| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
៤. ជម្ពុខាទកសំយុត្តំ
4. Jambukhādakasaṃyuttaṃ
១. និព្ពានបញ្ហាសុត្តវណ្ណនា
1. Nibbānapañhāsuttavaṇṇanā
៣១៤. ជម្ពុខាទកសំយុត្តេ ជម្ពុខាទកោ បរិព្ពាជកោតិ ឯវំនាមោ ថេរស្ស ភាគិនេយ្យោ ឆន្នបរិព្ពាជកោ។ យោ ខោ អាវុសោ រាគក្ខយោតិ និព្ពានំ អាគម្ម រាគោ ខីយតិ, តស្មា និព្ពានំ រាគក្ខយោតិ វុច្ចតិ។ ទោសមោហក្ខយេសុបិ ឯសេវ នយោ។
314. Jambukhādakasaṃyutte jambukhādako paribbājakoti evaṃnāmo therassa bhāgineyyo channaparibbājako. Yo kho āvuso rāgakkhayoti nibbānaṃ āgamma rāgo khīyati, tasmā nibbānaṃ rāgakkhayoti vuccati. Dosamohakkhayesupi eseva nayo.
យោ បន ឥមិនាវ សុត្តេន កិលេសក្ខយមត្តំ និព្ពានន្តិ វទេយ្យ, សោ វត្តព្ពោ ‘‘កស្ស កិលេសានំ ខយោ, កិំ អត្តនោ, ឧទាហុ បរេស’’ន្តិ? អទ្ធា ‘‘អត្តនោ’’តិ វក្ខតិ។ តតោ បុច្ឆិតព្ពោ ‘‘គោត្រភុញាណស្ស កិំ អារម្មណ’’ន្តិ? ជានមានោ ‘‘និព្ពាន’’ន្តិ វក្ខតិ។ កិំ បន គោត្រភុញាណក្ខណេ កិលេសា ខីណា ខីយន្តិ ខីយិស្សន្តីតិ? ‘‘ខីណា’’តិ វា ‘‘ខីយន្តី’’តិ វា ន វត្តព្ពា, ‘‘ខីយិស្សន្តី’’តិ បន វត្តព្ពាតិ។ កិំ បន តេសុ អខីណេសុយេវ កិលេសេសុ គោត្រភុញាណំ កិលេសក្ខយំ អារម្មណំ ករោតីតិ? អទ្ធា ឯវំ វុត្តេ និរុត្តរោ ភវិស្សតិ។
Yo pana imināva suttena kilesakkhayamattaṃ nibbānanti vadeyya, so vattabbo ‘‘kassa kilesānaṃ khayo, kiṃ attano, udāhu paresa’’nti? Addhā ‘‘attano’’ti vakkhati. Tato pucchitabbo ‘‘gotrabhuñāṇassa kiṃ ārammaṇa’’nti? Jānamāno ‘‘nibbāna’’nti vakkhati. Kiṃ pana gotrabhuñāṇakkhaṇe kilesā khīṇā khīyanti khīyissantīti? ‘‘Khīṇā’’ti vā ‘‘khīyantī’’ti vā na vattabbā, ‘‘khīyissantī’’ti pana vattabbāti. Kiṃ pana tesu akhīṇesuyeva kilesesu gotrabhuñāṇaṃ kilesakkhayaṃ ārammaṇaṃ karotīti? Addhā evaṃ vutte niruttaro bhavissati.
មគ្គញាណេនាបិ ចេតំ យោជេតព្ពំ។ មគ្គក្ខណេបិ ហិ កិលេសា ‘‘ខីណា’’តិ វា ‘‘ខីយិស្សន្តី’’តិ វា ន វត្តព្ពា, ‘‘ខីយន្តី’’តិ បន វត្តព្ពា, ន ច អខីណេសុយេវ កិលេសេសុ កិលេសក្ខយោ អារម្មណំ ហោតិ, តស្មា សម្បដិច្ឆិតព្ពមេតំ។ យំ អាគម្ម រាគាទយោ ខីយន្តិ, តំ និព្ពានំ។ តំ បនេតំ ‘‘រូបិនោ ធម្មា អរូបិនោ ធម្មា’’តិអាទីសុ (ធ. ស. ទុកមាតិកា ១១) ទុកេសុ អរូបិនោ ធម្មាតិ សង្គហិតត្តា ន កិលេសក្ខយមត្តមេវាតិ។
Maggañāṇenāpi cetaṃ yojetabbaṃ. Maggakkhaṇepi hi kilesā ‘‘khīṇā’’ti vā ‘‘khīyissantī’’ti vā na vattabbā, ‘‘khīyantī’’ti pana vattabbā, na ca akhīṇesuyeva kilesesu kilesakkhayo ārammaṇaṃ hoti, tasmā sampaṭicchitabbametaṃ. Yaṃ āgamma rāgādayo khīyanti, taṃ nibbānaṃ. Taṃ panetaṃ ‘‘rūpino dhammā arūpino dhammā’’tiādīsu (dha. sa. dukamātikā 11) dukesu arūpino dhammāti saṅgahitattā na kilesakkhayamattamevāti.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. និព្ពានបញ្ហាសុត្តំ • 1. Nibbānapañhāsuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១. និព្ពានបញ្ហសុត្តវណ្ណនា • 1. Nibbānapañhasuttavaṇṇanā
