| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
10. නිබ්‌බානසුඛජානනපඤ්‌හො
10. Nibbānasukhajānanapañho
10. රාජා ආහ ‘‘භන්‌තෙ නාගසෙන, යො න ලභති නිබ්‌බානං, ජානාති සො ‘සුඛං නිබ්‌බාන’’’න්‌ති? ‘‘ආම, මහාරාජ, යො න ලභති නිබ්‌බානං, ජානාති සො ‘සුඛං නිබ්‌බාන’’’න්‌ති. ‘‘කථං, භන්‌තෙ නාගසෙන, අලභන්‌තො ජානාති ‘සුඛං නිබ්‌බාන’’’න්‌ති? ‘‘තං කිං මඤ්‌ඤසි, මහාරාජ, යෙසං නච්‌ඡින්‌නා හත්‌ථපාදා , ජානෙය්‍යුං තෙ, මහාරාජ, ‘දුක්‌ඛං හත්‌ථපාදච්‌ඡෙදන’’’න්‌ති? ‘‘ආම, භන්‌තෙ, ජානෙය්‍යු’’න්‌ති. ‘‘කථං ජානෙය්‍යු’’න්‌ති? ‘‘අඤ්‌ඤෙසං, භන්‌තෙ, ඡින්‌නහත්‌ථපාදානං පරිදෙවිතසද්‌දං සුත්‌වා ජානන්‌ති ‘දුක්‌ඛං හත්‌ථපාදච්‌ඡෙදන’’’න්‌ති . ‘‘එවමෙව ඛො, මහාරාජ, යෙසං දිට්‌ඨං නිබ්‌බානං, තෙසං සද්‌දං සුත්‌වා ජානාති ‘සුඛං නිබ්‌බාන’’’න්‌ති.
10. Rājā āha ‘‘bhante nāgasena, yo na labhati nibbānaṃ, jānāti so ‘sukhaṃ nibbāna’’’nti? ‘‘Āma, mahārāja, yo na labhati nibbānaṃ, jānāti so ‘sukhaṃ nibbāna’’’nti. ‘‘Kathaṃ, bhante nāgasena, alabhanto jānāti ‘sukhaṃ nibbāna’’’nti? ‘‘Taṃ kiṃ maññasi, mahārāja, yesaṃ nacchinnā hatthapādā , jāneyyuṃ te, mahārāja, ‘dukkhaṃ hatthapādacchedana’’’nti? ‘‘Āma, bhante, jāneyyu’’nti. ‘‘Kathaṃ jāneyyu’’nti? ‘‘Aññesaṃ, bhante, chinnahatthapādānaṃ paridevitasaddaṃ sutvā jānanti ‘dukkhaṃ hatthapādacchedana’’’nti . ‘‘Evameva kho, mahārāja, yesaṃ diṭṭhaṃ nibbānaṃ, tesaṃ saddaṃ sutvā jānāti ‘sukhaṃ nibbāna’’’nti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
නිබ්‌බානසුඛජානනපඤ්‌හො දසමො.
Nibbānasukhajānanapañho dasamo.
නිබ්‌බානවග්‌ගො චතුත්‌ථො.
Nibbānavaggo catuttho.
ඉමස්‌මිං වග්‌ගෙ දස පඤ්‌හා.
Imasmiṃ vagge dasa pañhā.
