| Library / Tipiṭaka / д̇ибидага • Tipiṭaka / ид̇ивуд̇д̇ага-адтагат̇аа • Itivuttaka-aṭṭhakathā |
7. ниб̣б̣аанад̇хаад̇усуд̇д̇аван̣н̣анаа
7. Nibbānadhātusuttavaṇṇanā
44. сад̇д̇амз д̣̇взмаад̇и д̣̇вз имаа. ваанам̣ вужжад̇и д̇ан̣хаа, нигканд̇ам̣ ваанад̇о, над̇т̇и ваа зд̇т̇а ваанам̣, имасмим̣ ваа ад̇хиг̇ад̇з ваанасса абхаавод̇и ниб̣б̣аанам̣, д̇ад̣̇зва ниссад̇д̇аниж̇ж̇ийвадтзна сабхаавад̇хааран̣адтзна жа д̇хаад̇ууд̇и ниб̣б̣аанад̇хаад̇у. яад̣̇иби д̇ассаа барамад̇т̇ад̇о бхзд̣̇о над̇т̇и , барияааязна бана бан̃н̃ааяад̇ийд̇и д̇ам̣ барияааяабхзд̣̇ам̣ санд̇хааяа ‘‘д̣̇взмаа, бхигкавз, ниб̣б̣аанад̇хаад̇уяо’’д̇и вад̇ваа яат̇аад̇хиббзд̇аббабхзд̣̇ам̣ д̣̇ассзд̇ум̣ ‘‘саубаад̣̇исзсаа’’д̇иаад̣̇и вуд̇д̇ам̣. д̇ад̇т̇а д̇ан̣хаад̣̇ийхи палабхаавзна убаад̣̇ийяад̇ийд̇и убаад̣̇и, канд̇хабан̃жагам̣. убаад̣̇иязва сзсод̇и убаад̣̇исзсо, саха убаад̣̇исзсзнаад̇и саубаад̣̇исзсаа, д̇ад̣̇абхаавад̇о анубаад̣̇исзсаа.
44. Sattame dvemāti dve imā. Vānaṃ vuccati taṇhā, nikkhantaṃ vānato, natthi vā ettha vānaṃ, imasmiṃ vā adhigate vānassa abhāvoti nibbānaṃ, tadeva nissattanijjīvaṭṭhena sabhāvadhāraṇaṭṭhena ca dhātūti nibbānadhātu. Yadipi tassā paramatthato bhedo natthi , pariyāyena pana paññāyatīti taṃ pariyāyabhedaṃ sandhāya ‘‘dvemā, bhikkhave, nibbānadhātuyo’’ti vatvā yathādhippetappabhedaṃ dassetuṃ ‘‘saupādisesā’’tiādi vuttaṃ. Tattha taṇhādīhi phalabhāvena upādīyatīti upādi, khandhapañcakaṃ. Upādiyeva sesoti upādiseso, saha upādisesenāti saupādisesā, tadabhāvato anupādisesā.
араханд̇и аарагагилзсо, д̣̇уурагилзсод̇и ад̇т̇о. вуд̇д̇ан̃хзд̇ам̣ бхаг̇авад̇аа –
Arahanti ārakakileso, dūrakilesoti attho. Vuttañhetaṃ bhagavatā –
‘‘гат̇ан̃жа, бхигкавз, бхигку арахам̣ ход̇и, аарагаасса хонд̇и баабагаа агусалаа д̇хаммаа, сам̣гилзсигаа боноб̣бхавигаа, сад̣̇араа д̣̇угкавибаагаа, ааяад̇им̣ ж̇аад̇иж̇араамаран̣ияаа. звам̣ ко, бхигкавз, бхигку арахам̣ ход̇ий’’д̇и (ма. ни. 1.434).
‘‘Kathañca, bhikkhave, bhikkhu arahaṃ hoti, ārakāssa honti pāpakā akusalā dhammā, saṃkilesikā ponobbhavikā, sadarā dukkhavipākā, āyatiṃ jātijarāmaraṇiyā. Evaṃ kho, bhikkhave, bhikkhu arahaṃ hotī’’ti (ma. ni. 1.434).
