| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၁၀. နိဗ္ဗာနရူပသဏ္ဌာနပဉ္ဟော
10. Nibbānarūpasaṇṭhānapañho
၁၀. ‘‘ဘန္တေ နာဂသေန, ‘နိဗ္ဗာနံ နိဗ္ဗာန’န္တိ ယံ ဝဒေသိ, သက္ကာ ပန တသ္သ နိဗ္ဗာနသ္သ ရူပံ ဝာ သဏ္ဌာနံ ဝာ ဝယံ ဝာ ပမာဏံ ဝာ ဩပမ္မေန ဝာ ကာရဏေန ဝာ ဟေတုနာ ဝာ နယေန ဝာ ဥပဒသ္သယိတု’’န္တိ? ‘‘အပ္ပဋိဘာဂံ, မဟာရာဇ, နိဗ္ဗာနံ, န သက္ကာ နိဗ္ဗာနသ္သ ရူပံ ဝာ သဏ္ဌာနံ ဝာ ဝယံ ဝာ ပမာဏံ ဝာ ဩပမ္မေန ဝာ ကာရဏေန ဝာ ဟေတုနာ ဝာ နယေန ဝာ ဥပဒသ္သယိတု’’န္တိ။ ‘‘ဧတမ္ပာဟံ, ဘန္တေ နာဂသေန, န သမ္ပဋိစ္ဆာမိ, ယံ အတ္ထိဓမ္မသ္သ နိဗ္ဗာနသ္သ ရူပံ ဝာ သဏ္ဌာနံ ဝာ ဝယံ ဝာ ပမာဏံ ဝာ ဩပမ္မေန ဝာ ကာရဏေန ဝာ ဟေတုနာ ဝာ နယေန ဝာ အပညာပနံ, ကာရဏေန မံ သညာပေဟီ’’တိ။ ‘‘ဟောတု, မဟာရာဇ, ကာရဏေန တံ သညာပေသ္သာမိ။ အတ္ထိ, မဟာရာဇ, မဟာသမုဒ္ဒော နာမာ’’တိ? ‘‘အာမ, ဘန္တေ, အတ္ထေသော မဟာသမုဒ္ဒော’’တိ။ ‘‘သစေ တံ, မဟာရာဇ, ကောစိ ဧဝံ ပုစ္ဆေယ္ယ ‘ကိတ္တကံ, မဟာရာဇ, မဟာသမုဒ္ဒေ ဥဒကံ, ကတိ ပန တေ သတ္တာ, ယေ မဟာသမုဒ္ဒေ ပဋိဝသန္တီ’တိ, ဧဝံ ပုဋ္ဌော တ္ဝံ, မဟာရာဇ, ကိန္တိ တသ္သ ဗ္ယာကရေယ္ယာသီ’’တိ? ‘‘သစေ မံ, ဘန္တေ, ကောစိ ဧဝံ ပုစ္ဆေယ္ယ ‘ကိတ္တကံ, မဟာရာဇ, မဟာသမုဒ္ဒေ ဥဒကံ, ကတိ ပန တေ သတ္တာ, ယေ မဟာသမုဒ္ဒေ ပဋိဝသန္တီ’တိ, တမဟံ, ဘန္တေ, ဧဝံ ဝဒေယ္ယံ ‘အပုစ္ဆိတဗ္ဗံ မံ တ္ဝံ အမ္ဘော ပုရိသ ပုစ္ဆသိ, နေသာ ပုစ္ဆာ ကေနစိ ပုစ္ဆိတဗ္ဗာ, ဌပနီယော ဧသော ပဉ္ဟော။ အဝိဘတ္တော လောကက္ခာယိကေဟိ မဟာသမုဒ္ဒော, န သက္ကာ မဟာသမုဒ္ဒေ ဥဒကံ ပရိမိနိတုံ သတ္တာ ဝာ ယေ တတ္ထ ဝာသမုပဂတာတိ ဧဝာဟံ ဘန္တေ တသ္သ ပဋိဝစနံ ဒဒေယ္ယ’’’န္တိ။
10. ‘‘Bhante nāgasena, ‘nibbānaṃ nibbāna’nti yaṃ vadesi, sakkā pana tassa nibbānassa rūpaṃ vā saṇṭhānaṃ vā vayaṃ vā pamāṇaṃ vā opammena vā kāraṇena vā hetunā vā nayena vā upadassayitu’’nti? ‘‘Appaṭibhāgaṃ, mahārāja, nibbānaṃ, na sakkā nibbānassa rūpaṃ vā saṇṭhānaṃ vā vayaṃ vā pamāṇaṃ vā opammena vā kāraṇena vā hetunā vā nayena vā upadassayitu’’nti. ‘‘Etampāhaṃ, bhante nāgasena, na sampaṭicchāmi, yaṃ atthidhammassa nibbānassa rūpaṃ vā saṇṭhānaṃ vā vayaṃ vā pamāṇaṃ vā opammena vā kāraṇena vā hetunā vā nayena vā apaññāpanaṃ, kāraṇena maṃ saññāpehī’’ti. ‘‘Hotu, mahārāja, kāraṇena taṃ saññāpessāmi. Atthi, mahārāja, mahāsamuddo nāmā’’ti? ‘‘Āma, bhante, attheso mahāsamuddo’’ti. ‘‘Sace taṃ, mahārāja, koci evaṃ puccheyya ‘kittakaṃ, mahārāja, mahāsamudde udakaṃ, kati pana te sattā, ye mahāsamudde paṭivasantī’ti, evaṃ puṭṭho tvaṃ, mahārāja, kinti tassa byākareyyāsī’’ti? ‘‘Sace maṃ, bhante, koci evaṃ puccheyya ‘kittakaṃ, mahārāja, mahāsamudde udakaṃ, kati pana te sattā, ye mahāsamudde paṭivasantī’ti, tamahaṃ, bhante, evaṃ vadeyyaṃ ‘apucchitabbaṃ maṃ tvaṃ ambho purisa pucchasi, nesā pucchā kenaci pucchitabbā, ṭhapanīyo eso pañho. Avibhatto lokakkhāyikehi mahāsamuddo, na sakkā mahāsamudde udakaṃ pariminituṃ sattā vā ye tattha vāsamupagatāti evāhaṃ bhante tassa paṭivacanaṃ dadeyya’’’nti.
