| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9. நிப்³பா³னஸுத்தவண்ணனா
9. Nibbānasuttavaṇṇanā
179. நவமே அபி⁴த⁴ம்மே வுத்தனயேனாதி –
179. Navame abhidhamme vuttanayenāti –
‘‘கதமா ஹானபா⁴கி³னீ பஞ்ஞா? பட²மஸ்ஸ ஜா²னஸ்ஸ லாபி⁴ங் காமஸஹக³தா ஸஞ்ஞாமனஸிகாரா ஸமுதா³சரந்தி ஹானபா⁴கி³னீ பஞ்ஞா, தத³னுத⁴ம்மதா ஸதி ஸந்திட்ட²தி டி²திபா⁴கி³னீ பஞ்ஞா. அவிதக்கஸஹக³தா ஸஞ்ஞாமனஸிகாரா ஸமுதா³சரந்தி விஸேஸபா⁴கி³னீ பஞ்ஞா. நிப்³பி³தா³ஸஹக³தா ஸஞ்ஞாமனஸிகாரா ஸமுதா³சரந்தி விராகூ³பஸஞ்ஹிதா நிப்³பே³த⁴பா⁴கி³னீ பஞ்ஞா’’தி (விப⁴॰ 799) –
‘‘Katamā hānabhāginī paññā? Paṭhamassa jhānassa lābhiṃ kāmasahagatā saññāmanasikārā samudācaranti hānabhāginī paññā, tadanudhammatā sati santiṭṭhati ṭhitibhāginī paññā. Avitakkasahagatā saññāmanasikārā samudācaranti visesabhāginī paññā. Nibbidāsahagatā saññāmanasikārā samudācaranti virāgūpasañhitā nibbedhabhāginī paññā’’ti (vibha. 799) –
ஆதி³னா விப⁴ங்கே³ வுத்தனயேன ஏவமத்தோ² வேதி³தப்³போ³.
Ādinā vibhaṅge vuttanayena evamattho veditabbo.
தத்த² பட²மஸ்ஸ ஜா²னஸ்ஸ லாபி⁴ந்தி ய்வாயங் அப்பகு³ணஸ்ஸ பட²மஸ்ஸ ஜா²னஸ்ஸ லாபீ⁴, தங். காமஸஹக³தா ஸஞ்ஞாமனஸிகாரா ஸமுதா³சரந்தீதி ததோ வுட்டி²தங் ஆரம்மணவஸேன காமஸஹக³தா ஹுத்வா ஸஞ்ஞாமனஸிகாரா ஸமுதா³சரந்தி துத³ந்தி சோதெ³ந்தி. தஸ்ஸ காமானுபக்க²ந்தா³னங் ஸஞ்ஞாமனஸிகாரானங் வஸேன ஸா பட²மஜ்ஜா²னபஞ்ஞா ஹாயதி பரிஹாயதி, தஸ்மா ‘‘ஹானபா⁴கி³னீ பஞ்ஞா’’தி வுத்தா. தத³னுத⁴ம்மதாதி தத³னுரூபஸபா⁴வா. ஸதி ஸந்திட்ட²தீதி இத³ங் மிச்சா²ஸதிங் ஸந்தா⁴ய வுத்தங், ந ஸம்மாஸதிங். யஸ்ஸ ஹி பட²மஜ்ஜா²னானுரூபஸபா⁴வா பட²மஜ்ஜா²னங் ஸந்ததோ பணீததோ தி³ஸ்வா அஸ்ஸாத³யமானா அபி⁴னந்த³மானா நிகந்தி உப்பஜ்ஜதி, தஸ்ஸ நிகந்திவஸேன பட²மஜ்ஜா²னபஞ்ஞா நேவ ஹாயதி ந வட்³ட⁴தி, டி²திகொட்டா²ஸிகா ஹோதி. தேன வுத்தங் ‘‘டி²திபா⁴கி³னீ பஞ்ஞா’’தி. அவிதக்கஸஹக³தாதி அவிதக்கங் து³தியஜ்ஜா²னங் ஸந்ததோ பணீததோ மனஸிகரோதோ ஆரம்மணவஸேன அவிதக்கஸஹக³தா ஸஞ்ஞாமனஸிகாரா. ஸமுதா³சரந்தீதி பகு³ணதோ பட²மஜ்ஜா²னதோ வுட்டி²தங் து³தியஜ்ஜா²னாதி⁴க³மத்தா²ய துத³ந்தி சோதெ³ந்தி, தஸ்ஸ உபரி து³தியஜ்ஜா²னானுபக்க²ந்தா³னங் ஸஞ்ஞாமனஸிகாரானங் வஸேன ஸா பட²மஜ்ஜா²னபஞ்ஞா விஸேஸபூ⁴தஸ்ஸ து³தியஜ்ஜா²னஸ்ஸ உப்பத்திபத³ட்டா²னதாய ‘‘விஸேஸபா⁴கி³னீ’’தி வுத்தா.
