| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৭. নিব্বানধাতুসুত্তং
7. Nibbānadhātusuttaṃ
৪৪. ৰুত্তঞ্হেতং ভগৰতা, ৰুত্তমরহতাতি মে সুতং –
44. Vuttañhetaṃ bhagavatā, vuttamarahatāti me sutaṃ –
‘‘দ্ৰেমা, ভিক্খৰে, নিব্বানধাতুযো। কতমে দ্ৰে? সউপাদিসেসা চ নিব্বানধাতু, অনুপাদিসেসা চ নিব্বানধাতু।
‘‘Dvemā, bhikkhave, nibbānadhātuyo. Katame dve? Saupādisesā ca nibbānadhātu, anupādisesā ca nibbānadhātu.
‘‘কতমা চ, ভিক্খৰে, সউপাদিসেসা নিব্বানধাতু? ইধ, ভিক্খৰে, ভিক্খু অরহং হোতি খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞা ৰিমুত্তো। তস্স তিট্ঠন্তেৰ পঞ্চিন্দ্রিযানি যেসং অৰিঘাতত্তা 1 মনাপামনাপং পচ্চনুভোতি, সুখদুক্খং পটিসংৰেদেতি । তস্স যো রাগক্খযো, দোসক্খযো, মোহক্খযো – অযং ৰুচ্চতি, ভিক্খৰে, সউপাদিসেসা নিব্বানধাতু।
‘‘Katamā ca, bhikkhave, saupādisesā nibbānadhātu? Idha, bhikkhave, bhikkhu arahaṃ hoti khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto. Tassa tiṭṭhanteva pañcindriyāni yesaṃ avighātattā 2 manāpāmanāpaṃ paccanubhoti, sukhadukkhaṃ paṭisaṃvedeti . Tassa yo rāgakkhayo, dosakkhayo, mohakkhayo – ayaṃ vuccati, bhikkhave, saupādisesā nibbānadhātu.
‘‘কতমা চ, ভিক্খৰে, অনুপাদিসেসা নিব্বানধাতু? ইধ, ভিক্খৰে, ভিক্খু অরহং হোতি খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞা ৰিমুত্তো। তস্স ইধেৰ, ভিক্খৰে, সব্বৰেদযিতানি অনভিনন্দিতানি সীতি ভৰিস্সন্তি 3। অযং ৰুচ্চতি, ভিক্খৰে, অনুপাদিসেসা নিব্বানধাতু। ইমা খো, ভিক্খৰে, দ্ৰে নিব্বানধাতুযো’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Katamā ca, bhikkhave, anupādisesā nibbānadhātu? Idha, bhikkhave, bhikkhu arahaṃ hoti khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto. Tassa idheva, bhikkhave, sabbavedayitāni anabhinanditāni sīti bhavissanti 4. Ayaṃ vuccati, bhikkhave, anupādisesā nibbānadhātu. Imā kho, bhikkhave, dve nibbānadhātuyo’’ti. Etamatthaṃ bhagavā avoca. Tatthetaṃ iti vuccati –
‘‘দুৰে ইমা চক্খুমতা পকাসিতা, নিব্বানধাতূ অনিস্সিতেন তাদিনা।
‘‘Duve imā cakkhumatā pakāsitā, nibbānadhātū anissitena tādinā;
একা হি ধাতু ইধ দিট্ঠধম্মিকা, সউপাদিসেসা ভৰনেত্তিসঙ্খযা।
Ekā hi dhātu idha diṭṭhadhammikā, saupādisesā bhavanettisaṅkhayā;
অনুপাদিসেসা পন সম্পরাযিকা, যম্হি নিরুজ্ঝন্তি ভৰানি সব্বসো॥
Anupādisesā pana samparāyikā, yamhi nirujjhanti bhavāni sabbaso.
‘‘যে এতদঞ্ঞায পদং অসঙ্খতং, ৰিমুত্তচিত্তা ভৰনেত্তিসঙ্খযা।
‘‘Ye etadaññāya padaṃ asaṅkhataṃ, vimuttacittā bhavanettisaṅkhayā;
তে ধম্মসারাধিগমা খযে রতা, পহংসু তে সব্বভৰানি তাদিনো’’তি॥
Te dhammasārādhigamā khaye ratā, pahaṃsu te sabbabhavāni tādino’’ti.
অযম্পি অত্থো ৰুত্তো ভগৰতা, ইতি মে সুতন্তি। সত্তমং।
Ayampi attho vutto bhagavatā, iti me sutanti. Sattamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৭. নিব্বানধাতুসুত্তৰণ্ণনা • 7. Nibbānadhātusuttavaṇṇanā
