| Library / Tipiṭaka / തിപിടക • Tipiṭaka / ഖുദ്ദസിക്ഖാ-മൂലസിക്ഖാ • Khuddasikkhā-mūlasikkhā |
൧൯. ന്ഹാനകപ്പനിദ്ദേസവണ്ണനാ
19. Nhānakappaniddesavaṇṇanā
൧൬൮. കപ്പനം കപ്പിയതാ കപ്പോ, ന്ഹാനേ കപ്പോ ന്ഹാനകപ്പോ. നവകോ ഥേരാനം പുരതോ ഉപരി വാ ന ച ന്ഹായേയ്യാതി സമ്ബന്ധോ. ന ചാതി നയേവ. പുരതോതി അഭിമുഖേ. ഉപരീതി നദിയാ ഉപരി.
168. Kappanaṃ kappiyatā kappo, nhāne kappo nhānakappo. Navako therānaṃ purato upari vā na ca nhāyeyyāti sambandho. Na cāti nayeva. Puratoti abhimukhe. Uparīti nadiyā upari.
൧൬൯-൧൭൧. കുട്ടത്ഥമ്ഭതരുട്ടാനേ കായം ന ഘംസയേതി സമ്ബന്ധോ. തത്ഥ കുട്ടം നാമ ഇട്ഠകദാരുസിലാഭിത്തി. ഥമ്ഭോ നാമ നഹാനതിത്ഥേ നിഖനിത്വാ ഠപിതോ. തരൂതി രുക്ഖോ. അട്ടാനം നാമ തച്ഛേത്വാ അട്ഠപദാകാരേന രാജിയോ ഛിന്ദിത്വാ നഹാനതിത്ഥേ നിഖാതഫലകം. ഗന്ധബ്ബഹത്ഥേന വാ…പേ॰… മല്ലകേന വാ കായം സരീരേന വാ അഞ്ഞമഞ്ഞം ന ഘംസയേതി സമ്ബന്ധോ. ഗന്ധബ്ബഹത്ഥേനാതി ദാരുമയഹത്ഥേന. കുരുവിന്ദകസുത്തിയാതി കുരുവിന്ദകപാസാണചുണ്ണാനി ലാഖായ ബന്ധിത്വാ കതഗുളികാവലിയാ സുത്തേന ആവുണിതസുത്തിയാ. മല്ലകേനാതി മകരദന്തകേ ഛിന്ദിത്വാ പദുമകണ്ണികസണ്ഠാനേന കതമല്ലകേന. സരീരേനാതി അത്തനോ കായേന. അഞ്ഞമഞ്ഞസ്സ അഞ്ഞമഞ്ഞം കിരിയാകരണസങ്ഖാതേ കിരിയാബ്യഭിഹാരേ ദ്വിത്തം. കപാല…പേ॰… പുഥുപാണി ച സബ്ബേസം വട്ടതീതി സമ്ബന്ധോ. കപാലഞ്ച ഇട്ഠകാ ച, താസം ഖണ്ഡാനി. പുഥുപാണീതി പുഥു നാനാ പാണി പുഥുപാണി, ഹത്ഥപരികമ്മം രുള്ഹീവസേന. സബ്ബേസന്തി ഗിലാനാഗിലാനാനം. ഗിലാനസ്സ അകതമല്ലകം വട്ടതീതി സമ്ബന്ധോ. അകതമല്ലകം നാമ കതമല്ലകവിപരീതം. ഫേണം നാമ സമുദ്ദഫേണന്തി.
169-171. Kuṭṭatthambhataruṭṭāne kāyaṃ na ghaṃsayeti sambandho. Tattha kuṭṭaṃ nāma iṭṭhakadārusilābhitti. Thambho nāma nahānatitthe nikhanitvā ṭhapito. Tarūti rukkho. Aṭṭānaṃ nāma tacchetvā aṭṭhapadākārena rājiyo chinditvā nahānatitthe nikhātaphalakaṃ. Gandhabbahatthena vā…pe… mallakena vā kāyaṃ sarīrena vā aññamaññaṃ na ghaṃsayeti sambandho. Gandhabbahatthenāti dārumayahatthena. Kuruvindakasuttiyāti kuruvindakapāsāṇacuṇṇāni lākhāya bandhitvā kataguḷikāvaliyā suttena āvuṇitasuttiyā. Mallakenāti makaradantake chinditvā padumakaṇṇikasaṇṭhānena katamallakena. Sarīrenāti attano kāyena. Aññamaññassa aññamaññaṃ kiriyākaraṇasaṅkhāte kiriyābyabhihāre dvittaṃ. Kapāla…pe… puthupāṇi ca sabbesaṃ vaṭṭatīti sambandho. Kapālañca iṭṭhakā ca, tāsaṃ khaṇḍāni. Puthupāṇīti puthu nānā pāṇi puthupāṇi, hatthaparikammaṃ ruḷhīvasena. Sabbesanti gilānāgilānānaṃ. Gilānassa akatamallakaṃ vaṭṭatīti sambandho. Akatamallakaṃ nāma katamallakaviparītaṃ. Pheṇaṃ nāma samuddapheṇanti.
ന്ഹാനകപ്പനിദ്ദേസവണ്ണനാ നിട്ഠിതാ.
Nhānakappaniddesavaṇṇanā niṭṭhitā.