‘‘ကိသ္သ ပန, တ္ဝံ မဟာရာဇ, အတ္ထိဓမ္မေ မဟာသမုဒ္ဒေ ဧဝံ ပဋိဝစနံ ဒဒေယ္ယာသိ, နနု ဝိဂဏေတ္ဝာ 1 တသ္သ အာစိက္ခိတဗ္ဗံ ‘ဧတ္တကံ မဟာသမုဒ္ဒေ ဥဒကံ, ဧတ္တကာ စ သတ္တာ မဟာသမုဒ္ဒေ ပဋိဝသန္တီ’’တိ? ‘‘န သက္ကာ, ဘန္တေ, အဝိသယော ဧသော ပဉ္ဟော’’တိ။
‘‘Kissa pana, tvaṃ mahārāja, atthidhamme mahāsamudde evaṃ paṭivacanaṃ dadeyyāsi, nanu vigaṇetvā 2 tassa ācikkhitabbaṃ ‘ettakaṃ mahāsamudde udakaṃ, ettakā ca sattā mahāsamudde paṭivasantī’’ti? ‘‘Na sakkā, bhante, avisayo eso pañho’’ti.
‘‘ယထာ , မဟာရာဇ, အတ္ထိဓမ္မေ ယေဝ မဟာသမုဒ္ဒေ န သက္ကာ ဥဒကံ ပရိဂဏေတုံ 3 သတ္တာ ဝာ ယေ တတ္ထ ဝာသမုပဂတာ, ဧဝမေဝ ခော, မဟာရာဇ, အတ္ထိဓမ္မသ္သေဝ နိဗ္ဗာနသ္သ န သက္ကာ ရူပံ ဝာ သဏ္ဌာနံ ဝာ ဝယံ ဝာ ပမာဏံ ဝာ ဩပမ္မေန ဝာ ကာရဏေန ဝာ ဟေတုနာ ဝာ နယေန ဝာ ဥပဒသ္သယိတုံ, ဝိဂဏေယ္ယ, မဟာရာဇ, ဣဒ္ဓိမာ စေတောဝသိပ္ပတ္တော မဟာသမုဒ္ဒေ ဥဒကံ တတ္ရာသယေ စ သတ္တေ, န တ္ဝေဝ သော ဣဒ္ဓိမာ စေတောဝသိပ္ပတ္တော သက္ကုဏေယ္ယ နိဗ္ဗာနသ္သ ရူပံ ဝာ သဏ္ဌာနံ ဝာ ဝယံ ဝာ ပမာဏံ ဝာ ဩပမ္မေန ဝာ ကာရဏေန ဝာ ဟေတုနာ ဝာ နယေန ဝာ ဥပဒသ္သယိတုံ။
‘‘Yathā , mahārāja, atthidhamme yeva mahāsamudde na sakkā udakaṃ parigaṇetuṃ 4 sattā vā ye tattha vāsamupagatā, evameva kho, mahārāja, atthidhammasseva nibbānassa na sakkā rūpaṃ vā saṇṭhānaṃ vā vayaṃ vā pamāṇaṃ vā opammena vā kāraṇena vā hetunā vā nayena vā upadassayituṃ, vigaṇeyya, mahārāja, iddhimā cetovasippatto mahāsamudde udakaṃ tatrāsaye ca satte, na tveva so iddhimā cetovasippatto sakkuṇeyya nibbānassa rūpaṃ vā saṇṭhānaṃ vā vayaṃ vā pamāṇaṃ vā opammena vā kāraṇena vā hetunā vā nayena vā upadassayituṃ.
‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ, အတ္ထိဓမ္မသ္သေဝ နိဗ္ဗာနသ္သ န သက္ကာ ရူပံ ဝာ သဏ္ဌာနံ ဝာ ဝယံ ဝာ ပမာဏံ ဝာ ဩပမ္မေန ဝာ ကာရဏေန ဝာ ဟေတုနာ ဝာ နယေန ဝာ ဥပဒသ္သယိတုန္တိ။ အတ္ထိ, မဟာရာဇ, ဒေဝေသု အရူပကာယိကာ နာမ ဒေဝာ’’တိ။ ‘‘အာမ, ဘန္တေ, သုယ္ယတိ ‘အတ္ထိ ဒေဝေသု အရူပကာယိကာ နာမ ဒေဝာ’’’တိ။ ‘‘သက္ကာ ပန, မဟာရာဇ, တေသံ အရူပကာယိကာနံ ဒေဝာနံ ရူပံ ဝာ သဏ္ဌာနံ ဝာ ဝယံ ဝာ ပမာဏံ ဝာ ဩပမ္မေန ဝာ ကာရဏေန ဝာ ဟေတုနာ ဝာ နယေန ဝာ ဥပဒသ္သယိတု’’န္တိ? ‘‘န ဟိ, ဘန္တေ’’တိ။ ‘‘တေန ဟိ, မဟာရာဇ, နတ္ထိ အရူပကာယိကာ ဒေဝာ’’တိ? ‘‘အတ္ထိ, ဘန္တေ, အရူပကာယိကာ ဒေဝာ, န စ သက္ကာ တေသံ ရူပံ ဝာ သဏ္ဌာနံ ဝာ ဝယံ ဝာ ပမာဏံ ဝာ ဩပမ္မေန ဝာ ကာရဏေန ဝာ ဟေတုနာ ဝာ နယေန ဝာ ဥပဒသ္သယိတု’’န္တိ။ ‘‘ယထာ, မဟာရာဇ, အတ္ထိသတ္တာနံ ယေဝ အရူပကာယိကာနံ ဒေဝာနံ န သက္ကာ ရူပံ ဝာ သဏ္ဌာနံ ဝာ ဝယံ ဝာ ပမာဏံ ဝာ ဩပမ္မေန ဝာ ကာရဏေန ဝာ ဟေတုနာ ဝာ နယေန ဝာ ဥပဒသ္သယိတုံ, ဧဝမေဝ ခော, မဟာရာဇ, အတ္ထိဓမ္မသ္သေဝ နိဗ္ဗာနသ္သ န သက္ကာ ရူပံ ဝာ သဏ္ဌာနံ ဝာ ဝယံ ဝာ ပမာဏံ ဝာ ဩပမ္မေန ဝာ ကာရဏေန ဝာ ဟေတုနာ ဝာ နယေန ဝာ ဥပဒသ္သယိတု’’န္တိ။
