| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. නිබ්‌බානසුත්‌තං
9. Nibbānasuttaṃ
179. අථ ඛො ආයස්‌මා ආනන්‌දො යෙනායස්‌මා සාරිපුත්‌තො තෙනුපසඞ්‌කමි; උපසඞ්‌කමිත්‌වා ආයස්‌මතා සාරිපුත්‌තෙන සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා ආනන්‌දො ආයස්‌මන්‌තං සාරිපුත්‌තං එතදවොච – ‘‘කො නු ඛො, ආවුසො සාරිපුත්‌ත, හෙතු කො පච්‌චයො, යෙන මිධෙකච්‌චෙ සත්‌තා දිට්‌ඨෙව ධම්‌මෙ න පරිනිබ්‌බායන්‌තී’’ති?
179. Atha kho āyasmā ānando yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā ānando āyasmantaṃ sāriputtaṃ etadavoca – ‘‘ko nu kho, āvuso sāriputta, hetu ko paccayo, yena midhekacce sattā diṭṭheva dhamme na parinibbāyantī’’ti?
‘‘ඉධාවුසො ආනන්‌ද, සත්‌තා ඉමා හානභාගියා සඤ්‌ඤාති යථාභූතං නප්‌පජානන්‌ති, ඉමා ඨිතිභාගියා සඤ්‌ඤාති යථාභූතං නප්‌පජානන්‌ති, ඉමා විසෙසභාගියා සඤ්‌ඤාති යථාභූතං නප්‌පජානන්‌ති, ඉමා නිබ්‌බෙධභාගියා සඤ්‌ඤාති යථාභූතං නප්‌පජානන්‌ති. අයං ඛො, ආවුසො ආනන්‌ද, හෙතු අයං පච්‌චයො, යෙන මිධෙකච්‌චෙ සත්‌තා දිට්‌ඨෙව ධම්‌මෙ න පරිනිබ්‌බායන්‌තී’’ති.
‘‘Idhāvuso ānanda, sattā imā hānabhāgiyā saññāti yathābhūtaṃ nappajānanti, imā ṭhitibhāgiyā saññāti yathābhūtaṃ nappajānanti, imā visesabhāgiyā saññāti yathābhūtaṃ nappajānanti, imā nibbedhabhāgiyā saññāti yathābhūtaṃ nappajānanti. Ayaṃ kho, āvuso ānanda, hetu ayaṃ paccayo, yena midhekacce sattā diṭṭheva dhamme na parinibbāyantī’’ti.
‘‘කො පනාවුසො සාරිපුත්‌ත, හෙතු කො පච්‌චයො, යෙන මිධෙකච්‌චෙ සත්‌තා දිට්‌ඨෙව ධම්‌මෙ පරිනිබ්‌බායන්‌තී’’ති? ‘‘ඉධාවුසො ආනන්‌ද, සත්‌තා ඉමා හානභාගියා සඤ්‌ඤාති යථාභූතං පජානන්‌ති, ඉමා ඨිතිභාගියා සඤ්‌ඤාති යථාභූතං පජානන්‌ති, ඉමා විසෙසභාගියා සඤ්‌ඤාති යථාභූතං පජානන්‌ති, ඉමා නිබ්‌බෙධභාගියා සඤ්‌ඤාති යථාභූතං පජානන්‌ති. අයං ඛො, ආවුසො ආනන්‌ද, හෙතු අයං පච්‌චයො, යෙන මිධෙකච්‌චෙ සත්‌තා දිට්‌ඨෙව ධම්‌මෙ පරිනිබ්‌බායන්‌තී’’ති. නවමං.
‘‘Ko panāvuso sāriputta, hetu ko paccayo, yena midhekacce sattā diṭṭheva dhamme parinibbāyantī’’ti? ‘‘Idhāvuso ānanda, sattā imā hānabhāgiyā saññāti yathābhūtaṃ pajānanti, imā ṭhitibhāgiyā saññāti yathābhūtaṃ pajānanti, imā visesabhāgiyā saññāti yathābhūtaṃ pajānanti, imā nibbedhabhāgiyā saññāti yathābhūtaṃ pajānanti. Ayaṃ kho, āvuso ānanda, hetu ayaṃ paccayo, yena midhekacce sattā diṭṭheva dhamme parinibbāyantī’’ti. Navamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 9. නිබ්‌බානසුත්‌තවණ්‌ණනා • 9. Nibbānasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 9. නිබ්‌බානසුත්‌තවණ්‌ණනා • 9. Nibbānasuttavaṇṇanā
