| Library / Tipiṭaka / တိပိဋက • Tipiṭaka / ခုဒ္ဒသိက္ခာ-မူလသိက္ခာ • Khuddasikkhā-mūlasikkhā |
၁၉. န္ဟာနကပ္ပနိဒ္ဒေသဝဏ္ဏနာ
19. Nhānakappaniddesavaṇṇanā
၁၆၈. ပုရတောတိ (စူဠဝ. ၃၇၂) ထေရာနံ ပုရတော ဥပရိ ဝာ န စ န္ဟာယေယ္ယာတိ အတ္ထော။
168.Puratoti (cūḷava. 372) therānaṃ purato upari vā na ca nhāyeyyāti attho.
၁၆၉-၁၇၁. ကုဋ္ဋတ္ထမ္ဘတရုဋ္ဋာနေတိ ဧတ္ထ (စူဠဝ. ၂၄၃; စူဠဝ. အဋ္ဌ. ၂၄၃) ကုဋ္ဋေ ဝာ ထမ္ဘေ ဝာ တရုမ္ဟိ ဝာ အဋ္ဋာနဖလကေ ဝာ ကာယံ န ဃံသယေတိ အတ္ထော။ ဂန္ဓဗ္ဗဟတ္ထော နာမ မက္ကဋဟတ္ထသဒိသော ဒာရုအာဒိမယော။ ကုရုဝိန္ဒကသုတ္တိယာတိ ကုရုဝိန္ဒသုတ္တိယာ။ မလ္လကေန ဝာ အညမညံ ဝာ။ ‘‘န ဘိက္ခဝေ ဝိဂ္ဂယ္ဟ ပရိကမ္မံ ကာရာပေတဗ္ဗံ။ ယော ကာရာပေယ္ယ, အာပတ္တိ ဒုက္ကဋသ္သာ’’တိ (စူဠဝ. ၂၄၃) ဧဝံ ဝုတ္တံ ဝိဂ္ဂဟပရိကမ္မံ သန္ဓာယ ‘‘အညမညံ ဝာ’’တိ ဝုတ္တံ။
169-171.Kuṭṭatthambhataruṭṭāneti ettha (cūḷava. 243; cūḷava. aṭṭha. 243) kuṭṭe vā thambhe vā tarumhi vā aṭṭānaphalake vā kāyaṃ na ghaṃsayeti attho. Gandhabbahattho nāma makkaṭahatthasadiso dāruādimayo. Kuruvindakasuttiyāti kuruvindasuttiyā. Mallakena vā aññamaññaṃ vā. ‘‘Na bhikkhave viggayha parikammaṃ kārāpetabbaṃ. Yo kārāpeyya, āpatti dukkaṭassā’’ti (cūḷava. 243) evaṃ vuttaṃ viggahaparikammaṃ sandhāya ‘‘aññamaññaṃ vā’’ti vuttaṃ.
ဣဒာနိ ကပ္ပိယာနိ ဒသ္သေတုံ ‘‘ကပာလိဋ္ဌကခဏ္ဍာနီ’’တိအာဒိမာဟ။ သဗ္ဗေသံ ဝဋ္ဋတီတိ သမ္ဗန္ဓော ။ ဂိလာနသ္သပိ (စူဠဝ. အဋ္ဌ. ၂၄၃) အဂိလာနသ္သပိ ဣမာနိ ကပာလိဋ္ဌကခဏ္ဍာဒီနိ ကာယဃံသနေ ဝဋ္ဋန္တိ။ ပုထုပာဏီတိ (စူဠဝ. ၂၄၄) ဟတ္ထပရိကမ္မံ ဝုစ္စတိ။ တသ္မာ သဗ္ဗေသံ ဟတ္ထေန ပိဋ္ဌိပရိကမ္မံ ကာတုံ ဝဋ္ဋတိ။ အကတမလ္လကံ နာမ ဧကဒာဌိမံ ပရိစ္ဆိန္ဒိတ္ဝာ ကတံ။ ပာသာဏာဒယော ပာဒဃံသနေ ဧဝ ကပ္ပိယာ။ န္ဟာနကပ္ပဝိနိစ္ဆယော။
Idāni kappiyāni dassetuṃ ‘‘kapāliṭṭhakakhaṇḍānī’’tiādimāha. Sabbesaṃ vaṭṭatīti sambandho . Gilānassapi (cūḷava. aṭṭha. 243) agilānassapi imāni kapāliṭṭhakakhaṇḍādīni kāyaghaṃsane vaṭṭanti. Puthupāṇīti (cūḷava. 244) hatthaparikammaṃ vuccati. Tasmā sabbesaṃ hatthena piṭṭhiparikammaṃ kātuṃ vaṭṭati. Akatamallakaṃ nāma ekadāṭhimaṃ paricchinditvā kataṃ. Pāsāṇādayo pādaghaṃsane eva kappiyā. Nhānakappavinicchayo.
န္ဟာနကပ္ပနိဒ္ဒေသဝဏ္ဏနာ နိဋ္ဌိတာ။
Nhānakappaniddesavaṇṇanā niṭṭhitā.