‘‘Aparampi, mahārāja, uttariṃ kāraṇaṃ suṇohi, atthidhammasseva nibbānassa na sakkā rūpaṃ vā saṇṭhānaṃ vā vayaṃ vā pamāṇaṃ vā opammena vā kāraṇena vā hetunā vā nayena vā upadassayitunti. Atthi, mahārāja, devesu arūpakāyikā nāma devā’’ti. ‘‘Āma, bhante, suyyati ‘atthi devesu arūpakāyikā nāma devā’’’ti. ‘‘Sakkā pana, mahārāja, tesaṃ arūpakāyikānaṃ devānaṃ rūpaṃ vā saṇṭhānaṃ vā vayaṃ vā pamāṇaṃ vā opammena vā kāraṇena vā hetunā vā nayena vā upadassayitu’’nti? ‘‘Na hi, bhante’’ti. ‘‘Tena hi, mahārāja, natthi arūpakāyikā devā’’ti? ‘‘Atthi, bhante, arūpakāyikā devā, na ca sakkā tesaṃ rūpaṃ vā saṇṭhānaṃ vā vayaṃ vā pamāṇaṃ vā opammena vā kāraṇena vā hetunā vā nayena vā upadassayitu’’nti. ‘‘Yathā, mahārāja, atthisattānaṃ yeva arūpakāyikānaṃ devānaṃ na sakkā rūpaṃ vā saṇṭhānaṃ vā vayaṃ vā pamāṇaṃ vā opammena vā kāraṇena vā hetunā vā nayena vā upadassayituṃ, evameva kho, mahārāja, atthidhammasseva nibbānassa na sakkā rūpaṃ vā saṇṭhānaṃ vā vayaṃ vā pamāṇaṃ vā opammena vā kāraṇena vā hetunā vā nayena vā upadassayitu’’nti.
‘‘ဘန္တေ နာဂသေန, ဟောတု ဧကန္တသုခံ နိဗ္ဗာနံ, န စ သက္ကာ တသ္သ ရူပံ ဝာ သဏ္ဌာနံ ဝာ ဝယံ ဝာ ပမာဏံ ဝာ ဩပမ္မေန ဝာ ကာရဏေန ဝာ ဟေတုနာ ဝာ နယေန ဝာ ဥပဒသ္သယိတုံ။ အတ္ထိ ပန, ဘန္တေ, နိဗ္ဗာနသ္သ ဂုဏံ အညေဟိ အနုပဝိဋ္ဌံ ကိဉ္စိ ဩပမ္မနိဒသ္သနမတ္တ’’န္တိ? ‘‘သရူပတော, မဟာရာဇ, နတ္ထိ, ဂုဏတော ပန သက္ကာ ကိဉ္စိ ဩပမ္မနိဒသ္သနမတ္တံ ဥပဒသ္သယိတု’’န္တိ။ ‘‘သာဓု, ဘန္တေ နာဂသေန, ယထာဟံ လဘာမိ နိဗ္ဗာနသ္သ ဂုဏတောပိ ဧကဒေသပရိဒီပနမတ္တံ, တထာ သီဃံ ဗ္ရူဟိ, နိဗ္ဗာပေဟိ မေ ဟဒယပရိဠာဟံ ဝိနယ သီတလမဓုရဝစနမာလုတေနာ’’တိ။
‘‘Bhante nāgasena, hotu ekantasukhaṃ nibbānaṃ, na ca sakkā tassa rūpaṃ vā saṇṭhānaṃ vā vayaṃ vā pamāṇaṃ vā opammena vā kāraṇena vā hetunā vā nayena vā upadassayituṃ. Atthi pana, bhante, nibbānassa guṇaṃ aññehi anupaviṭṭhaṃ kiñci opammanidassanamatta’’nti? ‘‘Sarūpato, mahārāja, natthi, guṇato pana sakkā kiñci opammanidassanamattaṃ upadassayitu’’nti. ‘‘Sādhu, bhante nāgasena, yathāhaṃ labhāmi nibbānassa guṇatopi ekadesaparidīpanamattaṃ, tathā sīghaṃ brūhi, nibbāpehi me hadayapariḷāhaṃ vinaya sītalamadhuravacanamālutenā’’ti.
‘‘ပဒုမသ္သ, မဟာရာဇ, ဧကော ဂုဏော နိဗ္ဗာနံ အနုပဝိဋ္ဌော, ဥဒကသ္သ ဒ္ဝေ ဂုဏာ, အဂဒသ္သ တယော ဂုဏာ, မဟာသမုဒ္ဒသ္သ စတ္တာရော ဂုဏာ, ဘောဇနသ္သ ပဉ္စ ဂုဏာ, အာကာသသ္သ ဒသ ဂုဏာ, မဏိရတနသ္သ တယော ဂုဏာ , လောဟိတစန္ဒနသ္သ တယော ဂုဏာ, သပ္ပိမဏ္ဍသ္သ တယော ဂုဏာ, ဂိရိသိခရသ္သ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ။
‘‘Padumassa, mahārāja, eko guṇo nibbānaṃ anupaviṭṭho, udakassa dve guṇā, agadassa tayo guṇā, mahāsamuddassa cattāro guṇā, bhojanassa pañca guṇā, ākāsassa dasa guṇā, maṇiratanassa tayo guṇā , lohitacandanassa tayo guṇā, sappimaṇḍassa tayo guṇā, girisikharassa pañca guṇā nibbānaṃ anupaviṭṭhā’’ti.
