| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
१९. न्हानकप्पनिद्देसवण्णना
19. Nhānakappaniddesavaṇṇanā
१६८. पुरतोति (चूळव॰ ३७२) थेरानं पुरतो उपरि वा न च न्हायेय्याति अत्थो।
168.Puratoti (cūḷava. 372) therānaṃ purato upari vā na ca nhāyeyyāti attho.
१६९-१७१. कुट्टत्थम्भतरुट्टानेति एत्थ (चूळव॰ २४३; चूळव॰ अट्ठ॰ २४३) कुट्टे वा थम्भे वा तरुम्हि वा अट्टानफलके वा कायं न घंसयेति अत्थो। गन्धब्बहत्थो नाम मक्कटहत्थसदिसो दारुआदिमयो। कुरुविन्दकसुत्तियाति कुरुविन्दसुत्तिया। मल्लकेन वा अञ्ञमञ्ञं वा। ‘‘न भिक्खवे विग्गय्ह परिकम्मं कारापेतब्बं। यो कारापेय्य, आपत्ति दुक्कटस्सा’’ति (चूळव॰ २४३) एवं वुत्तं विग्गहपरिकम्मं सन्धाय ‘‘अञ्ञमञ्ञं वा’’ति वुत्तं।
169-171.Kuṭṭatthambhataruṭṭāneti ettha (cūḷava. 243; cūḷava. aṭṭha. 243) kuṭṭe vā thambhe vā tarumhi vā aṭṭānaphalake vā kāyaṃ na ghaṃsayeti attho. Gandhabbahattho nāma makkaṭahatthasadiso dāruādimayo. Kuruvindakasuttiyāti kuruvindasuttiyā. Mallakena vā aññamaññaṃ vā. ‘‘Na bhikkhave viggayha parikammaṃ kārāpetabbaṃ. Yo kārāpeyya, āpatti dukkaṭassā’’ti (cūḷava. 243) evaṃ vuttaṃ viggahaparikammaṃ sandhāya ‘‘aññamaññaṃ vā’’ti vuttaṃ.
इदानि कप्पियानि दस्सेतुं ‘‘कपालिट्ठकखण्डानी’’तिआदिमाह। सब्बेसं वट्टतीति सम्बन्धो । गिलानस्सपि (चूळव॰ अट्ठ॰ २४३) अगिलानस्सपि इमानि कपालिट्ठकखण्डादीनि कायघंसने वट्टन्ति। पुथुपाणीति (चूळव॰ २४४) हत्थपरिकम्मं वुच्चति। तस्मा सब्बेसं हत्थेन पिट्ठिपरिकम्मं कातुं वट्टति। अकतमल्लकं नाम एकदाठिमं परिच्छिन्दित्वा कतं। पासाणादयो पादघंसने एव कप्पिया। न्हानकप्पविनिच्छयो।
Idāni kappiyāni dassetuṃ ‘‘kapāliṭṭhakakhaṇḍānī’’tiādimāha. Sabbesaṃ vaṭṭatīti sambandho . Gilānassapi (cūḷava. aṭṭha. 243) agilānassapi imāni kapāliṭṭhakakhaṇḍādīni kāyaghaṃsane vaṭṭanti. Puthupāṇīti (cūḷava. 244) hatthaparikammaṃ vuccati. Tasmā sabbesaṃ hatthena piṭṭhiparikammaṃ kātuṃ vaṭṭati. Akatamallakaṃ nāma ekadāṭhimaṃ paricchinditvā kataṃ. Pāsāṇādayo pādaghaṃsane eva kappiyā. Nhānakappavinicchayo.
न्हानकप्पनिद्देसवण्णना निट्ठिता।
Nhānakappaniddesavaṇṇanā niṭṭhitā.
