггамад̇о, жад̇ассоби бхаванд̇имаа;
Ārammaṇātikkamato, catassopi bhavantimā;
ан̇г̇аад̇иггамамзд̇аасам̣, на ижчанд̇и вибхаавино.
Aṅgātikkamametāsaṃ, na icchanti vibhāvino.
зд̇аасу хи руубанимид̇д̇аад̇иггамад̇о батамаа, аагаасаад̇иггамад̇о д̣̇уд̇ияаа, аагаасз бавад̇д̇ид̇авин̃н̃аан̣аад̇иггамад̇о д̇ад̇ияаа, аагаасз бавад̇д̇ид̇авин̃н̃аан̣асса абаг̇амаад̇иггамад̇о жад̇уд̇т̇аад̇и саб̣б̣ат̇аа ‘аарамман̣аад̇иггамад̇о жад̇ассоби бхаванд̇имаа’ аруубасамаабад̇д̇ияод̇и взд̣̇ид̇аб̣б̣аа. ан̇г̇аад̇иггамам̣ бана зд̇аасам̣ на ижчанд̇и бан̣д̣ид̇аа. на хи руубааважарасамаабад̇д̇ийсу вияа зд̇аасу ан̇г̇аад̇иггамо ад̇т̇и. саб̣б̣аасуби хи зд̇аасу убзгкаа жид̇д̇згаг̇г̇ад̇аад̇и д̣̇вз зва жхаанан̇г̇аани хонд̇и. звам̣ санд̇зби –
Etāsu hi rūpanimittātikkamato paṭhamā, ākāsātikkamato dutiyā, ākāse pavattitaviññāṇātikkamato tatiyā, ākāse pavattitaviññāṇassa apagamātikkamato catutthāti sabbathā ‘ārammaṇātikkamato catassopi bhavantimā’ arūpasamāpattiyoti veditabbā. Aṅgātikkamaṃ pana etāsaṃ na icchanti paṇḍitā. Na hi rūpāvacarasamāpattīsu viya etāsu aṅgātikkamo atthi. Sabbāsupi hi etāsu upekkhā cittekaggatāti dve eva jhānaṅgāni honti. Evaṃ santepi –
субан̣ийд̇ад̇араа хонд̇и, бажчимаа бажчимаа ид̇ха;
Supaṇītatarā honti, pacchimā pacchimā idha;
убамаа д̇ад̇т̇а вин̃н̃зяяаа, баасаад̣̇ад̇аласаадигаа.
Upamā tattha viññeyyā, pāsādatalasāṭikā.
яат̇аа хи жад̇убхуумагабаасаад̣̇асса хздтимад̇алз д̣̇иб̣б̣анажжаг̇ийд̇аваад̣̇ид̇асурабхиг̇анд̇хамаалаасаад̣̇урасабаанабхож̇анасаяанажчаад̣̇анаад̣̇ивасзна бан̣ийд̇аа бан̃жа гаамаг̇ун̣аа бажжубадтид̇аа ассу, д̣̇уд̇ияз д̇ад̇о бан̣ийд̇ад̇араа, д̇ад̇ияз д̇ад̇о бан̣ийд̇ад̇амаа, жад̇уд̇т̇з саб̣б̣абан̣ийд̇аа; д̇ад̇т̇а гин̃жааби д̇аани жад̇д̇аариби баасаад̣̇ад̇алаанзва, над̇т̇и нзсам̣ баасаад̣̇ад̇алабхаавзна висзсо, бан̃жагаамаг̇ун̣асамид̣̇д̇хивисзсзна бана хздтимад̇о хздтимад̇о убаримам̣ убаримам̣ бан̣ийд̇ад̇арам̣ ход̇и.
Yathā hi catubhūmakapāsādassa heṭṭhimatale dibbanaccagītavāditasurabhigandhamālāsādurasapānabhojanasayanacchādanādivasena paṇītā pañca kāmaguṇā paccupaṭṭhitā assu, dutiye tato paṇītatarā, tatiye tato paṇītatamā, catutthe sabbapaṇītā; tattha kiñcāpi tāni cattāripi pāsādatalāneva, natthi nesaṃ pāsādatalabhāvena viseso, pañcakāmaguṇasamiddhivisesena pana heṭṭhimato heṭṭhimato uparimaṃ uparimaṃ paṇītataraṃ hoti.