‘‘ဘန္တေ နာဂသေန, ‘ပဒုမသ္သ ဧကော ဂုဏော နိဗ္ဗာနံ အနုပဝိဋ္ဌော’တိ ယံ ဝဒေသိ, ကတမော ပဒုမသ္သ ဧကော ဂုဏော နိဗ္ဗာနံ အနုပဝိဋ္ဌော’’တိ? ‘‘ယထာ, မဟာရာဇ, ပဒုမံ အနုပလိတ္တံ ဥဒကေန, ဧဝမေဝ ခော, မဟာရာဇ, နိဗ္ဗာနံ သဗ္ဗကိလေသေဟိ အနုပလိတ္တံ။ အယံ, မဟာရာဇ, ပဒုမသ္သ ဧကော ဂုဏော နိဗ္ဗာနံ အနုပဝိဋ္ဌော’’တိ။
‘‘Bhante nāgasena, ‘padumassa eko guṇo nibbānaṃ anupaviṭṭho’ti yaṃ vadesi, katamo padumassa eko guṇo nibbānaṃ anupaviṭṭho’’ti? ‘‘Yathā, mahārāja, padumaṃ anupalittaṃ udakena, evameva kho, mahārāja, nibbānaṃ sabbakilesehi anupalittaṃ. Ayaṃ, mahārāja, padumassa eko guṇo nibbānaṃ anupaviṭṭho’’ti.
‘‘ဘန္တေ နာဂသေန, ‘ဥဒကသ္သ ဒ္ဝေ ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ ဥဒကသ္သ ဒ္ဝေ ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, ဥဒကံ သီတလံ ပရိဠာဟနိဗ္ဗာပနံ, ဧဝမေဝ ခော, မဟာရာဇ, နိဗ္ဗာနံ သီတလံ သဗ္ဗကိလေသပရိဠာဟနိဗ္ဗာပနံ။ အယံ, မဟာရာဇ, ဥဒကသ္သ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဥဒကံ ကိလန္တတသိတပိပာသိတဃမ္မာဘိတတ္တာနံ ဇနပသုပဇာနံ ပိပာသာဝိနယနံ, ဧဝမေဝ ခော, မဟာရာဇ, နိဗ္ဗာနံ ကာမတဏ္ဟာဘဝတဏ္ဟာဝိဘဝတဏ္ဟာပိပာသာဝိနယနံ။ အယံ, မဟာရာဇ, ဥဒကသ္သ ဒုတိယော ဂုဏော နိဗ္ဗာနံ အနုပဝိဋ္ဌော။ ဣမေ ခော, မဟာရာဇ, ဥဒကသ္သ ဒ္ဝေ ဂုဏာ နိဗ္ဗာနံ အနုပဝိဋ္ဌာ’’တိ။
‘‘Bhante nāgasena, ‘udakassa dve guṇā nibbānaṃ anupaviṭṭhā’ti yaṃ vadesi, katame udakassa dve guṇā nibbānaṃ anupaviṭṭhā’’ti? ‘‘Yathā, mahārāja, udakaṃ sītalaṃ pariḷāhanibbāpanaṃ, evameva kho, mahārāja, nibbānaṃ sītalaṃ sabbakilesapariḷāhanibbāpanaṃ. Ayaṃ, mahārāja, udakassa paṭhamo guṇo nibbānaṃ anupaviṭṭho. Puna caparaṃ, mahārāja, udakaṃ kilantatasitapipāsitaghammābhitattānaṃ janapasupajānaṃ pipāsāvinayanaṃ, evameva kho, mahārāja, nibbānaṃ kāmataṇhābhavataṇhāvibhavataṇhāpipāsāvinayanaṃ. Ayaṃ, mahārāja, udakassa dutiyo guṇo nibbānaṃ anupaviṭṭho. Ime kho, mahārāja, udakassa dve guṇā nibbānaṃ anupaviṭṭhā’’ti.
‘‘ဘန္တေ နာဂသေန, ‘အဂဒသ္သ တယော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ အဂဒသ္သ တယော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, အဂဒော ဝိသပီဠိတာနံ သတ္တာနံ ပဋိသရဏံ, ဧဝမေဝ ခော, မဟာရာဇ, နိဗ္ဗာနံ ကိလေသဝိသပီဠိတာနံ သတ္တာနံ ပဋိသရဏံ။ အယံ, မဟာရာဇ, အဂဒသ္သ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, အဂဒော ရောဂာနံ အန္တကရော, ဧဝမေဝ ခော, မဟာရာဇ, နိဗ္ဗာနံ သဗ္ဗဒုက္ခာနံ အန္တကရံ။ အယံ, မဟာရာဇ, အဂဒသ္သ ဒုတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, အဂဒော အမတံ, ဧဝမေဝ ခော, မဟာရာဇ, နိဗ္ဗာနံ အမတံ။ အယံ, မဟာရာဇ, အဂဒသ္သ တတိယော ဂုဏော နိဗ္ဗာနံ အနုပဝိဋ္ဌော။ ဣမေ ခော, မဟာရာဇ, အဂဒသ္သ တယော ဂုဏာ နိဗ္ဗာနံ အနုပဝိဋ္ဌာ’’တိ။
‘‘Bhante nāgasena, ‘agadassa tayo guṇā nibbānaṃ anupaviṭṭhā’ti yaṃ vadesi, katame agadassa tayo guṇā nibbānaṃ anupaviṭṭhā’’ti? ‘‘Yathā, mahārāja, agado visapīḷitānaṃ sattānaṃ paṭisaraṇaṃ, evameva kho, mahārāja, nibbānaṃ kilesavisapīḷitānaṃ sattānaṃ paṭisaraṇaṃ. Ayaṃ, mahārāja, agadassa paṭhamo guṇo nibbānaṃ anupaviṭṭho. Puna caparaṃ, mahārāja, agado rogānaṃ antakaro, evameva kho, mahārāja, nibbānaṃ sabbadukkhānaṃ antakaraṃ. Ayaṃ, mahārāja, agadassa dutiyo guṇo nibbānaṃ anupaviṭṭho. Puna caparaṃ, mahārāja, agado amataṃ, evameva kho, mahārāja, nibbānaṃ amataṃ. Ayaṃ, mahārāja, agadassa tatiyo guṇo nibbānaṃ anupaviṭṭho. Ime kho, mahārāja, agadassa tayo guṇā nibbānaṃ anupaviṭṭhā’’ti.
