| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. ஜம்பு³கா²த³கஸங்யுத்தங்
4. Jambukhādakasaṃyuttaṃ
1. நிப்³பா³னபஞ்ஹாஸுத்தவண்ணனா
1. Nibbānapañhāsuttavaṇṇanā
314. ஜம்பு³கா²த³கஸங்யுத்தே ஜம்பு³கா²த³கோ பரிப்³பா³ஜகோதி ஏவங்னாமோ தே²ரஸ்ஸ பா⁴கி³னெய்யோ ச²ன்னபரிப்³பா³ஜகோ. யோ கோ² ஆவுஸோ ராக³க்க²யோதி நிப்³பா³னங் ஆக³ம்ம ராகோ³ கீ²யதி, தஸ்மா நிப்³பா³னங் ராக³க்க²யோதி வுச்சதி. தோ³ஸமோஹக்க²யேஸுபி ஏஸேவ நயோ.
314. Jambukhādakasaṃyutte jambukhādako paribbājakoti evaṃnāmo therassa bhāgineyyo channaparibbājako. Yo kho āvuso rāgakkhayoti nibbānaṃ āgamma rāgo khīyati, tasmā nibbānaṃ rāgakkhayoti vuccati. Dosamohakkhayesupi eseva nayo.
யோ பன இமினாவ ஸுத்தேன கிலேஸக்க²யமத்தங் நிப்³பா³னந்தி வதெ³ய்ய, ஸோ வத்தப்³போ³ ‘‘கஸ்ஸ கிலேஸானங் க²யோ, கிங் அத்தனோ, உதா³ஹு பரேஸ’’ந்தி? அத்³தா⁴ ‘‘அத்தனோ’’தி வக்க²தி. ததோ புச்சி²தப்³போ³ ‘‘கொ³த்ரபு⁴ஞாணஸ்ஸ கிங் ஆரம்மண’’ந்தி? ஜானமானோ ‘‘நிப்³பா³ன’’ந்தி வக்க²தி. கிங் பன கொ³த்ரபு⁴ஞாணக்க²ணே கிலேஸா கீ²ணா கீ²யந்தி கீ²யிஸ்ஸந்தீதி? ‘‘கீ²ணா’’தி வா ‘‘கீ²யந்தீ’’தி வா ந வத்தப்³பா³, ‘‘கீ²யிஸ்ஸந்தீ’’தி பன வத்தப்³பா³தி. கிங் பன தேஸு அகீ²ணேஸுயேவ கிலேஸேஸு கொ³த்ரபு⁴ஞாணங் கிலேஸக்க²யங் ஆரம்மணங் கரோதீதி? அத்³தா⁴ ஏவங் வுத்தே நிருத்தரோ ப⁴விஸ்ஸதி.
Yo pana imināva suttena kilesakkhayamattaṃ nibbānanti vadeyya, so vattabbo ‘‘kassa kilesānaṃ khayo, kiṃ attano, udāhu paresa’’nti? Addhā ‘‘attano’’ti vakkhati. Tato pucchitabbo ‘‘gotrabhuñāṇassa kiṃ ārammaṇa’’nti? Jānamāno ‘‘nibbāna’’nti vakkhati. Kiṃ pana gotrabhuñāṇakkhaṇe kilesā khīṇā khīyanti khīyissantīti? ‘‘Khīṇā’’ti vā ‘‘khīyantī’’ti vā na vattabbā, ‘‘khīyissantī’’ti pana vattabbāti. Kiṃ pana tesu akhīṇesuyeva kilesesu gotrabhuñāṇaṃ kilesakkhayaṃ ārammaṇaṃ karotīti? Addhā evaṃ vutte niruttaro bhavissati.
மக்³க³ஞாணேனாபி சேதங் யோஜேதப்³ப³ங். மக்³க³க்க²ணேபி ஹி கிலேஸா ‘‘கீ²ணா’’தி வா ‘‘கீ²யிஸ்ஸந்தீ’’தி வா ந வத்தப்³பா³, ‘‘கீ²யந்தீ’’தி பன வத்தப்³பா³, ந ச அகீ²ணேஸுயேவ கிலேஸேஸு கிலேஸக்க²யோ ஆரம்மணங் ஹோதி, தஸ்மா ஸம்படிச்சி²தப்³ப³மேதங். யங் ஆக³ம்ம ராகா³த³யோ கீ²யந்தி, தங் நிப்³பா³னங். தங் பனேதங் ‘‘ரூபினோ த⁴ம்மா அரூபினோ த⁴ம்மா’’திஆதீ³ஸு (த⁴॰ ஸ॰ து³கமாதிகா 11) து³கேஸு அரூபினோ த⁴ம்மாதி ஸங்க³ஹிதத்தா ந கிலேஸக்க²யமத்தமேவாதி.
Maggañāṇenāpi cetaṃ yojetabbaṃ. Maggakkhaṇepi hi kilesā ‘‘khīṇā’’ti vā ‘‘khīyissantī’’ti vā na vattabbā, ‘‘khīyantī’’ti pana vattabbā, na ca akhīṇesuyeva kilesesu kilesakkhayo ārammaṇaṃ hoti, tasmā sampaṭicchitabbametaṃ. Yaṃ āgamma rāgādayo khīyanti, taṃ nibbānaṃ. Taṃ panetaṃ ‘‘rūpino dhammā arūpino dhammā’’tiādīsu (dha. sa. dukamātikā 11) dukesu arūpino dhammāti saṅgahitattā na kilesakkhayamattamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. நிப்³பா³னபஞ்ஹாஸுத்தங் • 1. Nibbānapañhāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. நிப்³பா³னபஞ்ஹஸுத்தவண்ணனா • 1. Nibbānapañhasuttavaṇṇanā
