| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၁၀. နိဗ္ဗာနသုခဇာနနပဉ္ဟော
10. Nibbānasukhajānanapañho
၁၀. ရာဇာ အာဟ ‘‘ဘန္တေ နာဂသေန, ယော န လဘတိ နိဗ္ဗာနံ, ဇာနာတိ သော ‘သုခံ နိဗ္ဗာန’’’န္တိ? ‘‘အာမ, မဟာရာဇ, ယော န လဘတိ နိဗ္ဗာနံ, ဇာနာတိ သော ‘သုခံ နိဗ္ဗာန’’’န္တိ။ ‘‘ကထံ, ဘန္တေ နာဂသေန, အလဘန္တော ဇာနာတိ ‘သုခံ နိဗ္ဗာန’’’န္တိ? ‘‘တံ ကိံ မညသိ, မဟာရာဇ, ယေသံ နစ္ဆိန္နာ ဟတ္ထပာဒာ , ဇာနေယ္ယုံ တေ, မဟာရာဇ, ‘ဒုက္ခံ ဟတ္ထပာဒစ္ဆေဒန’’’န္တိ? ‘‘အာမ, ဘန္တေ, ဇာနေယ္ယု’’န္တိ။ ‘‘ကထံ ဇာနေယ္ယု’’န္တိ? ‘‘အညေသံ, ဘန္တေ, ဆိန္နဟတ္ထပာဒာနံ ပရိဒေဝိတသဒ္ဒံ သုတ္ဝာ ဇာနန္တိ ‘ဒုက္ခံ ဟတ္ထပာဒစ္ဆေဒန’’’န္တိ ။ ‘‘ဧဝမေဝ ခော, မဟာရာဇ, ယေသံ ဒိဋ္ဌံ နိဗ္ဗာနံ, တေသံ သဒ္ဒံ သုတ္ဝာ ဇာနာတိ ‘သုခံ နိဗ္ဗာန’’’န္တိ။
10. Rājā āha ‘‘bhante nāgasena, yo na labhati nibbānaṃ, jānāti so ‘sukhaṃ nibbāna’’’nti? ‘‘Āma, mahārāja, yo na labhati nibbānaṃ, jānāti so ‘sukhaṃ nibbāna’’’nti. ‘‘Kathaṃ, bhante nāgasena, alabhanto jānāti ‘sukhaṃ nibbāna’’’nti? ‘‘Taṃ kiṃ maññasi, mahārāja, yesaṃ nacchinnā hatthapādā , jāneyyuṃ te, mahārāja, ‘dukkhaṃ hatthapādacchedana’’’nti? ‘‘Āma, bhante, jāneyyu’’nti. ‘‘Kathaṃ jāneyyu’’nti? ‘‘Aññesaṃ, bhante, chinnahatthapādānaṃ paridevitasaddaṃ sutvā jānanti ‘dukkhaṃ hatthapādacchedana’’’nti . ‘‘Evameva kho, mahārāja, yesaṃ diṭṭhaṃ nibbānaṃ, tesaṃ saddaṃ sutvā jānāti ‘sukhaṃ nibbāna’’’nti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
နိဗ္ဗာနသုခဇာနနပဉ္ဟော ဒသမော။
Nibbānasukhajānanapañho dasamo.
နိဗ္ဗာနဝဂ္ဂော စတုတ္ထော။
Nibbānavaggo catuttho.
ဣမသ္မိံ ဝဂ္ဂေ ဒသ ပဉ္ဟာ။
Imasmiṃ vagge dasa pañhā.