‘‘ဘန္တေ နာဂသေန, ‘မဟာသမုဒ္ဒသ္သ စတ္တာရော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ မဟာသမုဒ္ဒသ္သ စတ္တာရော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, မဟာသမုဒ္ဒော သုညော သဗ္ဗကုဏပေဟိ, ဧဝမေဝ ခော, မဟာရာဇ , နိဗ္ဗာနံ သုညံ သဗ္ဗကိလေသကုဏပေဟိ။ အယံ, မဟာရာဇ , မဟာသမုဒ္ဒသ္သ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, မဟာသမုဒ္ဒော မဟန္တော အနောရပာရော, န ပရိပူရတိ သဗ္ဗသဝန္တီဟိ, ဧဝမေဝ ခော, မဟာရာဇ, နိဗ္ဗာနံ မဟန္တံ အနောရပာရံ, န ပူရတိ သဗ္ဗသတ္တေဟိ။ အယံ, မဟာရာဇ, မဟာသမုဒ္ဒသ္သ ဒုတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, မဟာသမုဒ္ဒော မဟန္တာနံ ဘူတာနံ အာဝာသော, ဧဝမေဝ ခော, မဟာရာဇ, နိဗ္ဗာနံ မဟန္တာနံ အရဟန္တာနံ ဝိမလခီဏာသဝဗလပ္ပတ္တဝသီဘူတမဟာဘူတာနံ အာဝာသော။ အယံ, မဟာရာဇ, မဟာသမုဒ္ဒသ္သ တတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, မဟာသမုဒ္ဒော အပရိမိတဝိဝိဓဝိပုလဝီစိပုပ္ဖသံကုသုမိတော, ဧဝမေဝ ခော, မဟာရာဇ, နိဗ္ဗာနံ အပရိမိတဝိဝိဓဝိပုလပရိသုဒ္ဓဝိဇ္ဇာဝိမုတ္တိပုပ္ဖသံကုသုမိတံ။ အယံ, မဟာရာဇ, မဟာသမုဒ္ဒသ္သ စတုတ္ထော ဂုဏော နိဗ္ဗာနံ အနုပဝိဋ္ဌော။ ဣမေ ခော, မဟာရာဇ, မဟာသမုဒ္ဒသ္သ စတ္တာရော ဂုဏာ နိဗ္ဗာနံ အနုပဝိဋ္ဌာ’’တိ။
‘‘Bhante nāgasena, ‘mahāsamuddassa cattāro guṇā nibbānaṃ anupaviṭṭhā’ti yaṃ vadesi, katame mahāsamuddassa cattāro guṇā nibbānaṃ anupaviṭṭhā’’ti? ‘‘Yathā, mahārāja, mahāsamuddo suñño sabbakuṇapehi, evameva kho, mahārāja , nibbānaṃ suññaṃ sabbakilesakuṇapehi. Ayaṃ, mahārāja , mahāsamuddassa paṭhamo guṇo nibbānaṃ anupaviṭṭho. Puna caparaṃ, mahārāja, mahāsamuddo mahanto anorapāro, na paripūrati sabbasavantīhi, evameva kho, mahārāja, nibbānaṃ mahantaṃ anorapāraṃ, na pūrati sabbasattehi. Ayaṃ, mahārāja, mahāsamuddassa dutiyo guṇo nibbānaṃ anupaviṭṭho. Puna caparaṃ, mahārāja, mahāsamuddo mahantānaṃ bhūtānaṃ āvāso, evameva kho, mahārāja, nibbānaṃ mahantānaṃ arahantānaṃ vimalakhīṇāsavabalappattavasībhūtamahābhūtānaṃ āvāso. Ayaṃ, mahārāja, mahāsamuddassa tatiyo guṇo nibbānaṃ anupaviṭṭho. Puna caparaṃ, mahārāja, mahāsamuddo aparimitavividhavipulavīcipupphasaṃkusumito, evameva kho, mahārāja, nibbānaṃ aparimitavividhavipulaparisuddhavijjāvimuttipupphasaṃkusumitaṃ. Ayaṃ, mahārāja, mahāsamuddassa catuttho guṇo nibbānaṃ anupaviṭṭho. Ime kho, mahārāja, mahāsamuddassa cattāro guṇā nibbānaṃ anupaviṭṭhā’’ti.
