| Library / Tipiṭaka / ತಿಪಿಟಕ • Tipiṭaka / ಖುದ್ದಸಿಕ್ಖಾ-ಮೂಲಸಿಕ್ಖಾ • Khuddasikkhā-mūlasikkhā |
೧೯. ನ್ಹಾನಕಪ್ಪನಿದ್ದೇಸವಣ್ಣನಾ
19. Nhānakappaniddesavaṇṇanā
೧೬೮. ಪುರತೋತಿ (ಚೂಳವ॰ ೩೭೨) ಥೇರಾನಂ ಪುರತೋ ಉಪರಿ ವಾ ನ ಚ ನ್ಹಾಯೇಯ್ಯಾತಿ ಅತ್ಥೋ।
168.Puratoti (cūḷava. 372) therānaṃ purato upari vā na ca nhāyeyyāti attho.
೧೬೯-೧೭೧. ಕುಟ್ಟತ್ಥಮ್ಭತರುಟ್ಟಾನೇತಿ ಏತ್ಥ (ಚೂಳವ॰ ೨೪೩; ಚೂಳವ॰ ಅಟ್ಠ॰ ೨೪೩) ಕುಟ್ಟೇ ವಾ ಥಮ್ಭೇ ವಾ ತರುಮ್ಹಿ ವಾ ಅಟ್ಟಾನಫಲಕೇ ವಾ ಕಾಯಂ ನ ಘಂಸಯೇತಿ ಅತ್ಥೋ। ಗನ್ಧಬ್ಬಹತ್ಥೋ ನಾಮ ಮಕ್ಕಟಹತ್ಥಸದಿಸೋ ದಾರುಆದಿಮಯೋ। ಕುರುವಿನ್ದಕಸುತ್ತಿಯಾತಿ ಕುರುವಿನ್ದಸುತ್ತಿಯಾ। ಮಲ್ಲಕೇನ ವಾ ಅಞ್ಞಮಞ್ಞಂ ವಾ। ‘‘ನ ಭಿಕ್ಖವೇ ವಿಗ್ಗಯ್ಹ ಪರಿಕಮ್ಮಂ ಕಾರಾಪೇತಬ್ಬಂ। ಯೋ ಕಾರಾಪೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ (ಚೂಳವ॰ ೨೪೩) ಏವಂ ವುತ್ತಂ ವಿಗ್ಗಹಪರಿಕಮ್ಮಂ ಸನ್ಧಾಯ ‘‘ಅಞ್ಞಮಞ್ಞಂ ವಾ’’ತಿ ವುತ್ತಂ।
169-171.Kuṭṭatthambhataruṭṭāneti ettha (cūḷava. 243; cūḷava. aṭṭha. 243) kuṭṭe vā thambhe vā tarumhi vā aṭṭānaphalake vā kāyaṃ na ghaṃsayeti attho. Gandhabbahattho nāma makkaṭahatthasadiso dāruādimayo. Kuruvindakasuttiyāti kuruvindasuttiyā. Mallakena vā aññamaññaṃ vā. ‘‘Na bhikkhave viggayha parikammaṃ kārāpetabbaṃ. Yo kārāpeyya, āpatti dukkaṭassā’’ti (cūḷava. 243) evaṃ vuttaṃ viggahaparikammaṃ sandhāya ‘‘aññamaññaṃ vā’’ti vuttaṃ.
ಇದಾನಿ ಕಪ್ಪಿಯಾನಿ ದಸ್ಸೇತುಂ ‘‘ಕಪಾಲಿಟ್ಠಕಖಣ್ಡಾನೀ’’ತಿಆದಿಮಾಹ। ಸಬ್ಬೇಸಂ ವಟ್ಟತೀತಿ ಸಮ್ಬನ್ಧೋ । ಗಿಲಾನಸ್ಸಪಿ (ಚೂಳವ॰ ಅಟ್ಠ॰ ೨೪೩) ಅಗಿಲಾನಸ್ಸಪಿ ಇಮಾನಿ ಕಪಾಲಿಟ್ಠಕಖಣ್ಡಾದೀನಿ ಕಾಯಘಂಸನೇ ವಟ್ಟನ್ತಿ। ಪುಥುಪಾಣೀತಿ (ಚೂಳವ॰ ೨೪೪) ಹತ್ಥಪರಿಕಮ್ಮಂ ವುಚ್ಚತಿ। ತಸ್ಮಾ ಸಬ್ಬೇಸಂ ಹತ್ಥೇನ ಪಿಟ್ಠಿಪರಿಕಮ್ಮಂ ಕಾತುಂ ವಟ್ಟತಿ। ಅಕತಮಲ್ಲಕಂ ನಾಮ ಏಕದಾಠಿಮಂ ಪರಿಚ್ಛಿನ್ದಿತ್ವಾ ಕತಂ। ಪಾಸಾಣಾದಯೋ ಪಾದಘಂಸನೇ ಏವ ಕಪ್ಪಿಯಾ। ನ್ಹಾನಕಪ್ಪವಿನಿಚ್ಛಯೋ।
Idāni kappiyāni dassetuṃ ‘‘kapāliṭṭhakakhaṇḍānī’’tiādimāha. Sabbesaṃ vaṭṭatīti sambandho . Gilānassapi (cūḷava. aṭṭha. 243) agilānassapi imāni kapāliṭṭhakakhaṇḍādīni kāyaghaṃsane vaṭṭanti. Puthupāṇīti (cūḷava. 244) hatthaparikammaṃ vuccati. Tasmā sabbesaṃ hatthena piṭṭhiparikammaṃ kātuṃ vaṭṭati. Akatamallakaṃ nāma ekadāṭhimaṃ paricchinditvā kataṃ. Pāsāṇādayo pādaghaṃsane eva kappiyā. Nhānakappavinicchayo.
ನ್ಹಾನಕಪ್ಪನಿದ್ದೇಸವಣ್ಣನಾ ನಿಟ್ಠಿತಾ।
Nhānakappaniddesavaṇṇanā niṭṭhitā.