кийн̣аасавод̇и гаамаасаваад̣̇аяо жад̇д̇аароби аасаваа арахад̇о кийн̣аа самужчиннаа бахийнаа бадиббассад̣̇д̇хаа абхаб̣б̣уббад̇д̇игаа н̃аан̣аг̇г̇инаа д̣̇ад̣дхаад̇и кийн̣аасаво. вусид̇аваад̇и г̇арусам̣ваасзби арияамаг̇г̇зби д̣̇асасу арияаваасзсуби васи бариваси баривудто вудтаваасо жин̣н̣ажаран̣од̇и вусид̇аваа. гад̇агаран̣ийяод̇и бут̇уж̇ж̇анагаляаан̣агам̣ убаад̣̇ааяа сад̇д̇а сзкаа жад̇уухи маг̇г̇зхи гаран̣ийяам̣ гаронд̇и наама, кийн̣аасавасса саб̣б̣агаран̣ийяаани гад̇аани барияосид̇аани, над̇т̇и уд̇д̇арим̣ гаран̣ийяам̣ д̣̇угкагкаяаад̇хиг̇амааяаад̇и гад̇агаран̣ийяо. вуд̇д̇амби жзд̇ам̣ –
Khīṇāsavoti kāmāsavādayo cattāropi āsavā arahato khīṇā samucchinnā pahīnā paṭippassaddhā abhabbuppattikā ñāṇagginā daḍḍhāti khīṇāsavo. Vusitavāti garusaṃvāsepi ariyamaggepi dasasu ariyavāsesupi vasi parivasi parivuṭṭho vuṭṭhavāso ciṇṇacaraṇoti vusitavā. Katakaraṇīyoti puthujjanakalyāṇakaṃ upādāya satta sekhā catūhi maggehi karaṇīyaṃ karonti nāma, khīṇāsavassa sabbakaraṇīyāni katāni pariyositāni, natthi uttariṃ karaṇīyaṃ dukkhakkhayādhigamāyāti katakaraṇīyo. Vuttampi cetaṃ –
‘‘д̇асса саммаа вимуд̇д̇асса, санд̇ажид̇д̇асса бхигкуно;
‘‘Tassa sammā vimuttassa, santacittassa bhikkhuno;
гад̇асса бадижаяо над̇т̇и, гаран̣ийяам̣ на виж̇ж̇ад̇ий’’д̇и. (а. ни. 6.55; махаава. 244);
Katassa paṭicayo natthi, karaṇīyaṃ na vijjatī’’ti. (a. ni. 6.55; mahāva. 244);
охид̇абхаарод̇и д̇аяо бхаараа – канд̇хабхааро, гилзсабхааро, абхисан̇каарабхаарод̇и. д̇ассимз д̇аяоби бхаараа охид̇аа оробид̇аа нигкид̇д̇аа баад̇ид̇аад̇и охид̇абхааро. ануббад̇д̇асад̣̇ад̇т̇од̇и ануббад̇д̇о сад̣̇ад̇т̇ам̣, сагад̇т̇анд̇и вуд̇д̇ам̣ ход̇и, гагаарасса д̣̇агааро гад̇о. ануббад̇д̇о сад̣̇ад̇т̇о зд̇знаад̇и ануббад̇д̇асад̣̇ад̇т̇о, сад̣̇ад̇т̇од̇и жа арахад̇д̇ам̣ взд̣̇ид̇аб̣б̣ам̣. д̇ан̃хи ад̇д̇убаниб̣анд̇хадтзна ад̇д̇ано авиж̇аханадтзна ад̇д̇ано барамад̇т̇зна жа ад̇д̇ано ад̇т̇ад̇д̇аа сагад̇т̇о ход̇и. баригкийн̣абхавасам̣яож̇анод̇и гаамарааг̇асам̣яож̇анам̣, бадигхасам̣яож̇анам̣, маанад̣̇идтивижигижчаасийлаб̣б̣ад̇абараамаасабхаварааг̇аиссаамажчарияаавиж̇ж̇аасам̣яож̇ананд̇и имаани сад̇д̇з бхавзсу. бхавам̣ ваа бхавзна сам̣яож̇знд̇и убаниб̣анд̇ханд̇ийд̇и бхавасам̣яож̇анаани наама. д̇аани арахад̇о баригкийн̣аани, бахийнаани, н̃аан̣аг̇г̇инаа, д̣̇ад̣дхаанийд̇и баригкийн̣абхавасам̣яож̇ано. саммад̣̇ан̃н̃аа вимуд̇д̇од̇и зд̇т̇а саммад̣̇ан̃н̃аад̇и саммаа ан̃н̃ааяа, ид̣̇ам̣ вуд̇д̇ам̣ ход̇и – канд̇хаанам̣ канд̇хадтам̣, ааяад̇анаанам̣ ааяад̇анадтам̣, д̇хаад̇уунам̣ сун̃н̃адтам̣, д̣̇угкасса бийл̣анадтам̣, самуд̣̇аяасса бабхавадтам̣, нирод̇хасса санд̇адтам̣, маг̇г̇асса д̣̇ассанадтам̣ ‘‘саб̣б̣з сан̇каараа анижжаа’’д̇и звамаад̣̇ибхзд̣̇ам̣ ваа саммаа яат̇аабхууд̇ам̣ ан̃н̃ааяа ж̇аанид̇ваа д̇ийраяид̇ваа д̇улаяид̇ваа вибхаавзд̇ваа вибхууд̇ам̣ гад̇ваа. вимуд̇д̇од̇и д̣̇вз вимуд̇д̇ияо жид̇д̇асса жа вимуд̇д̇и ниб̣б̣аанан̃жа. арахаа хи саб̣б̣агилзсзхи вимуд̇д̇ад̇д̇аа жид̇д̇авимуд̇д̇ияааби вимуд̇д̇о, ниб̣б̣аанзби вимуд̇д̇од̇и. д̇зна вуд̇д̇ам̣ ‘‘саммад̣̇ан̃н̃аа вимуд̇д̇о’’д̇и.
Ohitabhāroti tayo bhārā – khandhabhāro, kilesabhāro, abhisaṅkhārabhāroti. Tassime tayopi bhārā ohitā oropitā nikkhittā pātitāti ohitabhāro. Anuppattasadatthoti anuppatto sadatthaṃ, sakatthanti vuttaṃ hoti, kakārassa dakāro kato. Anuppatto sadattho etenāti anuppattasadattho, sadatthoti ca arahattaṃ veditabbaṃ. Tañhi attupanibandhaṭṭhena attano avijahanaṭṭhena attano paramatthena ca attano atthattā sakattho hoti. Parikkhīṇabhavasaṃyojanoti kāmarāgasaṃyojanaṃ, paṭighasaṃyojanaṃ, mānadiṭṭhivicikicchāsīlabbataparāmāsabhavarāgaissāmacchariyaavijjāsaṃyojananti imāni satte bhavesu. Bhavaṃ vā bhavena saṃyojenti upanibandhantīti bhavasaṃyojanāni nāma. Tāni arahato parikkhīṇāni, pahīnāni, ñāṇagginā, daḍḍhānīti parikkhīṇabhavasaṃyojano. Sammadaññā vimuttoti ettha sammadaññāti sammā aññāya, idaṃ vuttaṃ hoti – khandhānaṃ khandhaṭṭhaṃ, āyatanānaṃ āyatanaṭṭhaṃ, dhātūnaṃ suññaṭṭhaṃ, dukkhassa pīḷanaṭṭhaṃ, samudayassa pabhavaṭṭhaṃ, nirodhassa santaṭṭhaṃ, maggassa dassanaṭṭhaṃ ‘‘sabbe saṅkhārā aniccā’’ti evamādibhedaṃ vā sammā yathābhūtaṃ aññāya jānitvā tīrayitvā tulayitvā vibhāvetvā vibhūtaṃ katvā. Vimuttoti dve vimuttiyo cittassa ca vimutti nibbānañca. Arahā hi sabbakilesehi vimuttattā cittavimuttiyāpi vimutto, nibbānepi vimuttoti. Tena vuttaṃ ‘‘sammadaññā vimutto’’ti.
д̇асса д̇идтанд̇зва бан̃жинд̣̇рияаанийд̇и д̇асса арахад̇о жаримабхавахзд̇убхууд̇ам̣ гаммам̣ яаава на кийяад̇и, д̇аава д̇идтанд̇иязва жагкаад̣̇ийни бан̃жинд̣̇рияаани. авигхаад̇ад̇д̇аад̇и ануббаад̣̇анирод̇хавасзна анируд̣̇д̇хад̇д̇аа. манаабааманаабанд̇и идтаанидтам̣ руубаад̣̇иг̇ожарам̣. бажжанубход̇ийд̇и винд̣̇ад̇и бадилабхад̇и. сукад̣̇угкам̣ бадисам̣взд̣̇зд̇ийд̇и вибаагабхууд̇ам̣ сукан̃жа д̣̇угкан̃жа бадисам̣взд̣̇зд̇и д̇зхи д̣̇ваарзхи бадилабхад̇и.