Tattha paṭhamassa jhānassa lābhinti yvāyaṃ appaguṇassa paṭhamassa jhānassa lābhī, taṃ. Kāmasahagatāsaññāmanasikārā samudācarantīti tato vuṭṭhitaṃ ārammaṇavasena kāmasahagatā hutvā saññāmanasikārā samudācaranti tudanti codenti. Tassa kāmānupakkhandānaṃ saññāmanasikārānaṃ vasena sā paṭhamajjhānapaññā hāyati parihāyati, tasmā ‘‘hānabhāginī paññā’’ti vuttā. Tadanudhammatāti tadanurūpasabhāvā. Sati santiṭṭhatīti idaṃ micchāsatiṃ sandhāya vuttaṃ, na sammāsatiṃ. Yassa hi paṭhamajjhānānurūpasabhāvā paṭhamajjhānaṃ santato paṇītato disvā assādayamānā abhinandamānā nikanti uppajjati, tassa nikantivasena paṭhamajjhānapaññā neva hāyati na vaḍḍhati, ṭhitikoṭṭhāsikā hoti. Tena vuttaṃ ‘‘ṭhitibhāginī paññā’’ti. Avitakkasahagatāti avitakkaṃ dutiyajjhānaṃ santato paṇītato manasikaroto ārammaṇavasena avitakkasahagatā saññāmanasikārā. Samudācarantīti paguṇato paṭhamajjhānato vuṭṭhitaṃ dutiyajjhānādhigamatthāya tudanti codenti, tassa upari dutiyajjhānānupakkhandānaṃ saññāmanasikārānaṃ vasena sā paṭhamajjhānapaññā visesabhūtassa dutiyajjhānassa uppattipadaṭṭhānatāya ‘‘visesabhāginī’’ti vuttā.
நிப்³பி³தா³ஸஹக³தாதி தங்யேவ பட²மஜ்ஜா²னலாபி⁴ங் ஜா²னதோ வுட்டி²தங் நிப்³பி³தா³ஸங்கா²தேன விபஸ்ஸனாஞாணேன ஸஹக³தா. விபஸ்ஸனாஞாணஞ்ஹி ஜா²னங்க³பே⁴தே³ வத்தந்தே நிப்³பி³ந்த³தி உக்கண்ட²தி, தஸ்மா ‘‘நிப்³பி³தா³’’தி வுச்சதி. ஸமுதா³சரந்தீதி நிப்³பா³னஸச்சி²கிரியத்தா²ய துத³ந்தி சோதெ³ந்தி. விராகூ³பஸஞ்ஹிதாதி விராக³ஸங்கா²தேன நிப்³பா³னேன உபஸங்ஹிதா. விபஸ்ஸனாஞாணஞ்ஹி ஸக்கா இமினா மக்³கே³ன விராக³ங் நிப்³பா³னங் ஸச்சி²காதுந்தி பவத்திதோ ‘‘விராகூ³பஸங்ஹித’’ந்தி வுச்சதி. தங்ஸம்பயுத்தஸஞ்ஞாமனஸிகாராபி விராகூ³பஸங்ஹிதா ஏவ நாம. தஸ்ஸ தேஸங் ஸஞ்ஞாமனஸிகாரானங் வஸேன ஸா பட²மஜ்ஜா²னபஞ்ஞா அரியமக்³க³ப்படிவேத⁴ஸ்ஸ பத³ட்டா²னதாய ‘‘நிப்³பே³த⁴பா⁴கி³னீ’’தி வுத்தாதி.
Nibbidāsahagatāti taṃyeva paṭhamajjhānalābhiṃ jhānato vuṭṭhitaṃ nibbidāsaṅkhātena vipassanāñāṇena sahagatā. Vipassanāñāṇañhi jhānaṅgabhede vattante nibbindati ukkaṇṭhati, tasmā ‘‘nibbidā’’ti vuccati. Samudācarantīti nibbānasacchikiriyatthāya tudanti codenti. Virāgūpasañhitāti virāgasaṅkhātena nibbānena upasaṃhitā. Vipassanāñāṇañhi sakkā iminā maggena virāgaṃ nibbānaṃ sacchikātunti pavattito ‘‘virāgūpasaṃhita’’nti vuccati. Taṃsampayuttasaññāmanasikārāpi virāgūpasaṃhitā eva nāma. Tassa tesaṃ saññāmanasikārānaṃ vasena sā paṭhamajjhānapaññā ariyamaggappaṭivedhassa padaṭṭhānatāya ‘‘nibbedhabhāginī’’ti vuttāti.
நிப்³பா³னஸுத்தவண்ணனா நிட்டி²தா.
Nibbānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. நிப்³பா³னஸுத்தங் • 9. Nibbānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. நிப்³பா³னஸுத்தவண்ணனா • 9. Nibbānasuttavaṇṇanā