‘‘ဘန္တေ နာဂသေန, ‘ဘောဇနသ္သ ပဉ္စ ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ ဘောဇနသ္သ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, ဘောဇနံ သဗ္ဗသတ္တာနံ အာယုဓာရဏံ, ဧဝမေဝ ခော, မဟာရာဇ, နိဗ္ဗာနံ သစ္ဆိကတံ ဇရာမရဏနာသနတော အာယုဓာရဏံ။ အယံ, မဟာရာဇ, ဘောဇနသ္သ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဘောဇနံ သဗ္ဗသတ္တာနံ ဗလဝဍ္ဎနံ, ဧဝမေဝ ခော, မဟာရာဇ, နိဗ္ဗာနံ သစ္ဆိကတံ သဗ္ဗသတ္တာနံ ဣဒ္ဓိဗလဝဍ္ဎနံ။ အယံ, မဟာရာဇ, ဘောဇနသ္သ ဒုတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဘောဇနံ သဗ္ဗသတ္တာနံ ဝဏ္ဏဇနနံ, ဧဝမေဝ ခော, မဟာရာဇ, နိဗ္ဗာနံ သစ္ဆိကတံ သဗ္ဗသတ္တာနံ ဂုဏဝဏ္ဏဇနနံ။ အယံ, မဟာရာဇ, ဘောဇနသ္သ တတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဘောဇနံ သဗ္ဗသတ္တာနံ ဒရထဝူပသမနံ, ဧဝမေဝ ခော, မဟာရာဇ, နိဗ္ဗာနံ သစ္ဆိကတံ သဗ္ဗသတ္တာနံ သဗ္ဗကိလေသဒရထဝူပသမနံ။ အယံ, မဟာရာဇ, ဘောဇနသ္သ စတုတ္ထော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဘောဇနံ သဗ္ဗသတ္တာနံ ဇိဃစ္ဆာဒုဗ္ဗလ္ယပဋိဝိနောဒနံ, ဧဝမေဝ ခော, မဟာရာဇ, နိဗ္ဗာနံ သစ္ဆိကတံ သဗ္ဗသတ္တာနံ သဗ္ဗဒုက္ခဇိဃစ္ဆာဒုဗ္ဗလ္ယပဋိဝိနောဒနံ။ အယံ, မဟာရာဇ, ဘောဇနသ္သ ပဉ္စမော ဂုဏော နိဗ္ဗာနံ အနုပဝိဋ္ဌော။ ဣမေ ခော, မဟာရာဇ, ဘောဇနသ္သ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ။
‘‘Bhante nāgasena, ‘bhojanassa pañca guṇā nibbānaṃ anupaviṭṭhā’ti yaṃ vadesi, katame bhojanassa pañca guṇā nibbānaṃ anupaviṭṭhā’’ti? ‘‘Yathā, mahārāja, bhojanaṃ sabbasattānaṃ āyudhāraṇaṃ, evameva kho, mahārāja, nibbānaṃ sacchikataṃ jarāmaraṇanāsanato āyudhāraṇaṃ. Ayaṃ, mahārāja, bhojanassa paṭhamo guṇo nibbānaṃ anupaviṭṭho. Puna caparaṃ, mahārāja, bhojanaṃ sabbasattānaṃ balavaḍḍhanaṃ, evameva kho, mahārāja, nibbānaṃ sacchikataṃ sabbasattānaṃ iddhibalavaḍḍhanaṃ. Ayaṃ, mahārāja, bhojanassa dutiyo guṇo nibbānaṃ anupaviṭṭho. Puna caparaṃ, mahārāja, bhojanaṃ sabbasattānaṃ vaṇṇajananaṃ, evameva kho, mahārāja, nibbānaṃ sacchikataṃ sabbasattānaṃ guṇavaṇṇajananaṃ. Ayaṃ, mahārāja, bhojanassa tatiyo guṇo nibbānaṃ anupaviṭṭho. Puna caparaṃ, mahārāja, bhojanaṃ sabbasattānaṃ darathavūpasamanaṃ, evameva kho, mahārāja, nibbānaṃ sacchikataṃ sabbasattānaṃ sabbakilesadarathavūpasamanaṃ. Ayaṃ, mahārāja, bhojanassa catuttho guṇo nibbānaṃ anupaviṭṭho. Puna caparaṃ, mahārāja, bhojanaṃ sabbasattānaṃ jighacchādubbalyapaṭivinodanaṃ, evameva kho, mahārāja, nibbānaṃ sacchikataṃ sabbasattānaṃ sabbadukkhajighacchādubbalyapaṭivinodanaṃ. Ayaṃ, mahārāja, bhojanassa pañcamo guṇo nibbānaṃ anupaviṭṭho. Ime kho, mahārāja, bhojanassa pañca guṇā nibbānaṃ anupaviṭṭhā’’ti.
‘‘ဘန္တေ နာဂသေန, ‘အာကာသသ္သ ဒသ ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ အာကာသသ္သ ဒသ ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, အာကာသော န ဇာယတိ, န ဇီယတိ, န မီယတိ, န စဝတိ, န ဥပ္ပဇ္ဇတိ, ဒုပ္ပသဟော, အစောရာဟရဏော, အနိသ္သိတော, ဝိဟဂဂမနော, နိရာဝရဏော, အနန္တော။ ဧဝမေဝ ခော, မဟာရာဇ, နိဗ္ဗာနံ န ဇာယတိ, န ဇီယတိ , န မီယတိ, န စဝတိ, န ဥပ္ပဇ္ဇတိ, ဒုပ္ပသဟံ, အစောရာဟရဏံ, အနိသ္သိတံ, အရိယဂမနံ, နိရာဝရဏံ, အနန္တံ။ ဣမေ ခော, မဟာရာဇ, အာကာသသ္သ ဒသ ဂုဏာ နိဗ္ဗာနံ အနုပဝိဋ္ဌာ’’တိ။
‘‘Bhante nāgasena, ‘ākāsassa dasa guṇā nibbānaṃ anupaviṭṭhā’ti yaṃ vadesi, katame ākāsassa dasa guṇā nibbānaṃ anupaviṭṭhā’’ti? ‘‘Yathā, mahārāja, ākāso na jāyati, na jīyati, na mīyati, na cavati, na uppajjati, duppasaho, acorāharaṇo, anissito, vihagagamano, nirāvaraṇo, ananto. Evameva kho, mahārāja, nibbānaṃ na jāyati, na jīyati , na mīyati, na cavati, na uppajjati, duppasahaṃ, acorāharaṇaṃ, anissitaṃ, ariyagamanaṃ, nirāvaraṇaṃ, anantaṃ. Ime kho, mahārāja, ākāsassa dasa guṇā nibbānaṃ anupaviṭṭhā’’ti.