Tassa tiṭṭhanteva pañcindriyānīti tassa arahato carimabhavahetubhūtaṃ kammaṃ yāva na khīyati, tāva tiṭṭhantiyeva cakkhādīni pañcindriyāni. Avighātattāti anuppādanirodhavasena aniruddhattā. Manāpāmanāpanti iṭṭhāniṭṭhaṃ rūpādigocaraṃ. Paccanubhotīti vindati paṭilabhati. Sukhadukkhaṃ paṭisaṃvedetīti vipākabhūtaṃ sukhañca dukkhañca paṭisaṃvedeti tehi dvārehi paṭilabhati.
зд̇д̇аавад̇аа убаад̣̇исзсам̣ д̣̇ассзд̇ваа ид̣̇аани саубаад̣̇исзсам̣ ниб̣б̣аанад̇хаад̇ум̣ д̣̇ассзд̇ум̣ ‘‘д̇асса яо’’д̇иаад̣̇и вуд̇д̇ам̣. д̇ад̇т̇а д̇ассаад̇и д̇асса саубаад̣̇исзсасса сад̇о арахад̇о. яо рааг̇агкаяод̇и рааг̇асса каяо кийн̣аагааро абхааво ажжанд̇амануббаад̣̇о. зса наяо сзсзсуби. зд̇д̇аавад̇аа рааг̇аад̣̇игкаяо саубаад̣̇исзсаа ниб̣б̣аанад̇хаад̇ууд̇и д̣̇ассид̇ам̣ ход̇и.
Ettāvatā upādisesaṃ dassetvā idāni saupādisesaṃ nibbānadhātuṃ dassetuṃ ‘‘tassa yo’’tiādi vuttaṃ. Tattha tassāti tassa saupādisesassa sato arahato. Yo rāgakkhayoti rāgassa khayo khīṇākāro abhāvo accantamanuppādo. Esa nayo sesesupi. Ettāvatā rāgādikkhayo saupādisesā nibbānadhātūti dassitaṃ hoti.
ид̇хзваад̇и имасмим̣язва ад̇д̇абхаавз. саб̣б̣авзд̣̇аяид̇аанийд̇и сукаад̣̇аяо саб̣б̣аа аб̣яаагад̇авзд̣̇анаа, гусалаагусалавзд̣̇анаа бана буб̣б̣зязва бахийнаад̇и. анабхинанд̣̇ид̇аанийд̇и д̇ан̣хаад̣̇ийхи на абхинанд̣̇ид̇аани. сийд̇ибхависсанд̇ийд̇и ажжанд̇авуубасамзна сан̇каарад̣̇арат̇абадиббассад̣̇д̇хияаа сийд̇алий бхависсанд̇и, аббадисанд̇хиганирод̇хзна нируж̇жхиссанд̇ийд̇и ад̇т̇о. на гзвалам̣ взд̣̇аяид̇ааниязва, саб̣б̣зби бана кийн̣аасавасанд̇аанз бан̃жагканд̇хаа нируж̇жхиссанд̇и, взд̣̇аяид̇асийсзна д̣̇зсанаа гад̇аа.
Idhevāti imasmiṃyeva attabhāve. Sabbavedayitānīti sukhādayo sabbā abyākatavedanā, kusalākusalavedanā pana pubbeyeva pahīnāti. Anabhinanditānīti taṇhādīhi na abhinanditāni. Sītibhavissantīti accantavūpasamena saṅkhāradarathapaṭippassaddhiyā sītalī bhavissanti, appaṭisandhikanirodhena nirujjhissantīti attho. Na kevalaṃ vedayitāniyeva, sabbepi pana khīṇāsavasantāne pañcakkhandhā nirujjhissanti, vedayitasīsena desanā katā.
