| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. நேவஸஞ்ஞானாஸஞ்ஞாயதனபஞ்ஹாஸுத்தங்
8. Nevasaññānāsaññāyatanapañhāsuttaṃ
339. ‘‘‘நேவஸஞ்ஞானாஸஞ்ஞாயதனங், நேவஸஞ்ஞானாஸஞ்ஞாயதன’ந்தி வுச்சதி. கதமங் நு கோ² நேவஸஞ்ஞானாஸஞ்ஞாயதனந்தி? தஸ்ஸ மய்ஹங், ஆவுஸோ, ஏதத³ஹோஸி – ‘இத⁴ பி⁴க்கு² ஸப்³ப³ஸோ ஆகிஞ்சஞ்ஞாயதனங் ஸமதிக்கம்ம நேவஸஞ்ஞானாஸஞ்ஞாயதனங் உபஸம்பஜ்ஜ விஹரதி. இத³ங் வுச்சதி நேவஸஞ்ஞானாஸஞ்ஞாயதன’ந்தி. ஸோ க்²வாஹங், ஆவுஸோ, ஸப்³ப³ஸோ ஆகிஞ்சஞ்ஞாயதனங் ஸமதிக்கம்ம நேவஸஞ்ஞானாஸஞ்ஞாயதனங் உபஸம்பஜ்ஜ விஹராமி. தஸ்ஸ மய்ஹங், ஆவுஸோ, இமினா விஹாரேன விஹரதோ ஆகிஞ்சஞ்ஞாயதனஸஹக³தா ஸஞ்ஞாமனஸிகாரா ஸமுதா³சரந்தி.
339. ‘‘‘Nevasaññānāsaññāyatanaṃ, nevasaññānāsaññāyatana’nti vuccati. Katamaṃ nu kho nevasaññānāsaññāyatananti? Tassa mayhaṃ, āvuso, etadahosi – ‘idha bhikkhu sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharati. Idaṃ vuccati nevasaññānāsaññāyatana’nti. So khvāhaṃ, āvuso, sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharāmi. Tassa mayhaṃ, āvuso, iminā vihārena viharato ākiñcaññāyatanasahagatā saññāmanasikārā samudācaranti.
‘‘அத² கோ² மங், ஆவுஸோ, ப⁴க³வா இத்³தி⁴யா உபஸங்கமித்வா ஏதத³வோச – ‘மொக்³க³ல்லான, மொக்³க³ல்லான! மா, ப்³ராஹ்மண, நேவஸஞ்ஞானாஸஞ்ஞாயதனங் பமாதோ³, நேவஸஞ்ஞானாஸஞ்ஞாயதனே சித்தங் ஸண்ட²பேஹி, நேவஸஞ்ஞானாஸஞ்ஞாயதனே சித்தங் ஏகோதி³ங் கரோஹி, நேவஸஞ்ஞானாஸஞ்ஞாயதனே சித்தங் ஸமாத³ஹா’தி. ஸோ க்²வாஹங், ஆவுஸோ, அபரேன ஸமயேன ஸப்³ப³ஸோ ஆகிஞ்சஞ்ஞாயதனங் ஸமதிக்கம்ம நேவஸஞ்ஞானாஸஞ்ஞாயதனங் உபஸம்பஜ்ஜ விஹாஸிங். யஞ்ஹி தங், ஆவுஸோ, ஸம்மா வத³மானோ வதெ³ய்ய…பே॰… மஹாபி⁴ஞ்ஞதங் பத்தோ’’தி. அட்ட²மங்.
‘‘Atha kho maṃ, āvuso, bhagavā iddhiyā upasaṅkamitvā etadavoca – ‘moggallāna, moggallāna! Mā, brāhmaṇa, nevasaññānāsaññāyatanaṃ pamādo, nevasaññānāsaññāyatane cittaṃ saṇṭhapehi, nevasaññānāsaññāyatane cittaṃ ekodiṃ karohi, nevasaññānāsaññāyatane cittaṃ samādahā’ti. So khvāhaṃ, āvuso, aparena samayena sabbaso ākiñcaññāyatanaṃ samatikkamma nevasaññānāsaññāyatanaṃ upasampajja vihāsiṃ. Yañhi taṃ, āvuso, sammā vadamāno vadeyya…pe… mahābhiññataṃ patto’’ti. Aṭṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1-8. பட²மஜா²னபஞ்ஹாஸுத்தாதி³வண்ணனா • 1-8. Paṭhamajhānapañhāsuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1-8. பட²மஜ்ஜா²னபஞ்ஹஸுத்தாதி³வண்ணனா • 1-8. Paṭhamajjhānapañhasuttādivaṇṇanā