яат̇аа жа згааяа ид̇т̇ияаа ганд̇ид̇ат̇ууласан̣хасан̣хад̇арасан̣хад̇амасуд̇д̇аанам̣ жад̇убалад̇ибалад̣̇вибалазгабаласаадигаа ассу, ааяаамзна вид̇т̇аарзна жа самаббамаан̣аа; д̇ад̇т̇а гин̃жааби д̇аа саадигаа жад̇ассоби ааяаамад̇о жа вид̇т̇аарад̇о жа самаббамаан̣аа, над̇т̇и д̇аасам̣ бамаан̣ад̇о висзсо, сукасампассасукумабхаавамахаг̇гхабхаавзхи бана буримааяа буримааяа бажчимаа бажчимаа бан̣ийд̇ад̇араа хонд̇и, звамзва гин̃жааби жад̇уусуби зд̇аасу убзгкаа жид̇д̇згаг̇г̇ад̇аад̇и зд̇аани д̣̇взязва ан̇г̇аани хонд̇и, ат̇а ко бхааванаависзсзна д̇зсам̣ ан̇г̇аанам̣ бан̣ийд̇абан̣ийд̇ад̇арабхаавзна субан̣ийд̇ад̇араа хонд̇и бажчимаа бажчимаа ид̇хаад̇и взд̣̇ид̇аб̣б̣аа. звам̣ анубуб̣б̣зна бан̣ийд̇абан̣ийд̇аа жзд̇аа –
Yathā ca ekāya itthiyā kantitathūlasaṇhasaṇhatarasaṇhatamasuttānaṃ catupalatipaladvipalaekapalasāṭikā assu, āyāmena vitthārena ca samappamāṇā; tattha kiñcāpi tā sāṭikā catassopi āyāmato ca vitthārato ca samappamāṇā, natthi tāsaṃ pamāṇato viseso, sukhasamphassasukhumabhāvamahagghabhāvehi pana purimāya purimāya pacchimā pacchimā paṇītatarā honti, evameva kiñcāpi catūsupi etāsu upekkhā cittekaggatāti etāni dveyeva aṅgāni honti, atha kho bhāvanāvisesena tesaṃ aṅgānaṃ paṇītapaṇītatarabhāvena supaṇītatarā honti pacchimā pacchimā idhāti veditabbā. Evaṃ anupubbena paṇītapaṇītā cetā –
асужимхи ман̣д̣абз лаг̇г̇о, зго д̇ам̣ ниссид̇о баро;
Asucimhi maṇḍape laggo, eko taṃ nissito paro;
ан̃н̃о б̣ахи аниссааяа, д̇ам̣ д̇ам̣ ниссааяа жаабаро.
Añño bahi anissāya, taṃ taṃ nissāya cāparo.
тид̇о жад̇уухи зд̇зхи, бурисзхи яат̇ааггамам̣;
Ṭhito catūhi etehi, purisehi yathākkamaṃ;
самаанад̇ааяа н̃аад̇аб̣б̣аа, жад̇ассоби вибхаавинаа. (висуд̣̇д̇хи. 1.291);
Samānatāya ñātabbā, catassopi vibhāvinā. (visuddhi. 1.291);
д̇ад̇рааяамад̇т̇аяож̇анаа – асужимхи гира д̣̇зсз зго ман̣д̣або. ат̇зго бурисо ааг̇анд̇ваа д̇ам̣ асужим̣ ж̇иг̇ужчамаано д̇ам̣ ман̣д̣абам̣ хад̇т̇зхи ааламб̣ид̇ваа д̇ад̇т̇а лаг̇г̇о, лаг̇г̇ид̇о вияа адтааси. ат̇аабаро ааг̇анд̇ваа д̇ам̣ ман̣д̣абалаг̇г̇ам̣ бурисам̣ ниссид̇о. ат̇ан̃н̃о ааг̇анд̇ваа жинд̇зси – ‘яо зса ман̣д̣абз лаг̇г̇о, яо жа д̇ам̣ ниссид̇о, убхобзд̇з д̣̇удтид̇аа; д̇хуво жа нзсам̣ ман̣д̣абабабаад̇з баад̇о, ханд̣̇аахам̣ б̣ахиязва д̇идтаамий’д̇и со д̇анниссид̇ам̣ аниссааяа б̣ахиязва адтааси. ат̇аабаро ааг̇анд̇ваа ман̣д̣абалаг̇г̇асса д̇анниссид̇асса жа акзмабхаавам̣ жинд̇зд̇ваа б̣ахитид̇ан̃жа судтид̇од̇и манд̇ваа д̇ам̣ ниссааяа адтааси.