г̇аат̇аасу жагкумад̇аад̇и б̣уд̣̇д̇хажагку, д̇хаммажагку, д̣̇иб̣б̣ажагку, бан̃н̃аажагку, саманд̇ажагкууд̇и бан̃жахи жагкуухи жагкумад̇аа. аниссид̇знаад̇и д̇ан̣хаад̣̇идтиниссаяавасзна ган̃жи д̇хаммам̣ аниссид̇зна, рааг̇аб̣анд̇ханаад̣̇ийхи ваа аб̣анд̇хзна. д̇аад̣̇инаад̇и чал̣ан̇г̇убзгкаавасзна саб̣б̣ад̇т̇а идтаад̣̇ийсу згасабхаавад̇аасан̇каад̇зна д̇аад̣̇илагкан̣зна д̇аад̣̇инаа. д̣̇идтад̇хаммигаад̇и имасмим̣ ад̇д̇абхаавз бхаваа вад̇д̇амаанаа. бхаванзд̇д̇исан̇каяаад̇и бхаванзд̇д̇ияаа д̇ан̣хааяа баригкаяаа. самбарааяигаад̇и самбарааяз канд̇хабхзд̣̇ад̇о барабхааг̇з бхаваа. яамхийд̇и яасмим̣ анубаад̣̇исзсаниб̣б̣аанз. бхаваанийд̇и лин̇г̇авибаллаасзна вуд̇д̇ам̣, убабад̇д̇ибхаваа саб̣б̣асо анавасзсаа нируж̇жханд̇и, на бавад̇д̇анд̇и.
Gāthāsu cakkhumatāti buddhacakkhu, dhammacakkhu, dibbacakkhu, paññācakkhu, samantacakkhūti pañcahi cakkhūhi cakkhumatā. Anissitenāti taṇhādiṭṭhinissayavasena kañci dhammaṃ anissitena, rāgabandhanādīhi vā abandhena. Tādināti chaḷaṅgupekkhāvasena sabbattha iṭṭhādīsu ekasabhāvatāsaṅkhātena tādilakkhaṇena tādinā. Diṭṭhadhammikāti imasmiṃ attabhāve bhavā vattamānā. Bhavanettisaṅkhayāti bhavanettiyā taṇhāya parikkhayā. Samparāyikāti samparāye khandhabhedato parabhāge bhavā. Yamhīti yasmiṃ anupādisesanibbāne. Bhavānīti liṅgavipallāsena vuttaṃ, upapattibhavā sabbaso anavasesā nirujjhanti, na pavattanti.
д̇зд̇и д̇з звам̣ вимуд̇д̇ажид̇д̇аа. д̇хаммасаараад̇хиг̇амаад̇и вимуд̇д̇исаарад̇д̇аа имасса д̇хаммавинаяасса, д̇хаммзсу саарабхууд̇асса арахад̇д̇асса ад̇хиг̇аманад̇о. каязд̇и рааг̇аад̣̇игкаяабхууд̇з ниб̣б̣аанз рад̇аа абхирад̇аа. ат̇а ваа нижжабхаавад̇о сздтабхаавад̇о жа д̇хаммзсу сааранд̇и д̇хаммасаарам̣, ниб̣б̣аанам̣. вуд̇д̇ан̃хзд̇ам̣ ‘‘вирааг̇о сздто д̇хаммаанам̣ (д̇ха. ба. 273), вирааг̇о д̇зсам̣ аг̇г̇амагкааяад̇ий’’д̇и (ид̇иву. 90; а. ни. 4.34) жа. д̇асса д̇хаммасаарасса ад̇хиг̇амахзд̇у каяз саб̣б̣асан̇каарабаригкаяз анубаад̣̇исзсаниб̣б̣аанз рад̇аа. бахам̣сууд̇и баж̇ахим̣су. д̇зд̇и нибаад̇амад̇д̇ам̣. сзсам̣ вуд̇д̇анаяамзва.
Teti te evaṃ vimuttacittā. Dhammasārādhigamāti vimuttisārattā imassa dhammavinayassa, dhammesu sārabhūtassa arahattassa adhigamanato. Khayeti rāgādikkhayabhūte nibbāne ratā abhiratā. Atha vā niccabhāvato seṭṭhabhāvato ca dhammesu sāranti dhammasāraṃ, nibbānaṃ. Vuttañhetaṃ ‘‘virāgo seṭṭho dhammānaṃ (dha. pa. 273), virāgo tesaṃ aggamakkhāyatī’’ti (itivu. 90; a. ni. 4.34) ca. Tassa dhammasārassa adhigamahetu khaye sabbasaṅkhāraparikkhaye anupādisesanibbāne ratā. Pahaṃsūti pajahiṃsu. Teti nipātamattaṃ. Sesaṃ vuttanayameva.
сад̇д̇амасуд̇д̇аван̣н̣анаа нидтид̇аа.
Sattamasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ид̇ивуд̇д̇агабаал̣и • Itivuttakapāḷi / 7. ниб̣б̣аанад̇хаад̇усуд̇д̇ам̣ • 7. Nibbānadhātusuttaṃ
