| Library / Tipiṭaka / ติปิฎก • Tipiṭaka / ขุทฺทสิกฺขา-มูลสิกฺขา • Khuddasikkhā-mūlasikkhā |
๑๙. นฺหานกปฺปนิเทฺทสวณฺณนา
19. Nhānakappaniddesavaṇṇanā
๑๖๘. กปฺปนํ กปฺปิยตา กโปฺป, นฺหาเน กโปฺป นฺหานกโปฺปฯ นวโก เถรานํ ปุรโต อุปริ วา น จ นฺหาเยยฺยาติ สมฺพโนฺธฯ น จาติ นเยวฯ ปุรโตติ อภิมุเขฯ อุปรีติ นทิยา อุปริฯ
168. Kappanaṃ kappiyatā kappo, nhāne kappo nhānakappo. Navako therānaṃ purato upari vā na ca nhāyeyyāti sambandho. Na cāti nayeva. Puratoti abhimukhe. Uparīti nadiyā upari.
๑๖๙-๑๗๑. กุฎฺฎตฺถมฺภตรุฎฺฎาเน กายํ น ฆํสเยติ สมฺพโนฺธฯ ตตฺถ กุฎฺฎํ นาม อิฎฺฐกทารุสิลาภิตฺติฯ ถโมฺภ นาม นหานติเตฺถ นิขนิตฺวา ฐปิโตฯ ตรูติ รุโกฺขฯ อฎฺฎานํ นาม ตเจฺฉตฺวา อฎฺฐปทากาเรน ราชิโย ฉินฺทิตฺวา นหานติเตฺถ นิขาตผลกํฯ คนฺธพฺพหเตฺถน วา…เป.… มลฺลเกน วา กายํ สรีเรน วา อญฺญมญฺญํ น ฆํสเยติ สมฺพโนฺธฯ คนฺธพฺพหเตฺถนาติ ทารุมยหเตฺถนฯ กุรุวินฺทกสุตฺติยาติ กุรุวินฺทกปาสาณจุณฺณานิ ลาขาย พนฺธิตฺวา กตคุฬิกาวลิยา สุเตฺตน อาวุณิตสุตฺติยาฯ มลฺลเกนาติ มกรทนฺตเก ฉินฺทิตฺวา ปทุมกณฺณิกสณฺฐาเนน กตมลฺลเกนฯ สรีเรนาติ อตฺตโน กาเยนฯ อญฺญมญฺญสฺส อญฺญมญฺญํ กิริยากรณสงฺขาเต กิริยาพฺยภิหาเร ทฺวิตฺตํฯ กปาล…เป.… ปุถุปาณิ จ สเพฺพสํ วฎฺฎตีติ สมฺพโนฺธฯ กปาลญฺจ อิฎฺฐกา จ, ตาสํ ขณฺฑานิฯ ปุถุปาณีติ ปุถุ นานา ปาณิ ปุถุปาณิ, หตฺถปริกมฺมํ รุฬฺหีวเสนฯ สเพฺพสนฺติ คิลานาคิลานานํฯ คิลานสฺส อกตมลฺลกํ วฎฺฎตีติ สมฺพโนฺธฯ อกตมลฺลกํ นาม กตมลฺลกวิปรีตํฯ เผณํ นาม สมุทฺทเผณนฺติฯ
169-171. Kuṭṭatthambhataruṭṭāne kāyaṃ na ghaṃsayeti sambandho. Tattha kuṭṭaṃ nāma iṭṭhakadārusilābhitti. Thambho nāma nahānatitthe nikhanitvā ṭhapito. Tarūti rukkho. Aṭṭānaṃ nāma tacchetvā aṭṭhapadākārena rājiyo chinditvā nahānatitthe nikhātaphalakaṃ. Gandhabbahatthena vā…pe… mallakena vā kāyaṃ sarīrena vā aññamaññaṃ na ghaṃsayeti sambandho. Gandhabbahatthenāti dārumayahatthena. Kuruvindakasuttiyāti kuruvindakapāsāṇacuṇṇāni lākhāya bandhitvā kataguḷikāvaliyā suttena āvuṇitasuttiyā. Mallakenāti makaradantake chinditvā padumakaṇṇikasaṇṭhānena katamallakena. Sarīrenāti attano kāyena. Aññamaññassa aññamaññaṃ kiriyākaraṇasaṅkhāte kiriyābyabhihāre dvittaṃ. Kapāla…pe… puthupāṇi ca sabbesaṃ vaṭṭatīti sambandho. Kapālañca iṭṭhakā ca, tāsaṃ khaṇḍāni. Puthupāṇīti puthu nānā pāṇi puthupāṇi, hatthaparikammaṃ ruḷhīvasena. Sabbesanti gilānāgilānānaṃ. Gilānassa akatamallakaṃ vaṭṭatīti sambandho. Akatamallakaṃ nāma katamallakaviparītaṃ. Pheṇaṃ nāma samuddapheṇanti.
นฺหานกปฺปนิเทฺทสวณฺณนา นิฎฺฐิตาฯ
Nhānakappaniddesavaṇṇanā niṭṭhitā.