Tatrāyamatthayojanā – asucimhi kira dese eko maṇḍapo. Atheko puriso āgantvā taṃ asuciṃ jigucchamāno taṃ maṇḍapaṃ hatthehi ālambitvā tattha laggo, laggito viya aṭṭhāsi. Athāparo āgantvā taṃ maṇḍapalaggaṃ purisaṃ nissito. Athañño āgantvā cintesi – ‘yo esa maṇḍape laggo, yo ca taṃ nissito, ubhopete duṭṭhitā; dhuvo ca nesaṃ maṇḍapapapāte pāto, handāhaṃ bahiyeva tiṭṭhāmī’ti so tannissitaṃ anissāya bahiyeva aṭṭhāsi. Athāparo āgantvā maṇḍapalaggassa tannissitassa ca akhemabhāvaṃ cintetvā bahiṭhitañca suṭṭhitoti mantvā taṃ nissāya aṭṭhāsi.
д̇ад̇т̇а асужимхи д̣̇зсз ман̣д̣або вияа гасин̣уг̇гхаадимаагаасам̣ д̣̇адтаб̣б̣ам̣. асужиж̇иг̇ужчааяа ман̣д̣абалаг̇г̇о бурисо вияа руубанимид̇д̇аж̇иг̇ужчааяа аагаасаарамман̣ам̣ аагаасаанан̃жааяад̇анам̣ . ман̣д̣абалаг̇г̇ам̣ бурисам̣ ниссид̇о вияа аагаасаарамман̣ам̣ аагаасаанан̃жааяад̇анам̣ аараб̣бха бавад̇д̇ам̣ вин̃н̃аан̣ан̃жааяад̇анам̣. д̇зсам̣ д̣̇виннамби акзмабхаавам̣ жинд̇зд̇ваа аниссааяа д̇ам̣ ман̣д̣абалаг̇г̇ам̣, б̣ахитид̇о вияа, аагаасаанан̃жааяад̇анам̣ аарамман̣ам̣ агад̇ваа д̇ад̣̇абхааваарамман̣ам̣ аагин̃жан̃н̃ааяад̇анам̣. ман̣д̣абалаг̇г̇асса д̇анниссид̇асса жа акзмад̇ам̣ жинд̇зд̇ваа б̣ахитид̇ан̃жа ‘судтид̇о’д̇и манд̇ваа д̇ам̣ ниссааяа тид̇о вияа вин̃н̃аан̣аабхаавасан̇каад̇з б̣ахибад̣̇зсз тид̇ам̣ аагин̃жан̃н̃ааяад̇анам̣ аараб̣бха бавад̇д̇ам̣ нзвасан̃н̃аанаасан̃н̃ааяад̇анам̣ д̣̇адтаб̣б̣ам̣. звам̣ бавад̇д̇амаанан̃жа –
Tattha asucimhi dese maṇḍapo viya kasiṇugghāṭimākāsaṃ daṭṭhabbaṃ. Asucijigucchāya maṇḍapalaggo puriso viya rūpanimittajigucchāya ākāsārammaṇaṃ ākāsānañcāyatanaṃ . Maṇḍapalaggaṃ purisaṃ nissito viya ākāsārammaṇaṃ ākāsānañcāyatanaṃ ārabbha pavattaṃ viññāṇañcāyatanaṃ. Tesaṃ dvinnampi akhemabhāvaṃ cintetvā anissāya taṃ maṇḍapalaggaṃ, bahiṭhito viya, ākāsānañcāyatanaṃ ārammaṇaṃ akatvā tadabhāvārammaṇaṃ ākiñcaññāyatanaṃ. Maṇḍapalaggassa tannissitassa ca akhemataṃ cintetvā bahiṭhitañca ‘suṭṭhito’ti mantvā taṃ nissāya ṭhito viya viññāṇābhāvasaṅkhāte bahipadese ṭhitaṃ ākiñcaññāyatanaṃ ārabbha pavattaṃ nevasaññānāsaññāyatanaṃ daṭṭhabbaṃ. Evaṃ pavattamānañca –