‘‘ဘန္တေ နာဂသေန, ‘မဏိရတနသ္သ တယော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ မဏိရတနသ္သ တယော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, မဏိရတနံ ကာမဒဒံ, ဧဝမေဝ ခော, မဟာရာဇ, နိဗ္ဗာနံ ကာမဒဒံ။ အယံ, မဟာရာဇ, မဏိရတနသ္သ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, မဏိရတနံ ဟာသကရံ, ဧဝမေဝ ခော, မဟာရာဇ, နိဗ္ဗာနံ ဟာသကရံ။ အယံ, မဟာရာဇ, မဏိရတနသ္သ ဒုတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, မဏိရတနံ ဥဇ္ဇောတတ္တကရံ, ဧဝမေဝ ခော, မဟာရာဇ, နိဗ္ဗာနံ ဥဇ္ဇောတတ္တကရံ 5။ အယံ, မဟာရာဇ, မဏိရတနသ္သ တတိယော ဂုဏော နိဗ္ဗာနံ အနုပဝိဋ္ဌော။ ဣမေ ခော, မဟာရာဇ, မဏိရတနသ္သ တယော ဂုဏာ နိဗ္ဗာနံ အနုပဝိဋ္ဌာ’’တိ။
‘‘Bhante nāgasena, ‘maṇiratanassa tayo guṇā nibbānaṃ anupaviṭṭhā’ti yaṃ vadesi, katame maṇiratanassa tayo guṇā nibbānaṃ anupaviṭṭhā’’ti? ‘‘Yathā, mahārāja, maṇiratanaṃ kāmadadaṃ, evameva kho, mahārāja, nibbānaṃ kāmadadaṃ. Ayaṃ, mahārāja, maṇiratanassa paṭhamo guṇo nibbānaṃ anupaviṭṭho. Puna caparaṃ, mahārāja, maṇiratanaṃ hāsakaraṃ, evameva kho, mahārāja, nibbānaṃ hāsakaraṃ. Ayaṃ, mahārāja, maṇiratanassa dutiyo guṇo nibbānaṃ anupaviṭṭho. Puna caparaṃ, mahārāja, maṇiratanaṃ ujjotattakaraṃ, evameva kho, mahārāja, nibbānaṃ ujjotattakaraṃ 6. Ayaṃ, mahārāja, maṇiratanassa tatiyo guṇo nibbānaṃ anupaviṭṭho. Ime kho, mahārāja, maṇiratanassa tayo guṇā nibbānaṃ anupaviṭṭhā’’ti.
‘‘ဘန္တေ နာဂသေန, ‘လောဟိတစန္ဒနသ္သ တယော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ လောဟိတစန္ဒနသ္သ တယော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, လောဟိတစန္ဒနံ ဒုလ္လဘံ, ဧဝမေဝ ခော, မဟာရာဇ, နိဗ္ဗာနံ ဒုလ္လဘံ။ အယံ, မဟာရာဇ, လောဟိတစန္ဒနသ္သ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, လောဟိတစန္ဒနံ အသမသုဂန္ဓံ, ဧဝမေဝ ခော, မဟာရာဇ, နိဗ္ဗာနံ အသမသုဂန္ဓံ။ အယံ, မဟာရာဇ, လောဟိတစန္ဒနသ္သ ဒုတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, လောဟိတစန္ဒနံ သဇ္ဇနပသတ္ထံ 7, ဧဝမေဝ ခော, မဟာရာဇ, နိဗ္ဗာနံ အရိယသဇ္ဇနပသတ္ထံ။ အယံ, မဟာရာဇ, လောဟိတစန္ဒနသ္သ တတိယော ဂုဏော နိဗ္ဗာနံ အနုပဝိဋ္ဌော။ ဣမေ ခော, မဟာရာဇ, လောဟိတစန္ဒနသ္သ တယော ဂုဏာ နိဗ္ဗာနံ အနုပဝိဋ္ဌာ’’တိ။
‘‘Bhante nāgasena, ‘lohitacandanassa tayo guṇā nibbānaṃ anupaviṭṭhā’ti yaṃ vadesi, katame lohitacandanassa tayo guṇā nibbānaṃ anupaviṭṭhā’’ti? ‘‘Yathā, mahārāja, lohitacandanaṃ dullabhaṃ, evameva kho, mahārāja, nibbānaṃ dullabhaṃ. Ayaṃ, mahārāja, lohitacandanassa paṭhamo guṇo nibbānaṃ anupaviṭṭho. Puna caparaṃ, mahārāja, lohitacandanaṃ asamasugandhaṃ, evameva kho, mahārāja, nibbānaṃ asamasugandhaṃ. Ayaṃ, mahārāja, lohitacandanassa dutiyo guṇo nibbānaṃ anupaviṭṭho. Puna caparaṃ, mahārāja, lohitacandanaṃ sajjanapasatthaṃ 8, evameva kho, mahārāja, nibbānaṃ ariyasajjanapasatthaṃ. Ayaṃ, mahārāja, lohitacandanassa tatiyo guṇo nibbānaṃ anupaviṭṭho. Ime kho, mahārāja, lohitacandanassa tayo guṇā nibbānaṃ anupaviṭṭhā’’ti.
