| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৪. জম্বুখাদকসংযুত্তং
4. Jambukhādakasaṃyuttaṃ
১. নিব্বানপঞ্হাসুত্তৰণ্ণনা
1. Nibbānapañhāsuttavaṇṇanā
৩১৪. জম্বুখাদকসংযুত্তে জম্বুখাদকো পরিব্বাজকোতি এৰংনামো থেরস্স ভাগিনেয্যো ছন্নপরিব্বাজকো। যো খো আৰুসো রাগক্খযোতি নিব্বানং আগম্ম রাগো খীযতি, তস্মা নিব্বানং রাগক্খযোতি ৰুচ্চতি। দোসমোহক্খযেসুপি এসেৰ নযো।
314. Jambukhādakasaṃyutte jambukhādako paribbājakoti evaṃnāmo therassa bhāgineyyo channaparibbājako. Yo kho āvuso rāgakkhayoti nibbānaṃ āgamma rāgo khīyati, tasmā nibbānaṃ rāgakkhayoti vuccati. Dosamohakkhayesupi eseva nayo.
যো পন ইমিনাৰ সুত্তেন কিলেসক্খযমত্তং নিব্বানন্তি ৰদেয্য, সো ৰত্তব্বো ‘‘কস্স কিলেসানং খযো, কিং অত্তনো, উদাহু পরেস’’ন্তি? অদ্ধা ‘‘অত্তনো’’তি ৰক্খতি। ততো পুচ্ছিতব্বো ‘‘গোত্রভুঞাণস্স কিং আরম্মণ’’ন্তি? জানমানো ‘‘নিব্বান’’ন্তি ৰক্খতি। কিং পন গোত্রভুঞাণক্খণে কিলেসা খীণা খীযন্তি খীযিস্সন্তীতি? ‘‘খীণা’’তি ৰা ‘‘খীযন্তী’’তি ৰা ন ৰত্তব্বা, ‘‘খীযিস্সন্তী’’তি পন ৰত্তব্বাতি। কিং পন তেসু অখীণেসুযেৰ কিলেসেসু গোত্রভুঞাণং কিলেসক্খযং আরম্মণং করোতীতি? অদ্ধা এৰং ৰুত্তে নিরুত্তরো ভৰিস্সতি।
Yo pana imināva suttena kilesakkhayamattaṃ nibbānanti vadeyya, so vattabbo ‘‘kassa kilesānaṃ khayo, kiṃ attano, udāhu paresa’’nti? Addhā ‘‘attano’’ti vakkhati. Tato pucchitabbo ‘‘gotrabhuñāṇassa kiṃ ārammaṇa’’nti? Jānamāno ‘‘nibbāna’’nti vakkhati. Kiṃ pana gotrabhuñāṇakkhaṇe kilesā khīṇā khīyanti khīyissantīti? ‘‘Khīṇā’’ti vā ‘‘khīyantī’’ti vā na vattabbā, ‘‘khīyissantī’’ti pana vattabbāti. Kiṃ pana tesu akhīṇesuyeva kilesesu gotrabhuñāṇaṃ kilesakkhayaṃ ārammaṇaṃ karotīti? Addhā evaṃ vutte niruttaro bhavissati.
মগ্গঞাণেনাপি চেতং যোজেতব্বং। মগ্গক্খণেপি হি কিলেসা ‘‘খীণা’’তি ৰা ‘‘খীযিস্সন্তী’’তি ৰা ন ৰত্তব্বা, ‘‘খীযন্তী’’তি পন ৰত্তব্বা, ন চ অখীণেসুযেৰ কিলেসেসু কিলেসক্খযো আরম্মণং হোতি, তস্মা সম্পটিচ্ছিতব্বমেতং। যং আগম্ম রাগাদযো খীযন্তি, তং নিব্বানং। তং পনেতং ‘‘রূপিনো ধম্মা অরূপিনো ধম্মা’’তিআদীসু (ধ॰ স॰ দুকমাতিকা ১১) দুকেসু অরূপিনো ধম্মাতি সঙ্গহিতত্তা ন কিলেসক্খযমত্তমেৰাতি।
Maggañāṇenāpi cetaṃ yojetabbaṃ. Maggakkhaṇepi hi kilesā ‘‘khīṇā’’ti vā ‘‘khīyissantī’’ti vā na vattabbā, ‘‘khīyantī’’ti pana vattabbā, na ca akhīṇesuyeva kilesesu kilesakkhayo ārammaṇaṃ hoti, tasmā sampaṭicchitabbametaṃ. Yaṃ āgamma rāgādayo khīyanti, taṃ nibbānaṃ. Taṃ panetaṃ ‘‘rūpino dhammā arūpino dhammā’’tiādīsu (dha. sa. dukamātikā 11) dukesu arūpino dhammāti saṅgahitattā na kilesakkhayamattamevāti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. নিব্বানপঞ্হাসুত্তং • 1. Nibbānapañhāsuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. নিব্বানপঞ্হসুত্তৰণ্ণনা • 1. Nibbānapañhasuttavaṇṇanā