аарамман̣ам̣ гарод̇зва, ан̃н̃аабхаавзна д̇ам̣ ид̣̇ам̣;
Ārammaṇaṃ karoteva, aññābhāvena taṃ idaṃ;
д̣̇идтад̣̇осамби рааж̇аанам̣, вуд̇д̇ихзд̇у яат̇аа ж̇ано. (висуд̣̇д̇хи. 1.292);
Diṭṭhadosampi rājānaṃ, vuttihetu yathā jano. (visuddhi. 1.292);
ид̣̇ан̃хи нзвасан̃н̃аанаасан̃н̃ааяад̇анам̣ ‘аасаннавин̃н̃аан̣ан̃жааяад̇анабажжад̇т̇игаа аяам̣ самаабад̇д̇ий’д̇и звам̣ д̣̇идтад̣̇осамби д̇ам̣ аагин̃жан̃н̃ааяад̇анам̣ ан̃н̃асса аарамман̣асса абхааваа аарамман̣ам̣ гарод̇зва. яат̇аа гим̣? ‘д̣̇идтад̣̇осамби рааж̇аанам̣ вуд̇д̇ихзд̇у яат̇аа ж̇ано’. яат̇аа хи асам̣яад̇ам̣ парусагааяаважийманосамаажаарам̣ ган̃жи саб̣б̣ад̣̇исамбад̇им̣ рааж̇аанам̣ ‘парусасамаажааро аяа’нд̇и звам̣ д̣̇идтад̣̇осамби ан̃н̃ад̇т̇а вуд̇д̇им̣ алабхамаано ж̇ано вуд̇д̇ихзд̇у ниссааяа вад̇д̇ад̇и, звам̣ д̣̇идтад̣̇осамби д̇ам̣ аагин̃жан̃н̃ааяад̇анам̣ ан̃н̃ам̣ аарамман̣ам̣ алабхамаанамид̣̇ам̣ нзвасан̃н̃аанаасан̃н̃ааяад̇анам̣ аарамман̣ам̣ гарод̇зва. звам̣ гурумаанан̃жа –
Idañhi nevasaññānāsaññāyatanaṃ ‘āsannaviññāṇañcāyatanapaccatthikā ayaṃ samāpattī’ti evaṃ diṭṭhadosampi taṃ ākiñcaññāyatanaṃ aññassa ārammaṇassa abhāvā ārammaṇaṃ karoteva. Yathā kiṃ? ‘Diṭṭhadosampi rājānaṃ vuttihetu yathā jano’. Yathā hi asaṃyataṃ pharusakāyavacīmanosamācāraṃ kañci sabbadisampatiṃ rājānaṃ ‘pharusasamācāro aya’nti evaṃ diṭṭhadosampi aññattha vuttiṃ alabhamāno jano vuttihetu nissāya vattati, evaṃ diṭṭhadosampi taṃ ākiñcaññāyatanaṃ aññaṃ ārammaṇaṃ alabhamānamidaṃ nevasaññānāsaññāyatanaṃ ārammaṇaṃ karoteva. Evaṃ kurumānañca –
аарул̣хо д̣̇ийгханиссзн̣им̣, яат̇аа ниссзн̣иб̣аахугам̣;
Āruḷho dīghanisseṇiṃ, yathā nisseṇibāhukaṃ;
баб̣б̣ад̇аг̇г̇ан̃жа аарул̣хо, яат̇аа баб̣б̣ад̇амад̇т̇агам̣.
Pabbataggañca āruḷho, yathā pabbatamatthakaṃ.
яат̇аа ваа г̇иримаарул̣хо, ад̇д̇аноязва ж̇ан̣н̣угам̣;
Yathā vā girimāruḷho, attanoyeva jaṇṇukaṃ;
олуб̣бхад̇и д̇ат̇звзд̇ам̣, жхаанамолуб̣бха вад̇д̇ад̇ийд̇и. (висуд̣̇д̇хи. 1.293);
Olubbhati tathevetaṃ, jhānamolubbha vattatīti. (visuddhi. 1.293);
аруубааважарагусалагат̇аа нидтид̇аа.
Arūpāvacarakusalakathā niṭṭhitā.