‘‘ဘန္တေ နာဂသေန, ‘သပ္ပိမဏ္ဍသ္သ တယော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ သပ္ပိမဏ္ဍသ္သ တယော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, သပ္ပိမဏ္ဍော ဝဏ္ဏသမ္ပန္နော, ဧဝမေဝ ခော, မဟာရာဇ, နိဗ္ဗာနံ ဂုဏဝဏ္ဏသမ္ပန္နံ။ အယံ, မဟာရာဇ, သပ္ပိမဏ္ဍသ္သ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, သပ္ပိမဏ္ဍော ဂန္ဓသမ္ပန္နော, ဧဝမေဝ ခော, မဟာရာဇ, နိဗ္ဗာနံ သီလဂန္ဓသမ္ပန္နံ။ အယံ, မဟာရာဇ, သပ္ပိမဏ္ဍသ္သ ဒုတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, သပ္ပိမဏ္ဍော ရသသမ္ပန္နော, ဧဝမေဝ ခော , မဟာရာဇ, နိဗ္ဗာနံ ရသသမ္ပန္နံ။ အယံ, မဟာရာဇ, သပ္ပိမဏ္ဍသ္သ တတိယော ဂုဏော နိဗ္ဗာနံ အနုပဝိဋ္ဌော။ ဣမေ ခော, မဟာရာဇ, သပ္ပိမဏ္ဍသ္သ တယော ဂုဏာ နိဗ္ဗာနံ အနုပဝိဋ္ဌာ’’တိ။
‘‘Bhante nāgasena, ‘sappimaṇḍassa tayo guṇā nibbānaṃ anupaviṭṭhā’ti yaṃ vadesi, katame sappimaṇḍassa tayo guṇā nibbānaṃ anupaviṭṭhā’’ti? ‘‘Yathā, mahārāja, sappimaṇḍo vaṇṇasampanno, evameva kho, mahārāja, nibbānaṃ guṇavaṇṇasampannaṃ. Ayaṃ, mahārāja, sappimaṇḍassa paṭhamo guṇo nibbānaṃ anupaviṭṭho. Puna caparaṃ, mahārāja, sappimaṇḍo gandhasampanno, evameva kho, mahārāja, nibbānaṃ sīlagandhasampannaṃ. Ayaṃ, mahārāja, sappimaṇḍassa dutiyo guṇo nibbānaṃ anupaviṭṭho. Puna caparaṃ, mahārāja, sappimaṇḍo rasasampanno, evameva kho , mahārāja, nibbānaṃ rasasampannaṃ. Ayaṃ, mahārāja, sappimaṇḍassa tatiyo guṇo nibbānaṃ anupaviṭṭho. Ime kho, mahārāja, sappimaṇḍassa tayo guṇā nibbānaṃ anupaviṭṭhā’’ti.
‘‘ဘန္တေ နာဂသေန, ‘ဂိရိသိခရသ္သ ပဉ္စ ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ ဂိရိသိခရသ္သ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, ဂိရိသိခရံ အစ္စုဂ္ဂတံ, ဧဝမေဝ ခော, မဟာရာဇ, နိဗ္ဗာနံ အစ္စုဂတံ။ အယံ, မဟာရာဇ, ဂိရိသိခရသ္သ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဂိရိသိခရံ အစလံ, ဧဝမေဝ ခော, မဟာရာဇ, နိဗ္ဗာနံ အစလံ။ အယံ, မဟာရာဇ, ဂိရိသိခရသ္သ ဒုတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဂိရိသိခရံ ဒုရဓိရောဟံ, ဧဝမေဝ ခော, မဟာရာဇ, နိဗ္ဗာနံ ဒုရဓိရောဟံ သဗ္ဗကိလေသာနံ။ အယံ, မဟာရာဇ, ဂိရိသိခရသ္သ တတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဂိရိသိခရံ သဗ္ဗဗီဇာနံ အဝိရူဟနံ, ဧဝမေဝ ခော, မဟာရာဇ, နိဗ္ဗာနံ သဗ္ဗကိလေသာနံ အဝိရူဟနံ။ အယံ, မဟာရာဇ, ဂိရိသိခရသ္သ စတုတ္ထော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဂိရိသိခရံ အနုနယပ္ပဋိဃဝိပ္ပမုတ္တံ, ဧဝမေဝ ခော, မဟာရာဇ, နိဗ္ဗာနံ အနုနယပ္ပဋိဃဝိပ္ပမုတ္တံ။ အယံ, မဟာရာဇ, ဂိရိသိခရသ္သ ပဉ္စမော ဂုဏော နိဗ္ဗာနံ အနုပဝိဋ္ဌော ။ ဣမေ ခော, မဟာရာဇ, ဂိရိသိခရသ္သ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။
‘‘Bhante nāgasena, ‘girisikharassa pañca guṇā nibbānaṃ anupaviṭṭhā’ti yaṃ vadesi, katame girisikharassa pañca guṇā nibbānaṃ anupaviṭṭhā’’ti? ‘‘Yathā, mahārāja, girisikharaṃ accuggataṃ, evameva kho, mahārāja, nibbānaṃ accugataṃ. Ayaṃ, mahārāja, girisikharassa paṭhamo guṇo nibbānaṃ anupaviṭṭho. Puna caparaṃ, mahārāja, girisikharaṃ acalaṃ, evameva kho, mahārāja, nibbānaṃ acalaṃ. Ayaṃ, mahārāja, girisikharassa dutiyo guṇo nibbānaṃ anupaviṭṭho. Puna caparaṃ, mahārāja, girisikharaṃ duradhirohaṃ, evameva kho, mahārāja, nibbānaṃ duradhirohaṃ sabbakilesānaṃ. Ayaṃ, mahārāja, girisikharassa tatiyo guṇo nibbānaṃ anupaviṭṭho. Puna caparaṃ, mahārāja, girisikharaṃ sabbabījānaṃ avirūhanaṃ, evameva kho, mahārāja, nibbānaṃ sabbakilesānaṃ avirūhanaṃ. Ayaṃ, mahārāja, girisikharassa catuttho guṇo nibbānaṃ anupaviṭṭho. Puna caparaṃ, mahārāja, girisikharaṃ anunayappaṭighavippamuttaṃ, evameva kho, mahārāja, nibbānaṃ anunayappaṭighavippamuttaṃ. Ayaṃ, mahārāja, girisikharassa pañcamo guṇo nibbānaṃ anupaviṭṭho . Ime kho, mahārāja, girisikharassa pañca guṇā nibbānaṃ anupaviṭṭhā’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
နိဗ္ဗာနရူပသဏ္ဌာနပဉ္ဟော ဒသမော။
Nibbānarūpasaṇṭhānapañho dasamo.
Footnotes:
