| Library / Tipiṭaka / ติปิฎก • Tipiṭaka / ขุทฺทสิกฺขา-มูลสิกฺขา • Khuddasikkhā-mūlasikkhā |
๑๙. นฺหานกปฺปนิเทฺทสวณฺณนา
19. Nhānakappaniddesavaṇṇanā
๑๖๘. ปุรโตติ (จูฬว. ๓๗๒) เถรานํ ปุรโต อุปริ วา น จ นฺหาเยยฺยาติ อโตฺถฯ
168.Puratoti (cūḷava. 372) therānaṃ purato upari vā na ca nhāyeyyāti attho.
๑๖๙-๑๗๑. กุฎฺฎตฺถมฺภตรุฎฺฎาเนติ เอตฺถ (จูฬว. ๒๔๓; จูฬว. อฎฺฐ. ๒๔๓) กุเฎฺฎ วา ถเมฺภ วา ตรุมฺหิ วา อฎฺฎานผลเก วา กายํ น ฆํสเยติ อโตฺถฯ คนฺธพฺพหโตฺถ นาม มกฺกฎหตฺถสทิโส ทารุอาทิมโยฯ กุรุวินฺทกสุตฺติยาติ กุรุวินฺทสุตฺติยาฯ มลฺลเกน วา อญฺญมญฺญํ วาฯ ‘‘น ภิกฺขเว วิคฺคยฺห ปริกมฺมํ การาเปตพฺพํฯ โย การาเปยฺย, อาปตฺติ ทุกฺกฎสฺสา’’ติ (จูฬว. ๒๔๓) เอวํ วุตฺตํ วิคฺคหปริกมฺมํ สนฺธาย ‘‘อญฺญมญฺญํ วา’’ติ วุตฺตํฯ
169-171.Kuṭṭatthambhataruṭṭāneti ettha (cūḷava. 243; cūḷava. aṭṭha. 243) kuṭṭe vā thambhe vā tarumhi vā aṭṭānaphalake vā kāyaṃ na ghaṃsayeti attho. Gandhabbahattho nāma makkaṭahatthasadiso dāruādimayo. Kuruvindakasuttiyāti kuruvindasuttiyā. Mallakena vā aññamaññaṃ vā. ‘‘Na bhikkhave viggayha parikammaṃ kārāpetabbaṃ. Yo kārāpeyya, āpatti dukkaṭassā’’ti (cūḷava. 243) evaṃ vuttaṃ viggahaparikammaṃ sandhāya ‘‘aññamaññaṃ vā’’ti vuttaṃ.
อิทานิ กปฺปิยานิ ทเสฺสตุํ ‘‘กปาลิฎฺฐกขณฺฑานี’’ติอาทิมาหฯ สเพฺพสํ วฎฺฎตีติ สมฺพโนฺธ ฯ คิลานสฺสปิ (จูฬว. อฎฺฐ. ๒๔๓) อคิลานสฺสปิ อิมานิ กปาลิฎฺฐกขณฺฑาทีนิ กายฆํสเน วฎฺฎนฺติฯ ปุถุปาณีติ (จูฬว. ๒๔๔) หตฺถปริกมฺมํ วุจฺจติฯ ตสฺมา สเพฺพสํ หเตฺถน ปิฎฺฐิปริกมฺมํ กาตุํ วฎฺฎติฯ อกตมลฺลกํ นาม เอกทาฐิมํ ปริจฺฉินฺทิตฺวา กตํฯ ปาสาณาทโย ปาทฆํสเน เอว กปฺปิยาฯ นฺหานกปฺปวินิจฺฉโยฯ
Idāni kappiyāni dassetuṃ ‘‘kapāliṭṭhakakhaṇḍānī’’tiādimāha. Sabbesaṃ vaṭṭatīti sambandho . Gilānassapi (cūḷava. aṭṭha. 243) agilānassapi imāni kapāliṭṭhakakhaṇḍādīni kāyaghaṃsane vaṭṭanti. Puthupāṇīti (cūḷava. 244) hatthaparikammaṃ vuccati. Tasmā sabbesaṃ hatthena piṭṭhiparikammaṃ kātuṃ vaṭṭati. Akatamallakaṃ nāma ekadāṭhimaṃ paricchinditvā kataṃ. Pāsāṇādayo pādaghaṃsane eva kappiyā. Nhānakappavinicchayo.
นฺหานกปฺปนิเทฺทสวณฺณนา นิฎฺฐิตาฯ
Nhānakappaniddesavaṇṇanā niṭṭhitā.
